NOU an 1923. Lasal konser dan Konservatwar Teat ek Lamizik dan São Paulo bien ranpli! Eski ou pe tann George Young so lavwa bien ferm? Pe tradir so diskour an Portige, fraz par fraz. Toule 585 asistan pe ekoute bien. Pe kapav trouv bann verse Labib an Portige lor enn lekran. Ek pou konklir bien sa diskour-la, pe distribie enn santenn brosir Des millions de personnes actuellement vivantes ne mourront jamais !, an Portige, me osi an Angle, Alman, ek Italien. Sa diskour-la enn sikse! Boukou pe koz lor la. So deziem swar apre, lasal reranpli pou enn lot diskour. Me ki finn amenn sa bann levennman-la?

An 1867, Sarah Bellona Ferguson avek so fami ti kit l’États-Unis ek ti al imigre dan Brésil. An 1899, apre ki Sarah ti’nn lir bann piblikasion Biblik ki so ti-frer ti amene depi l’États-Unis, li ti kone ki li’nn trouv laverite. Parski li ti anvi lir plis nou bann piblikasion, li ti abone ar Latour Degard an Angle. Li ti telman kontan ki li’nn konn mesaz ki ena dan Labib, ki li ti ekrir Frer C. T. Russell, ek ti dekrir limem kouma “enn prev ki personn pa res tro lwin pou tann mesaz laverite.”

Sarah Ferguson ti fer tou seki li kapav pou partaz laverite ki ena dan Labib avek lezot, me souvan li ti demann limem kisannla ti pou vinn ed li ek so fami, ek osi tou bann bon dimounn dan Brésil. An 1912, Béthel Brooklyn ti fer li kone ki enn kikenn ti pe vinn São Paulo avek plizir milye trak ki ti ena tit Où sont les morts ?, an Portige. An 1915, li ti dir ki sa ti touletan etonn li ki boukou Etidian Labib ti pe atann ki Lesegner ti pou pran zot pou al dan lesiel biento. Pou dir seki li panse, li ti ekrir: “Ki nou kapav dir konsernan Brésil ek tou l’Amérique du Sud? . . . Kan nou gete ki grander l’Amérique du Sud ete konpare ar lezot pei dan lemond, li pou fasil pou trouve ki ena ankor  boukou pou fer dan travay rekolt.” Wi, ti ena enn pli gran travay rekolt ki ti pou fer!

Ver 1920, wit zenn marin Brezilien ti asiste de-trwa renion dan enn kongregasion dan New York an-atandan ki repar zot bato lager. Kan zot ti retourn Rio de Janeiro, zot ti partaz avek lezot dimounn lesperans ki zot ti fek aprann dan Labib. Enn tipe apre, an Mars 1923, George Young ki ti enn pelrin ouswa enn sirveyan ki vizit bann kongregasion, ti ariv Rio de Janeiro kot li ti trouv bann dimounn ki ti interese ar laverite. Li ti pran bann dispozision pou fer tradir plizir piblikasion an Portige. Enn tigit letan apre, Frer Young ti al São Paulo, lavil kot sa lepok-la ti ena apepre 600,000 abitan. Laba, li ti fer sa diskour-la ek ti distribie bann brosir Millions, kouma ti mansione dan koumansman lartik. Li dir: “Parski mo ti tousel, mo ti bizin kont zis lor bann lanons ki mete dan bann lagazet.” Li ti azoute: “Sa ti bann premie diskour piblik ki ti met dan bann lanons ek ki ti sponnsorize par I.B.S.A. dan Brésil.” a

Dan enn rapor lor Brésil, Latour Degard 15 Desam 1923, an Angle, dir: “Kan nou reflesi ki travay laba inn koumanse 1^e Zin ek ki sa lepok-la pa ti ena okenn piblikasion pou servi, li extraordiner kouma Lesegner inn beni sa travay-la.” Sa rapor-la dir osi ki bann diskour piblik ki Frer Young ti fer dan São Paulo ti 2 parmi 21 diskour ki ti fer ant 1^e Zin ek 30 Septam, ek antou ti ena 3,600 asistan pou sa bann diskour-la. Dan Rio de Janeiro, tigit-tigit partou bann dimounn ti pe tann mesaz lor Rwayom Bondie. Dan zis de-trwa mwa, ti distribie plis ki 7,000 nou bann piblikasion an Portige! Anplis, ti koumans pibliye Latour Degard an Portige apartir nimero Novam-Desam 1923.

George Young ti rann Sarah Ferguson enn vizit, ek Latour Degard ti dir: “Ser-la ti vinn dan salon, ek pou enn moman li pa ti kapav koze. Li ti trap lame Frer Young, ek li ti get li fran dan so figir, ek alafin li ti dir: ‘Eski vremem to enn Pelrin vivan?’” Enn tipe apre, Sarah ek kat parmi so bann zanfan ti pran batem. Ofet, li finn bizin atann 25 an pou li kapav pran batem! Latour Degard 1^e Out 1924, an Angle, mansione ki ti ena 50 batem dan Brésil, ek laplipar ti dan Rio de Janeiro.

Asterla, anviron 90 an plitar, li pa neseser ki nou poz sa kestion-la: “Ki nou kapav dir konsernan Brésil ek tou l’Amérique du Sud?” Plis ki 760,000 Temwin Jéhovah pe pres bonn nouvel dan Brésil. Ek asterla partou dan l’Amérique du Sud, pe pres mesaz Rwayom Bondie an Portige, Espagnol ek boukou lezot lang ki koze dan sa pei-la. An 1915, Sarah Ferguson ti ena rezon kan li ti dir ki, ‘ti ena ankor boukou pou fer dan travay rekolt.’​—Dan nou bann arsiv dan Brésil.