1. Kan bann Izraelit ti sorti depi Lezip, kouma Moiz ti montre ki li ti ena konfians dan Zeova?

 LIV Ebre koz lor boukou dimounn ki ti ena lafwa dan Zeova. Moiz li enn parmi zot ek li ti ena enn extra gran lafwa. (Ebre 3:2-5; 11:23-25) Li ti ena lafwa kan li ti fer bann Izraelit sorti depi Lezip, ek li pa ti per Faraon ek so larme. Li ti ena foul konfians dan Zeova ek li ti gid bann Izraelit atraver Lamer Rouz ek osi dan dezer. (Ebre 11:27-29) Kan laplipar bann Izraelit ti koumans ena bann dout ki Zeova ti kapav pran zot swin, Moiz ti kontign ena konfians dan Zeova. Ek li ti ena rezon pou ena konfians dan Zeova, parski Zeova ti donn bann Izraelit manze ek delo pou ki zot kapav viv dan sa dezer kot nanye pa ti pe pouse la. a—Ex. 15:22-25; Ps. 78:23-25.

2. Kifer Bondie ti dir Moiz: “Eski lame Zeova tro kourt”? (Nonb 11:21-23)

² Mem si Moiz ti ena enn gran lafwa, apepre enn an apre ki Zeova ti fer bann Izraelit sorti depi Lezip, Moiz ti demann limem si Zeova ti vremem kapav donn bann Izraelit laviann pou manze. Ti ena plis ki 600,000 zom, san kont bann fam ek bann zanfan pou nouri, ek pa ti ena manze mem dan sa dezer-la. Alor, eski Zeova ti pou vremem kapav donn zot tou ase laviann pou manze? Pou reponn sa kestion-la, Zeova ti dir Moiz: “Eski lame Zeova tro kourt?” (Lir Nonb 11:21-23.) Lexpresion “lame Zeova” vedir lespri sin Bondie, ouswa pwisans ki Li servi pou fer so volonte. Alor, kan Zeova ti dir Moiz sa bann parol-la, se koumadir Li ti pe dir Moiz, ‘Eski to panse ki mo pena ase pwisans pou fer seki mo anvi?’

3. Kifer li bien inportan ki nou reflesi lor seki ti ariv Moiz ek bann Izraelit?

 ³ Eski to’nn deza demann tomem si Zeova pou donn twa ek to fami seki zot bizin pou viv? Anou get enn sitiasion kot Moiz ek bann Izraelit ti mank konfians dan Zeova ek zot ti panse ki Li pa ti pou kapav donn zot seki zot bizin. Nou pou get osi sertin prinsip Labib ki pou ogmant nou konfians dan Zeova ek ki pou montre nou ki Zeova pou touletan soutenir nou.

TIR BANN LESON AR LEXANP MOIZ EK BANN IZRAELIT

4. Kifer boukou Izraelit ti koumans panse ki Zeova pa ti pou kapav donn zot seki zot bizin?

⁴ Kifer boukou Izraelit ti koumans panse ki Zeova pa ti pou kapav donn zot seki zot bizin? Sa ti fer inpe letan aster-la ki bann Izraelit ek “enn gran pep tou sort kalite dimounn,” setadir bann dimounn ki ti sorti dan lezot nasion, ti sorti depi Lezip. Zot ti pe marse dan dezer pou al dan Later Promiz. (Ex. 12:38; Det. 8:15) Sa bann dimounn ki sorti dan lezot nasion la ti koumans plin ar lamann ek zot ti koumans plengne. Lerla, bann Izraelit osi ti koumans plengne ansam avek zot (Nonb 11:4-6) Zot ti anvi manz bann manze ki zot ti pe gagne dan Lezip. Ek parski zot ti pe plengn ar Moiz, Moiz ti panse ki se li ki ti bizin al rod laviann pou zot.—Nonb 11:13, 14.

5-6. Bann dimounn ki ti sorti dan bann lezot nasion ti ena enn move linflians lor bann Izraelit. Ki leson sa aprann nou?

