“Montré ki zot inn paré, parski c’est dan enn l’heure ki zot pa attann, ki Fils de l’homme pé vini.”​—MAT. 24:44.

1, 2. (a) Ki bann l’evenement ki la Bible annoncé nou kapav compare ar l’attak enn tigre? (b) Ki nou bizin faire pou survive kan Christ pou vinn detruire seki resté dan le monde Satan?

 PENDANT plusieurs l’année, enn missié ki ti bien renommé, ki ti dresse bann tigre Bengale, ti faire bann spectak devant bann la foule, sans ki li gagne okenn probleme. Li ti dire: “Kan enn zanimo donne ou so confiance, ou ena l’impression ki ou finn gagne pli joli don ki existé dan le monde.” Mais le 3 octobre 2003, sa confiance-la ti’nn disparette. Pou enn raison ki nou pa koné, enn parmi so bann zanimo, enn tigre blanc ki pese 172 kilo, ti attak li. Sa missié-la pa ti attann ditou ki sa tigre-la pou attak li, ek li pa ti’nn prepare-li pou sa.

² Li bon nou remarké ki la Bible annonce l’attak enn “bête sauvage,” ek nou bizin montré ki nou’nn paré pou sa. (Lire Révélation 17:15-18.) Kisannla sa bête sauvage-la pou attaké? Enn coute sans attann, situation pou changé net ek le monde Satan pou divisé kont li-mem. Sa bête sauvage couleur rouge vif-la represente l’Organisation Nations unies, ek sa “dix corne[-la]” represente tou bann gouvernement politik. Zot pou attak Babylone la Grande, ki couma enn prostitué, ek ki represente l’empire mondial fausse religion, ek pou detruire li avek violence. Kan sa l’evenement-la pou arrivé? Nou pa konn ni jour ni l’heure. (Mat. 24:36) Mais seki nou koné, c’est ki sa pou arrivé enn l’heure ki nou pa pou attann ek ki pa reste beaucoup le temps avant sa l’attak-la. (Mat. 24:44; 1 Cor. 7:29) Alors, li bien important ki nou montré ki nou’nn paré lor plan spirituel, pou ki, kan sa l’attak-la arrivé ek kan Christ vini pou detruire bann l’ennemi Bondié, li pou aussi vini pou delivré nou! (Luc 21:28) Pou nou pré kan sa bann l’evenement-la pou arrivé, nou kapav aprann ar l’exemple bann serviteur Bondié ki ti fidele. Zot ti montré ki zot ti’nn paré lor plan spirituel ek coumsa zot ti temoin realisation bann promesse Bondié. Eski nou considere l’exemple sa bann serviteur Bondié-la couma enn kitsoz serieux?

Montré ki zot inn paré​—pareil couma Noé

3. Kifer li ti difficile pou Noé servi Bondié avek fidelité?

³ Malgré bann condition ki ti bouleverse li, ki ti ena lor la terre dan so lepok, Noé ti montré ki li ti’nn paré pou trouve realisation promesse Bondié. Mazinn bann difficulté ki Noé ti gagné kan bann ange rebelle ti prend enn lekor humain pou gagne bann relation kont nature avek bann joli femme lor la terre! Sa bann femme-la ti gagne bann zenfant ki ti vinn bann geant, “bann zom fort” ki ti servi zot la force pou faire dominere ar bann dimoune. (Gen. 6:4) Mazinn violence ki ti ena lerla kan sa bann geant-la ti faire bann grand degat partout kot zot ti passé. A cause sa, ti ena mechanceté partout ek fason pensée ek conduite bann dimoune ti’nn vinn bien mauvais. Lerla, Souverain Seigneur Jéhovah ti fixé enn le temps pou Li detruire sa bann mauvais dimoune-la.​—Lire Genèse 6:3, 5, 11, 12. a

4, 5. Couma bann condition dan nou lepok pareil couma dan lepok Noé?

⁴ Jésus ti annoncé ki bann condition dan nou lepok pou pareil couma dan lepok Noé. (Mat. 24:37) Par exemple, nou aussi nou trouve fason ki bann mauvais l’esprit pé agir dan nou lepok. (Rév. 12:7-9, 12) Dan lepok Noé, sa bann ange ki ti vinn bann demon-la ti prend enn lekor  humain. Mem si dan nou lepok zot nepli gagne droit prend enn lekor humain, zot faire tou seki zot kapav pou controle bann jeune ek bann agé. Sans ki bann dimoune koné, sa bann ange ki obsedé par sexe-la prend beaucoup plaisir pou trouve bann dimoune ki zot inn reussi influencé lor la terre, faire le mal ek commette bann action immoral.​—Éph. 6:11, 12.

