1. Ki lexperyans extraordiner boukou zenn Kretien pe fer zordi?

 NOU pe viv enn lepok extraordiner. Zordi plizir milyon dimounn ki sorti dan tou bann nasion pe vinn ador Jéhovah. Zame pa finn ena sa avan dan listwar. (Rév. 7:9, 10) Boukou zenn pe fer bann zoli lexperyans amezir ki zot ed lezot pou konpran bann verite ki ena dan Labib. (Rév. 22:17) Sertin zenn pe kondir bann letid Labib, ek pe ed bann dimounn pou amelior zot lavi. Lezot zenn pe aprann enn nouvo lang ek pe pres bonn nouvel avek zel ar bann etranze. (Ps. 110:3; Is. 52:7) Ki to kapav fer pou partisip dan sa gran travay ki pep Jéhovah pe fer la?

2. Kouma lexanp Timothée montre ki Jéhovah dispoze pou konfie bann zenn bann responsabilite? (Get zimaz dan koumansman lartik.)

² Antan ki enn zenn, to kapav pran bann desizion ki plitar pou permet twa fer plis dan servis Bondie. Par exanp, Timothée, ki ti viv dan lavil Lystres, ti pran bann bon desizion ki ti fer li vinn enn misioner kan li ti ena apepre 20 an. (Actes 16:1-3) Li paret ki selman de-trwa mwa plitar, apre ki Paul ti oblize kit kongregasion akoz enn gran lopozision, li ti avoy Timothée dan kongregasion Thessalonique. Sa kongregasion-la ti fek forme, ek Timothée ti gagn responsabilite pou ankouraz bann frer laba. (Actes 17:5-15; 1 Thess. 3:1, 2, 6) Mazine ki  kantite Timothée ti kontan kan li ti gagn sa mision-la!

3. Ki desizion pli inportan to kapav pran dan to lavi, ek kan eski to kapav pran sa desizion-la?

³ Se asterla ki to bizin pran bann desizion bien inportan, kan to ankor zenn. Desizion ki pli inportan ki to bizin pran, se servi Jéhovah. Kan eski to bizin pran sa desizion-la? Jéhovah dir: “Rapel to Gran Kreater pandan to zenes.” (Eccl. 12:1) Sel fason ki to kapav “rapel” Jéhovah, se kan to servi Li avek tou to leker. (Deut. 10:12) Desizion pou servi Bondie avek tou to leker, samem pli gran desizion ki to kapav pran. Sa pou ena enn lefe lor to lavenir.​—Ps. 71:5.

4. Ki bann desizion inportan pou ena enn lefe lor to servis pou Jéhovah?

⁴ Biensir, to desizion pou servi Jéhovah, se pa sel desizion ki pou ena enn lefe lor to lavenir. Par exanp, kitfwa to demann twa si to pou marye enn zour, ar kisannla to pou marye, ek ki travay to pou fer. Se bann desizion bien inportan, me li bon ki to deside dabor si to pou servi Jéhovah avek tou to leker. (Deut. 30:19, 20) Kifer? Parski tou sa bann desizion-la ena enn lien ant zot. Seki to deside konsernan maryaz ek travay pou ena enn lefe lor to servis pou Bondie. (Konpar avek Luc 14:16-20.) Me rapel osi ki to desizion pou servi Bondie pou ena enn lefe lor to bann desizion konsernan maryaz ek travay. Alor, avan, deside ki bann kitsoz ki pli inportan dan to lavi.​—Phil. 1:10.

5, 6. Donn enn lexanp kouma, kan to pran bann bon desizion, sa kapav fer twa gagn bann bon lexperyans plitar. (Get osi lartik “Desizion Ki Mo Ti Pran Kan Mo Ti Ankor Tipti” dan sa peryodik-la.)

⁵ Enn fwa ki to finn deside pou servi Bondie, to kapav reflesi lor seki Li anvi to fer, ek lerla to kapav deside kouma to pou servi Li. Enn frer dan Japon ekrir: “Kan mo ti ena 14 an, mo ti sorti predikasion avek enn ansien ki ti remarke ki mo pa ti zwaye dan predikasion. Li ti dir mwa dan enn fason zanti: ‘Yuichiro, al lakaz. Asiz devan to biro ek reflesi bien lor tou seki Jéhovah inn fer pou twa.’ Mo ti fer seki li ti dir. An realite, mo ti kontign reflesi ek mo ti priye pandan de-trwa zour. Tigit par tigit, mo latitid ti sanze. Pa tro lontan apre, mo ti koumans servi Jéhovah avek lazwa. Mo ti kontan pou lir lor laktivite bann misioner ek mo ti koumans reflesi kouma mo kapav servi plis Jéhovah.

