4^eme Secret

KI LA BIBLE ENSEIGNÉ? “Enn kikenn ki marche avek bann dimoune ki ena la sagesse pou gagne la sagesse.”—Proverbes 13:20.

KIFER LI DIFFICILE? Nou bann camarade kapav faire nou ressenti enn grand satisfaction ou-soit le contraire. Pena doute ki zot l’attitude ek zot conversation pou ena enn l’effet lor fason ki nou considere la vie.—1 Corinthiens 15:33.

Par exemple, anou guette enn recit dan la Bible ki koz lor 12 zom ki ti al espionne pays Canaan. Kan zot ti retourné, la plupart parmi zot “ti pé faire enn mauvais rapport lor sa pays ki zot ti’nn espionné-la, devant bann Israélite.” Malgré sa, deux parmi sa bann zom-la ti dire bann bon kitsoz lor Canaan; zot ti dire ki c’est “enn pays ki bien-bien bon.” Mais l’attitude negatif sa dix espion-la ti fané parmi le peuple. Sa recit-la dire ki “lerla l’assemblée en entier ti criyé,” “ek tou bann Israélite ti commence murmuré.”—Nombres 13:30–14:9.

Pareil azordi, beaucoup dimoune content ‘murmuré ek plaigne lor zot sort dan la vie.’ (Jude 16) Li difficile pou garde enn sentiment satisfaction si nou frequente bann camarade ki jamais pa satisfait.

KI OU KAPAV FAIRE? Examine bann conversation ki ou ena avek ou bann camarade. Eski ou bann camarade souvent faire vantard concernant bann kitsoz ki zot ena, ou-soit eski touletan zot plaigné concernant bann kitsoz ki zot pena? Ek ki qualité camarade ou été pou zot? Eski ou faire tou seki ou kapav pou faire ou bann camarade envié ou, ou-soit ou encourage zot pou contente-zot avek seki zot ena?

Anou guetté ki l’exemple David ek Yonathân inn laissé. David ti pré pou vinn le roi ek Yonathân ti garson le roi Saül. David ti’nn bizin sauvé ek al reste dan desert. Pou le roi Saül, David ti enn menace ek li ti envie ki li mort. Mem si normalement c’est Yonathân ki ti pou vinn prochain le roi, li ti’nn vinn enn parmi bann bon camarade David. Yonathân ti reconette ki Bondié ti choisir David pou vinn prochain le roi ek li ti content pou soutenir so camarade.—1 Samuel 19:1, 2; 20:30-33; 23:14-18.

C’est bann camarade coumsa ki ou bizin, bann camarade ki faire tou pou contente-zot avek seki zot ena ek ki envie seki meilleur pou ou. (Proverbes 17:17) Bien sur, pou attire bann camarade coumsa, fodé ki ou aussi ou manifesté sa bann qualité-la.—Philippiens 2:3, 4.

[Zimage page 7]

Eski ou bann camarade faire ou ressenti enn grand satisfaction ou-soit le contraire?