Imite Jésus—Enseigne avek amour
“Jamais enn lot zom pa finn koz coumsa.”—JEAN 7:46.
1. Couma bann dimoune ti reagir ar fason ki Jésus ti enseigné?
MAZINÉ couma sa ti extraordinaire pou tann Jésus enseigné! Dan la Bible, nou aprann ki l’effet sa ti ena lor bann dimoune ki ti joinde li. Par exemple, dan so l’Evangile, Luc raconté ki bann dimoune dan Nazareth, kot Jésus ti pé resté, “ti etonné par bann parole ki faire plaisir pou tendé, ki ti sorti dan so la bouche.” Matthieu ti ecrire ki bann dimoune ki ti ecoute Jésus kan li ti pé faire so Sermon lor montagne, “ti impressionné par so fason enseigné.” Ek Jean ti faire remarké ki bann zom ki ti gagne l’ordre pou arrete Jésus, ti retourne la main vide, ek zot ti dire: “Jamais enn lot zom pa finn koz coumsa.”—Luc 4:22; Mat. 7:28; Jean 7:46.
2. Ki methode l’enseignement Jésus ti servi?
2 Sa bann zom-la pa ti faire erreur. Pena okenn doute lor la: Jésus ti vrai-mem pli grand Enseignant ki finn existé. Li ti enseigne dan enn fason clair, simple, ek avek enn logik ki personne pa ti kapav contredire. Li ti bien konn servi bann l’exemple ek bann question. Li ti adapté so l’enseignement ar bann ki ti ecoute li, ki zot ti ena enn grand position, ou-soit zot ti bann dimoune ordinaire. Bann verité ki li ti enseigné ti bien facile pou comprend, mais en mem temps zot ti vrai-mem profond. Selman, c’est pa zis sa bann kitsoz-la ki ti faire Jésus enn grand Enseignant.
Qualité ki pli important—L’amour
3. En tant ki enseignant, couma Jésus ti different avek bann chef religieux dan so lepok?
3 Parmi bann scribe ek bann Pharisien, surement ti ena bann zom bien malin ki ti ena connaissance ek capacité pou transmette sa connaissance-la. Ki kitsoz ti faire ki fason ki Jésus ti enseigné ti tellement different avek zot fason enseigné? Bann chef religieux dan sa lepok-la pa ti ena l’amour pou bann dimoune ordinaire. Au contraire, zot ti meprise sa bann dimoune-la, ek ti considere zot couma bann “dimoune maudit.” (Jean 7:49) Mais Jésus li, li ti ena pitié pou sa bann dimoune-la, parski zot ti “gagne maltraité ek zot ti senti-zot perdi pareil couma bann mouton ki pena berger.” (Mat. 9:36) Li ti ena tendresse, compassion, ek bonté. En plus, bann chef religieux pa ti ena enn vrai l’amour pou Bondié. (Jean 5:42) Mais Jésus li, li ti content so Papa ek ti faire So volonté avek plaisir. Bann chef religieux ti deforme bann parole Bondié pou zot prop l’avantage, mais Jésus li, li ti content “parole Bondié”—li ti enseigne sa parole-la, ti explik li, ti defann li, ek ti vive en accord avek bann principe ki ena dan sa parole-la. (Luc 11:28) Oui, l’amour ti forme partie dan personnalité Jésus, ti influence seki li ti enseigné, fason ki li ti agir avek bann dimoune, ek fason ki li ti enseigne zot.
4, 5. (a) Kifer li important ki nou enseigne avek amour? (b) Kan nou enseigné, kifer la connaissance ek capacité aussi zot important?
4 Ki nou kapav dire lor nou? En tant ki bann disciple Christ, nou envie imite li dan nou ministere ek dan nou la vie. (1 Pierre 2:21) Sa vedir ki nou l’objectif c’est pa zis pou partage connaissance ki ena dan la Bible, mais aussi pou reflete bann qualité Jéhovah, surtout so l’amour. Ki nou ena enn grand connaissance ou-soit zis enn ti connaissance-mem, enn grand capacité pou enseigné ou-soit nou limité, l’amour ki nou manifesté pou aide nou touche leker bann dimoune avek ki nou preché. Pou nou vrai-mem efficace kan nou faire bann disciple, nou bizin imite Jésus kan nou enseigne avek amour.
5 Bien sur, pou nou kapav vinn bann bon enseignant, nou bizin konn bien sujet ki nou enseigné ek nou bizin ena bann capacité pou transmette sa connaissance-la. Jésus ti aide so bann disciple pou gagne toulé-deux, ek zordi, Jéhovah aide nou par so l’organisation, pou ki nou kapav gagne sa nou aussi. (Lire Isaïe 54:13; Luc 12:42.) Mais kan-mem, nou bizin ena l’objectif pou enseigne avek nou leker pa zis avek nou l’esprit. Kan connaissance, capacité, ek l’amour marche ensam, nou kapav gagne bann resultat ki donne nou enn grand satisfaction. Alors, dan ki fason nou kapav manifesté l’amour kan nou enseigné? Couma Jésus ek so bann disciple ti faire sa? Anou guette sa.