⁶ Yuichiro kontign rakonte: “Mo ti pran bann desizion ki ti pou permet mwa servi Jéhovah dan enn lot pei. Par exanp, mo ti deside pou aprann Angle. Kan mo ti kit lekol, mo ti swazir enn travay a-mitan, mo ti ansegn Angle pou mo kapav fer pionie. Kan mo ti gagn 20 an, mo ti koumans aprann Mongol ek mo ti gagn lokazion pou al vizit enn group proklamater ki koz Mongol. De-z-an apre, an 2007, mo ti al Mongolie. Kan mo ti al prese avek sertin pionie ek mo ti trouve ki boukou dimounn ti pe rod laverite, mo ti deside pou al res laba ek pou ed zot. Mo ti retourn Japon pou prepar mwa. Mo pe fer pionie dan Mongolie depi Avril 2008. Lavi pa fasil isi. Me bann dimounn pe aksepte laverite ek mo pe kapav ed zot pou vinn pros ar Jéhovah. Mo panse ki mo finn swazir pli bon lavi ki kapav ena.”

7. Ki bann desizion to bizin pran, ek ki nou kapav aprann ar lexanp Moïse?

⁷ Sak dimounn bizin pran so prop desizion lor fason ki li pou servi so lavi antan ki enn Temwin Jéhovah. (Jos. 24:15) Nou pa kapav dir twa si to bizin marye ouswa non, ar kisannla to bizin marye,  ouswa ki travay to pou fer. Eski to pou swazir pou fer enn travay kot to pa pou bizin enn long formasion? Sertin zenn Kretien viv dan bann vilaz bien pov, alor ki lezot viv dan bann lavil bien ris. Dan lemond antie, bann zenn bien diferan an rapor avek zot personalite, zot kapasite, zot lexperyans, seki interes zot ek zot bann lobzektif spiritiel. Kitfwa, diferans ki ena ant zot, li parey kouma diferans ki ti ena ant bann zenn Ebre an Égypte ek Moïse kan li ti zenn. Li ti kapav profit tou bann privilez ki ti ena dan pale, alor ki bann lezot zenn Ebre ti esklav. (Ex. 1:13, 14; Actes 7:21, 22) Parey kouma twa, zot ti viv enn lepok kot zot ti bizin pran bann desizion inportan. (Ex. 19:4-6) Sakenn ti bizin swazir si li ti pou servi Jéhovah avek tou so leker. Moïse ti fer enn bon swa.​—Lir Hébreux 11:24-27.

8. Ki kapav ed twa pou pran bann bon desizion?

⁸ Jéhovah ed twa pou pran bann bon desizion pandan ki to ankor zenn. Li donn twa bann konsey atraver bann prinsip Labib ki to kapav aplike dan to sitiasion. (Ps. 32:8) Anplis, to bann paran ki servi Jéhovah ek bann ansien dan kongregasion kapav ed twa pou trouve kouma to kapav aplik sa bann prinsip-la. (Prov. 1:8, 9) Anou examinn trwa prinsip Labib ki kapav ed twa pou pran bann bon desizion ki pou ena enn bon lefe dan to lavenir.

9. (a) Kouma Jéhovah onor nou kan Li donn nou liberte pou swazir? (b) Kan nou ‘rod Rwayom Bondie avan tou,’ ki lokazion sa donn nou?

⁹ Avan tou kitsoz, rod Rwayom Bondie ek so zistis. (Lir Matthieu 6:19-21, 24-26, 31-34.) Jéhovah onor nou kan Li donn nou liberte pou swazir. Li pa dir komie letan to bizin konsakre dan to zenes pou pres bonn nouvel lor Rwayom Bondie. Me Jésus ti donn bann prinsip ki pou ed nou rod Rwayom Bondie avan tou kitsoz. Fason ki to aplik seki li ti dir pou donn twa lokazion montre to lamour pou Bondie ek pou to prosin, ek pou montre to rekonesans pou lesperans lavi eternel. Si to pans pou marye ouswa pou travay, reflesi si to bann desizion pou fer twa gagn plis traka lor bann kitsoz materyel ouswa sa pou montre ki to pe rod Rwayom Bondie ek so zistis avek zel.