⁵ Parole Bondié decrire Satan le Diable couma “enn criminel” ek dire ki li ena “pouvoir pou faire dimoune mort.” (Jean 8:44; Héb. 2:14) So pouvoir li limité. Bondié pa permette li pou touye n’importe ki dimoune ki li envie. Selman, sa mauvais l’esprit-la kapav pousse bann dimoune pou faire bann kitsoz ki faire zot souffert ek mort. Li aussi mette dan zot l’esprit ek dan zot leker enn la haine ek enn tendance pou touyé. Par exemple, en Amérique, 1 zenfant lor 142 ki né, pou perdi so la vie dan enn crime. Avek sa qualité violence ki ena partout lor la terre sans okenn raison-la, eski ou pensé ki Jéhovah pou prend sa situation-la moins compte ki dan lepok Noé? Eski Li pa pou faire nanyin?

6, 7. Couma Noé ek so famille ti montré zot la foi ek zot la crainte pou Bondié?

⁶ Kan ler ti arrivé, Bondié ti faire Noé konn so decision pou amenn enn deluge ki ti pou detruire tou la vie lor la terre. (Gen. 6:13, 17) Jéhovah ti donne Noé l’ordre pou construire enn l’arche ki ti pareil couma enn grand caisse. Noé ek so famille ti commence travail. Ki ti aide zot pou obeir ek pou montré ki zot ti’nn paré kan jugement Bondié ti vini?

⁷ Enn grand la foi ek la crainte pou Bondié ti pousse Noé ek so famille pou faire dapré tou seki Bondié ti donne zot l’ordre pou faire. (Gen. 6:22; Héb. 11:7) En tant ki chef so famille, Noé ti reste lor so garde lor plan spirituel ek pa ti laisse bann mauvais pratik ki ti ena dan so lepok contamine li. (Gen. 6:9) Li ti koné ki bann membre so famille ti bizin faire attention pou pa imite conduite violent ek mauvais l’attitude bann dimoune ki ti entoure zot. Li ti important ki zot pa laisse-zot absorbé par bann l’occupation ki zot ti ena pou faire dan la vie toulé-jour. Bondié ti donne zot enn travail pou zot faire, ek li ti bien important ki tou bann membre la famille donne sa travail-la priorité dan zot la vie.​—Lire Genèse 6:14, 18.

Noé ek so famille ti montré ki zot ti’nn paré

8. Couma nou koné ki bann membre famille Noé ti montré zot l’attachement pou Bondié?

⁸ Li vrai ki la Bible koz surtout lor Noé, ki ti chef so famille, mais femme Noé, so bann garson ek zot femme, zot aussi zot ti adore Jéhovah. Prophete Ézékiel ti confirme sa. Li ti dire ki si Noé ti vive dan so lepok, c’est pa a cause so justice ki so bann zenfant ti pou gagne la vie sauve. Zot ti assez grand pou choisir si zot ti pou obeir ou-soit desobeir. Alors, personnellement zot ti montré ki zot ti content Bondié ek so bann la loi. (Ézék. 14:19, 20) Famille Noé ti accepté bann instruction ki Noé ti donne zot. Zot ti ena mem la foi ki li, ek zot pa ti laisse l’influence bann dimoune empeche zot pou faire travail Bondié.

9. Kisannla zordi pé imite la foi Noé?

⁹ Li bien encourageant zordi pou trouvé ki dan la famille mondial nou bann frere ek soeur, ena bann chef famille ki pé faire tou seki zot kapav pou imite Noé! Sa bann chef famille-la reconette ki li pa assez ki zot zis donne zot  famille mangé, linge, enn lakaz ek l’education. Zot bizin aussi prend soin zot famille lor plan spirituel. Kan zot faire sa, zot montré ki zot inn paré pou seki Jéhovah pou faire bientot.

10, 11. (a) Kan zot ti dan l’arche, ki Noé ek so famille ti surement ressenti? (b) Ki question li bon nou pose nou-mem?

¹⁰ Li possible ki Noé, so femme, so bann garson ek zot femme ti construire l’arche pendant apepré 50 an. Pendant ki zot ti pé construire l’arche, kitfois plus ki cent fois zot ti rentré ek sorti ladan. Zot ti passe goudron partout lor l’arche pou empeche de l’eau rentré, zot ti ramasse mangé ek mette bann zanimo dan l’arche. Mazinn sa scene-la. Finalement, grand jour-la ti vini. Dan 17^eme jour, deuxieme mois, l’an 2370 avant nou lepok, zot ti rente dan l’arche. Jéhovah ti ferme la porte l’arche, ek la pluie ti commence tombé, pa enn ti la pluie ordinaire. Sa la pluie-la ti coumadir enn l’ocean ki ti sorti dan le ciel, ti tombe lor la terre. (Gen. 7:11, 16) Bann dimoune ki ti en dehors l’arche ti mort alors ki bann ki ti endan, ti gagne la vie sauve. Ki Noé ek so famille ti surement ressenti? Surement enn grand reconnaissance envers Bondié. Mais pena doute aussi ki zot ti ena sa pensée-la: ‘Heureusement ki nou finn marche avek vrai Bondié ek ki nou finn montré-nou pré!’ (Gen. 6:9) Eski ou kapav faire vision ki ou’nn traverse Har–Maguédôn, ek ou aussi ou leker rempli ar mem reconnaissance?

