L’ESPERANCE pou al vive dan le ciel kapav vrai-mem parette bien attirant! Nou retrouve l’esperance ki ena enn la vie apré la mort, dan different forme, parmi bann musulman, bann hindou, bann bouddhiste, bann membre l’eglise la chretienté, ek mem bann ki pa interessé ar la religion. Souvent bann dimoune pensé ki le ciel li enn place ki bien-bien joli ek kot faire bon pou vive; kot bann dimoune soulagé ar bann souffrance ek kot zot rejoinde “bann dimoune ki zot content mais ki’nn mort.” Mais pourtant, sa ancien proverbe-la applik bien ar la plupart dimoune: Tou dimoune envie al dan le ciel, mais personne pa envie mort pou al la-bas. Kifer sa?

Si ti’nn faire nou pou nou mort ek pou nou al dan le ciel, eski pli beaucoup dimoune pa ti pou attann sa avek impatience pareil couma enn zenfant li impatient pou li grandi ou-soit enn jeune li impatient pou li marié? Mais la plupart dimoune pa envie mort.

Malgré sa, bann pretre pretann ki apré nou sejour bien courte lor la terre, le ciel c’est place kot nou supposé vive. Par exemple, Theodore Edgar Cardinal McCarrick, enn ancien archeveque dan Washington, D.C., ti dire: “Pa ti crée nou pou amenn sa qualité la vie-la. Nou finn crée pou vive dan le ciel.” Enn ancien president l’Association américaine des mouvements évangéliques, ti dire preské mem l’idée: “But la vie c’est pou donne la gloire Bondié ek al dan le ciel . . . parski le ciel c’est nou lakaz.”

Bann ki croire ki bann dimoune apré la mort zot pou al vive dan le ciel, zot base zot croyance lor enn tigit renseignement-mem. George Barna, ki president dan enn societé ki faire bann recherche lor bann l’opinion par rapport avek la religion, ti trouvé ki beaucoup dimoune accepté “bann l’idée lor la vie ek la vie apré la mort dapré bann renseignement ki zot inn gagné par plusieurs source, couma bann film, bann la musik ek bann livre.” Dan Floride, enn pasteur épiscopalien ti dire: “Nou pa konn nanyin concernant le ciel, zis seki nou koné c’est ki Bondié reste dan le ciel.”

Mais selman, le ciel li enn sujet important dan la Bible. Dapré Parole Bondié, couma le ciel été? Eski bann dimoune inn faire pou vive dan le ciel? Si bann dimoune vrai-mem al dan le ciel, ki zot pou faire la-bas?

[L’encadré page 3]

Kifer ena beaucoup dimoune ki envie al dan le ciel, mais bien tigit ki envie mort pou al la-bas?