Nou pou marche dan nou l’integrité!
“Mais moi, mo pou marche dan mo l’integrité.”—PS. 26:11.
1, 2. (a) Ki Job ti dire concernant so l’integrité? (b) Kan nou lire Job chapitre 31, ki nou aprann lor li?
DAN le passé, souvent bann dimoune ti pese bann kitsoz lor enn balance. Balance-la ti ena deux plateau. Enn coté, zot ti mette sa kitsoz ki ti bizin pesé-la ek lot coté zot ti mette enn poids. Bann serviteur Bondié ti bizin servi bann balance ki pa triké ek bann poids exact.—Prov. 11:1.
2 Job ti enn bon dimoune ki ti faire Bondié plaisir. Kan li ti pé souffert a cause bann l’epreuve ki Satan ti pé faire li gagné, li ti dire: “[Jéhovah] pou pese moi dan enn balance exact ek Bondié pou kapav konn mo l’integrité.” (Job 31:6) En rapport avek sa, Job ti mentionne plusieurs situation ki ti kapav testé enn kikenn ki ena l’integrité. Mais Job ti reussi passe sa l’epreuve-la. C’est seki nou comprend kan nou lire so bann parole ki trouve dan Job chapitre 31. So bon l’exemple kapav pousse nou pou agir pareil couma li ek dire avek l’assurance, pareil couma psalmiste David: “Mais moi, mo pou marche dan mo l’integrité.”—Ps. 26:11.
3. Kifer li important ki nou reste fidele envers Bondié dan bann grand ek bann ti kitsoz?
3 Mem si Job ti gagne bann l’epreuve bien-bien difficile, li ti reste fidele ar Bondié. Certain kapav mem dire ki sa bann l’epreuve ki Job finn passé-la ek fason ki li ti reste ferme dan so l’integrité, ti vrai-mem extraordinaire. Zordi, nou pa pé konn bann souffrance exactement pareil couma Job. Mais, pou montré ki nou pé marche dan l’integrité ek ki nou pé soutenir souveraineté Jéhovah, nou bizin reste fidele envers Bondié dan bann grand ek bann ti kitsoz toulé-deux.—Lire Luc 16:10.
Li bien important ki nou garde nou l’integrité lor plan moral
4, 5. Pou garde so l’integrité, ki conduite Job ti evité?
4 Pou nou garde nou l’integrité envers Jéhovah, nou bizin reste attaché ar so bann principe moral, pareil couma Job ti faire. Li ti dire: “Mo’nn faire enn l’alliance avek mo lizié. Alors couma mo kapav guette enn vierge? . . . Si mo leker finn laisse-li attiré vers enn femme, si mo finn contigne veillé devant la porte mo compagnon, alors, ki mo femme commence crase la grain pou enn lot zom, ek ki lezot zom agenou lor li.”—Job 31:1, 9, 10.
5 Job ti bien decidé pou garde so l’integrité envers Bondié, ek sa ti pousse li pou evite guette enn femme dan enn fason immoral. En tant ki enn zom marié, li pa ti flirté avek enn femme celibataire, ni li ti rod developpe enn relation sentimental avek femme enn lot zom. Dan so Sermon lor montagne, Jésus ti faire enn declaration bien puissant concernant l’immoralité sexuel—enn declaration ki, bann ki garde zot l’integrité bizin toujours rappel.—Lire Matthieu 5:27, 28.
Jamais pa servi bann moyen pou trompe lezot
6, 7. (a) Ki Bondié servi pou mesure nou l’integrité? (b) Kifer fodé pa nou vinn enn kikenn ki trompe lezot?
6 Si nou envie forme partie parmi bann dimoune ki garde zot l’integrité, fodé pa nou agir dan enn fason pou trompe lezot. (Lire Proverbes 3:31-33.) Job ti dire: “Si mo ti’nn marche avek bann zom ki pena la verité en zot, ek si mo lipié pressé pou al vers tromperie, Li [Jéhovah] pou pese moi dan enn balance exact ek Bondié pou kapav konn mo l’integrité.” (Job 31:5, 6) Jéhovah pese tou dimoune dan “enn balance exact.” Pareil couma dan cas Job, Bondié servi so principe la justice ki parfait pou mesure l’integrité so bann serviteur ki’nn voué zot la vie ar Li.
7 Si nou vinn enn dimoune ki trompe lezot, nou pou nepli garde nou l’integrité envers Bondié. Bann ki garde zot l’integrité finn “rejette bann kitsoz ki faire en cachiette ek ki faire honté” ek zot pa “trik personne.” (2 Cor. 4:1, 2) Mais ki pou arrivé si, par nou parole ou-soit nou action, nou trompe enn chretien, ek a cause sa li suppliye Bondié pou gagne So l’aide? Si sa arrivé, nou pou dan enn mauvais situation! Enn psalmiste ti chanté: “Dan mo malheur, c’est Jéhovah ki mo ti appelé, ek lerla Li ti reponn moi. O Jéhovah, delivré mo nâme ar bann la levre ki koz menti, ar enn la langue ki konn embete lezot.” (Ps. 120:1, 2) Li bon nou rappel ki Bondié kapav trouve seki nou été au fond nou-mem. Li “examine [nou] leker ek [nou] lé-rein” pou guetté si vrai-mem nou pé garde nou l’integrité.—Ps. 7:8, 9.
