1, 2. (a) Ki bann qualité pou aide nou pou faire face ar bann probleme? (b) Couma ou pou decrire la foi? Donne enn l’exemple.

 SERVICE Jéhovah faire nou gagne la joie. Pourtant, nou faire face ar bann probleme pareil couma tou dimoune, ek kitfois nou “souffert a cause la justice.” (1 Pierre 3:14; 5:8, 9; 1 Cor. 10:13) Pou nou reussi faire face ar sa bann l’epreuve-la, nou bizin ena la foi ek courage.

² Ki été la foi? L’apotre Paul ti ecrire: “La foi c’est kan nou sur ki seki nou pé attann pou arrivé, li enn preuve sur ki bann kitsoz ki pourtant nou pa trouvé, zot enn realité.” (Héb. 11:1) Enn lot traduction dire: “La foi li enn contrat pou bann kitsoz ki nou pé attann. La foi c’est kan nou sur ki bann kitsoz ki nou pa trouvé pou arrivé.” (The Simple English Bible) Si’nn faire enn contrat ar nou pou nou gagne enn terrain, nou ena garantie ki sa terrain-la pou vinn pou nou. Nou ena la foi ki Bondié touletan realise so parole, alors c’est coumadir nou ena enn contrat dan nou la main. Nou la foi faire nou ena l’assurance ki nou pou trouve realisation bann promesse ki ena dan la Bible, bann promesse ki nou pé attann, ek nou sur ki bann kitsoz spirituel zot vrai, mem si nou pa trouve zot.

3, 4. (a) Ki sa vedir courage? (b) Cite enn fason couma nou kapav fortifié nou la foi ek nou courage.

³ Dapré enn dictionnaire, courage c’est kan enn dimoune ena la “force spirituel, affectif, ek moral pou kozé ek pou agir sans okenn frayeur devant bann difficulté ek bann danger.” (The New Interpreter’s Dictionary of the Bible) Si nou ena courage, nou pou fort, nou pou bien decidé ek parfois nou pou mem pré pou souffert a cause nou croyance.​—Marc 6:49, 50; 2 Tim. 1:7.

⁴ La foi ek courage c’est bann qualité ki ena beaucoup valeur. Mais ki nou pou faire si nou pensé ki nou bizin plus la foi ek courage? Plusieurs millier serviteur Bondié ki la Bible mentionné, zot bann bon l’exemple parski zot inn manifesté sa bann qualité-la. Alors, enn  fason ki nou kapav fortifié nou la foi ek nou courage c’est kan nou examine certain parmi sa bann l’exemple-la.

5. Ki Josué ti bizin pou li reussi dan so responsabilité?

⁵ Anou retourne apepré 3,500 an en arriere. Quarante an finn passé depuis ki Jéhovah ti servi so puissance pou delivré plusieurs million Israélite ki ti en esclavage en Égypte. Prophete Moïse ti pé dirige nation Israël. Li ti ena 120 an, ek li ti al lor Montagne Nebo pou guette la Terre Promise de loin, ek apré sa, li ti mort lor sa montagne-la. Josué, ki ti remplace Moïse pou dirige nation Israël, ti enn kikenn ki ti “rempli ar l’esprit sagesse.” (Deut. 34:1-9) Bann Israélite ti pré pou prend pays Canaan. Josué ti bizin sagesse Bondié pou li reussi dan so responsabilité. Li ti pou bizin aussi ena la foi en Jéhovah ek montré ki li ena courage ek ki li fort.​—Deut. 31:22, 23.

6. (a) Dapré Josué 23:6, nou bizin ena courage pou faire ki kitsoz? (b) Ki nou aprann ar bann parole ki trouve dan Actes 4:18-20 ek Actes 5:29?

⁶ Sagesse, courage ek la foi ki Josué ti manifesté pendant plusieurs l’année ki zot ti laguerre pou prend pays Canaan, ti surement bien fortifié bann Israélite. Bann Israélite pa ti bizin ena courage zis pou laguerre, mais aussi pou faire seki Josué ti demann zot. Zis avant li mort, Josué ti dire bann Israélite: “Zot bizin ena beaucoup courage pou obeir ek pou pratik tou seki finn ecrire dan livre la loi Moïse, sans jamais zot detourne-zot ar sa la loi-la, ni a droite, ni a gauche.” (Jos. 23:6) Nou aussi nou bizin courage pou obeir Jéhovah touletan, surtout kan bann dimoune dire nou faire bann kitsoz ki contraire ar volonté Bondié. (Lire Actes 4:18-20; 5:29.) Si nou prié Jéhovah ek nou compte lor Li, Li pou aide nou pou ena courage ki bizin.