Nou bizin content Jéhovah
6. Couma nou koz lor enn kikenn ki nou content?
6 Sa faire nou enn grand plaisir pou koz lor bann kitsoz ki nou content. Kan nou koz lor enn kitsoz ki bien important pou nou, bann dimoune kapav trouve nou la joie ek nou l’enthousiasme lor nou figure ek dan bann geste ki nou faire. Sa li surtout vrai kan nou koz lor enn dimoune ki nou content. En general, nou bien envie dire lezot seki nou koné lor sa dimoune-la. Nou loué li, nou honore li, ek nou defann li. Nou faire sa parski nou envie ki lezot aussi content sa dimoune-la ek bann qualité ki li ena, pareil couma nou.
7. L’amour ki Jésus ti ena pou Bondié, ti pousse li pou faire ki kitsoz?
7 Avant ki nou kapav aide lezot pou developpe l’amour pou Jéhovah, nou bizin konn Li ek content Li nou-mem. Apré tou, vrai l’adoration li basé lor l’amour pou Bondié. (Mat. 22:36-38) Jésus inn donne nou enn l’exemple parfait. Li ti content Jéhovah avek tou so leker, so l’esprit, so nâme, ek so la force. Li ti passe kitfois, plusieurs milliard l’année avek so Papa dan le ciel, alors Jésus ti konn Li bien. Ki resultat sa finn ena? Jésus ti dire ki li ‘content so Papa.’ (Jean 14:31) Ti kapav trouve sa l’amour-la dan tou seki Jésus ti dire ek ti faire. Sa ti touletan pousse li pou faire bann kitsoz ki faire Bondié plaisir. (Jean 8:29) Sa ti pousse li pou denonce bann chef religieux ki dan enn fason hypocrite, ti pretann ki zot ti represente Bondié. Sa ti pousse li aussi pou koz lor Jéhovah ek pou aide lezot pou konn Li ek pou content Li.
8. Ki zot l’amour pou Bondié ti pousse bann disciple Jésus pou faire?
8 Pareil couma Jésus, so bann disciple dan premier siecle ti content Jéhovah, ek sa l’amour-la ti pousse zot pou preche la bonne nouvelle avek courage ek zele. Zot ti rempli Jérusalem avek zot l’enseignement, mem si bann chef religieux ki ti ena beaucoup pouvoir, ti opposé ar zot. Bann disciple pa ti kapav arrete koz lor bann kitsoz ki zot ti trouvé ek tendé. (Actes 4:20; 5:28) Zot ti koné ki Jéhovah ti avek zot ek ti pou beni zot—ek vrai-mem Jéhovah ti beni zot! En realité, moins ki 30 an apré la mort Jésus, l’apotre Paul ti kapav ecrire ki la bonne nouvelle ti’nn preché “dan tou creation ki trouve enba le ciel.”—Col. 1:23.
9. Couma nou kapav fortifié nou l’amour pou Bondié?
9 Si nou envie vinn vrai-mem bann bon enseignant, nou aussi nou bizin faire tou pou ki nou contigne fortifié nou l’amour pou Bondié. Couma nou kapav faire sa? Kan nou koz souvent avek Bondié dan la priere. Nou aussi faire nou l’amour pou Li vinn pli fort kan nou etudié so Parole, kan nou lire bann publication biblik, ek kan nou assisté reunion. A mesure ki nou connaissance lor Bondié augmenté, nou leker pou rempli ar l’amour pou Li. Lerla, kan nou montré nou l’amour pou Bondié par nou bann parole ek nou bann action, lezot pou remark sa, ek kitfois sa kapav attire zot vers Jéhovah.—Lire Psaume 104:33, 34.
Nou bizin content seki nou enseigné
10. Ki kitsoz bien important ki faire enn kikenn vinn enn bon enseignant?
10 Enn kitsoz bien important ki faire ki enn dimoune li enn bon enseignant c’est ki li content bann kitsoz ki li enseigné. Li bizin croire ki sa bann kitsoz-la zot vrai, zot important, ek zot ena valeur. Si seki li enseigné ena valeur pou li, bann dimoune ki li enseigné pou trouve so l’enthousiasme, ek sa pou ena enn grand l’effet lor zot. De lot coté, si enn enseignant pa vrai-mem apprecié seki li enseigné, couma li kapav attann ki so bann zeleve pou apprecié seki zot pé tendé? Alors, jamais pa pensé ki ou l’exemple en tant ki enn enseignant Parole Bondié, pena l’importance. Jésus ti dire: “Tou zeleve ki’nn gagne enn l’instruction complet, pou couma so professeur.”—Luc 6:40, La Bible en français courant.
