“Pou tou kitsoz mo ena courage grace a celui ki donne moi la force.”—PHIL. 4:13.

1. Kifer bann serviteur Jéhovah gagne beaucoup l’epreuve?

 BANN serviteur Jéhovah souvent inn gagne bann l’epreuve dan different fason. Nou gagne certain l’epreuve a cause nou prop l’imperfection ou-soit a cause sa systeme dan ki nou pé vive-la. Ena lezot l’epreuve ki nou gagné parski nou bizin supporte la haine ki bann dimoune ki pa servi Bondié ena pou bann ki servi Li. (Gen. 3:15) Boner dan l’histoire l’humanité, Bondié ti aide so bann serviteur fidele pou faire face ar persecution ki zot gagné a cause zot religion, pou resisté kont pression zot bann camarade, ek pou endure toute sorte qualité lezot l’epreuve. So l’esprit saint kapav donne nou la force pou faire pareil.

 Persecution a cause religion

2. Ki l’objectif persecution ki bann dimoune gagné a cause zot religion, ek ki different forme sa kapav prend?

² Persecution a cause religion c’est kan bann dimoune gagne bann mauvais traitement lor plan physik ou-soit moral par expré, a cause zot la foi ou-soit zot bann croyance. So l’objectif c’est pou arrete sa bann croyance-la, pou empeche zot fané, ou-soit pou faire bann croyant vinn infidele. Persecution kapav prend plusieurs forme, certain zot direct, certain indirect. La Bible compare bann l’attak Satan ar l’attak enn jeune lion ek enn cobra.—Lire Psaume 91:13.

3. Couma nou kapav decrire persecution ki pareil ar l’attak (a) enn lion? (b) enn cobra?

³ Pareil couma enn lion feroce, souvent Satan attak so bann victime dan enn fason direct, kan li servi la violence, li faire bann dimoune al dan prison, ou-soit par l’interdiction. (Ps. 94:20) L’Annuaire bann Témoins de Jéhovah ki koz lor zot l’activité dan lepok moderne, mentionne plusieurs sa bann tactik-la. Bann la foule en colere, certain dirigé par bann pretre ou-soit bann fanatik politik finn maltraite bann serviteur Bondié dan beaucoup l’endroit. Sa bann l’attak ki pareil couma l’attak enn lion-la finn faire certain arrete servi Jéhovah. Pareil couma enn cobra, Satan le Diable attak aussi bann dimoune dan enn fason sournois pou empoisonne zot l’esprit ek embete zot pou faire seki li envie. L’objectif sa qualité l’attak-la c’est pou affaibli ou-soit pou faire nou agir kont nou la foi. Mais grace a l’esprit saint, nou kapav resisté kont toulé-deux forme persecution.

4, 5. Ki pli bon fason nou kapav prepare-nou pou persecution, ek kifer? Donne enn l’exemple.

⁴ Si nou mazinn different maniere couma nou kapav gagne persecution dan l’avenir, c’est pa pli bon fason pou prepare-nou pou sa. Kifer? Parski en realité, nou pa kapav koné ki qualité persecution nou pou gagné. Alors, li pa vaut la peine ki nou tracassé concernant bann situation ki kitfois jamais pou arrivé. Mais selman, ena enn kitsoz ki nou kapav faire. La plupart serviteur Jéhovah finn reussi endure bann persecution. Couma? Kan zot finn medite lor l’exemple fidelité bann serviteur Jéhovah ki mentionné dan la Bible, ek lor bann l’enseignement ek l’exemple Jésus. Sa finn permette zot augmente zot l’amour pou Jéhovah. En retour, sa l’amour-la ti aide zot pou resisté kont n’importe ki l’epreuve ki zot ti gagné.

⁵ Anou prend l’exemple deux soeur ki reste Malawi. Pou oblige-zot acheté carte bann partie politik, enn la foule violent ti batte zot, ti deshabille zot, ek ti menace pou viole zot. La foule-la ti koz menti ar zot ek ti dire zot ki mem bann Béthélite ti acheté sa bann carte-la. Ki bann soeur-la ti reponn? “Nou, nou servi zis Jéhovah. Alors, si bann frere dan Béthel finn acheté bann carte, sa pa change nanyin pou nou. Nou, nou pa pou desobeir, mem si zot touye nou!” Apré ki zot ti prend sa position ferme-la, zot bann l’ennemi ti laisse zot allé.

6, 7. Couma Jéhovah donne so bann serviteur la force pou faire face ar persecution?

