Fason ki Jéhovah gouverné pou justifié!
“Sa Kikenn ki Pli Grand-la, Li Chef dan royaume bann dimoune.”—DAN. 4:17.
1, 2. Cite certain raison kifer domination bann dimoune pa finn reussi ditou.
DOMINATION bann dimoune pa finn reussi, nou pena okenn doute lor la! Enn raison principal kifer zot pa finn reussi dirige bien c’est parski zot pena sagesse ki bizin. Dan nou lepok, li bien clair ki domination bann dimoune pa finn reussi. Kifer? Parski nou trouve beaucoup dirigeant ki ‘content zot-mem, ki content l’argent, ki vantard, ki ena l’orgueil, ki pa fidele, ki pa d’accord entre zot-mem, ki mette bann fausse l’accusation lor lezot, ki pa konn controle-zot, ki pena pitié, ki pa content seki bien, ki traitre, ek ki rempli ar l’orgueil.’—2 Tim. 3:2-4.
2 Bien longtemps, nou premier parent ti rejette fason ki Bondié gouverné. Kan zot ti faire sa, kitfois zot ti pensé ki zot ti pé choisir zot l’independance. Mais en realité, zot ti pé soumette-zot ar l’autorité Satan. Sa faire six mille an ki bann dimoune pa pé dirige bien—Satan, “chef sa le monde-la,” ena enn grand l’influence lor zot—ek zot domination finn mette l’humanité dan enn trou. (Jean 12:31) Concernant situation le monde zordi, livre The Oxford History of the Twentieth Century dire ki li inutile pou “espere enn le monde parfait.” Li donne sa l’explication-la: “Sa le monde-la pa existé, mais pena zis sa, tou zeffort pou crée [enn le monde coumsa] conduire vers bann malheur, bann gouvernement dictateur ek bann la guerre pli horrible ki kapav ena.” C’est enn remark honnete pou montré ki vrai-mem domination bann dimoune pa finn reussi ditou!
3. Ki nou kapav dire concernant fason ki Bondié ti pou gouverné si Adam ek Ève pa ti faire peché?
3 Alors, li vrai-mem bien triste ki nou bann premier parent finn rejette sel maniere dirigé ki marche bien, setadir domination Bondié! Bien sur, nou pa koné ki bann disposition Jéhovah ti pou prend pou dirige la terre si Adam et Ève ti reste fidele envers Li. Selman, nou kapav sur ki domination Bondié, ki tou dimoune ti pou accepté, ti pou dirige avek amour ek li pa ti pou faire okenn preference. (Actes 10:34; 1 Jean 4:8) Personne pena sa sagesse ki Bondié ena-la. Alors, ki ti pou arrivé si bann dimoune ti contigne soumette ar l’autorité Jéhovah? Nou kapav sur ki lerla zot ti pou kapav evite tou bann erreur ki bann ki soutenir domination bann dimoune, finn faire. Theocratie, setadir domination par Bondié, ti pou reussi “satisfaire desir tou seki vivant.” (Ps. 145:16) Nou kapav dire ki sa gouvernement-la ti pou parfait. (Deut. 32:4) Oui, li vrai-mem bien triste ki bann dimoune finn rejette sa gouvernement-la!
4. Ziska ki point Bondié inn permette Satan dirigé?
4 Mais selman, pa blié ki mem si Jéhovah finn permette bann dimoune pou dirige zot par zot-mem, jamais Li pa finn renonce ar so droit pou gouverne so bann creature. Mem enn le roi puissant ki ti dirige Babylone, ti obligé reconette ki finalement, “sa Kikenn ki Pli Grand-la, Li Chef dan royaume bann dimoune.” (Dan. 4:17) A la fin, volonté Bondié pou faire grace a so Royaume. (Mat. 6:10) Li vrai ki pou enn certain temps, Jéhovah finn permette Satan pou agir couma “bondié sa systeme-la” pou donne enn reponse ki pa kapav contesté lor bann question ki Satan ti soulevé. (2 Cor. 4:4; 1 Jean 5:19) Selman, jamais Satan pa finn kapav depasse limite ki Jéhovah inn fixé. (2 Chron. 20:6; compare avek Job 1:11, 12; 2:3-6.) En plus, finn toujours ena bann dimoune ki finn choisir pou soumette ar Bondié, mem si zot ti pé vive dan enn le monde ki dirigé par Satan, pli grand adversaire Bondié.