10. Ki ti fer Jésus ena lazwa, ek ki to bizin fer pou to ere?

¹⁰ Servi lezot fer nou ena lazwa. (Lir Actes 20:20, 21, 24, 35.) Se enn prinsip bien inportan dan lavi, ki Jésus ti ansegn nou. Li ti ena boukou lazwa parski li ti fer volonte so Papa, pa so volonte. Jésus ti kontan kan li ti trouv bann dimounn ki ti ena limilite aksepte bonn nouvel. (Luc 10:21; Jean 4:34) Sirman to osi to finn konn lazwa pou ed lezot. Si to pran bann desizion ki an akor avek bann prinsip ki Jésus ti ansegne, pena dout ki sa pou fer twa ena lazwa ek sa pou fer Jéhovah plezir.​—Prov. 27:11.

11. Kifer Barouk ti perdi so lazwa, ek ki konsey Jéhovah ti donn li?

¹¹ Nou pli gran boner se kan nou servi Jéhovah. (Prov. 16:20) Li paret ki Barouk, sekreter Jérémie ti bliye sa. Enn sertin moman, li ti nepli apresie so servis pou Jéhovah. Jéhovah ti dir li: “To pe rod bann gran kitsoz pou tomem. Aret rode. Parski mo pe amenn enn maler lor tou dimounn, . . . Se to lavi ki to pou gagne kouma enn rekonpans partou kot to pou ale.” (Jér. 45:3, 5) Ki to panse? Ki ti pou fer Barouk pli kontan? Gagn bann kitsoz materyel ouswa fer seki Jéhovah ti demande ek gagn lavi sov pandan destriksion Jérusalem?​—Jacq. 1:12.

12. Ki desizion Ramiro ti pran ki ti fer li ena lazwa?

 ¹² Ramiro, se enn frer ki ti ena lazwa pou ed lezot. Li dir: “Mo ti sorti dan enn fami bien pov ki ti viv dan enn vilaz dan Les Andes, dan Bolivie. Alor, sa ti enn gran lokazion kan mo gran frer ti ofer pou pey liniversite pou mwa. Mo ti fek batize antan ki enn Temwin Jéhovah, ek mo ti gagn enn lot propozision​—enn pionie ti invit mwa pou al pres avek li dan enn ti vilaz. Mo ti al laba, mo ti aprann koup seve bann dimounn ek mo ti ouver enn salon kwafir pou ed mwa lor plan finansie. Kan nou ti propoz bann letid Labib, boukou dimounn ti aksepte. Plitar, mo ti al dan enn kongregasion ki ti’nn fek forme dan lang ki koze dan sa landrwa-la. Sa fer di-z-an depi ki mo dan servis aplintan. Pena okenn lot travay ki kapav donn mwa lazwa ki mo ena pou ed bann dimounn pou etidie Labib dan zot lang maternel.”

13. Kifer lazenes se pli bon moman pou servi Jéhovah aplintan?

¹³ Kontan pou servi Jéhovah dan to zenes. (Lir Ecclésiaste 12:1.) Pa panse ki to bizin gagn enn bon travay pou to kapav servi Jéhovah plitar. Pli bon moman pou koumans servis aplintan, se kan to ankor zenn. Boukou zenn pena bann gran responsabilite familial ek zot ena enn bon lasante ek lafors pou asim bann responsabilite ki difisil. Ki to ti pou kontan fer pou Jéhovah dan to zenes? Kitfwa to ena lobzektif pou fer pionie. Kitfwa to anvi travay dan enn teritwar etranze. Ouswa kitfwa to anvi servi plis dan to kongregasion. Ninport ki lobzektif to ena dan servis Bondie, to pou bizin trouv enn mwayin pou gagn to lavi. Ki kantite formasion to pou bizin? Ki travay to pou swazir?