11. Kifer Jésus ti content seki li ti enseigné?
11 Jésus ti content seki li ti enseigné. Li ti koné ki li ti ena bann kitsoz ki ena valeur pou partagé—la verité lor so Papa ki dan le ciel, “bann parole Bondié,” ek “bann parole la vie eternel.” (Jean 3:34; 6:68) Pareil couma enn la lumiere ki eclaire bien fort, bann verité ki Jésus ti enseigné ti denonce seki mauvais ek ti montré ki kitsoz ki ti bon. Sa bann verité-la ti donne l’espoir ek consolation bann dimoune humble ki bann chef religieux ti’nn embeté ek ki ti’nn souffert par Satan le Diable. (Actes 10:38) Nou kapav trouve l’amour ki Jésus ti ena pou la verité, pa zis dan so bann l’enseignement, mais dan tou seki li ti faire.
12. Ki sentiment l’apotre Paul ti ena lor la bonne nouvelle?
12 Pareil couma Jésus, so bann disciple ti tellement content ek apprecié la verité lor Jéhovah ek lor Christ, ki zot bann l’ennemi pa ti kapav empeche zot pou partage sa avek lezot. Paul ti ecrire bann chretien ki ti reste Rome: “Mo ena enn grand desir pou annonce zot la bonne nouvelle . . . Parski mo pa honté a cause la bonne nouvelle; avredir c’est puissance Bondié pou ki tou dimoune ki ena la foi kapav gagne la vie sauve.” (Rom. 1:15, 16) Paul ti considere sa couma enn privilege pou preche la verité. Li ti ecrire: “C’est moi, . . . ki finn gagne sa faveur ki personne pa merité-la, pou ki mo annonce bann nation la bonne nouvelle ki concerne bann richesse Christ ki nou pa kapav comprend.” (Éph. 3:8) Li pa difficile pou mazinn l’enthousiasme ki Paul ti ena kan li ti enseigne lezot lor Jéhovah ek lor So projet.
13. Ki bann raison nou ena pou content la bonne nouvelle?
13 La bonne nouvelle ki trouve dan Parole Bondié permette nou pou konn nou Createur ek pou ena bann bon relation avek Li. Sa bonne nouvelle-la donne nou bann bon reponse lor bann question important ki nou posé dan la vie. Li ena aussi pouvoir pou transforme nou la vie, pou donne nou enn l’espoir, ek pou fortifié nou kan nou gagne bann probleme. En plus, li faire nou koné ki nou pou kapav gagne enn la vie ki ena sens ki jamais pa pou fini. Pena okenn connaissance ki ena plus valeur ou-soit ki pli important ki la bonne nouvelle. Nou finn gagne enn don ki ena enn grand valeur, ki faire nou gagne enn grand la joie. Ek nou la joie vinn pli grand encore kan nou partage sa don-la avek lezot.—Actes 20:35.
14. Couma nou kapav fortifié nou l’amour pou seki nou enseigné?
14 Ki ou kapav faire pou fortifié encore plus ou l’amour pou la bonne nouvelle? Kan ou lire Parole Bondié, faire enn pause de temps en temps pou medite lor seki ou pé lire. Par exemple, maziné ki ou pé accompagne Jésus pendant so ministere lor la terre ou-soit ki ou pé voyagé ensam avek l’apotre Paul. Faire vision ki ou dan le monde nouveau, ek maziné couma la vie pou different. Reflechi lor bann benediction ki ou finn gagné parski ou finn obeir la bonne nouvelle. Si ou garde ou l’amour pou la bonne nouvelle bien fort, bann ki ou enseigné pou senti sa l’amour-la. Alors, nou ena bann bon raison pou nou medite lor seki nou finn aprann ek prend compte seki nou enseigné.—Lire 1 Timothée 4:15, 16.
Nou bizin content bann dimoune
15. Kifer enn enseignant bizin content so bann zeleve?
15 Enn bon enseignant mette so bann zeleve a l’aise pou ki zot bien envie aprann ek participé. Enn enseignant ki ena l’amour, partage la connaissance parski li prend compte vrai-mem so bann zeleve. Li adapté so l’enseignement ar seki zot bizin ek ar zot capacité pou comprend. Li prend en consideration zot capacité ek zot situation. Kan bann enseignant ena enn l’amour coumsa, bann zeleve pou remark sa, ek lerla li enn plaisir pou enseigné ek pou aprann.
