1, 2. Kouma Jéhovah kominik avek so bann serviter?

 TOUTLONG listwar, Jéhovah inn gid bann dimounn dan diferan fason. Avek sertin, Bondie ti koz atraver bann anz, bann vizion ouswa bann rev pou revel zot seki ti pou arive dan lavenir. Jéhovah ti osi donn zot bann travay presi. (Nomb. 7:89; Ézék. 1:1; Dan. 2:19) Lezot ti gagn bann linstriksion atraver Jéhovah so bann reprezantan imin ki ti servi dan parti vizib so lorganizasion. Mem si Jéhovah ti servi diferan fason pou kominik avek so pep, bann ki ti ekout so bann linstriksion ti gagn benediksion.

² Azordi, Jéhovah gid so pep par mwayin Labib, so lespri sin ek kongregasion. (Actes 9:31; 15:28; 2 Tim. 3:16, 17) Bann konsey ki Jéhovah donn nou telman kler ki se koumadir ‘nou zorey pe tann enn parol deryer nou, ki dir: “Ala semin-la. Mars ladan.”’ (Is. 30:21) Ofet, Jésus osi fer nou tann lavwa Jéhovah kan li diriz kongregasion par “lesklav fidel ek saz.” (Mat. 24:45) Nou bizin swiv avek serye konsey ek direksion Jéhovah, parski se zis kan nou obeir ki nou pou gagn lavi eternel.​—Héb. 5:9.

3. Ki kitsoz kapav anpes nou obeir bann linstriksion Jéhovah? (Get zimaz dan koumansman lartik.)

³ Lobzektif Satan Lediab se pou anpes nou tann bann linstriksion Jéhovah ki permet nou gagn lavi sov. Anplis, nou ‘leker ki tret’ kapav anpes nou obeir Jéhovah dan enn fason konple.  (Jér. 17:9) Alor, anou gete kouma nou kapav sirmont bann obstak ki kapav anpes nou ekout lavwa Jéhovah. Anou gete osi kouma enn bon kominikasion avek Jéhovah pou protez nou relasion avek Li dan ninport ki sitiasion.

4. Kouma Satan esey inflians fason panse bann dimounn?

⁴ Satan esey inflians fason panse bann dimounn par bann fos linformasion ek bann lide ki anbet zot. (Lir 1 Jean 5:19.) Partou dan lemond​—mem dan bann rezion pli lwin​—bann zournal, liv, magazinn, ek osi radio, televizion ek Internet fann bann linformasion. Mem si bann media donn bann linformasion interesan, souvan zot ankouraz bann dimounn pou ena enn kondwit ek pou swiv bann prinsip ki al kont bann prinsip Jéhovah. (Jér. 2:13) Par exanp, zot dir ki pena nanye demal ki de dimounn mem sex marye, ek boukou dimounn panse ki seki Labib dir lor lomosexialite li tro strikt.​—1 Cor. 6:9, 10.

5. Kouma nou kapav evit les nou inflianse par bann fos lide ki Satan pe repann?

⁵ Kouma bann ki kontan prinsip Bondie kapav evit les zot inflianse par bann fos lide ki Satan pe repann zordi? Kouma zot kapav fer diferans ant seki bon ek seki pa bon? ‘Se kan zot res lor zot gard dapre parol Bondie’! (Ps. 119:9) Dan Parol Bondie ena bann konsey bien inportan ki permet nou fer diferans ant bann vre linformasion ek bann linformasion ki kapav anbet nou. (Prov. 23:23) Jésus ti sit bann Lekritir Ebraik kan li ti dir ki “enn dimounn bizin viv . . . avek tou parol ki sorti dan labous Jéhovah.” (Mat. 4:4) Nou bizin aprann kouma pou met an pratik bann prinsip Labib dan nou lavi. Par exanp, bien avan ki Moïse ti ekrir lalwa Jéhovah konsernan ladilter, Joseph ki ti enn zenom ti konpran ki sa ti enn pese kont Bondie. Zame li pa’nn pans pou dezobeir Jéhovah kan madam Potiphar ti tant li pou fer seki pa bon. (Lir Genèse 39:7-9.) a Mem si madam Potiphar ti met presion lor li pandan enn bon bout letan, Joseph pa ti les lavwa sa madam-la anpes li tann lavwa Bondie. Pou ki nou reisi fer diferans ant seki bon ek seki pa bon, li bien inportan ki nou ekout lavwa Jéhovah ek pa ekout bann fos lide ki Satan pe kontign fane.

