1, 2. Dan bann Lekritir Ebraik, ar ki kitsoz lexpresion ‘ban kot poz lipie’ fer referans?

ZEOVA inn dir: “Lesiel, se mo tronn, ek later se ban kot mo poz mo lipie.” (Iza. 66:1) Li’nn dir osi: “Mo pou glorifie plas kot mo lipie ete.” (Iza. 60:13) Kouma Zeova fer sa? Ki sa bann parol-la vedir pou nou, ki viv dan plas ‘kot Li poz so lipie’?

² Bann Lekritir Ebraik servi osi lexpresion ‘ban kot poz lipie’ dan enn fason sinbolik pou dekrir ansien tanp Izrael. (1 Kro. 28:2; Ps. 132:7) Sa tanp-la ti reprezant sant vre ladorasion ek se pou sa rezon la ki li ti vremem zoli pou Zeova. Lexistans mem sa tanp-la ti glorifie plas kot Zeova poz so lipie, setadir later.

3. Ki ete gran tanp spiritiel, ek kan li’nn koumans existe?

³ Zordi nepli ena enn tanp literal lor later ki reprezant sant vre ladorasion. Selman, ena enn tanp sinbolik, enn tanp spiritiel ki glorifie Zeova kouma okenn batiman lor later pa kapav fer. Ki ete sa tanp sinbolik-la? Se dispozision ki Bondie pran pou permet bann dimounn rekonsilie avek Li, gras-a sakrifis Zezi ek so pozision antan ki Gran Pret. Sa gran tanp spiritiel-la inn koumans existe lane 29 Nou Lepok kan Zezi ti  pran batem ek Zeova ti swazir li pou vinn Gran Pret.—Ebre 9:11, 12.

4, 5. (a) Kouma Psom 99 dekrir gran dezir tou bann adorater Zeova? (b) Ki kestion nou bizin demann noumem?

⁴ Nou bien rekonesan pou sa dispozision ki Zeova inn pran la. Sa pous nou pou donn Li laglwar kan nou fer lezot konn so nom ek laranson, don extraordiner ki Li’nn fer nou dan so bonte. Nou extra kontan kan nou kone ki plis ki wit milyon vre Kretien zordi pe glorifie Zeova avek zel! Alor ki boukou dimounn krwar ki se apre zot lamor ki zot pou loue Bondie dan lesiel, nou, bann Temwin Zeova, nou kone ki se asterla mem ek isi mem lor later ki nou bizin loue Bondie.

⁵ Se koumsa ki nou swiv lexanp bann fidel serviter Zeova ki mansione dan Psom 99:1-3, 5. (Lir. *) Parey kouma nou trouve dan sa psom-la, Moiz, Aaron, ek Samiel ti soutenir avek tou zot leker dispozision ki ti pran pou vre ladorasion dan zot lepok. (Ps. 99:6, 7) Zordi, bann Kretien ki pou al servi kouma pret dan lesiel ansam avek Zezi, pe servi Zeova avek fidelite lor later, dan lakour tanp spiritiel. Plizir milyon “lezot brebi” pe soutenir zot. (Zan 10:16, NW.) Mem si sa de group la pena mem lesperans, sa pa anpes zot ador Zeova dan linite lor later. Selman, personelman li bon nou demann noumem: ‘Eski mo pe soutenir avek tou mo leker dispozision ki Zeova pran pou vre ladorasion?’

6, 7. Ki problem ti ena dan premie siek, ek ki Zeova inn bizin fer plizir siek apre?

⁶ Mwins ki enn siek apre kongregasion Kretien ti forme, lapostazi ti fane partou parey kouma ti anonse. (Zist. 20:28-30; 2 Tes. 2:3, 4) Apre sa, li ti vinn deplizanpli difisil pou kone kisannla vremem pe servi Bondie dan so tanp spiritiel. Me plizir siek plitar, Zeova ti met tou okler par mwayin Zezi, nouvo Lerwa ki Li’nn etabli.

⁷ An 1919, li ti fasil pou idantifie kisannla ena faver Zeova ek pe servi Li dan so tanp spiritiel. Kifer? Parski Bondie ti pirifie zot ek zot ti fer bann sanzman pou ki Li aksepte zot ladorasion. (Iza. 4:2, 3; Mal. 3:1-4) Alor, seki lapot Pol ti’nn trouve dan enn vizion plizir siek alavans, ti koumans realize.

