Apprecié ou role dan congregation
“Bondié inn place bann membre dan enn lekor, sakenn parmi zot, couma sa faire Li plaisir.”—1 COR. 12:18.
1, 2. (a) Couma nou koné ki sakenn dan congregation kapav ena enn role ki li apprecié? (b) Ki bann question nou pou examiné dan sa lartik-la?
DEPUIS lepok bann Israélite, Jéhovah finn donne nourriture spirituel ek direction ki so peuple bizin, a travers la congregation. Par exemple, apré ki bann Israélite ti prend la ville Aï, Josué “ti lire fort tou bann parole dan la Loi, benediction ek malediction, dapré tou seki finn ecrire dan livre la Loi . . . devant congregation Israël en entier.”—Jos. 8:34, 35.
2 Dan premier siecle nou lepok, l’apotre Paul ti dire Timothée, ki ti enn ancien, ki la congregation chretien ti “famille Bondié” ek “enn colonne ek enn support pou la verité.” (1 Tim. 3:15) “Famille Bondié” zordi c’est l’organisation mondial kot ena bann vrai chretien. Dan premier lettre ki Paul ti ecrire bann Corinthien, dan chapitre 12, li compare congregation ar lekor enn dimoune. Li dire ki mem si chaque membre ena enn role different, zot tou zot bien important. Paul ecrire: “Bondié inn place bann membre dan enn lekor, sakenn parmi zot, couma sa faire Li plaisir.” Li mem faire remarké ki “bann membre nou lekor ki nou pensé merite moins l’honneur, sa bannla nou entoure zot avek enn pli grand l’honneur.” (1 Cor. 12:18, 23) Alors, dan congregation, role enn chretien ki agir dan enn fason droite, li pa pli bon ni pli mauvais ki role enn lot chretien fidele. Li zis different. Alors, couma nou kapav trouve nou place dan congregation Bondié ek apprecié sa place-la? Ki bann kitsoz ki kapav ena enn l’effet lor role ki nou ena? Ek couma nou kapav faire ki “tou dimoune trouve bien [nou] bann progré”?—1 Tim. 4:15.
Couma nou kapav montré ki nou apprecié nou role?
3. Cite enn fason couma nou kapav comprend role ki nou ena dan congregation ek nou montré ki nou apprecié sa.
3 Enn fason ki nou kapav comprend role ki nou ena dan congregation ek montré ki nou apprecié sa, c’est kan nou coopere avek tou nou leker ar “l’esclave fidele et avisé” ek so representant, College central. (Lire Matthieu 24:45-47.) Li bon ki nou examine nou-mem ek guetté couma nou reagir ar direction ki nou gagné ar sa l’esclave-la. Par exemple, avek le temps nou finn gagne bann conseil bien precis lor l’habillement ek coiffure, divertissement, ek pou pa servi Internet dan enn mauvais fason. Eski nou obeir sa bann bon conseil-la, pou nou kapav protege nou spiritualité? Ki nou kapav dire lor conseil ki nou gagné pou faire nou l’etude la Bible en famille regulierement? Eski nou finn prend sa conseil-la serieux ek nou finn reserve enn soirée pou sa? Si nou enn celibataire, eski nou reserve le temps pou l’etude personnel la Bible? Ki nou tousel ou-soit nou ena enn famille, Jéhovah pou beni nou si nou suive direction ki sa l’esclave-la donne nou.
4. Ki nou bizin prend compte kan nou prend bann decision dan bann domaine personnel?
4 Certain kapav pensé ki bann domaine couma divertissement, l’habillement ek coiffure c’est bann kitsoz personnel kot chaque chretien kapav prend so prop decision. Mais enn chretien ki’nn voué so la vie ar Jéhovah ek ki apprecié role ki li ena dan congregation, li pa base-li zis lor so bann preference personnel kan li bizin prend bann decision. Li bizin surtout prend compte seki Jéhovah pensé couma finn ecrire dan so Parole, la Bible. Message ki trouve dan la Bible li ‘enn la lampe pou nou lipié, ek enn la lumiere pou nou chemin.’ (Ps. 119:105) Nou montré ki nou sage si nou reflechi aussi couma bann choix ki nou faire dan nou la vie privé ena enn l’effet lor nou ministere ek lor lezot dimoune, ki li dan congregation ek en dehors congregation.—Lire 2 Corinthiens 6:3, 4.