6, 7. Ki nou bizin fer pou pa ekout bann move konsey Satan?

⁶ Lemond telman ranpli ar bann lansegnman ek bann doktrinn relizie kontradiktwar ki boukou dimounn panse ki li pa vo lapenn rod vre relizion. Selman, Jéhovah donn so bann linstriksion dan enn fason  bien kler pou bann ki vremem anvi profit sa. Nou bizin deside kisannla nou pou ekoute. Li preske inposib pou ekout de lavwa anmemtan, alor nou bizin ‘konn lavwa’ Jésus ek ekout li. Se limem ki Jéhovah inn etabli lor So bann brebi.​—Lir Jean 10:3-5.

⁷ Jésus ti dir: “Pran bien kont seki zot pe tande.” (Marc 4:24) Bann konsey Jéhovah fasil pou konpran ek fer nou gagn bann bienfe, selman nou bizin pran kont ek ekout sa bann konsey-la. Ek nou pou kapav fer sa kan nou prepar nou leker pou aksepte zot. Si nou pa fer atansion, nou kapav ekout bann move konsey Satan olie ki nou ekout bann konsey ki Bondie donn nou avek amour. Fode zame ou les bann lamizik, fim, emision televizion, liv, kamarad, bann profeser, ouswa bann swadizan exper sa lemond-la kontrol ou lavi.​—Col. 2:8.

8. (a) Kouma bann tandans nou leker kapav fer nou tom dan piez Satan? (b) Ki kapav ariv nou si nou pa pran kont bann lavertisman?

⁸ Satan kone ki nou ena tandans pou fer pese, ek li esey pous nou pou satisfer nou bann move dezir. Kan Satan pous nou pou fer sa, li vinn vremem difisil pou gard nou lintegrite. (Jean 8:44-47) Kouma nou kapav gard nou lintegrite? Pran lexanp enn dimounn ki’nn satisfer so prop dezir ek ki finalman inn fer enn move kitsoz ki zame li ti pans pou fer. (Rom. 7:15) Ki finn amenn li dan sa move sitiasion-la? Kitfwa tigit-tigit sa dimounn-la finn aret ekout lavwa Jéhovah. Swa li pa’nn remark bann sign ki ti pe averti li ki so leker pe elwagne ar Jéhovah, swa li’nn deside pou pa pran zot kont. Par exanp, kitfwa li’nn aret fer lapriyer, pa tro sorti predikasion, ouswa koumans rat bann renion. Alafin, li’nn les li antrene par so bann dezir ek li’nn fer seki li ti kone pa bon. Nou kapav evit fer enn erer grav koumsa si nou pran kont bann lavertisman ek azir deswit pou redres nou sitiasion. Ek si nou ekout lavwa Jéhovah, nou pou rezet bann lide aposta.​—Prov. 11:9.

9. Si nou ena kit tandans pou fer seki pa bon, kifer li bien inportan ki depi boner nou remark sa?

⁹ Si depi boner dekouver maladi enn dimounn, sa kapav sov so lavi. Li parey, si nou remarke ki nou ena kit tandans pou fer seki pa bon, nou bizin azir deswit avan ki Satan “may [nou] vivan pou . . . fer so volonte.” (2 Tim. 2:26) Ki nou bizin fer si nou remarke ki tigit-tigit nou’nn les nou bann panse ek nou bann dezir al kont bann prinsip Jéhovah? San perdi letan, avek imilite nou bizin retourn ver Jéhovah, ouver bien nou zorey pou ekout  so bann konsey ek aplik zot avek tou nou leker. (Is. 44:22) Si nou pran enn move desizion, sa kapav les enn sikatris bien profon ki kapav fer nou gagn bann konsekans bien grav. Alor, li pli bon ki nou pa elwagn nou ar Jéhovah ek azir deswit pou evit fer bann erer grav!

10, 11. (a) Ki montre ki enn dimounn ena lorgey? (b) Ki leson nou aprann ar lexanp Qorah, Dathân, ek Abiram?

