“Vini, suive moi”
“Si kikenn envie suive moi, li bizin arrete vive pou li-mem ek li prend so poteau souffrance, jour apré jour ek . . . suive moi.”—LUC 9:23.
1, 2. (a) Ki l’invitation Jésus ti faire? (b) Couma ou finn reponn l’invitation Jésus?
VERS la fin so ministere, Jésus ti preche dan Pérée, enn l’endroit lot coté la riviere Jourdain, dan nord-est Judée. Enn jeune homme ti approche li ek ti demann li seki li ti bizin faire pou gagne la vie eternel. Kan Jésus ti sur ki sa jeune homme-la ti pé bien suive la Loi mosaïk couma bizin, li ti faire li enn l’invitation extraordinaire. Li ti dire li: “Allé, vann tou seki to ena, ek donne sa bann pauvre, ek to pou gagne enn tresor dan le ciel, apré vini, suive moi.” (Marc 10:21) Mazinn enn coup—enn l’invitation pou suive Jésus, sel Garson ki’nn crée direct par Bondié Tout-Puissant!
2 Sa jeune homme-la ti refuse sa l’invitation-la, mais ti ena lezot ki ti accepté. Avant sa, Jésus ti dire Philippe: “Suive moi.” (Jean 1:43) Philippe ti accepté ek plitar li ti vinn enn zapotre. Jésus ti faire mem l’invitation ar Matthieu, ek li aussi li ti accepté. (Mat. 9:9; 10:2-4) En realité, Jésus ti faire sa mem l’invitation-la tou bann ki content la justice kan li ti dire: “Si kikenn envie suive moi, li bizin arrete vive pou li-mem ek li prend so poteau souffrance, jour apré jour ek contigne suive moi.” (Luc 9:23) Sa vedir ki, n’importe kisannla kapav suive Jésus si vrai-mem li envie. Eski ou ena sa desir-la? La plupart parmi nou finn fini accepté sa l’invitation ki Jésus inn faire-la, ek grace a la predication, nou faire sa mem l’invitation-la lezot dimoune.
3. Couma nou kapav evité eloigne-nou tigit par tigit ar Jésus?
3 Malheureusement, certain ki finn manifesté l’interet pou la verité ki trouve dan la Bible, pa contigne etudié. Zot ralenti, ek zot “eloigné tigit par tigit” ar Jésus. (Héb. 2:1) Couma nou kapav evite tombe dan sa piege-la? C’est kan nou demann nou-mem: ‘Pou ki raison mo’nn choisir pou suive Jésus? Ki sa vedir suive Jésus?’ Si nou garde reponse sa deux question-la dan nou l’esprit, sa pou aide nou pou bien determiné pou reste lor sa bon chemin ki nou finn choisir-la. Sa pou aide nou aussi pou encourage lezot pou suive Jésus.
Kifer nou bizin suive Jésus?
4, 5. Kifer Jésus li qualifié pou dirige nou?
4 Prophete Jérémie ti dire: “Mo konn bien, o Jéhovah, ki enn dimoune pa finn crée pou decidé ki chemin li pou prend. Enn dimoune ki pé marché pa finn crée pou dirige so pas.” (Jér. 10:23) L’Histoire inn confirme bann parole Jérémie. Avek le temps, li’nn vinn encore pli clair ki bann dimoune imparfait pa kapav dirige zot-mem bien couma bizin. Nou ti accepté l’invitation pou suive Jésus parski nou’nn aprann ki li qualifié pou vinn nou guide ek ki personne pa kapav faire couma li. Anou guette certain qualification ki Jésus ena.
5 Premierement, c’est Jéhovah Li-mem ki finn choisir Jésus pou vinn le Messie, enn Guide. Kisannla pli koné ki nou Createur ki qualité guide nou bizin? Deuxiemement, Jésus ena bann qualité ki nou kapav admiré ek imité. (Lire Isaïe 11:2, 3.) Li enn l’exemple parfait. (1 Pierre 2:21) Troisiemement, Jésus interesse beaucoup ar bann ki suive li, c’est seki li ti montré kan li ti donne so la vie pou zot. (Lire Jean 10:14, 15.) En plus, en tant ki enn berger ki prend nou soin, li guide nou pou ki nou amenn enn la vie ki pou faire nou heureux asterla ek ki pou faire nou gagne enn l’avenir eternel extraordinaire. (Jean 10:10, 11; Rév. 7:16, 17) Pou sa bann raison-la ek lezot raison encore, nou finn prend enn bon decision kan nou finn choisir pou suive li. Mais, suive Jésus, ki sa impliké?