¹¹ Nanyin pa kapav empeche Bondié Tout-Puissant pou realise so promesse pou detruire sa le monde Satan-la. Demann ou-mem: ‘Eski mo ena enn l’assurance total ki okenn promesse Bondié pa pou manké pou realisé mem dan pli tipti detail ek ki zot tou pou realisé dan ler ki Bondié inn fixé?’ Si oui, montré ki ou finn paré kan ou garde dan ou l’esprit sa “jour Jéhovah” ki pé vinn bien vite-la.​—2 Pierre 3:12.

Moïse ti reste lor so garde

12. Ki kitsoz ti kapav empeche Moïse ena enn bon vision spirituel?

¹² Anou prend enn lot l’exemple, l’exemple Moïse. Si nou considere situation Moïse dan enn fason humain, li ti parette ena enn position extraordinaire ki ti kapav faire li gagne bann grand l’avantage dan le monde égyptien. Tifi Pharaon ti adopté li, alors, surement bann dimoune ti bien respecté li ek li ti kapav profite pli bon mangé ek linge ki ti ena, ek li ti vive dan enn l’environnement bien luxe. Li ti gagne enn grand l’education. (Lire Actes 7:20-22.) Kitfois, li ti kapav gagne enn grand l’heritage.

13. Couma Moïse ti garde so l’esprit fixé lor bann promesse Bondié?

¹³ Li parette ki formation ki Moïse ti gagné ar so bann parent kan li ti tipti, ti permette li pou comprend ki l’adoration bann zidole, ki bann Égyptien ti pé pratiké, ti enn kitsoz bien bete. (Ex. 32:8) Systeme l’education bann Égyptien ek tou bann joli kitsoz materiel ki ti ena dan palais royal pa ti faire Moïse abandonne vrai l’adoration. Surement li ti reflechi beaucoup lor bann promesse ki Bondié ti faire ar so bann ancetre ek li ti ena enn grand desir pou montré ki li  ti pré pou faire volonté Bondié. Apré tou, Moïse ti dire bann Israélite: “Jéhovah . . . Bondié Abraham, Bondié Isaac ek Bondié Jacob, finn envoye moi vers zot.”​—Lire Exode 3:15-17.

14. Couma la foi ek courage Moïse ti testé?

¹⁴ Pou Moïse, Jéhovah, vrai Bondié, ti réel. Li pa ti couma tou sa bann zidole ki ti represente bann bondié égyptien ki pa ti ena la vie-la. Moïse ti vive dan enn fason coumadir li ti kapav trouve “sa Kikenn ki invisible-la.” Li ti ena la foi ki Bondié ti pou delivré So peuple, mais li pa ti koné kan sa ti pou arrivé. (Héb. 11:24, 25, 27) Li ti ena enn grand desir ki bann hébreu liberé ek li ti montré sa kan li ti defann enn esclave Israélite ki ti pé gagne batté. (Ex. 2:11, 12) Selman, pa ti encore arrive ler pou Jéhovah agir, alors Moïse ti bizin sauvé ek al reste dan enn pays bien loin. Pena doute ki li ti difficile pou li pou quitte enn l’endroit confortable couma la cour royal en Égypte, pou al reste dan desert. Kan-mem, Moïse ti montré ki li ti’nn paré kan li ti prend compte chaque instruction ki Jéhovah ti donne li. Pou sa raison-la, Bondié ti kapav servi li pou soulage so bann frere apré ki li ti passe 40 an dan Madiân. Kan Bondié ti donne li l’ordre, Moïse ti obeir ek li ti retourne l’Égypte. Ler ti’nn arrivé pou ki Moïse accompli enn mission ek li ti bizin faire travail Bondié dan fason ki Bondié ti envie. (Ex. 3:2, 7, 8, 10) Kan li ti retourne dan l’Égypte, Moïse, ki “ti beaucoup pli humble ki tou bann dimoune,” ti bizin la foi ek courage pou al devant Pharaon. (Nomb. 12:3) Li ti faire sa, pa zis enn sel fois, mais plusieurs fois, a mesure ki bann plaie ti arrivé enn apré lot. Apré chaque plaie, li pa ti koné comié fois encore li ti pou bizin al devant Pharaon.