Vinn enn l’exemple dan fason ki ou traite lezot
8. Couma Job ti traite lezot?
8 Pou garde nou l’integrité, nou bizin vinn pareil couma Job, ki ti ena l’humilité, ki ti juste ek ki ti ena consideration pou lezot. Li ti dire: “Si mo ti habitué refuse jugement mo esclave male ou-soit mo esclave femelle dan zot zaffaire devant la cour avek moi, alors ki mo pou faire kan Bondié pou levé? Ek kan Li pou demann bann compte, ki mo pou reponn Li? Eski sa Kikenn ki finn faire moi dan ventre mo mama-la, pa finn faire sa dimoune-la aussi, ek eski c’est pa Enn sel ki finn commence prepare nou dan ventre nou mama?”—Job 31:13-15.
9. Ki bann qualité Job ti manifesté envers so bann serviteur, ek couma nou bizin suive so l’exemple?
9 Li parette ki dan lepok Job, pa ti bizin faire bann demarche compliké pou reglé bann probleme legal. Ti pé traite bann cas dan enn fason bien organisé, ek bann esclave aussi ti kapav amenn zot cas devant la cour. Job ti traite so bann serviteur dan enn fason juste ek avek misericorde. Pou nou marche dan nou l’integrité, nou bizin manifesté sa bann qualité-la, surtout si nou enn ancien dan congregation.
Vinn genereux, pa envié seki lezot ena
10, 11. (a) Couma nou koné ki Job ti genereux ek ti content aide lezot? (b) Ki bann conseil, Job 31:16-25 faire nou rappel?
10 Job ti genereux ek ti content aide lezot. Li pa ti egoïste ek li pa ti envié seki lezot ena. Li ti dire: “Si mo ti laisse lizié enn veuve fatigué attann, si mo ti mange mo boute di-pain tousel sans ki enn garson ki pena papa pa finn mange enn boute ladan, . . . Si mo ti trouve enn kikenn pé mort parski li pena linge, . . . Si mo ti leve mo la main kont sa garson ki pena papa-la, kan mo ti trouvé ki ti bizin mo l’aide kot la porte, ki mo omoplate sorti dan so zepaule ek ki mo lé-bras cassé ek sorti ar so lezo ki la-haut.” Job pa ti pou’nn garde so l’integrité si li ti’nn dire ar l’or: “To-mem mo confiance!”—Job 31:16-25.
11 Sa bann l’expression poetik-la surement rappel nou bann parole ki disciple Jacques ti ecrire: “L’adoration ki pur ek ki pa contaminé devant nou Bondié ek nou Papa, c’est: prend soin bann orphelin ek bann veuve dan zot difficulté, ek reste sans tache concernant sa lé-monde-la.” (Jacq. 1:27) Kitfois nou kapav rappel aussi l’avertissement ki Jésus ti donné kan li ti dire: “Garde zot lizié ouvert, ek faire attention ar tou sorte qualité l’envie exageré, parski mem kan enn dimoune li dan l’abondance, so la vie pa depann lor bann kitsoz ki li ena.” Apré sa, Jésus ti donne enn l’exemple concernant enn zom riche ki ti ena enn l’envie exageré. Kan sa dimoune-la ti mort, Jésus ti decrire li couma enn kikenn “ki pa riche devant Bondié.” (Luc 12:15-21) Pou garde nou l’integrité, fodé pa nou cedé devant enn l’envie exageré, ek enn desir pou gagne plus, ki bann peché devant Bondié. Sa qualité l’envie-la li enn idolatrie. Kifer? Parski sa kitsoz ki sa dimoune-la pé envie, li detourne so l’attention ar Jéhovah, ek coumsa, sa kitsoz-la vinn enn zidole. (Col. 3:5) Nou pa kapav ena l’integrité ek en mem temps ena enn l’envie exageré!
Reste attaché ar vrai l’adoration
12, 13. Ki l’exemple Job ti laissé kan li ti rejette l’idolatrie?
12 Bann ki garde zot l’integrité zot pa detourne-zot ar l’adoration ki pur. C’est seki Job ti faire, parski li ti dire: “Si mo ti trouve la lumiere kan li ti commence brillé, ou-soit la lune ki ena beaucoup valeur ki ti pé avancé, ek si mo leker ti commence laisse-li tenté en secret ek si mo la main ti embrasse mo la bouche, sa aussi ti pou enn erreur ki bann juge ti bizin prend compte, parski mo ti pou’nn renié vrai Bondié ki la-haut.”—Job 31:26-28.