⁶ L’apotre Paul ti remarké ki bann chretien dan la ville Thessalonique ti’nn accepté message la verité “dan beaucoup l’epreuve,” mais “avek la joie ki l’esprit saint donné.” (1 Thess. 1:6) Oui, beaucoup chretien, dan le passé ek dan nou lepok ki finn gagne persecution ek ki finn reussi surmonte sa, dire ki dan moment pli difficile pendant zot l’epreuve, zot ti ressenti enn la paix au fond zot-mem. Sa la paix-la forme partie dan fruit l’esprit saint Bondié. (Gal. 5:22) En retour, la paix ti protege zot leker ek zot capacité mental. Oui, Jéhovah servi so l’esprit saint pou donne la force so bann serviteur pou faire face ar bann l’epreuve ek pou agir avek sagesse kan zot gagne probleme. a

⁷ Bann dimoune ki observe bann serviteur Jéhovah, ti etonné kan zot ti remarké ki bannla ti bien decidé pou reste fidele malgré bann persecution violent. Sa bann Témoins-la ti parette coumadir rempli ar enn la force ki plus ki normal, ek vrai-mem zot ti ena sa la force-la. L’apotre Pierre donne nou sa l’assurance-la: “Si pé koz en mal lor zot a cause nom Christ, zot heureux, parski  l’esprit la gloire, oui l’esprit Bondié, pé repose lor zot.” (1 Pierre 4:14) Kan nou gagne persecution parski nou pé soutenir bann principe juste, alors, sa montré ki nou ena faveur Bondié. (Mat. 5:10-12; Jean 15:20) Oui, sa preuve ki nou ena benediction Jéhovah-la, donne nou beaucoup la joie!

Pression bann camarade

8. (a) Ki ti permette Josué ek Caleb pou resisté kont pression bann lezot Israélite? (b) Ki nou kapav aprann ar l’exemple Josué ek Caleb?

⁸ Ena enn lot fason indirect ki bann chretien gagne l’opposition. C’est kan zot bizin faire face ar pression negatif ki zot bann camarade mette lor zot. Selman, parski l’esprit saint Jéhovah beaucoup pli fort ki l’esprit le monde, nou kapav resisté kont bann dimoune ki bouffonne nou, ki fann bann fausseté lor nou, ou-soit ki rod force nou pou suive zot bann principe. Par exemple, ki ti aide Josué ek Caleb pou rejette l’opinion lezot dix espion ki ti al dan pays Canaan? L’esprit saint ti pousse zot pou ena enn lot “l’esprit,” setadir enn lot l’attitude mental.—Lire Nombres 13:30; 14:6-10, 24.

9. Kifer bann chretien bizin disposé pou montré ki zot different ar la plupart dimoune?

⁹ Li ti pareil aussi pou bann zapotre Jésus. L’esprit saint ti donne zot la force pou obeir Bondié plutot ki bann zom. Beaucoup parmi sa bann zom-la ti bien respecté ek zot ti consideré couma bann enseignant vrai religion. (Actes 4:21, 31; 5:29, 32) La plupart dimoune prefere coumadir suive la foule pou evite gagne probleme. Mais, souvent bann vrai chretien bizin prend position pou seki zot koné droite. Mais mem sa, grace a la force ki l’esprit saint Bondié donne zot, zot pa peur pou montré ki zot different. (2 Tim. 1:7) Anou examine enn domaine kot fodé pa nou cedé ar pression bann camarade.

10. Ki choix difficile kitfois certain chretien bizin faire?

¹⁰ Certain jeune kitfois bizin faire enn choix difficile si zot aprann ki enn camarade ena enn conduite ki pa en accord avek la Bible. Li possible ki zot pensé ki si zot demann bann ancien pou aide zot camarade, zot pou trahir confiance ki camarade-la ena en zot. Alors, zot refuse pou koz lor sa sujet-la parski zot ena enn fausse l’idée lor seki fidelité été. Enn kikenn ki’nn faire enn peché, kapav mem mette pression lor so bann camarade pou cachiette so peché. Bien sur, pa zis bann jeune ki gagne sa qualité probleme-la. Certain adulte aussi kitfois trouve sa difficile pou al guette bann ancien kan enn camarade ou-soit enn membre zot famille faire enn peché. Mais couma bann vrai chretien bizin reagir devant sa qualité pression-la?

11, 12. Si enn membre congregation suppliye ou pou cachiette so peché, ki pli bon reaction ou bizin ena, ek kifer?