Domination Bondié lor nation Israël
5. Ki l’engagement bann Israélite ti prend envers Bondié?
5 Depuis lepok Abel ziska lepok ki nation Israël inn formé, ti ena certain dimoune fidele ki ti adore Jéhovah ek ki ti obeir so bann commandement. (Héb. 11:4-22) Dan lepok Moïse, Jéhovah ti faire enn l’alliance avek bann descendant Jacob ki ti chef enn grand famille, ek sa bann descendant-la ti vinn nation Israël. En 1513 avant nou lepok, bann Israélite ti prend enn l’engagement pou zot-mem ek pou zot bann descendant pou accepté Jéhovah couma zot Chef, kan zot ti dire: “Nou d’accord pou faire tou seki Jéhovah inn dire.”—Ex. 19:8.
6, 7. Couma domination Bondié lor nation Israël ti été?
6 Kan Jéhovah ti choisir nation Israël pou vinn so peuple, Li ti ena enn but precis. (Lire Deutéronome 7:7, 8.) Sa choix-la ti implik plus ki zis bien-etre bann Israélite. Nom Bondié ek so droit pou dirigé ti aussi impliké, ek sa ti ena enn pli grand l’importance. Nation Israël ti bizin temoigné ki Jéhovah Li tousel vrai Bondié. (Is. 43:10; 44:6-8) C’est a cause sa ki Jéhovah ti dire nation Israël: “To enn peuple ki saint pou Jéhovah to Bondié, ek Jéhovah finn choisir toi pou vinn so peuple, enn di-bien special, parmi tou bann peuple ki lor la terre.”—Deut. 14:2.
7 Par fason ki Bondié ti dirige bann Israélite, Li ti prend en consideration ki bannla ti imparfait. En mem temps, so bann la loi ti parfait ek ti reflete so bann qualité. Bann commandement ki Li ti donné a travers Moïse ti mette bien l’accent ki Bondié Li saint, zot ti aussi mette l’accent lor so l’amour pou la justice, so volonté pou pardonné ek so patience. Plitar, dan lepok Josué ek so generation, nation Israël ti obeir bann commandement Jéhovah ek ti konn la paix ek bann benediction spirituel. (Jos. 24:21, 22, 31) Sa periode dan l’histoire nation Israël-la ti montré ki fason dirigé Jéhovah li vrai-mem bon.
Domination humain coute cher
8, 9. Ki bann Israélite ti demandé, ki pa ti sage, ek ki resultat zot ti gagné?
8 Mais avek le temps, souvent bann Israélite ti rejette direction Bondié ek zot ti perdi so protection. Finalement, a travers prophete Samuel, zot ti demann enn le roi humain ki zot ti pou kapav trouvé. Jéhovah ti dire Samuel donne zot seki zot ti demandé. Selman Jéhovah ti ajouté: “C’est pa toi ki zot finn rejeté, mais c’est moi ki zot finn rejeté pou ki mo nepli zot le roi.” (1 Sam. 8:7) Mem si Jéhovah ti permette bann Israélite pou ena enn le roi, Li ti averti zot ki sa ti pou coute zot cher pou ena enn le roi humain.—Lire 1 Samuel 8:9-18.
9 L’Histoire finn prouvé ki sa l’avertissement Jéhovah-la ti vrai. Domination enn le roi humain ti faire bann Israélite gagne bann probleme bien grave, surtout kan le roi-la pa ti fidele envers Jéhovah. Kan nou reflechi lor l’exemple bann Israélite, nou pa etonné ki toute longue bann siecle, bann gouvernement ki’nn dirigé par bann dimoune ki pa konn Jéhovah, pa finn reussi produire bann bon resultat. Li vrai ki certain politicien demann Bondié beni zot zeffort pou etabli la paix ek securité. Mais couma Bondié kapav beni bann dimoune ki pa soumette ar so fason gouverné?—Ps. 2:10-12.