6. Ki sa impliké pou suive Jésus?
6 Suive Christ vedir plus ki zis dire ki nou bann chretien. Zordi, ena apepré deux milliard dimoune ki dire zot chretien, mais zot action montré ki zot bann ki “pratik seki kont la Loi.” (Lire Matthieu 7:21-23.) Kan bann dimoune interessé ar l’invitation pou suive Jésus, nou explik zot ki dan tou domaine zot la vie, bann vrai chretien vive en accord avek bann l’enseignement ek l’exemple Jésus—ek zot faire sa toulé-jour. Pou montré ki sa impliké, anou examine certain kitsoz ki nou koné lor Jésus.
Imite l’exemple sagesse ki Jésus inn laissé
7, 8. (a) Ki été la sagesse, ek kifer Jésus ti ena sa qualité-la en abondance? (b) Couma Jésus ti manifesté la sagesse, ek couma nou kapav imite li?
7 Jésus ti manifesté beaucoup qualité extraordinaire, mais nou pou examine quatre qualité: so sagesse, so l’humilité, so zele, ek so l’amour. Premierement, anou guette so sagesse, setadir so capacité pou applik connaissance ek l’intelligence dan enn fason pratik. L’apotre Paul ti ecrire: “Tou bann tresor la sagesse ek connaissance inn bien cachiette en [Jésus].” (Col. 2:3) Kot-sa Jésus inn gagne sa qualité sagesse-la? Li-mem li ti dire: “Mo dire sa bann kitsoz-la pareil couma mo Papa finn enseigne moi.” (Jean 8:28) C’est Jéhovah ki ti donne li sa sagesse ki li ti ena-la, alors nou pa etonné ki Jésus ti ena enn bon jugement.
8 Par exemple, Jésus ti servi so bon jugement pou choisir ki qualité la vie li ti pou amené lor la terre. Li ti decidé pou amenn enn la vie simple ki ti fixé zis lor enn sel kitsoz: faire volonté Bondié. Li ti servi so le temps ek so l’energie avek sagesse pou mette le Royaume en premier. Nou suive l’exemple Jésus kan nou faire zeffort pou garde nou ‘lizié simple’ ek evite mette lor nou bann fardeau ki pa necessaire, ki prend nou l’energie ek nou l’attention. (Mat. 6:22) Beaucoup chretien finn prend bann disposition pou simplifié zot la vie pou ki zot kapav consacré plus le temps dan service Jéhovah. Certain finn kapav commence service pionnier. Si ou enn parmi zot, nou felicite ou. Kan nou ‘rod le royaume avant tou kitsoz,’ sa faire nou gagne enn grand la joie ek satisfaction.—Mat. 6:33.
Reste humble pareil couma Jésus
9, 10. Couma Jésus ti montré so l’humilité?
9 Enn deuxieme l’aspect dan personnalité Jésus ki nou pou examiné c’est so l’humilité. Kan bann dimoune imparfait gagne l’autorité, souvent zot developpe enn sentiment superiorité. Enn grand difference avek Jésus, pa vrai? Malgré ki li ti ena enn grand role dan realisation projet Jéhovah, Jésus pa ti ena mem enn ti trace l’orgueil dan li. Ek la Bible encourage nou pou imite li dan sa domaine-la. L’apotre Paul ti ecrire: “Garde sa l’etat d’esprit ki Jésus Christ aussi ti ena-la, ki mem si li ti existé dan forme Bondié, li pa ti pense pou prend place Bondié, setadir pou vinn egal ar Bondié. Non, mais li ti laisse tou, li ti prend forme enn esclave ek li ti vinn pareil couma bann zom.” (Phil. 2:5-7) Ki sa ti impliké?
10 Jésus ti ena enn grand privilege pou reste dan presence so Papa dan le ciel, mais sans hesité, li “ti laisse tou.” Bondié ti transfere so la vie dan ventre enn vierge juif, kot la li’nn developpé pendant neuf mois ziska ki li’nn né couma enn tibaba sans defense dan lakaz enn simple charpentier. Dan lakaz Joseph, Jésus ti grandi, li ti vinn enn jeune garson, ek apré enn adolescent. Li pa ti ena okenn peché. Pourtant, pendant tou so jeunesse li ti soumette ar bann parent ki ti imparfait. (Luc 2:51, 52) C’est vrai-mem enn grand l’humilité, pa vrai?