13 Job pa ti adore bann kitsoz ki pena la vie. Ki ti pou arrivé si so leker ti laisse-li tenté en secret kan li ti pé guette bann kitsoz ki ena dan le ciel, couma par exemple la lune, ek si so ‘la main ti embrasse so la bouche,’ kitfois kan li ti envoye enn bisou ar so la main—enn action ki ena enn lien avek l’idolatrie? Li ti pou vinn enn idolatre ek li ti pou renié Bondié. (Deut. 4:15, 19) Pou garde nou l’integrité ar Bondié, nou bizin evite tou forme l’idolatrie.—Lire 1 Jean 5:21.
Pa garde rancune ou-soit faire hypocrite
14. Kifer nou kapav dire ki Job pa ti content faire lezot di-tort?
14 Job pa ti content faire lezot di-tort, ni li ti cruel. Li ti koné ki si li ti ena sa bann defaut-la, sa ti pou montré ki li pa ti enn kikenn ki garde so l’integrité, parski li ti dire: “Si sa ti faire mo leker content kan sa kikenn ki ena enn grand la haine pou moi-la, disparette, ou-soit si mo ti ressenti enn grand la joie ki finn arrive li enn malheur . . . , ki mo pa’nn permette mo palais pou faire peché kan mo’nn demann enn serment kont so nâme.”—Job 31:29, 30.
15. Kifer li pa bon ki nou dan la joie kan enn kikenn ki ena la haine pou nou gagne enn malheur?
15 Job ti enn dimoune droite. Jamais so leker ti content kan enn kikenn ki ena la haine pou li, ti gagne enn malheur. Enn proverbe ki finn ecrire plitar donne sa l’avertissement-la: “Kan to l’ennemi tombé, fodé pa to content; ek kan li manké tombé, fodé pa ki to leker dan la joie, attention ki Jéhovah trouve sa, ek ki sa li mauvais devant So lizié, ek ki vrai-mem Li nepli en colere kont li.” (Prov 24:17, 18) Nou koné ki Jéhovah kapav lire seki ena dan nou leker. Alors, Li koné si en secret nou dan la joie kan enn dimoune pé konn enn malheur ek surement Li pa approuve enn l’attitude coumsa. (Prov. 17:5) Bondié kapav corrige nou parski Li dire: “Vengeance ek punition pou moi.”—Deut. 32:35.
16. Mem si nou pa riche, couma nou kapav manifesté l’hospitalité?
16 Job ti manifesté l’hospitalité. (Job 31:31, 32) Mem si nou pa riche, nou kapav “contigne montré l’hospitalité.” (Rom. 12:13) Nou kapav partage enn simple repas avek lezot. En realité, la Bible dire ki “vaut mieux enn plat legume kot ena l’amour ki enn taureau ki’nn bien engraissé ek la haine ensam avek sa.” (Prov. 15:17) Kan nou partage mem enn simple ti repas avek enn compagnon chretien dan enn bon l’atmosphere, sa kapav vinn enn moment agreable kot nou kapav fortifié-nou lor plan spirituel.
17. Kifer fodé pa nou essaye cachiette enn peché grave?
17 Pena doute ki bann ki ti profite l’hospitalité Job, ti senti-zot fortifié lor plan spirituel. Kifer? Parski li pa ti enn hypocrite. Li pa ti pareil couma bann dimoune ki pa ti ena okenn respé pou Bondié ki ti rente dan congregation premier siecle ek ki ti “pé admire bann grand-grand dimoune pou zot prop profit.” (Jude 3, 4, 16) En plus, Job pa ti couvert so peché ou-soit ti ‘cachiette so faute dan poche so chemise,’ attention lezot meprise li si zot ti aprann sa. Li ti disposé pou laisse Bondié examine li, ek si li ti commette enn peché, li ti kapav confesse sa ar Li. (Job 31:33-37) Si nou finn faire enn peché grave, fodé pa nou essaye cachiette nou faute pou sauve la face. Couma nou kapav montré ki nou pé essaye garde nou l’integrité? C’est kan nou reconette nou erreur, nou repenti, nou rod enn l’aide spirituel, ek nou faire tou seki nou kapav pou repare degat ki nou finn faire.—Prov. 28:13; Jacq. 5:13-15.
Job propose pou al la cour pou prouve so l’integrité
18, 19. (a) Kifer nou kapav dire ki Job jamais ti exploite personne? (b) Ki Job ti disposé pou faire si li ti coupable?
