Seki nou aprann ar Jésus

Ki l’attitude lor mariage rann bann famille heureux?

Mariage c’est enn lien sacré. Kan ti demann Jésus si ti ena droit divorcé, li ti dire: “Eski zot pa finn lire ki celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair’? Oui, zot nepli deux, mais enn sel la chair. Alors, seki Bondié finn mette enba enn sel joug, fodé ki personne pa separe sa. . . . N’importe kisannla ki divorce avek so femme, excepté a cause fornication, ek marié avek enn lot, commette l’adultere.” (Matthieu 19:4-6, 9) Kan enn couple suive conseil Jésus ek zot reste fidele sakenn ar zot camarade, zot tou dan la famille senti zot en securité ek heureux.

Kifer l’amour pou Bondié rann bann famille heureux?

Jésus ti dire: “ ‘To bizin content Jéhovah to Bondié avek tou to leker ek avek tou to nâme ek avek tou to l’esprit.’ Sa-mem pli grand ek premier commandement.” Ki deuxieme pli grand commandement? Jésus ti dire: “To bizin content to prochain [parmi ena aussi bann ki reste pli pré ar ou, setadir ou famille] couma to-mem.” (Matthieu 22: 37-39) Alors pou ki la famille heureux, li bien important ki nou ena enn bon relation avek Bondié, parski l’amour ki nou ena pou Li pou pousse nou pou ena l’amour sakenn pou nou camarade.

 Couma enn mari ek enn femme kapav rann sakenn so camarade heureux?

Bann mari rann zot femme heureux kan zot suive l’exemple Jésus. Li ti ena enn l’amour ki ti disposé pou faire bann sacrifice pou so femme symbolik, la congregation. (Éphésiens 5:25) Jésus ti dire: “Fils de l’homme inn vini, pa pou faire lezot servi li, mais pou li servi lezot.” (Matthieu 20:28) Jésus jamais ti faire dominere ou-soit ti dur avek bann ki ti enba so responsabilité, mais li ti reconforte zot. (Matthieu 11:28) Alors, bann mari bizin servi zot l’autorité avek bonté pou ki zot tou dan la famille tire profit.

Bann femme aussi kapav tire profit ar l’exemple Jésus. La Bible dire: “Chef Christ c’est Bondié.” La Bible dire aussi ki “chef enn femme c’est zom.” (1 Corinthiens 11:3) Pou Jésus, soumette ar Bondié, pa ti enn kitsoz ki ti abaisse li. Li ti ena enn profond respé pou so Papa. Jésus ti dire: “Mo faire toujours seki faire Li plaisir.” (Jean 8:29) Enn femme ki soumette ar l’autorité so mari par amour ek respé pou Bondié contribué beaucoup pou rann so famille heureux.

Ki bann parent kapav aprann ar fason ki Jésus ti considere bann zenfant?

Jésus ti passe le temps avek bann zenfant ek li ti interessé avek seki zot ti pensé ek ressenti. La Bible dire: “Jésus ti appel bann zenfant, ek ti dire: ‘Laisse bann zenfant vinn vers moi.’ ” (Luc 18:15, 16) Enn fois, bann dimoune ti critik deux-trois garson ki ti pé dire bien fort ki zot ena la foi dan Jésus. Mais Jésus ti felicite sa bann jeune-la ek ti dire bann ki ti critik zot: “Eski jamais zot pa finn lire sa: ‘Dan la bouche bann ti zenfant, ek bann ki encore pé boire avek zot mama, to finn faire louange sorti’?”—Matthieu 21:15, 16.

Ki bann zenfant kapav aprann ar Jésus?

Jésus ti donne enn bon l’exemple lor couma bann zenfant bizin montré l’interet pou bann kitsoz spirituel. Kan li ti ena 12 an, so bann parent ti trouve li “dan temple, li ti pé assizé au milieu bann enseignant, li ti pé ecoute zot ek li ti pé pose zot question.” Ki l’effet sa ti ena? “Tou bann ki ti pé ecoute li ti reste etonné par so l’intelligence ek par so bann reponse.” (Luc 2:42, 46, 47) Pourtant, connaissance ki Jésus ti ena pa ti faire li vinn vantard. Au contraire, sa ti faire li ena respé pou so bann parent. La Bible dire: “Li ti contigne soumette ar zot.”—Luc 2:51.

Pou plus renseignement, guette chapitre 14 dan livre Ki la Bible enseigné vrai-mem? a

[Note]