8, 9. Ar ki trwa kitsoz “paradi” ki Pol ti trouve dan enn vizion fer referans?

⁸ Pol dekrir so vizion dan 2 Korintien 12:1-4. (Lir.) Li apel sa enn revelasion. Seki li trouve, se pa enn kitsoz ki existe dan so lepok, me enn kitsoz ki pou arive dan lavenir. Kan Pol ti “mont ziska trwaziem lesiel,” ki “paradi” li ti trouve? Premierman, sa paradi-la kapav fer referans ar paradi ki pou ena lor later. (Lik 23:43) Deziemman, li kapav fer referans ar paradi spiritiel ki nou pou profite dan enn fason konple dan lemond nouvo. Ek trwaziemman, li kapav fer referans ar bann kondision extraordiner ki ena dan lesiel, dan “paradi Bondie.” (Rev. 2:7, NW.) Toule-trwa pou existe dan lavenir.

⁹ Me kifer Pol dir ki “li ti tann bann kitsoz ki pa kapav exprime, ek ki okenn imin pa kapav [“pena drwa,” NW] repete”? Parski pa ti ankor ler pou li explik an  detay bann kitsoz merveye ki li ti trouve dan sa vizion-la. Me zordi, nou kapav, nou ena drwa koz lor bann benediksion extraordiner ki pep Bondie pe kone!

10. Ki diferans ena ant “paradi spiritiel” ek “tanp spiritiel”?

¹⁰ Souvan nou servi lexpresion “paradi spiritiel.” Me, eski ena enn diferans ant “tanp spiritiel” ek “paradi spiritiel”? Wi. Tanp spiritiel se dispozision ki Bondie inn pran pou vre ladorasion. Parkont, “paradi spiritiel” se lanvironnman ouswa kondision spiritiel inik ki existe dan pep Bondie, ek ki permet zot res anpe avek Li ek avek zot bann frer. Se sa kondision spiritiel-la ki idantifie bann ki ena faver Bondie ek pe servi Li dan so tanp spiritiel zordi.—Mal. 3:18.

11. Ki privilez nou ena zordi?

¹¹ Nou bien kontan ki depi 1919, Zeova inn permet bann imin inparfe travay ansam avek Li pou kiltiv, ranforsi, ek agrandi paradi spiritiel ki ena lor later! Eski to pe donn enn koudme dan sa travay extraordiner la? Eski to santi twa motive pou travay ansam avek Zeova pou glorifie ‘plas kot so lipie ete’?

12. Ki konfians nou ena kan nou trouv realizasion Izai 60:17? (Get zimaz koumansman lartik.)

¹² Profet Izai ti anonse ki pou ena bann sanzman extraordiner dan parti lorganizasion Zeova lor later. (Lir Izai 60:17. *) Bann zenn ouswa bann ki nouvo dan laverite sirman finn lir ouswa finn tann koz lor sa bann sanzman-la. Me boukou nou bann frer ek ser finn gagn privilez pou viv sa personelman! Pou zot, pena okenn dout ki Zeova pe gid ek pe diriz so lorganizasion par mwayin Zezi, Lerwa ki Li’nn etabli! Se sa ki fer zot ena enn konfians total an Zeova. Kan nou tann lexperyans sa bann Kretien-la, sa fortifie nou lafwa ek nou konfians an Zeova.

13. Dapre Psom 48:12-14 ki responsabilite nou ena?

¹³ Mem komie letan nou dan laverite, nou ena responsabilite pou fer lezot konn lorganizasion Zeova. Eski se pa enn mirak ki dan sa lemond kot pena lamour la, ena enn paradi spiritiel? Alor, avek lazwa anou fer ‘bann zenerasion apre nou’ konn laverite lor sa paradi spiritiel-la ek lor bann kitsoz extraordiner konsernan “Sion,” setadir lorganizasion Zeova.—Lir Psom 48:12-14. *

14, 15. Ki sanzman finn ena pandan bann lane 1970, ek ki bienfe sa finn amene?