⁵ Bann dimounn ki ti sorti dan bann lezot nasion, pa ti ena rekonesans pou tou seki Zeova ti donn zot, ek bann Izraelit ti koumans pans parey kouma zot. Nou osi sa kapav ariv nou. Nou antoure ar bann dimounn ki ingra, ek si nou pa fer atansion, nou osi nou kapav mank rekonesans pou bann kitsoz ki Zeova donn nou. Sa kapav arive osi si nou kontign mazinn bann kitsoz ki nou ti ena avan, ouswa si nou zalou bann kitsoz ki lezot ena. Parkont, nou pou plis ere si nou kontant nou ar bann kitsoz ki nou ena.

⁶ Bann Izraelit ti bizin rapel promes ki Zeova ti fer zot. Li ti promet zot ki Li ti pou donn zot boukou bon kitsoz, pa kan zot ti pou dan dezer, me kan zot ti pou rant dan Later Promiz. Dan mem fason, olie ki nou res konsantre lor bann kitsoz ki nou pena aster-la, nou bizin res konsantre lor bann kitsoz ki Zeova pou donn nou dan lemond nouvo. Nou bizin osi reflesi lor bann verse Labib ki kapav ed nou pou ogmant nou konfians dan Zeova.

7. Kifer nou sir ki Zeova kapav ed nou?

⁷ Kan Zeova ti poz Moiz kestion ki trouv dan Nonb 11:23, kitfwa Li ti anvi ki Moiz reflesi lor de kitsoz: (1) So pwisans pena okenn limit, ek (2) Li kapav servi So pwisans partou kot Li anvi. Alor, Zeova ti kapav donn bann Izraelit kantite laviann ki Li ti anvi, mem si zot ti omilie enn dezer. “Avek so lame for ek so lebra pwisan,” Zeova ti pou montre zot so pwisans. (Ps. 136:11, 12) Ki sa aprann nou? Ninport kotsa nou ete, kan nou gagn bann leprev, nou sir ki Zeova kapav ed nou.—Ps. 138:6, 7.

8. Ki kitsoz kapav ed nou pou nou pa fer mem erer ki bann Izraelit? (Get zimaz osi.)

⁸ Zeova ti tini so promes; Li ti avoy enn gran kantite kay pou ki lepep manze. Selman, bann Izraelit pa ti remersie Zeova pou sa mirak-la. Olie sa, boukou parmi zot ti gourma, zot ti ramas plis ki seki zot kapav manze, ek pandan enn zour edmi, zot ti kontign ramas bann kay. Zeova ti  bien ankoler ar zot parski zot ti “egois,” ek Li ti pini zot. (Nonb 11:31-34) Ki nou kapav aprann ar sa lexanp-la? Nou bizin fer bien atansion ki nou pa tom dan piez pou touletan anvi gagn plis. Mem si nou ris ouswa pov, nou priorite se pou ramas ‘bann trezor dan lesiel’ kan nou kontign fer zefor pou vinn pli pros ar Zeova ek Zezi. (Mat. 6:19, 20; Lik 16:9) Si nou fer sa, nou kapav sir ki Zeova pou touletan donn nou seki nou bizin.

9. Ki kitsoz nou kapav sir?

⁹ Zeova avoy so lame pou ed so bann serviter azordi. Eski savedir ki zame nou pa pou mank kas ouswa manze? b Non. Selman, nou kapav sir ki Zeova zame pa pou abandonn nou. Dan ninport ki sitiasion nou ete, Li pou touletan donn nou lafors ek led ki nou bizin. Kouma nou kapav montre ki nou ena konfians ki Zeova pou donn nou seki nou bizin? Anou get de sitiasion: (1) kan nou gagn bann problem finans, ek (2) kan nou pe kalkile kouma nou pou fer pou ena ase kas pou kan nou vinn vie.