¹⁰ Nou bizin rekonet ki nou leker kapav elwagn nou ar Jéhovah. Nou bann tandans pou fer pese ena vremem enn gran linflians lor nou! Par exanp, anou gete kouma lorgey ek lanvi pou gagn plis kapav anpes nou ekout Jéhovah ek antrenn nou dan enn move semin. Enn dimounn ki ena lorgey panse ki li pli siperyer ki lezot. Li kapav panse ki li ena drwa fer tou seki li anvi ek ki personn pena drwa dir li seki li bizin fer. Alor, li kapav panse ki li pa bizin swiv konsey bann frer ek ser, konsey bann ansien, ouswa mem konsey lorganizasion Bondie. Sa kalite dimounn-la tann lavwa Jéhovah bien dousman.

¹¹ Kan bann Izraelit ti dan dezer, Qorah, Dathân, ek Abiram ti rebel kont lotorite Moïse ek Aaron. Parski zot ti ena lorgey, zot ti pran bann dispozision pou ador Jéhovah kouma zot zot ti anvi. Ki Jéhovah ti fer? Li ti touy zot. (Nomb. 26:8-10) Vremem, sa zistwar-la ansegn nou enn leson bien inportan! Si nou rebel kont Jéhovah nou pou gagn bann move konsekans. Anou rapel osi ki “avan larwinn, ena lorgey.”​—Prov. 16:18; Is. 13:11.

12, 13. (a) Donn enn lexanp pou montre kouma lanvi pou gagn plis kapav fer enn dimounn gagn bann move konsekans. (b) Explike kouma lanvi pou gagn plis kapav grandi bien vit si nou pa derasinn li dan nou leker.

¹² Ki nou kapav dir konsernan enn dimounn ki ena lanvi pou gagn plis. Se enn dimounn ki panse li kapav pran bann kitsoz ki pa pou li ek ki depas limit. Apre ki profet Élisha ti geri lalep Naamân, sef larme bann Sirien, Naamân ti ofer li bann kado. Me Élisha ti refiz so kado. Selman Guéhazi, serviter Élisha, ti anvi gagn sa bann kado-la. Guéhazi ti dir ar limem: “Parey kouma Jéhovah vivan, vremem mo pou galoup deryer [Naamân] ek mo pou pran enn kitsoz ar li.” San ki Élisha kone, li ti galoup deryer Naamân ek li ti koz manti pou gagn “enn talan larzan ek de resanz linz.” Ki ti ariv Guéhazi kan li ti fer sa ek kan li ti koz manti ar profet Élisha? Akoz so lanvi pou gagn plis, Guéhazi ti gagn lalep ki Naamân ti ena.​—2 Rois 5:20-27.

¹³ Lanvi pou gagn plis kapav vini tigit-tigit, ek si nou pa derasinn li, li kapav grandi bien vit ziska ki li detrir nou. Lexanp Akân montre bien ki pouvwar sa dezir-la kapav ena. Gete ki vites sa dezir-la inn grandi dan so leker. Li ti dir: “Kan mo ti trouv enn zoli linz ofisiel ki sorti Shinéar ek 200 sik larzan ek enn bar an-or ki pez 50 sik, parmi bann dibien, mo ti anvi gagn zot, alor mo ti pran zot.” Olie ki li ti rezet so move dezir, Akân ki ti anvi gagn plis, ti kokin sa bann dibien-la ek ti kasiet zot dan so latant. Kan ti dekouver move aksion Akân, Josué ti dir li ki Jéhovah ti pou amenn enn maler lor li. Mem zour, ti lapid Akân ek so fami ziska zot mor. (Jos. 7:11, 21, 24, 25) Ninport kisannla parmi nou kapav devlop lanvi pou gagn plis parey kouma Akân. Alor, anou “fer atansion ar tou sort kalite lanvi exazere.” (Luc 12:15) Detanzantan nou kapav ena bann move panse, me li bien inportan ki nou kontrol nou lespri ek pa les nou bann dezir grandi ziska ki li pous nou fer pese.​—Lir Jacques 1:14, 15.