18 Job ti enn kikenn ki honnete ek droite. Ala kifer li ti kapav dire: “Si mo prop la terre ti criyé au secours kont moi, si bann sillon ti pleuré ensam, si mo ti’nn mange so bann fruit sans ki mo payé, si mo ti faire nâme so bann proprietaire essoufflé, au lieu di-blé laisse bann pié pikan poussé, ek au lieu l’orge laisse bann mauvais l’herbe ki senti pi poussé.” (Job 31:38-40) Job jamais ti kokin la terre lezot dimoune, ek li pa ti exploite bann travailleur. Pareil couma li, nou bizin garde nou l’integrité envers Jéhovah dan bann grand ek bann ti kitsoz.
19 Devant so trois compagnon ek aussi devant enn jeune homme ki ti appel Élihou, Job ti’nn koz lor fason ki li ti amenn so la vie. Job ti invite n’importe kisannla ki ena enn kitsoz kont li pou mette enn accusation kont seki li’nn faire toute longue so la vie, ek li ti attesté sa par so prop “signature.” Si ti kapav prouvé ki Job ti coupable, li ti disposé pou gagne enn punition. Alors, li ti soumette so cas ek li ti attann jugement ki la cour Bondié ti pou rendé. “Bann parole Job fini la-mem.”—Job 31:35, 40.
Ou kapav garde ou l’integrité
20, 21. (a) Kifer eski Job ti kapav garde so l’integrité? (b) Couma nou kapav developpe l’amour pou Bondié?
20 Job ti kapav garde so l’integrité parski li ti content Bondié, ek Jéhovah ti content li ek ti aide li. Job ti dire: “To finn faire la vie ek l’amour fidele developpé en moi; ek to bann soin finn veille lor mo l’esprit.” (Job 10:12) En plus, Job ti manifesté l’amour envers lezot. Li ti reconette ki si enn dimoune refuse manifesté l’amour fidele envers lezot, li pou arrete ena la crainte ek enn grand respé pou Tout-Puissant. (Job 6:14) Bann ki garde zot l’integrité zot content Bondié ek zot content zot prochain.—Mat. 22:37-40.
21 Nou kapav developpe l’amour pou Bondié kan nou lire so Parole toulé-jour ek kan nou medite lor seki nou decouvert lor Li. Dan enn la priere sincere, nou kapav loué Jéhovah ek remercié Li pou so bonté envers nou. (Phil. 4:6, 7) Nou kapav chante pou Jéhovah ek profite bann bienfait ki nou gagné kan nou rassemblé-nou avek so peuple. (Héb. 10:23-25) En plus, nou l’amour pou Bondié pou grandi a mesure ki nou participe dan predication ek nou annonce sa bon nouvelle concernant delivrance ki Jéhovah pou amené-la. (Ps. 96:1-3) Coumsa, nou pou kapav garde nou l’integrité, pareil couma enn psalmiste ti faire. Li ti chanté: “Vinn pré ar Bondié sa li bon pou moi. Mo finn mette mo refuge dan Souverain Seigneur Jéhovah.”—Ps. 73:28.
22, 23. Ki comparaison nou kapav faire entre nou bann l’activité ek seki bann serviteur dan le passé ti faire?
22 A mesure ki bann siecle finn passé, Jéhovah finn donne bann dimoune ki ena l’integrité different mission. Noé ti range enn l’arche ek li ti “enn predicateur la justice.” (2 Pierre 2:5) Josué ti amenn bann Israélite dan la Terre promise, mais li ti reussi faire sa zis parski li ti lire “livre la loi . . . la-nuit li-jour” ek li ti agir en accord avek seki li ti lire. (Jos. 1:7, 8) Bann premier chretien ti faire bann disciple ek zot ti joinde regulierement pou etudié bann l’Écritures.—Mat. 28:19, 20.
23 Nou soutenir souveraineté Jéhovah ek nou garde nou l’integrité kan nou preche la justice, kan nou faire bann disciple, kan nou applik bann conseil biblik, ek kan nou rassemblé ensam avek nou bann compagnon chretien pendant bann reunion ek bann l’assemblée. Sa bann l’activité-la aide nou pou ena courage, pou reste fort lor plan spirituel, ek pou reussi faire volonté Bondié. Sa li pa trop difficile pou nou parski nou ena soutien nou Papa ki dan le ciel ek so Garson. (Deut. 30:11-14; 1 Rois 8:57) En plus, nou gagne soutien “toute la famille nou bann frere,” ki zot aussi pé marche dan l’integrité ek pé honore Jéhovah ek considere Li couma zot Souverain Seigneur.—1 Pierre 2:17.
Couma ou pou reponn?
• Couma nou bizin considere bann principe moral ki Jéhovah inn etabli?
• Ki bann qualité ki Job ti manifesté, attire ou?
• Dapré Job 31:29-37, ki qualité conduite Job ti ena?
• Kifer nou kapav garde nou l’integrité envers Bondié?
[Questions d’étude]