14. Kont ki kitsoz enn zenn bizin fer atansion kan li rod enn travay?

¹⁴ Sa trwa prinsip Labib ki nou finn fek examine la kapav ed twa pou deside ki travay to pou fer. Pena dout ki bann konseye ki ena dan bann lekol kone ki bann travay ki to kapav gagne dan to landrwa. Kitfwa ena enn biro gouvernman ki kapav ed twa pou trouv enn travay dan to landrwa ouswa dan enn landrwa kot to anvi ale. Sa bann dimounn-la kapav ed twa, me fer bien atansion. Bann dimounn ki pa kontan Jéhovah kapav esey plant lamour pou lemond dan to leker. (1 Jean 2:15-17) Kan to get seki lemond pe ofer, pa bliye ki to leker kapav anbet twa fasilman.​—Lir Proverbes 14:15; Jér. 17:9.

15, 16. Kisannla kapav sirtou donn twa bann bon konsey konsernan travay?

¹⁵ Enn fwa ki to kone ki travay to pou fer, to bizin bann bon konsey. (Prov. 1:5) Kisannla kapav ed twa pou gete si sa travay-la an akor avek bann prinsip Labib? Ekout bann dimounn ki kontan Jéhovah, ki kontan twa, ek ki konn twa ek to sitiasion bien. Zot pou ed twa pou examinn to latitid ek to bann mobil dan enn fason onet. Kitfwa seki zot dir, pou ed twa pou re-examinn to bann lobzektif. Si to bann paran kontan Jéhovah, zot kapav enn gran led pou twa! Bann ansien dan to kongregasion osi kapav donn twa bann bon konsey parski zot bann zom spiritiel. Anplis, koz ar bann pionie ek bann sirveyan. Demann zot kifer zot inn pran desizion pou servi Jéhovah aplintan. Kouma zot inn koumans fer pionie ek ki travay zot ti fer? Ki bann bienfe zot gagne dan zot servis?​—Prov. 15:22.

¹⁶ Bann dimounn ki konn twa bien kapav donn twa bann bon konsey. Par exanp, sipoze ki to anvi aret lekol pou fer pionie sirtou parski to pa kontan pou travay dir dan lekol. Enn dimounn ki kontan twa kapav trouve pou ki rezon to anvi kit lekol. Li kapav fer twa konpran ki lekol pou ed twa aprann pou pa bes lebra vit, enn kalite bien inportan si to anvi servi Jéhovah aplintan.​—Ps. 141:5; Prov. 6:6-10.

17. Ki bann desizion nou bizin evite pou pran?

¹⁷ Tou bann ki servi Jéhovah bizin fer fas ar bann danze spiritiel ki kapav afebli zot lafwa ek fer zot elwagne ar Jéhovah. (1 Cor. 15:33; Col. 2:8) Me dan sertin travay kapav ena pli boukou danze spiritiel ki dan lezot travay. Kitfwa to finn remarke ki “lafwa [sertin Kretien] finn fer nofraz” parski zot finn swazir enn sertin travay. (1 Tim. 1:19) Li pou saz si to evit pran bann desizion ki pou met an danze to bann relasion avek Jéhovah.​—Prov. 22:3.

18, 19. Si to pankor ena dezir pou fer plis dan servis Jéhovah, ki to kapav fer?

¹⁸ Si to ena enn dezir sinser pou servi Jéhovah, profit bann posibilite ki to ena pou servi Li alor ki to ankor zenn. Profit sa lepok-la pou pran bann desizion ki pou permet twa servi Li avek lazwa.​—Ps. 148:12, 13.

¹⁹ Me ki to pou fer si to pankor ena dezir pou fer plis dan servis Jéhovah? Pa aret to bann zefor pou fortifie to lafwa an Jéhovah. Apre ki lapot Paul ti dekrir bann zefor ki li ti fer pou gagn benediksion Jéhovah, li ti ekrir: “Si zot ena enn lot lopinion lor ninport ki size, Bondie pou fer zot ena latitid ki fek mansione. Ninport ki kantite progre ki nou finn fer, anou kontign mars dan enn fason ordone dan sa mem direksion-la.” (Phil. 3:15, 16) Rapel ki Jéhovah kontan twa ek so bann konsey touzour pli bon. Li kapav ed twa pou pran bann bon desizion dan to zenes.