Enn nouveau nation ki dirigé par Bondié
10. Kifer Bondié ti remplace nation Israël?
10 Nation Israël ti montré ki li pa ti disposé pou servi Jéhovah avek fidelité. Finalement, zot ti rejette Messie ki Bondié ti choisir. Lerla, Jéhovah ti rejette zot Li aussi ek Li ti decidé pou remplace zot par enn groupe dimoune ki ti pou forme enn nouveau nation. C’est coumsa ki en l’an 33 nou lepok, congregation bann chretien oint ti né. Sa congregation-la ti vrai-mem enn nouveau nation ki ti enba l’autorité Jéhovah. Paul ti koz lor sa nation-la couma “Israël Bondié.”—Gal. 6:16.
11, 12. Ki ressemblance ena entre nation Israël ek “Israël Bondié” en rapport avek fason dirigé?
11 Entre nation Israël ek “Israël Bondié,” ena bann difference ek bann ressemblance toulé-deux. Difference ki ena, seki dan congregation chretien pena enn le roi humain couma ti ena dan nation Israël, ek bann chretien pa bizin offert bann sacrifice zanimo pou bann dimoune ki faire peché, couma bann Israélite ti faire. Enn ressemblance ki ena: dan nation Israël ti ena bann ancien ek dan congregation chretien aussi pareil. (Ex. 19:3-8) Bann ancien dan congregation chretien pa domine lor troupeau Bondié. Au contraire, zot prend soin congregation ek zot faire tou seki zot kapav pou prend la tête dan bann activité spirituel. Zot traite chaque membre congregation avek amour, ek zot donne l’honneur ek dignité tou dimoune.—2 Cor. 1:24; 1 Pierre 5:2, 3.
12 Kan bann membre “Israël Bondié” ek “lezot brebis” medite lor fason ki Bondié ti agir avek nation Israël, zot ena enn pli grand reconnaissance pou Jéhovah ek pou so fason dirigé. (Jean 10:16) Par exemple, l’Histoire montré ki bann le roi en Israël ti ena enn grand l’influence, bon ou-soit mauvais, lor le peuple. Kan bann ki prend la tête dan congregation reflechi lor la, sa faire zot rappel ki mem si zot pa bann le roi couma bannla, zot bizin donne toujours enn bon l’exemple en rapport avek la foi.—Héb. 13:7.
Couma Jéhovah dirigé zordi
13. Ki evenement bien important inn arrivé en 1914?
13 Zordi dan le monde entier bann chretien pé annoncé ki domination bann dimoune pré pou disparette. En 1914, Jéhovah ti etabli so Royaume dan le ciel enba direction le Roi ki Li’nn choisir, Jésus Christ. Lerla, Li ti donne Jésus l’autorité pou sorti ‘couma enn vainker ek pou complete so victoire.’ (Rév. 6:2) Bondié ti dire sa nouveau le roi-la: “Al regne parmi to bann l’ennemi.” (Ps. 110:2) Malheureusement, bann nation finn touletan refuse pou soumette ar domination Jéhovah. Zot finn contigne agir coumadir “pena Jéhovah.”—Ps. 14:1.
14, 15. (a) Couma Royaume Bondié dirige nou zordi, ek ki bann question nou bizin pose nou-mem? (b) Couma mem zordi, nou trouvé ki domination Bondié li pli bon ki tou?
14 Zordi lor la terre, reste enn tigit chretien oint, bann membre “Israël Bondié.” Sa bann frere Jésus-la contigne agir couma bann “ambassadeur dan place Christ.” (2 Cor. 5:20) Jésus finn etabli zot couma l’esclave fidele et avisé ek inn donne zot responsabilité pou prend soin ek pou donne nourriture spirituel bann chretien oint ek bann membre la grande foule. Sa la foule-la pé vinn pli beaucoup, zordi zot plusieurs million ek zot ena l’espoir pou vive pou touletan lor la terre. (Mat. 24:45-47; Rév. 7:9-15) Prosperité spirituel ki ena parmi bann serviteur Jéhovah zordi prouvé ki Jéhovah pé beni sa disposition ki ena en rapport avek l’esclave fidele et avisé-la.