11. Cite bann fason couma nou kapav imite l’humilité Jésus.
11 Nou imite l’humilité Jésus kan nou pa hesité pou accepté bann responsabilité ki kapav parette pena l’importance. Prend par exemple responsabilité pou preche la bonne nouvelle. Sa l’activité-la kapav parette pena l’importance, surtout kan bann dimoune indifferent, bouffonne nou, ou-soit opposé ar nou. Selman, kan nou perseveré dan sa l’activité-la, nou aide lezot pou accepté l’invitation ki Jésus inn faire pou suive li. Coumsa, nou pé faire tou pou sauve la vie bann dimoune. (Lire 2 Timothée 4:1-5.) Enn lot l’exemple c’est nettoyage nou la Salle du Royaume. Kitfois pendant sa nettoyage-la, nou bizin devide bann poubelle, passe mop, ek nettoye toilette—bann kitsoz ki certain consideré couma enn dernier travail! Mais nou reconette ki garde nou la Salle du Royaume prop faire partie dan nou service sacré. La Salle du Royaume c’est centre vrai l’adoration dan nou l’endroit. Kan nou disposé pou faire sa bann travail-la, nou montré l’humilité ek lerla nou pé suive trace Christ.
Pareil couma Jésus, anou montré ki nou zelé
12, 13. (a) Couma Jésus ti montré so zele, ek ki ti pousse li pou faire sa? (b) Ki pou pousse nou pou zelé dan nou ministere?
12 Anou examine zele ki Jésus ti ena dan so ministere. Jésus ti faire beaucoup kitsoz kan li ti lor la terre. Surement au commencement so la vie, li ti travail avek Joseph, so papa adoptif, couma enn charpentier. Pendant so ministere, Jésus ti faire bann mirak, parmi li ti gueri bann malade ek ressuscite bann dimoune mort. Mais travail principal ki li ti faire c’est preche la bonne nouvelle ek enseigne bann dimoune ki ti disposé pou ecoute li. (Mat. 4:23) En tant ki so bann disciple, nou ena mem travail pou faire. Couma nou kapav suive so l’exemple? Enn kitsoz ki nou kapav faire c’est developpe mem mobile ki Jésus ti ena.
13 C’est surtout l’amour pou Bondié ki ti pousse Jésus pou preché ek pou enseigné. Mais Jésus ti content aussi bann verité ki li ti enseigné. Pou li, sa bann verité-la ti couma bann tresor ki ena enn grand valeur, ek li ti ena enn grand desir pou partage sa avek lezot. Nou, en tant ki “bann ki enseigne en publik,” nou ena mem sentiment. Mazinn inpé certain verité ki ena valeur ki nou finn aprann dan Parole Bondié! Nou konn question ki’nn soulevé lor souveraineté Jéhovah ek couma sa pou reglé. Nou comprend bien seki la Bible enseigné lor condition bann dimoune mort ek lor bann benediction ki pou ena dan le monde nouveau. Sa bann verité-la pa perdi zot valeur, ki nou finn fek aprann zot ou-soit depuis longtemps. Au contraire, zot couma bann tresor ki ena enn grand valeur. (Lire Matthieu 13:52.) Kan nou preche avek enthousiasme ek avek tou nou leker, nou partage avek lezot l’amour ki nou ena pou seki Jéhovah inn enseigne nou.
14. Couma nou kapav imite fason ki Jésus ti enseigné?
14 Remarké aussi couma Jésus ti enseigné. Li ti touletan dirige bann dimoune ki ti ecoute li vers bann l’Ecriture. Souvent li ti commence enn sujet important par sa bann parole-la: “Finn ecrire.” (Mat. 4:4; 21:13) Dan so bann parole ki nou trouvé dan la Bible, li ti cite directement ou-soit li ti faire reference dan enn fason indirect ar plus ki la moitié bann livre ki trouve dan bann l’Écritures hébraïques. Pareil couma Jésus, dan nou ministere nou touletan base nou l’enseignement lor la Bible, ek nou faire tou pou attire l’attention lor la Bible autant ki possible. Dan sa fason-la, nou aide bann dimoune ki ena enn leker sincere pou trouvé par zot-mem ki nou pé enseigne bann pensée Bondié, pa nou prop pensée. Sa faire nou vrai-mem plaisir kan enn kikenn accepté pou lire enn verset la Bible ek pou koz lor valeur ek signification Parole Bondié! Ek kan bann dimoune coumsa accepté l’invitation pou suive Jésus, nou ena enn grand la joie.
Suive Jésus vedir content lezot
15. (a) Ki qualité extraordinaire ki Jésus ena? (b) Kan nou medite lor la, ki l’effet sa kapav ena lor nou?
15 Dernier l’aspect personnalité Jésus ki nou pou examiné, li enn l’aspect ki bien reconfortant—c’est so l’amour pou bann dimoune. L’apotre Paul ti ecrire: “L’amour ki Christ ena, mette enn l’obligation lor nou.” (2 Cor. 5:14) Kan nou medite lor l’amour ki Jésus ena pou l’humanité en general ek pou sakenn parmi nou personnellement, sa touche nou leker ek nou senti-nou obligé suive so l’exemple.
16, 17. Dan ki fason Jésus ti montré so l’amour pou lezot?