¹¹ Mazinn sa situation-la: supposé ki Alex, enn jeune frere, aprann ki Steve, so camarade ki forme partie dan congregation, ena l’habitude pou guette pornographie. Alex dire Steve ki li bien tracassé ar seki li pé faire. Selman, Steve pa prend compte seki Alex dire li. Kan Alex encourage li pou al koz sa ar bann ancien, Steve dire Alex ki si zot toulé-deux zot bann vrai camarade, alors Alex pa pou rapporte li ar bann ancien. Eski Alex bizin peur pangar li perdi so camarade? Kitfois li demann li-mem kisannla bann ancien pou croire si Steve dire ki tousala fausse. Mais kan-mem,  situation Steve pa pou amelioré si Alex reste trankil. Oui, sa kapav amenn Steve pou perdi so bann bon relation avek Jéhovah. Li pou bon si Alex rappel ki “tremblé devant bann zom, sa-mem ki mette nou dan piege, mais enn dimoune ki mette so confiance en Jéhovah pou protegé.” (Prov. 29:25) Ki Alex kapav faire encore? Par amour, li kapav ré-al guette Steve ek koz franc lor so probleme. Sa pou demann li courage. Li possible ki sa fois-la, Steve pou content saisi sa l’occasion-la pou koz lor so probleme. Alex bizin encourage Steve encore enn fois pou al koz ar bann ancien ek dire li ki si li pa faire sa dan enn le temps raisonnable, alors c’est li, Alex, ki pou al guette zot.—Lév. 5:1.

¹² Si jamais enn jour ou dan enn situation coumsa, li possible ki au commencement, ou camarade pa pou apprecié zeffort ki ou pou faire pou aide li. Mais kitfois avek le temps, li kapav realisé ki ou pé agir dan so l’interet. Si sa dimoune ki pé prend enn mauvais chemin-la gagne l’aide ek accepté sa l’aide-la, kitfois li pou touletan ena reconnaissance pou ou courage ek ou fidelité. Parkont, si li contigne en colere ar ou parski ou finn demann bann ancien pou aide li, eski c’est vrai-mem sa qualité camarade-la ki ou envie ena? Enn kitsoz ki touletan pli bon pou nou faire, c’est faire plaisir Jéhovah, nou pli grand Camarade. Kan nou mette Li en premier, lezot ki content Li pou respecté nou parski nou fidele ek zot pou vinn nou bann vrai camarade. Fodé jamais nou laisse place pou Satan le Diable dan congregation. Si nou faire sa, nou pou vrai-mem faire l’esprit saint Jéhovah la peine. Mais, nou pou agir en accord avek sa l’esprit-la kan nou faire tou pou garde congregation pur.—Éph. 4:27, 30.

Toute sorte qualité l’epreuve

13. Ki qualité l’epreuve bann serviteur Jéhovah pé gagné, ek kifer sa bann kitsoz-la arrive souvent?

¹³ Bann l’epreuve kapav vinn dan beaucoup fason—enn gros probleme l’argent, nou perdi nou travail, enn catastrophe naturel, la mort enn kikenn ki nou content, enn maladie grave, ek lezot probleme encore. Nou pé vive dan “bann lepok critik,” alors nou bizin attann ki pa zordi pa demain, nou tou nou pou bizin faire face ar enn certain l’epreuve. (2 Tim. 3:1) Kan sa arrivé, li bien important ki nou pa paniké. L’esprit saint kapav donne nou la force pou endure n’importe ki l’epreuve.

14. Ki ti donne Job la force pou endure so bann l’epreuve?

¹⁴ Job ti gagne bann probleme enn derriere lot. Li ti perdi moyen ki ti permette li pou gagne so la vie, li ti perdi aussi so bann zenfant, so bann camarade, ek so la santé. So madame ti perdi confiance en Jéhovah. (Job 1:13-19; 2:7-9) Pourtant, Job ti gagne enn vrai consolation avek Élihou. Message Élihou ek seki ti pli important dan tou seki Jéhovah ti dire Job, ti: “Arreté, ek prend bien compte bann travail extraordinaire ki Bondié finn faire.” (Job 37:14) Ki ti aide Job pou endure so bann l’epreuve? Ek ki kapav aide nou pou endure nou bann l’epreuve? C’est kan nou rappel ek nou medite lor different fason ki l’esprit saint Jéhovah ek so pouvoir agir. (Job 38:1-41; 42:1, 2) Kitfois nou rappel bann moment dan nou prop la vie kot nou finn gagne preuve ki Bondié interessé ar nou personnellement. Li encore toujours interessé ar nou.

15. Ki ti donne Paul la force pou endure bann l’epreuve?

¹⁵ A cause so la foi, l’apotre Paul ti endure beaucoup l’epreuve ki ti menace so la  vie. (2 Cor. 11:23-28) Dan sa bann situation difficile-la, couma li ti garde so l’equilibre ek couma li ti reste stable lor plan affectif ? Li ti compte lor Jéhovah dan la priere. Pendant sa periode l’epreuve ki kitfois ti termine avek so la mort couma enn martyre-la, Paul ti ecrire: “Le Seigneur ti deboute pré ar moi ek ti faire moi vinn fort, pou ki par moi, kapav faire predication dan enn fason complet ek ki tou bann nation tann sa; ek li ti sap moi dan la gueule lion.” (2 Tim. 4:17) Alors, par so l’experience personnel, Paul ti kapav donne l’assurance bann chretien dan so lepok, ki fodé pa zot “tracassé pou okenn kitsoz.”—Lire Philippiens 4:6, 7, 13.