5. Kifer eski nou bizin faire attention pou pa developpe enn l’esprit l’independance?
5 “L’esprit ki pé agir asterla dan bann garson desobeissance” li tellement partout ki li couma l’air ki nou respiré. (Éph. 2:2) Sa l’esprit-la kapav faire nou pensé ki nou pa bizin direction ki l’organisation Jéhovah donne nou. Surement nou pa envie ressemblé Diotréphès ki pa ti ‘accepté nanyin ki l’apotre Jean ti dire, avek respé.’ (3 Jean 9, 10) Nou bizin faire attention pou pa developpe enn l’esprit l’independance. Fodé jamais ki par nou parole ou-soit nou action, nou mank respé ek rebellé kont moyen communication ki Jéhovah pé servi zordi, setadir l’esclave fidele et avisé. (Nomb. 16:1-3) Au contraire, nou bizin apprecié privilege ki nou ena pou coopere avek sa l’esclave-la. Ek finalement, anou faire tou seki nou kapav pou obeir ek pou soumette ar bann ki prend la tête dan nou congregation.—Lire Hébreux 13:7, 17.
6. Kifer nou bizin examine nou situation personnel?
6 Enn lot fason ki nou kapav montré ki nou apprecié role ki nou ena dan congregation c’est kan nou examine bien nou situation personnel ek faire tou seki nou kapav pou ‘glorifié nou ministere’ ek donne l’honneur Jéhovah. (Rom. 11:13) Situation certain permette zot pou faire service pionnier permanent. Lezot servi dan bann different forme service a plein temps: zot servi couma bann missionnaire, surveillant itinerant, ek Béthélite, a travers le monde. Beaucoup frere ek soeur aidé dan construction bann la Salle du Royaume. Majorité bann Témoins de Jéhovah faire tou zot possible pou prend soin zot famille lor plan spirituel ek chaque semaine zot participe autant ki zot kapav dan predication. (Lire Colossiens 3:23, 24.) Nou kapav sur ki, si nou disposé pou faire tou seki nou kapav dan service Bondié ek nou faire tou pou servi Li avek tou nou leker ek nou nâme, touletan pou ena enn place pou nou dan congregation.
Bann kitsoz ki kapav faire enn difference
7. Expliké couma nou situation kapav ena enn l’effet lor role ki nou ena dan congregation.
7 Li bien important ki nou examine nou situation a fond parski, ziska enn certain point, role ki nou ena dan congregation depann lor seki nou ena capacité pou faire ou-soit seki nou gagne droit faire. Par exemple, role ki enn frere ena dan congregation different avek role enn soeur. L’age, la santé, ek lezot kitsoz affecté aussi seki nou kapav faire dan service Jéhovah. Proverbes 20:29 dire: “Beauté bann jeune, c’est zot la force, ek la gloire bann dimoune dan l’age, c’est zot cheveux blanc.” Kitfois bann jeune dan congregation kapav faire plus lor plan physik a cause zot la force, alors ki bann ki pli agé kapav apporte beaucoup dan congregation grace a zot sagesse ek l’experience ki zot ena. Nou bizin aussi pa blié ki tou seki nou kapav faire dan l’organisation Jéhovah nou reussi faire sa grace a faveur Bondié ki personne pa merité.—Actes 14:26; Rom. 12:6-8.
8. Ki l’effet bann desir ena lor seki nou faire dan congregation?
8 Pou montré enn lot kitsoz ki affecté role ki nou ena dan congregation, anou prend l’exemple deux prop soeur. Toulé-deux inn fini zot l’etude secondaire. Zot dan mem situation. Zot parent inn faire tou pou encourage zot pou prend service pionnier permanent apré lekol. Apré ki zot ti gagne zot certificat, enn ti prend service pionnier alors ki lot-la ti commence travail a plein temps. Kifer ti ena sa difference-la? C’est a cause desir ki sakenn ti ena. Finalement, sakenn ti faire seki li ti envie. Eski c’est pa pareil avek la plupart parmi nou? Alors, nou bizin reflechi bien lor seki nou envie faire dan service Bondié. Eski nou kapav augmente le temps ki nou passé dan sa service-la, mem si nou bizin faire bann changement dan nou bann l’habitude?—2 Cor. 9:7.
