CERTAIN dimoune pensé ki li impossible pou koné couma le ciel été parski personne jamais pa finn sorti dan le ciel ek vinn lor la terre pou dire nou couma li été. Kitfois zot inn blié ki Jésus ti dire: “Mo finn sorti dan le ciel mo finn vinn lor la terre.” (Jean 6:38) Li ti aussi dire ar certain chef religieux: “Zot, zot sorti dan bann region enba; moi, mo sorti dan bann region la-haut.” (Jean 8:23) Ki Jésus ti dire concernant le ciel?

Jésus ti confirmé ki le ciel c’est place kot Jéhovah resté. Li ti appel Bondié “mo Papa ki dan le ciel.” (Matthieu 12:50) Mais Jésus ti servi mot “le ciel” dan plus ki enn sel sens. Par exemple li ti faire reference ar l’atmosphere la terre ek li ti appel li “le ciel” kan li ti dire: “Observe bien bann zoiseau dan le ciel.” (Matthieu 6:26) Mais selman, Jéhovah reste pli loin ki sa l’atmosphere-la. La Bible dire: “Ena enn Kikenn ki reste pli la-haut ki cercle la terre.”—Isaïe 40:22.

Eski nou “Papa ki dan le ciel,” Li vive au millieu bann zetoile? La Bible appel l’univers physik aussi “le ciel.” Par exemple, enn psalmiste ti ecrire: “Kan mo guette le ciel ek bann travail ki to finn faire avek to la main, la lune ek bann zetoile ki to finn preparé, ki été enn dimoune mortel, pou ki to pense li?”—Psaume 8:3, 4.

Jéhovah pa obligé vive dan l’univers physik ki Li’nn crée, pareil couma enn menuisier pa obligé vive dan enn placard ki li’nn faire. A cause sa-mem, kan le roi Salomon ti offert Jéhovah temple ki ti dan Jérusalem, li ti dire: “Eski vrai-mem Bondié pou reste lor la terre? Guetté! Le ciel li-mem, oui pli grand le ciel ki kapav ena, pa assez grand pou toi, alors couma to pou kapav reste dan sa lakaz ki mo’nn rangé-la!” (1 Rois 8:27) Si Jéhovah pa reste dan le ciel physik, dan ki le ciel eski Li resté?

Mem si bann dimoune inn observe le ciel physik avek bann telescope bien puissant ek certain finn voyage dan l’espace, seki la Bible dire li reste la verité: “Okenn zom jamais pa finn trouve Bondié.” (Jean 1:18) Jésus ti expliké kifer, kan li ti dire ki “Bondié Li enn l’Esprit.”—Jean 4:24.

Enn l’esprit li enn forme la vie ki pli superieur ki enn dimoune. Enn l’esprit li pa’nn faire avek bann element physik, couma la chair ek di-sang, ki bann dimoune kapav trouvé ek touché. Alors, kan Jésus ti dire ki li ti vive avek so Papa dan “le ciel,” li ti pé rod dire ki li ti ena enn forme la vie ki ti ena plus la gloire ki n’importe ki forme la vie physik. (Jean 17:5; Philippiens 3:20, 21) La Bible appel l’endroit kot Jésus ti vive avek so Papa couma enn creature spirituel, “le ciel.” Couma li été sa “le ciel[-la]”? Ki passé la-bas?

Enn place kot ena beaucoup l’activité ek la joie

La Bible decrire le ciel couma enn place kot ena beaucoup l’activité. Li mentionne par  centaine million creature spirituel fidele ki reste la-bas. (Daniel 7:9, 10) Sakenn sa bann creature-la ena so prop personnalité. Couma nou konn sa? Parmi tou bann creature ki visible, pena deux creature vivant ki exactement pareil, alors nou kapav sur ki dan le ciel aussi, ena enn grand diversité. Seki extraordinaire, c’est ki tou sa bann creature ki reste dan le ciel-la, travail ensam dan l’unité. Sa li bien different avek seki passé lor la terre zordi, kot li bien rare ki ena enn bon cooperation entre bann dimoune.

Guetté couma la Bible decrire l’activité ki ena dan le ciel. “Beni Jéhovah, zot so bann ange puissant, ki faire seki Li dire, kan zot ecoute so parole. Beni Jéhovah, zot tou so bann l’armée, zot, so bann ministre ki faire so volonté.” (Psaume 103:20, 21) Alors ena enn grand travail ki pé faire dan le ciel. Ek nou kapav sur ki c’est enn travail ki donne satisfaction.

Bann ange ena beaucoup l’année service derriere zot, ki remonte mem ziska lepok kot la terre pa ti encore crée. Dapré bann l’Ecriture, kan Jéhovah ti faire fondation la terre, bann garson Bondié “ti criyé ensam dan la joie” ek “ti commence loué Li bien fort.” (Job 38:4, 7) Enn parmi bann garson Bondié ki ti dan le ciel ti mem ena privilege pou travail ensam avek Bondié dan creation tou lezot kitsoz. (Colossiens 1:15-17) Sa description bien attirant lor bann l’activité ki faire dan le ciel avek beaucoup la joie-la kapav amenn ou pou pose bann question ki concerne le ciel ek l’humanité en general.

Eski bann dimoune ti supposé al dan le ciel?

Si bann ange ti pé servi Bondié dan le ciel avant fondation la terre, li clair ki premier zom ek premier femme pa ti’nn crée pou rempli le ciel avek zot bann zenfant. Au contraire Bondié ti dire ar sa premier couple humain-la: “Gagne beaucoup zenfant, multiplié, rempli la terre.” (Genèse 1:28; Actes 17:26) Adam ti premier parmi enn nouveau forme la vie lor la terre, ki ti kapav aprann konn Bondié ek servi Li avek fidelité. Li ti pou papa tou bann dimoune ki ti pou vive lor la terre. “En seki concerne le ciel, li pou Jéhovah, mais la terre, Li finn donne sa bann dimoune.”—Psaume 115:16.

Bann dimoune normalement pa envie mort; la mort li pa enn kitsoz normal pou zot. Bondié ti mentionne la mort ar Adam zis couma enn punition pou so desobeissance. Si Adam ti obeir, jamais li ti pou mort.—Genèse 2:17; Romains 5:12.

Alors, sa pa etonne nou ki Bondié pa ti dire Adam ki li pou al dan le ciel. Alors, la terre li pa ti supposé enn place kot bann dimoune ti pou passe bann l’epreuve pou guetté si zot qualifié pou al dan le ciel. Bann dimoune ti crée pou vive pou touletan lor la terre, ek sa projet Bondié-la bientot pou realisé. La Bible promette ki “bann dimoune juste pou possede la terre, ek zot pou reste lor la pou touletan.” (Psaume 37:29) Alors, li clair ki kan Bondié ti crée bann dimoune, Li pa ti’nn crée zot pou al dan le ciel. Alors, kifer eski Jésus ti promette so bann zapotre ki zot pou al vive dan le ciel? Eski Jésus ti pé dire ki tou bann bon dimoune pou al dan le ciel?