KAN NOU GAGN BANN PROBLEM FINANS

10. Ki bann difikilte nou kapav gagne?

¹⁰ Plis nou koste ar lafin sa lemond-la, plis nou lavi pou vinn dir akoz bann gouvernman, bann lager, bann katastrof, ouswa bann nouvo pandemi. San ki nou  atann, nou kapav perdi nou travay, nou bann dibien, ouswa nou lakaz. Kitfwa osi nou pou bizin al rod enn lot travay dan enn lot landrwa, ouswa pran nou fami pou al res dan enn lot landrwa pou ki nou kapav donn zot seki zot bizin. Dan bann sitiasion koumsa, ki kitsoz kapav ed nou pou pran bann desizion ki montre ki nou ena konfians dan lame Zeova?

11. Kan nou ena bann problem finans, ki kitsoz kapav ed nou? (Lik 12:29-31)

¹¹ Enn premie kitsoz bien inportan ki nou bizin fer, se dir Zeova tou seki pe trakas nou. (Prov. 16:3) Nou bizin osi demann Zeova sazes pou pran bann bon desizion, pou ki nou res kalm ek ki nou pa “trakase plis ki bizin.” (Lir Lik 12:29-31.) Si nou ena zis seki nou bizin pou viv, nou bizin demann Zeova pou ed nou pou kontant nou ar seki nou ena. (1 Tim. 6:7, 8) Nou bizin osi fer bann resers dan bann piblikasion, pou nou kone seki nou kapav fer kan nou ena bann problem finans. Boukou dimounn dir ki bann lartik ek bann video ki ena lor jw.org inn ed zot kan zot ti ena bann problem larzan.

12. Pou ki enn kikenn kapav pran bann bon desizion pou so fami, ki kestion li bizin poz limem?

¹² Sertin inn aksepte enn travay kot zot ti bizin kit zot fami pou al dan enn lot pei. Me bien souvan sa pa ti enn bon desizion. Kan to rod enn nouvo travay, pa pans zis komie kas to pou gagne, me reflesi sirtou si sa travay-la pou ed twa ek to fami pou res pros ar Zeova. (Lik 14:28) To kapav demann tomem: ‘Si mo al lwin ar mo konzwin, ki pou ariv mo maryaz? Eski mo pou reisi gagn tou mo bann renion, predikasion, ek pas ase letan ar mo bann frer ek ser?’ Si to ena bann zanfan, to bizin poz twa sa kestion inportan la osi: ‘Kouma mo pou kapav elve mo bann zanfan “dan disiplinn ek dan bann lavertisman Zeova” si mo pa avek zot?’ (Efe. 6:4) Kan to bizin pran enn desizion, fer zefor pou pans parey kouma Zeova ek pa fer seki to bann fami ek to bann kamarad ki pa konn bann prinsip Labib, pe dir twa fer. c Tony, ki res dan lwes Lazi, inn gagn plizir travay dan plizir pei. Selman, apre ki li ti priye Zeova lor la ek ki li ti koz sa ar so madam, li ti desid pou refiz sa bann travay-la. Olie sa, zot ti fer bann sanzman dan zot lavi ek zot ti diminie zot bann depans. Azordi, Tony dir: “Gras-a desizion ki mo’nn pran, mo’nn kapav ed plizir dimounn pou aprann konn Zeova, ek nou bann zanfan bien kontan servi Zeova. Nou fami inn konpran ki, tanki nou met Matie 6:33 an pratik dan nou lavi, Zeova pou touletan pran nou swin.”

KAN NOU KALKILE KOUMA NOU POU FER POU ENA ASE KAS POU KAN NOU VINN VIE

13. Sit sertin kitsoz ki nou kapav fer depi aster-la mem, pou ki nou kapav pran nou swin kan nou vinn vie.

¹³ Nou kapav osi montre ki kantite konfians nou ena dan Zeova kan nou pran bann dispozision pou kan nou vinn vie. Labib ankouraz nou pou travay dir pou ki nou ena ase kas pou pran nou swin plitar. (Prov. 6:6-11) Alor, si nou kapav, li bon ki nou met enn ti kas dekote pou lavenir. Li vre ki larzan donn enn sertenn sekirite. (Ekle. 7:12) Selman, fode pa ki  nou fer larzan vinn kitsoz ki pli inportan dan nou lavi.