16, 17. Donne enn l’exemple couma Jéhovah pé donne la force so bann serviteur pou faire face ar bann l’epreuve zordi.

¹⁶ Enn pionnier ki appel Roxana inn trouvé couma Jéhovah donne so bann serviteur seki zot bizin. Kan li ti al demann so patron permission pou prend deux-trois jour congé pou assisté enn l’assemblée, patron-la ti en colere. Li ti dire Roxana ki si li al l’assemblée, li pou mette li dehors. Kan-mem sa, Roxana ti al l’assemblée, ek li ti prié avek tou so leker pou garde so travail. Apré sa, li ti senti-li calme. Kan li ti rente travail lundi apré l’assemblée, so patron ti vrai-mem mette li dehors. Roxana ti bien tracassé. Li ti bizin sa travail-la pou aide so famille, mem si li pa ti gagne beaucoup kass. Li ti prié Jéhovah encore, ek li ti reflechi ki Jéhovah finn donne li seki li bizin lor plan spirituel dan l’assemblée. Alors Jéhovah pou bien kapav aussi donne li seki li bizin lor plan physik. Pendant ki li ti pé marché pou al kot li, Roxana ti trouve enn l’affiche kot ti ecrire: “Bizin travailleur.” Enn compagnie ti pé rod bann dimoune ki ena l’experience pou travail lor bann machine a coudre industriel, ek Roxana ti faire enn application pou enn travail. Manager-la ti rann-li compte ki Roxana pa ti ena okenn l’experience mais kan-mem li ti donne li enn travail, ek so la paye ti preské deux fois plus ki seki li ti gagné avant. Roxana ti ena sentiment ki Jéhovah ti’nn reponn so bann la priere. Mais pli grand benediction ki li ti gagné c’est ki li ti kapav partage la bonne nouvelle avek plusieurs camarade travail. Cinq ladan, parmi ti ena manager-la, ti accepté la verité ek ti prend bapteme.

¹⁷ Parfois, li kapav parette ki Bondié pa reponn nou bann la priere—kitfois pa desuite ou-soit pa dan fason ki nou attann. Dan sa cas-la, surement ena enn bon raison pou sa. Jéhovah Li, Li koné pou ki raison, mais kitfois pou nou c’est zis dan l’avenir ki nou pou comprend sa raison-la. Mais enn kitsoz ki nou kapav sur—Bondié pa abandonne so bann serviteur ki fidele.—Héb. 6:10.

Bann l’epreuve ek bann tentation

18, 19. (a) Kifer nou kapav attann pou faire face ar bann l’epreuve ek bann tentation? (b) Couma nou kapav reussi faire face ar bann l’epreuve?

¹⁸ Bann serviteur Jéhovah pa etonné kan zot gagne bann tentation, decouragement, persecution ek kan zot gagne pression ar zot bann camarade. En general, le monde pa content nou. (Jean 15:17-19) Pourtant, l’esprit saint kapav aide nou pou surmonte n’importe ki difficulté ki nou kapav gagné dan nou service pou Bondié. Jéhovah pa pou laisse nou gagne enn tentation ki nou pa kapav supporté. (1 Cor. 10:13) Dan okenn fason, Li pa pou quitte nou, ni abandonne nou. (Héb. 13:5) Kan nou obeir so Parole ki Li’nn inspiré, sa protege nou ek fortifié nou. En plus, l’esprit Bondié kapav pousse nou bann frere ek soeur pou aide nou kan nou bien bizin sa l’aide-la.

¹⁹ Nou tou, anou contigne rod l’esprit saint par la priere ek l’etude la Bible. Anou contigne ‘vinn fort avek puissance la gloire Bondié pou ki nou kapav supporte tou ek pou ena patience avek la joie.’—Col. 1:11.

[Note]

Couma ou pou reponn?

• Couma ou kapav prepare-ou pou faire face ar persecution?

• Couma ou bizin agir si enn kikenn suppliye ou pou pa denonce so peché?

• Ki l’assurance ou kapav ena kan ou gagne n’importe ki l’epreuve?

[Questions d’étude]

[Zimage page 30]

Ki nou aprann ar l’exemple Josué ek Caleb?

[Zimage page 31]

Couma ou kapav aide enn camarade ki pé faire peché?