15. Malgré bann decouragement, ki ti pousse Moïse pou veille bann l’occasion pou honore so Papa ki dan le ciel?

¹⁵ Pendant prochain 40 an, depuis 1513 avant nou lepok ziska 1473 avant nou lepok, kan bann Israélite ti dan desert, Moïse ti faire face ar bann situation ki ti faire li deçu. Pourtant, li ti veille bann l’occasion pou honore Jéhovah, ek avek tou so leker li ti encourage so bann frere Israélite pou faire pareil. (Deut. 31:1-8) Kifer? Parski li ti content nom ek souveraineté Jéhovah plus ki so prop nom. (Ex. 32:10-13; Nomb. 14:11-16) Malgré bann situation ki faire nou deçu ou-soit faire nou decouragé, nou aussi nou bizin contigne soutenir domination Bondié. Nou bizin ena l’assurance ki fason ki Li faire bann kitsoz li pli sage, pli juste ek pli bon ki n’importe ki lezot fason faire. (Is. 55:8-11; Jér. 10:23) Eski ou ena sa l’assurance-la?

Contigne veillé!

16, 17. Kifer Marc 13:35-37 ena enn grand signification pou ou?

¹⁶ “Faire attention, contigné veillé, parski zot pa koné kan le temps fixé pou arrivé.” (Marc 13:33) Jésus ti donne sa l’avertissement-la kan li ti koz lor signe concernant conclusion sa mauvais systeme-la. Guette seki Marc ti ecrire lor bann dernier parole sa grand prophetie ki Jésus ti annoncé-la: “Contigne veillé, parski zot pa koné kan maitre lakaz-la pé vini, si li pé vinn tard dan la journée, ou-soit minuit, ou-soit kan coq chanté, ou-soit boner gramatin; pou ki, kan enn coute li arrivé, li pa trouve zot pé dormi. Mais seki mo dire zot, mo dire sa ar tou dimoune: Contigne veillé.”​—Marc 13:35-37.

¹⁷ Conseil ki Jésus ti donné, faire nou reflechi. Dan le passé, bann dimoune ti divise la nuit en quatre partie. Pou enn dimoune ki ti bizin veillé, dernier partie la nuit ti pou pli difficile, parski li ti commencé depuis trois heure  du matin ziska soleil levé. Dapré bann chef l’armée, c’est sa partie la nuit-la ki pli bon moment pou attak bann l’ennemi, parski ena plus chance ki zot pé “dormi.” Li pareil zordi aussi, alors ki bann dimoune en general zot dan enn profond sommeil lor plan spirituel, nou kapav trouve sa pli difficile pou contigne veillé. Eski nou encore pé douté ki nou bizin “faire attention,” ek ‘contigne veille’ la fin ek delivrance ki la Bible finn annoncé?

18. En tant ki Témoins de Jéhovah, ki grand privilege nou ena?

¹⁸ Sa missié ki nou ti mentionné dan commencement sa lartik-la, ti reussi sapé kan sa tigre Bengale-la ti attak li. Mais, fausse religion ek le reste sa mauvais systeme-la pa pou sapé kan la fin pou vini, exactement couma prophetie la Bible finn annoncé. (Rév. 18:4-8) Nou souhaité ki tou bann serviteur Bondié, jeune ek agé, pou reflechi lor l’importance pou faire tou seki zot kapav pou montré ki zot inn paré pou jour Jéhovah, pareil couma Noé ek so famille. Nou pé vive dan enn le monde ki pé deshonore Bondié, kot bann enseignant fausse religion, mais aussi bann ki ena doute ki Bondié existé ek bann athée, pé bouffonne nou Createur ar zot discours. Mais nou pa kapav prend risk ki zot contamine nou. Anou considere bann l’exemple ki nou finn examiné couma enn kitsoz bien serieux ek veille lor bann l’occasion pou defann ek pou honore Jéhovah, pli grand Bondié, oui, “Bondié ki grand, fort ek ki faire nou ena la crainte.”​—Deut. 10:17.

[Note]

Eski ou rappel?

• Kifer Noé ti bizin donne priorité besoin spirituel so famille?

• Couma nou lepok bien ressemblé lepok Noé?

• Malgré bann decouragement, kifer Moïse ti garde so lizié fixé lor bann promesse Jéhovah?

• Ki bann prophetie la Bible ki aide ou pou contigne veillé lor plan spirituel?

[Questions d’étude]

[Zimage page 25]

Noé ek so famille ti donne travail Jéhovah priorité dan zot la vie

[Zimage page 26]

Moïse ti sur ki bann promesse Bondié ti pou realisé ek sa ti aide li pou contigne veillé