9, 10. Ki nou bizin faire si nou mank motivation pou faire plus dan service Jéhovah?
9 Mais ki nou kapav faire si nou mank motivation pou faire plus dan service Jéhovah ek nou ena tendance pou faire zis seki bizin dan congregation? Dan lettre ki Paul ti ecrire bann Philippien, li ti dire: “Parski c’est Bondié ki pou so prop plaisir, pé influence zot pou ki zot envie ek zot agir toulé-deux.” Oui, Jéhovah kapav influence nou ek pousse nou pou ki nou ena bann bon desir.—Phil. 2:13; 4:13.
10 Alors, eski nou pa bizin suppliye Bondié pou Li motive nou pou faire so volonté? C’est seki le roi David ti faire. Li ti faire sa la priere-la: “Ah Jéhovah, faire moi konn to bann chemin; enseigne moi to bann sentier. Faire moi marche dan to la verité ek enseigne moi parski to-mem mo Bondié ki sauve moi. Mo’nn mette mo l’espoir en toi, toute longue la journée.” (Ps. 25:4, 5) Pareil couma li, nou aussi nou kapav prié Jéhovah pou motive nou pou nou envie faire seki faire Li plaisir. Kan nou reflechi lor sentiment ki Jéhovah ek so Garson ena kan zot trouve seki nou faire pou zot, nou leker rempli ar reconnaissance. (Mat. 26:6-10; Luc 21:1-4) Sa reconnaissance-la kapav pousse nou pou suppliye Jéhovah pou faire nou envie progressé lor plan spirituel. Prophete Isaïe ti donne enn bon l’exemple lor l’attitude ki nou bizin ena. Kan li ti tann Jéhovah demandé: “Kisannla ki mo pou envoyé, ek kisannla ki pou al pou nou?” Isaïe ti reponn: “Ala mo la. Envoye moi.”—Is. 6:8.
Couma faire bann progré?
11. (a) Ki bien bizin dan bann congregation? (b) Couma enn frere kapav prepare-li pou prend bann responsabilité dan congregation?
11 Pendant l’année service 2008, ti ena 289,678 bapteme. Sa montré ki bien bizin bann frere pou servi dan bann congregation. Couma enn frere bizin reagir kan li konn sa? Li bizin faire zeffort pou rempli bann condition necessaire pou bann assistant ministeriel ek bann ancien, ki mentionné dan la Bible. (1 Tim. 3:1-10, 12, 13; Tite 1:5-9) Ki bann zeffort enn frere bizin faire pou rempli sa bann condition ki mentionné dan la Bible-la? Li bizin participe avek zele dan ministere, prend so bann responsabilité dan congregation avek serieux, travail dur pou ameliore qualité so bann commentaire dan reunion, ek interesse-li personnellement ar lezot. Lerla li pou montré ki li apprecié role ki li ena dan congregation.
12. Couma bann jeune frere kapav montré zot zele pou la verité?
12 Ki bann jeune frere kapav faire, surtout bann adolescent, pou progressé dan congregation? Zot kapav faire zeffort pou augmente zot “sagesse ek capacité pou comprend bann kitsoz spirituel” kan zot faire zeffort pou gagne enn connaissance lor la Bible. (Col. 1:9) Si zot etudié la Bible avek serieux ek participe bien dan reunion, sa pou aide zot. Bann jeune frere kapav aussi montré zot desir pou progressé kan zot faire zeffort pou qualifié-zot pou rente par sa “grand la porte pou l’activité[-la],” ek servi dan plusieurs forme service a plein temps. (1 Cor. 16:9) Kan enn kikenn faire carriere dan service Jéhovah, li gagne vrai-mem enn grand satisfaction dan so la vie, ek sa faire li gagne beaucoup benediction.—Lire Ecclésiaste 12:1.
13, 14. Couma bann soeur kapav montré ki zot apprecié role ki zot ena dan congregation?
13 Bann soeur aussi kapav montré ki zot apprecié privilege pou participe personnellement dan realisation Psaume 68:11. Dan sa verset-la nou lire: “Jéhovah Li-mem dire la parole; bann femme ki annonce la bonne nouvelle zot enn grand l’armée.” Enn fason bien important ki bann soeur kapav montré zot reconnaissance pou role ki zot ena dan congregation c’est kan zot participe dan l’activité pou faire bann disciple. (Mat. 28:19, 20) Alors, kan zot disposé pou faire bann sacrifice pou participe autant ki possible dan zot ministere, bann soeur montré ki zot apprecié beaucoup zot role dan congregation.