16. Dan ki fason Jésus ti montré l’amour pou bann dimoune?
16 Jésus ti montré sa qualité l’amour-la. Pli grand fason ki li’nn montré so l’amour c’est kan li ti donne so la vie parfait en sacrifice pou ki lezot kapav sauvé. (Jean 15:13) Pendant so ministere Jésus ti touletan pré pou aide bann dimoune lor plan materiel ek surtout spirituel. Au lieu ki li ti attann ki bann dimoune vinn vers li, li ti marche plusieurs centaine kilometre pou partage la bonne nouvelle avek zot. (Mat. 4:23-25; Luc 8:1) Li ti ena patience ek li ti comprend bann dimoune. Kan so bann disciple ti bizin ki corrige zot fason pensé, li ti faire sa avek amour. (Marc 9:33-37) Li ti encourage zot kan li ti dire ki li ena confiance ki zot pou vinn bann bon predicateur la bonne nouvelle. Pa’nn ena enn enseignant ki finn ena enn pli grand l’amour ki Jésus. L’amour ki li ti montré pou so bann disciple ti pousse zot pou content li ek pou garde so bann commandement.—Lire Jean 14:15.
17. Couma bann disciple Jésus ti montré zot l’amour pou lezot?
17 Pareil couma Jésus, so bann disciple ti montré enn grand l’amour ek enn grand l’affection pou bann dimoune avek ki zot ti preché. Mem si zot ti bizin endure persecution ek riské zot la vie, zot ti aide lezot ek zot ti reussi preche la bonne nouvelle. Oui, zot ti ena vrai-mem enn grand l’affection pou bann dimoune ki zot ti aidé lor plan spirituel! Sa bann parole Paul-la montré so grand l’affection: “Nou finn montré beaucoup douceur parmi zot, pareil couma enn mama prend soin bann zenfant ki li nourri. Alors, parski nou ti ena enn grand l’affection pou zot, nou ti bien content pou partage avek zot, pa zis bon nouvelle Bondié, mais aussi nou prop nâme, parski nou ti tellement content zot.”—1 Thess. 2:7, 8.
18, 19. (a) Kifer nou disposé pou faire bann sacrifice pou preché? (b) Donne enn l’exemple pou montré ki lezot dimoune remark l’amour ki nou montré.
18 Li pareil aussi dan nou lepok, bann Témoins de Jéhovah preche partout lor la terre pou rod bann dimoune ki envie konn Bondié ek servi Li. Avredir, pendant sa 17 l’année ki’nn passé-la, nou finn passe plus ki enn milliard l’heure chaque l’année pou preché ek pou enseigne bann dimoune—ek nou pé contigne faire sa travail-la. Nou faire sa volontairement, mem si nou l’activité predication demann nou pou sacrifié nou le temps, nou la force, ek nou bann kitsoz materiel. Pareil couma Jésus, nou comprend ki nou bon Papa ki dan le ciel envie ki bann dimoune gagne connaissance ki amenn vers la vie eternel. (Jean 17:3; 1 Tim. 2:3, 4) L’amour pousse nou pou aide bann dimoune sincere pou aprann konn Jéhovah ek pou content Li pareil couma nou.
19 Lezot dimoune remark l’amour ki nou montré. Par exemple, enn soeur ki pionnier en Amérique ecrire bann lettre pou console bann dimoune ki’nn perdi enn membre zot famille ki’nn mort. Enn missié ti reponn li: “Au commencement, mo ti etonné ki enn dimoune faire sa quantité zeffort-la pou ecrire enn lettre enn kikenn ki li pa konn ditou, pou aide li endure so l’epreuve. Mo zis kapav dire ki ou ena l’amour pou ou prochain ek pou Bondié ki guide bann dimoune lor chemin la vie.”
20. Ki quantité li important ki nou enseigne avek amour?
20 Certain finn dire ki kan l’amour ek capacité travail ensam, ou kapav attann pou gagne enn resultat extraordinaire. Kan nou enseigné, nou essaye aide nou bann etudiant pou developpe enn l’esprit ki konn Jéhovah ek enn leker ki content Li. Oui, pou nou kapav vinn bann bon enseignant, nou bizin ena l’amour dan trois domaine—l’amour pou Bondié, l’amour pou la verité, ek l’amour pou bann dimoune. A mesure ki nou developpe sa qualité l’amour-la ek montré sa dan nou ministere, nou pa pou zis gagne la joie ki ena pou donné, mais aussi satisfaction pou koné ki nou pé imite Jésus ek nou pé faire Jéhovah plaisir.
Couma ou pou reponn?
• A mesure ki nou enseigne lezot la bonne nouvelle, kifer li important ki nou ena . . .
l’amour pou Bondié?
l’amour pou seki nou enseigné?
l’amour pou bann ki nou enseigné?
[Questions d’étude]
[Zimage lor page 17]
Ki kitsoz ki ti faire l’enseignement Jésus different avek l’enseignement bann scribe ek bann Pharisien?
[Zimage lor page 20]
Pou nou enseigne bien, nou bizin ena la connaissance, capacité ek surtout, l’amour