14. Kouma Ebre 13:5 kapav ed nou pou pa trakas plis ki bizin?

¹⁴ Zezi inn servi enn lexanp pou montre ki nou pou bien bet si nou ramas enn ta kas me ki nou pa “ris devan Bondie.” (Lik 12:16-21) Avredir, personn pa kone kouma so lavi pou ete dime! (Prov. 23:4, 5; Zak 4:13-15) Anplis, Zezi ti dir ki tou bann ki anvi vinn so disip bizin pre pou “abandonn” tou bann kitsoz materyel ki zot ena. (Lik 14:33) Dan premie siek, se seki bann Kretien dan Zide ti fer. Zot ti abandonn zot bann dibien ek zot ti fer sa avek lazwa. (Ebre 10:34) Dan nou lepok osi, ena boukou frer ek ser ki’nn aksepte perdi zot bann dibien parski zot pa’nn soutenir bann parti politik. (Rev. 13:16, 17) Ki kitsoz inn ed zot pou fer sa? Zot ti ena foul konfians dan promes Zeova, ki dir: “Zame mo pa pou kit twa, ek zame mo pa pou abandonn twa.” (Lir Ebre 13:5.) Alor, mem si nou fer seki nou kapav pou met inpe larzan dekote pou kan nou vinn vie, kan bann sitiasion ki nou pa atann ariv nou, nou sir ki Zeova pou pran nou swin.

15. Ki fason panse bann paran Kretien bizin ena konsernan zot zanfan? (Get zimaz osi.)

 ¹⁵ Dan sertin kiltir, bann dimounn gagn zanfan sirtou pou ki zanfan-la li travay ek ki li gagn ase kas pou ki li kapav pran zot swin apre. Dan enn sertenn fason, zot zanfan se koumadir zot “plan retret.” Labib dir ki bann paran bizin pran swin zot zanfan. (2 Kor. 12:14) Ek biensir, kan bann paran vinn vie, boukou zanfan pran bann dispozision pou okip zot paran, ek zot bien kontan pou fer sa. (1 Tim. 5:4) Selman, bann paran ki ena konfians dan Zeova, zot konpran ki zot pou pli ere kan zot ed zot zanfan pou vinn bann serviter Zeova, olie ki zot atann ki zot zanfan gagn ase kas pou ki li kapav pran zot swin kan zot vinn vie.—3 Zan 4.

16. Paran, kouma to kapav prepar to zanfan pou li depann lor limem? (Efezien 4:28)

¹⁶ Par to lexanp, montre to zanfan ki to ena konfians dan Zeova. Lerla, amezir ki to pe montre li kouma li kapav debrouy li par limem, li pou konpran ki li bizin fer Zeova konfians. Depi ki li tipti, montre li ki travay dir bien inportan. (Prov. 29:21; lir Efezien 4:28.) Ek amezir ki li grandi, ed li pou fer so best dan lekol. Bann paran Kretien bizin fer bann resers ek rod bann prinsip Labib pou ki zot kapav ed zot zanfan pou pran bann bon desizion konsernan zot ledikasion. Paran, to lobzektif se pou prepar to zanfan pou li aprann depann lor limem, koumsa li pou kapav ena plis letan pou prese, ek kitfwa mem fer pionie.

17. Ki kitsoz nou kapav sir?

¹⁷ Bann fidel serviter Zeova, zot sir ki Zeova ena kapasite ek dezir pou donn zot seki zot bizin. Plis lafin sa lemond-la pe koste, plis nou pou bizin fer Zeova konfians. Alor, ninport ki arive, anou kontign ogmant nou konfians dan Zeova, parski nou kone ki Li pou servi so pwisans pou donn nou seki nou bizin. Nou kapav sir ki so lame for ek so lebra pwisan zame pou tro kourt pou ed nou.