¹⁴ Boukou frer ek ser aze finn temwin bann sanzman ki’nn ena dan parti lorganizasion Zeova lor later pou fer li vinn pli zoli. Zot rapel lepok kan ti ena enn serviter kongregasion olie enn komite bann ansien dan kongregasion, kan ti ena enn serviter biro nasional olie enn Komite Biro Nasional dan bann pei, ek kan se prezidan Watch Tower Society ki ti donn bann direksion olie Komite Santral bann Temwin Zeova. Li vre ki sa bann frer bien devwe la ti gagn soutien lezot frer. Me an realite, se zis enn  sel dimounn ki ti pe pran desizion dan kongregasion, dan biro nasional ek dan biro mondial. Pandan bann lane 1970, finn ena bann sanzman. Olie enn sel dimounn pran tou desizion, asterla se enn group ansien ki ena sa responsabilite-la.

¹⁵ Eski sa bann sanzman-la inn amenn bann bienfe? Wi, ek li normal parski avek letan bann Kretien inn konpran pli bien bann Lekritir. Olie lopinion enn sel ansien, asterla lorganizasion kapav profit lexperyans ek bann zoli kalite tou bann ansien, setadir bann “don” ki Bondie inn done.—Efe. 4:8; Prov. 24:6.

16, 17. Ki bann dernie sanzman ki’nn pli inpresionn twa, ek kifer?

¹⁶ Pans osi bann sanzman ki finn ena pa tro lontan an rapor avek nouvo look, konteni ek fason ki nou propoz nou bann piblikasion. Pena dout ki to kontan pou prezant bann piblikasion bien atiran ki donn bann konsey pratik! Pans osi bann nouvo teknolozi ki nou servi pou pres bonn nouvel, kouma par exanp sit jw.org. Gras-a sa sit-la, partou, bann dimounn ki dezespere kapav gagn led ki zot bizin. Tou sa bann sanzman-la montre ki Zeova vremem interese ar bann dimounn!

¹⁷ Fode pa nou bliye osi sanzman ki’nn ena an rapor avek bann renion. Asterla nou ena plis letan pou fer nou Ladorasion an Fami ouswa letid personel. Nou’nn trouv vremem sazes ki ena deryer sa sanzman-la. Nou apresie osi sanzman an rapor avek bann lasanble. Sak lane, noumem nou dir ki bann lasanble pe vinn deplizanpli interesan! Nou bien rekonesan osi pou formasion ki lorganizasion pa pe aret donn nou atraver bann lekol teokratik. Dan tou sa bann sanzman-la  nou trouv lame Zeova! Tigit par tigit, Li fer so lorganizasion ek nou paradi spiritiel vinn pli zoli ankor!

18, 19. Ki nou kapav fer pou nou paradi spiritiel vinn pli zoli?

¹⁸ Zeova inn fer nou enn loner: Li permet nou fer nou paradi spiritiel vinn pli zoli. Me kouma nou kapav fer sa? Enn fason se kan nou pres bon nouvel lor Rwayom Bondie avek zel ek fer bann disip. Sak fwa nou ed enn dimounn vinn enn serviter Bondie, se koumadir nou pe amenn nou blok pou agrandi nou paradi spiritiel.—Iza. 26:15; 54:2.

¹⁹ Enn lot fason osi se kan nou fer zefor pou kontign amelior nou personalite. Koumsa, sa paradi-la vinn pli zoli pou gete ek atir bann dimounn. Bien souvan se pa zis nou konesans lor Labib ki atir enn dimounn an premie. Me se plito pirte ek lape ki ena parmi nou ki atir li ar lorganizasion, ek apre ar Zeova ek Zezi.

20. Dapre Proverb 14:35, kouma nou bizin touletan azir?

²⁰ Mazine kouma Zeova ek Zezi kontan kan zot get nou paradi spiritiel zordi! Lazwa ki nou resanti asterla amezir ki nou fer zefor pou fer sa paradi spiritiel la vinn pli zoli, li zis enn avangou seki pe atann nou. Sa enn nanye ditou konpare ar lazwa ki nou pou gagne kan nou pou fer later vinn enn paradi. Li bon nou rapel seki Proverb 14:35 dir: “Lerwa apresie enn serviter ki azir avek bon zizman.” Alor, anou touletan azir avek bon zizman ek kontign travay dir pou fer nou paradi spiritiel vinn pli zoli ankor!