15 Sakenn parmi nou bizin demann li-mem: ‘Eski mo accepté vrai-mem bann responsabilité ki mo bizin prend dan congregation? Eski mo pé soutenir couma bizin maniere ki Jéhovah gouverné? Eski mo fiere ki mo enn sujet Royaume Bondié? Eski mo bien decidé pou contigne preche Royaume Bondié ar lezot autant ki mo kapav?’ En tant ki enn groupe, nou disposé pou soumette ar direction ki College central donne nou ek pou coopere avek bann ancien ki’nn etabli dan congregation. Coumsa, nou montré ki nou accepté fason ki Bondié gouverné. (Lire Hébreux 13:17.) Kan nou disposé pou soumette, sa crée l’unité avek nou bann frere dan le monde entier; pena enn l’unité coumsa okenn part dan sa le monde divisé-la. Sa produire aussi la paix ek la justice, ek sa donne la gloire Jéhovah. Tousala prouvé ki so fason gouverné beaucoup pli bon ki tou.
Domination Jéhovah gagne la victoire
16. Devant ki decision chaque dimoune été zordi?
16 Dan encore enn tigit le temps, bann question ki ti soulevé en Éden pou reglé. Alors, asterla inn arrive ler pou bann dimoune prend enn decision. Chaque dimoune bizin decidé si li pou accepté fason ki Jéhovah gouverné ou-soit si li pou reste attaché ar domination bann dimoune. Nou ena privilege pou aide bann dimoune ki humble pou prend enn bon decision. Bientot, kan Har-Maguédôn pou vini, domination Jéhovah pou remplace pou touletan bann gouvernement humain ki enba l’influence Satan. (Dan. 2:44; Rév. 16:16) Domination bann dimoune pou disparette, ek Royaume Bondié pou dirige la terre entier. Lerla, dan enn fason complet, Jéhovah pou montré ki zis so fason gouverné ki bon.—Lire Révélation 21:3-5.
17. Ki kapav aide bann dimoune humble pou choisir enn bon gouvernement?
17 Bann ki pankor prend enn decision ferme pou servi Jéhovah bizin reflechi dan la priere lor bann benediction ki so domination pou amené pou l’humanité. Bann gouvernement humain pa finn kapav reglé probleme couma crime, parmi ena terrorisme. Gouvernement Bondié pou tire tou bann mauvais dimoune lor la terre. (Ps. 37:1, 2, 9) Zordi, a cause bann gouvernement humain, ena beaucoup la guerre, mais gouvernement Bondié pou faire “bann la guerre arreté ziska dan boute la terre.” (Ps. 46:9) Oui, gouvernement Bondié pou mem retabli la paix entre bann dimoune ek bann zanimo! (Is. 11:6-9) Pendant domination bann dimoune, finn touletan ena la misere ek la faim, mais gouvernement Bondié pou elimine sa net. (Is. 65:21) Mem bann dirigeant humain ki ena bann bon l’intention pa finn kapav tire maladie ek la mort, mais enba gouvernement Bondié, bann dimoune agé ek malade pou extra content kan zot pou retrouve la force ki zot ti ena kan zot ti jeune. (Job 33:25; Is. 35:5, 6) Oui, la terre pou vinn enn paradis kot mem bann mort pou ressuscité.—Luc 23:43; Actes 24:15.
18. Couma nou kapav montré ki nou sur ki fason gouverné Bondié pli bon?
18 Oui, gouvernement Bondié pou repare tou bann degat ki Satan finn faire kan li finn influence nou premier parent pou tourne zot lé-dos ar zot Createur. Mazinn aussi ki Satan finn faire beaucoup di-tort pendant 6,000 an, mais Bondié Li, par Christ, Li pou prend zis 1,000 an pou repare tou sa di-tort-la! C’est enn grand preuve ki domination Bondié li vrai-mem pli bon! En tant ki bann Témoins nou Bondié, nou accepté Li couma nou Chef. Alors, chaque jour, oui, chaque moment dan nou la vie, anou montré ki nou bann adorateur Jéhovah, bann sujet so Royaume, ek ki nou fiere ki nou so bann Témoins. Ek anou saisi tou l’occasion pou dire tou seki envie tendé, ki fason ki Jéhovah gouverné, sa-mem pli bon.
En seki concerne domination Bondié, ki nou finn aprann kan nou finn lire . . .
• Deutéronome 7:7, 8?
• 1 Samuel 8:9-18?
[Questions d’étude]
[Zimage lor page 29]
Jéhovah finn toujours garde so droit pou gouverné
[Zimage lor page 29]
Nou soumission volontaire envers l’autorité Jéhovah permette pou ena l’unité dan le monde entier