NOU trouve souffrance partout, ek beaucoup dimoune avek compassion aide bann ki pé souffert. Par exemple, bann personnel medical faire bann longue shift dan bann l’hopital pou aide bann ki malade ou-soit bann ki blessé. Bann pompier, bann la police, ek bann ki travail dan bann l’equipe secours faire tou seki zot kapav pou soulage souffrance lezot ou-soit pou empeche zot souffert. Sa bann zeffort ki zot faire-la aide beaucoup dimoune lor plan personnel, mais selman li impossible pou n’importe kisannla ou-soit n’importe ki l’organisation pou elimine souffrance partout lor la terre. Parkont, Bondié Li, Li kapav ek Li pou amenn enn solution pou la terre entier.

Nou trouve sa l’assurance-la dan dernier livre la Bible: “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” (Révélation 21:4) Ki l’effet sa promesse-la pou ena? En deux-trois mot li explik projet ki Bondié ena pou mette enn fin ar tou souffrance. Li pou faire sa kan Li pou tire  lor la terre la guerre, la famine, maladie, ek l’injustice, ensam avek tou bann mauvais dimoune. Okenn dimoune pa kapav faire enn kitsoz coumsa.

Ki Royaume Bondié pou faire

Bondié pou realise so bann promesse a travers deuxieme personnage pli puissant ki ena dan l’univers—Jésus Christ ki finn ressuscité. Ler pé vini kot Jésus pou dirige la terre entier en tant ki le Roi sans okenn l’opposition. Bann dimoune pou nepli gouverné par bann le roi, bann president, ou-soit bann politicien. Au contraire, c’est enn sel le Roi ek enn sel gouvernement, setadir Royaume Bondié, ki pou dirige zot.

Sa Royaume-la pou detruire tou gouvernement humain. Depuis bien longtemps, la Bible ti predire: “Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou okenn lot peuple. Li pou crase tou bann lezot royaume ek li pou fini zot, ek li-mem li pou regné pou touletan.” (Daniel 2:44) Bann dimoune dan le monde entier pou uni ensam enba enn sel gouvernement juste—Royaume Bondié.

Kan Jésus ti lor la terre en tant ki enn humain, plusieurs fois li ti koz concernant sa Royaume-la. Li ti koz lor sa Royaume-la dan la priere modele, ek li ti demann so bann disciple pou prié coumsa: “Ki to royaume vini. Ki to volonté faire lor la terre pareil couma dan le ciel.” (Matthieu 6:10) Remarké ki Jésus ti montré ki Royaume Bondié ena enn lien avek realisation volonté Bondié lor la terre, ek volonté Bondié c’est pou tire souffrance lor la terre entier.

Gouvernement Bondié ki enn gouvernement juste, pou amenn bann bienfait ki okenn gouvernement humain jamais pou kapav amené. Rappel ki Jéhovah ti donne so Garson couma enn ranson pou ki bann dimoune kapav gagne la vie eternel. Enba bon regne sa Royaume-la, bann dimoune doucement-doucement pou vinn parfait. Ki resultat sa pou amené? Jéhovah “pou faire la mort disparette pou touletan, ek vrai-mem Souverain Seigneur Jéhovah pou souye larme lor tou bann figure.”—Isaïe 25:8.

Certain kapav demandé: ‘Kifer Bondié pankor faire sa bann changement-la? Ki Li pé attann?’ Depuis bien longtemps Jéhovah ti kapav prend bann action pou elimine ou-soit pou empeche tou souffrance. Mais au lieu sa, Li finn permette ki sa situation-la contigné, pa pou enn raison egoïste, mais pou ki so bann zenfant gagne bann bienfait eternel lor la terre. Bann parent ki content zot zenfant pou permette ki zot zenfant passe par bann difficulté si zot koné ki plitar sa pou faire zot di-bien pendant longtemps. Pareil, ena bann bon raison kifer Bondié finn permette ki bann dimoune souffert pendant enn ti periode le temps, ek la Bible explik nou sa bann raison-la. Parmi sa bann raison-la ena liberté pou choisir, peché ek enn question ki concerne droit ki Jéhovah ena pou dirigé. La Bible dire aussi ki pou enn tigit letan, enn mauvais creature spirituel finn gagne permission pou dirige le monde. a

Mem si nou pa kapav explik tou sa bann raison-la dan zis deux-trois page ici, ena deux verité ki kapav donne nou l’espoir ek l’encouragement. Premier verité: Bann benediction ki Jéhovah pou donne nou pou beaucoup plus ki tou bann souffrance ki nou’nn koné. En plus, Jéhovah donne nou sa l’assurance-la: “Personne pa pou rappel bann kitsoz avant, ek sa pa pou vinn dan zot leker.” (Isaïe 65:17) Bondié pou tire net ek pou touletan, la misere ek souffrance ki nou gagné parski Li finn permette mechanceté zis pou enn tigit le temps.

Deuxieme verité: Bondié finn fixé enn jour precis pou mette enn fin ar souffrance. Rappel ki prophete Habaqouq ti demandé ziska kan Jéhovah ti pou permette violence ek la guerre. Jéhovah ti reponn: “Vision-la encore pou le temps fixé . . . Li pa pou en retard.” (Habaqouq 2:3) Couma nou pou trouvé dan prochain lartik, sa “le temps fixé[-la]” li pré.

[Note]

 [Tableau lor page 7]

Bann verset la Bible ki annonce enn l’avenir extraordinaire

NEPLI POU ENA LA GUERRE:

“Vini, vinn guette seki Jéhovah inn faire, couma Li’nn faire bann evenement etonnant arrivé lor la terre. Li faire bann la guerre arreté ziska dan boute la terre.”—Psaume 46:8, 9.

BANN KI’NN MORT POU RESSUSCITÉ:

“Pou ena enn resurrection bann dimoune ki juste ek bann dimoune ki pa juste, toulé-deux.”—Actes 24:15.

POU ENA MANGÉ POU TOU DIMOUNE:

“Pou ena la grain cereale en abondance lor la terre, ek la-haut lor bann montagne, pou ena enn grand l’abondance.”—Psaume 72:16.

NEPLI POU ENA MALADIE:

“Okenn habitant pa pou dire: ‘Mo malade.’ ”—Isaïe 33:24.

NEPLI POU ENA MAUVAIS DIMOUNE:

“Mais bann mauvais dimoune zot, pou tire zot lor sa la terre-la; ek bann traitre zot, pou rass zot lor la.”—Proverbes 2:22.

POU ENA LA JUSTICE PARTOUT:

“Guetté! Enn le roi pou regné pou la justice; ek bann prince zot, zot pou gouverné couma bann prince pou la justice.”—Isaïe 32:1.

[Zimage lor page 7]

Royaume Bondié pou tire n’importe ki souffrance ki nou’nn koné