14 Kan Paul ti ecrire Tite, li ti dire: “Bann femme agé . . . bizin ena enn conduite ki montré respé pou Bondié, . . . fodé ki zot bann dimoune ki enseigne seki bon; pou ki zot kapav ramenn bann jeune femme a la raison, pou ki bannla content zot mari, content zot zenfant, garde zot capacité pou raisonné, pur, occupe zot lakaz couma bizin, bon, ek soumette ar zot prop mari, pou ki personne pa koz en mal lor parole Bondié.” (Tite 2:3-5) Oui, bann soeur ki mur lor plan spirituel kapav vrai-mem ena enn bon l’influence dan congregation! Kan zot respecté bann frere ki prend la tête dan congregation ek kan zot prend bann bon decision dan domaine l’habillement, coiffure ek divertissement, zot donne lezot enn bon l’exemple ek zot montré ki zot role dan congregation ena enn grand valeur pou zot.
15. Ki enn soeur celibataire kapav faire kan li senti-li tousel?
15 Parfois, bann soeur celibataire kapav gagne difficulté pou comprend role ki zot ena dan congregation. Enn soeur ki ti ena sa sentiment-la, raconté: “Kan enn kikenn pa marié, parfois li senti-li tousel.” Kan ti demann sa soeur-la couma li ti faire face ar sa situation-la, li ti reponn: “La priere ek l’etude aide moi pou comprend mo role dan congregation. Mo etudié bann lartik ki faire moi trouvé couma Jéhovah considere moi. Lerla mo essaye faire tou seki mo kapav pou aide lezot dan congregation. Sa aide moi pou pense lezot au lieu ki mo pense zis mo tousel.” Dan Psaume 32:8, Jéhovah ti dire David: “Mo pou donne toi conseil pendant ki mo garde enn lizié lor toi.” Oui, Jéhovah interessé ar sakenn so bann serviteur, ar bann soeur celibataire aussi, ek Li pou aide zot tou pou comprend zot role dan congregation.
Contigne apprecié ou role!
16, 17. (a) Kifer c’est pli bon decision ki nou finn prend kan nou finn accepté pou forme partie dan l’organisation Jéhovah? (b) Couma nou kapav contigne garde nou place dan l’organisation Jéhovah?
16 Avek amour, Jéhovah inn attire sakenn parmi nou pou nou kapav ena bann bon relation avek Li. Jésus ti dire: “Personne pa kapav vinn vers moi si le Père, ki finn envoye moi, pa attire li.” (Jean 6:44) Parmi bann milliard dimoune ki vive lor la terre, Jéhovah finn invite nou personnellement pou faire partie dan so congregation zordi. Kan nou finn accepté sa l’invitation-la, c’est pli bon decision ki nou finn prend dan nou la vie. Sa inn donne nou la vie enn sens. Eski sa pa faire nou gagne enn grand la joie ek satisfaction parski nou ena enn place dan congregation?
17 Enn psalmiste ti dire: “Jéhovah, mo’nn content place kot to lakaz été.” Li ti dire aussi: “Mo pou deboute dan enn l’endroit plate; parmi bann la foule rassemblé [dan bann congregation, Darby], mo pou beni Jéhovah.” (Ps. 26:8, 12) Vrai Bondié donne sakenn parmi nou enn place dan so l’organisation. Kan nou contigne suive direction ki l’organisation donne nou ek kan nou reste occupé dan service Bondié, nou kapav contigne garde nou place ki ena valeur, dan la congregation.
Eski ou rappel?
• Kifer nou kapav dire ki chaque chretien ena so role dan congregation?
• Couma nou montré ki nou apprecié role ki nou ena dan l’organisation Bondié?
• Ki different kitsoz kapav ena enn l’effet lor role ki nou ena dan congregation?
• Couma bann jeune ek bann adulte kapav montré ki zot apprecié zot role dan l’organisation Bondié?
[Questions d’étude]
[Zimage page 21]
Couma bann frere kapav montré ki zot ena desir pou servi dan congregation?
[Zimage page 22]
Couma bann soeur kapav montré ki zot apprecié role ki zot ena dan congregation?