16 Couma Jésus ti montré l’amour pou lezot? Li ti disposé pou donne so la vie pou l’humanité ek sa c’est pli grand preuve l’amour ki li’nn montré. (Jean 15:13) Selman, pendant so ministere, Jésus ti aussi montré so l’amour dan lezot fason. Par exemple, li ti mette-li dan place bann ki ti pé souffert. Kan li ti trouve Marie ek lezot dimoune ki ti pé ploré kan Lazare ti mort, li ti bien touché par zot chagrin. Mem si li ti pré pou ressuscite Lazare, Jésus ti tellement touché ki li “pa ti kapav tini, so larme ti coulé.”—Jean 11:32-35.
17 Au commencement ministere Jésus, enn lepreux ti approche li ek ti dire li: “Si vrai-mem to envie, to kapav faire moi vinn pur.” Couma Jésus ti reagir? La Bible raconté: “Li ti rempli ar pitié.” Lerla, li ti faire enn kitsoz extraordinaire. “Li ti envoye so la main, li ti touche li ek li ti dire: ‘Mo envie. Vinn pur.’ Desuite la lepre ki ti lor li, ti disparette ek li ti vinn pur.” Dapré la Loi mosaïk, bann lepreux ti impur, ek Jésus ti bien kapav gueri sa missié-la sans touche li. Pourtant, kan Jésus ti gueri sa lepreux-la, li ti permette-li gagne enn contact physik avek enn lot dimoune, kitfois pou premier fois apré bien longtemps. Sa ti vrai-mem enn action ki rempli ar compassion, pa vrai?—Marc 1:40-42.
18. Couma nou kapav ‘mette-nou dan place nou camarade’?
18 En tant ki bann disciple Christ, nou’nn gagne l’ordre pou montré nou l’amour kan nou ‘mette-nou dan place nou camarade.’ (1 Pierre 3:8) Sa kapav difficile pou nou comprend sentiment enn frere ou-soit enn soeur ki pé souffert a cause enn maladie chronik ou-soit a cause enn depression grave—surtout si jamais nou pa’nn passe par la nou-mem. Jésus li, li ti comprend souffrance bann malade mem si jamais li-mem li pa’nn tombe malade. Couma nou kapav montré ki nou comprend lezot pareil couma Jésus? C’est kan nou ecoute avek patience kan bann ki pé souffert, ouvert zot leker ar nou. Nou kapav aussi demann nou-mem: ‘Si mo ti dan zot situation, ki mo ti pou ressenti?’ Si nou prend compte sentiment lezot, nou pou plus kapav “koz dan enn fason ki pou encourage bann ki deprimé.” (1 Thess. 5:14) Coumsa, nou pou suive Jésus.
19. Dan ki fason l’exemple Jésus influence nou?
19 Li vrai-mem interessant pou etudié bann parole ek bann action Jésus Christ! Plus nou aprann lor li, plus nou envie vinn couma li—ek plus nou envie aide lezot pou faire pareil. Alors, anou trouve plaisir pou suive nou le Roi messianik—asterla ek pou touletan!
Eski ou kapav expliké?
• Couma nou kapav montré sagesse, pareil couma Jésus?
• Dan ki fason nou kapav manifesté l’humilité?
• Couma nou kapav developpe zele pou nou ministere?
• Cite bann fason couma nou kapav imite Jésus kan nou montré l’amour pou lezot.
[Questions d’étude]
[L’encadré lor page 11]
ENN PUBLICATION KI POU AIDE NOU POU IMITE CHRIST
Pendant l’assemblée district 2007, enn livre 192 page ki ena titre “ Viens, suis-moi ” ti parette. L’objectif sa livre-la c’est pou aide bann chretien pou fixé zot l’esprit lor Jésus, surtout lor so bann qualité ek so bann action. Apré deux chapitre introduction, premier partie faire enn resumé lor bann qualité extraordinaire ki Jésus ena—lor so l’humilité, so courage, so sagesse, so l’obeissance ek so l’endurance.
Apré sa, ena bann partie ki koz lor bann activité ki Jésus ti faire en tant ki enn enseignant ek enn predicateur la bonne nouvelle ek lor certaine fason ki li ti manifesté so grand l’amour. Depuis commencement ziska la fin sa livre-la, ena bann renseignement ki pou aide enn chretien imite Jésus.
Nou sur ki sa publication-la pou pousse nou tou pou examine nou-mem ek pou demann nou: ‘Eski mo pé suive Jésus vrai-mem? Couma mo kapav suive li pli bien?’ Sa pou aide aussi ‘tou bann ki ena l’attitude ki bizin pou gagne la vie eternel’ pou vinn bann disciple Jésus.—Actes 13:48.