14. Ki nou bizin fer si nou remarke ki nou ena tandans pou ena lorgey ouswa ki nou ena lanvi pou gagn plis?

 ¹⁴ Lorgey ek lanvi pou gagn plis kapav fer nou gagn bann move konsekans. Si nou reflesi lor sa bann konsekans-la, sa pou ed nou pou kontign ekout lavwa Jéhovah. (Deut. 32:29) Dan Labib, Jéhovah pa zis dir nou ki semin nou bizin swiv, me Li osi explike ki bann bienfe nou pou gagne si nou mars dan sa semin-la ek ki bann konsekans nou pou gagne si nou pran enn move semin. Wi, si lorgey ouswa lanvi pou gagn plis pe pous nou pou fer enn move kitsoz, li bon ki nou pans lor bann konsekans! Nou bizin reflesi kouma nou move aksion kapav afekte noumem, bann ki nou kontan ek sirtou nou relasion avek Jéhovah.

15. Ki nou kapav aprann ar lexanp Jésus?

¹⁵ Jéhovah anvi seki pli bon pou nou. (Ps. 1:1-3) Li donn nou bann bon konsey dan ler ki bizin. (Lir Hébreux 4:16.) Mem si li ti parfe, Jésus ti trouv sa inportan pou koz regilierman avek Jéhovah, ek li ti priye Li souvan. Jéhovah ti soutenir ek ti gid Jésus dan bann fason extraordiner. Jéhovah ti avoy bann anz pou soutenir li, ti ed li gras-a So lespri sin, ek ti gid li pou swazir so 12 zapot. Depi lesiel Jéhovah ti koze pou montre ki Li ti soutenir ek ti aksepte Jésus. (Mat. 3:17; 17:5; Marc 1:12, 13; Luc 6:12, 13; Jean 12:28) Parey kouma Jésus, nou osi nou bizin priye Bondie avek tou nou leker. (Ps. 62:7, 8; Héb. 5:7) Gras-a lapriyer, nou pou kapav gard enn bon kominikasion avek Jéhovah ek nou pou kapav amenn enn lavi ki donn Li loner.

16. Kouma Jéhovah ed nou pou ekout so lavwa?

¹⁶ Li fasil pou gagn bann konsey Jéhovah, me Jéhovah pa fors personn pou swiv sa bann konsey-la. Nou bizin demann Li so lespri sin, ek san ezite li pou donn nou sa. (Lir Luc 11:10-13.) Selman, li bien inportan ki nou ‘fer atansion ar fason ki nou ekoute.’ (Luc 8:18) Par exanp, si nou ena tandans pou komet limoralite, li pou ipokrit si nou demann Jéhovah led pou rezet sa tandans-la, alor ki nou kontign get pornografi ouswa bann fim imoral. Ofet, nou bizin al dan bann plas kot ena lespri Jéhovah, par exanp dan bann renion kongregasion. Boukou serviter Jéhovah inn evit bann move konsekans kan zot inn ekout Jéhovah pandan bann renion. Sa inn ed zot pou trouv bann move dezir ki ti pe devlope dan zot leker ek pou koriz sa bann tandans-la.​—Ps. 73:12-17; 143:10.

17. Kifer li danzere ki nou kont lor noumem?

¹⁷ Anou get lexanp David ki ti Lerwa Israël dan lepase. Kan li ti enn zenn garson, li ti gagn viktwar lor Goliath, enn zean Filistin. David ti vinn enn solda, enn lerwa, enn kikenn ki ti protez so pep ek ki ti pran desizion pou zot. Me kan David ti kont lor limem, so leker ti tronp li ek ti fer li komet enn pese grav avek Bath-Shéba, ek David ti mem fer touy Ouriya, misie Bath-Shéba. Kan David ti gagn disiplinn, avek imilite li ti aksepte so erer ek ti fer zefor pou regagn bann bon relasion avek Jéhovah.​—Ps. 51:4, 6, 10, 11.

18. Ki kapav ed nou pou kontign ekout lavwa Jéhovah?

¹⁸ Anou swiv konsey ki trouv dan 1 Corinthiens 10:12 ek evit ena enn tro gran konfians an noumem. Parski nou pa kapav ‘diriz nou pa,’ finalman swa nou pou ekout lavwa Jéhovah swa nou pou ekout lavwa so Lennmi. (Jér. 10:23) Alor anou kontign priye, swiv direksion lespri sin ek touletan ekout bien lavwa Jéhovah.