7. Ki Josué ti bizin faire pou li agir avek courage ek reussi dan seki li ti faire?

⁷ Pou nou ena courage pou faire volonté Bondié, nou bizin etudié ek mette en pratik so Parole. C’est seki Jéhovah ti dire Josué kan li ti remplace Moïse: “Prend courage ek reste bien fort pou to kapav faire dapré tou seki ena dan la loi ki Moïse mo serviteur finn donne toi l’ordre pou faire. . . . Fodé pa ki sa livre la loi-la reste loin ar to la bouche ek to bizin lire li doucement la-nuit li-jour, pou ki to faire attention pou faire dapré tou seki finn ecrire ladan. Lerla to pou reussi dan seki to faire ek to pou agir avek sagesse.” (Jos. 1:7, 8) Josué ti suive sa conseil-la ek ‘li ti reussi dan seki li ti faire.’ Si nou aussi nou faire pareil, nou pou ena plus courage ek nou pou reussi dan service Bondié.

8. Dan ki verset la Bible texte pou l’année 2013 sorti, ek couma ou pensé sa bann parole-la pou aide ou?

⁸ Surement sa ti bien fortifié Josué kan apré Jéhovah ti dire li: “Prend courage ek vinn fort. Pa tremblé ek pa peur, parski Jéhovah to Bondié avek toi partout kot to pou allé.” (Jos. 1:9) Zordi aussi Jéhovah avek nou. Alors, “pa tremblé ek pa peur” devant n’importe ki l’epreuve. Nou surtout interessé ar bann parole ki trouve dan Josué 1:9: “Prend courage ek vinn fort. . . . Jéhovah to Bondié avek toi.” C’est sa bann  parole-la ki finn choisir couma texte pou l’année 2013. Pena doute ki sa bann parole-la pou bien fortifié nou pendant bann mois ki pou vini, pareil couma bann parole ek bann action bann lezot serviteur Bondié ki ti ena la foi ek courage.

9. Dan ki fason Rahab ti montré la foi ek courage?

⁹ Kan Josué ti envoye deux espion dan Canaan, Rahab, enn prostitué ti cachiette zot ek ti faire zot bann l’ennemi prend enn lot direction. Grace a so la foi ek so courage, Rahab ek so famille ti gagne la vie sauve kan bann Israélite ti prend la ville Jéricho. (Héb. 11:30, 31; Jacq. 2:25) Bien sur, Rahab ti abandonne so la vie immoral pou li kapav gagne faveur Jéhovah. Certain ki’nn vinn chretien finn ena la foi, courage ek la force moral pou faire bann mem qualité changement pou zot gagne faveur Bondié.

10. Dan ki circonstance Ruth ti choisir pou adore Jéhovah, ek ki benediction li ti gagné?

¹⁰ Apré la mort Josué, Ruth, ki ti enn veuve, ti ena courage pou choisir pou adore Jéhovah. Li ti enn Moabite, mais so mari ti enn Israélite, alors surement li ti konn enn tipé lor Jéhovah. Naomi, so belle-mere aussi ti enn veuve ek ti vive dan Moab, mais li ti decidé pou retourne Bethléhem, en Israël. Lor chemin, Naomi ti suppliye Ruth pou retourne vers so prop peuple, mais Ruth ti dire li: “Pa suppliye moi pou abandonne toi, pou quitte toi. . . . To peuple pou vinn mo peuple, ek to Bondié mo Bondié.” (Ruth 1:16) C’est seki Ruth ti faire. Avek le temps, Boaz, enn proche parent ar Naomi, ti marié ar Ruth ek zot ti gagne enn garson, ek lerla, Ruth ti vinn enn ancetre David ek Jésus. Oui, Jéhovah beni bann dimoune ki ena la foi ek courage.​—Ruth 2:12; 4:17-22; Mat. 1:1-6.

11. Couma Yehoïada ek Yehoshéba ti montré zot courage, ek ki sa ti permette?

¹¹ Nou courage ek nou la foi vinn pli fort kan nou trouvé ki Bondié Li avek so bann serviteur ki faire so volonté ek ki mette l’interet zot bann frere avant zot prop l’interet. Anou prend l’exemple Grand Pretre Yehoïada ek so madame, Yehoshéba. Apré la mort le Roi Ahazia, Athalie, so mama, ti touye tou so bann descendant, excepté Yehoash, ek ti faire-li-mem vinn la reine. Yehoïada ek Yehoshéba ti riské zot la vie kan zot ti sauve Yehoash, garson Ahazia, ek zot ti cachiette li pendant six an. Dan septieme l’année, Yehoïada ti faire Yehoash vinn le roi ek ti faire touye Athalie. (2 Rois 11:1-16) Plitar, Yehoïada ti soutenir le Roi Yehoash pou repare temple. Kan Yehoïada ti mort, l’age 130 an, ti enterre li avek bann le roi “parski li ti faire seki bien en Israël ek envers vrai Bondié ek So lakaz.” (2 Chron. 24:15, 16) En plus, grace a courage Yehoïada ek so madame, sa ti permette pou protege bann descendant royal, depuis David ziska le Messie.

12. Couma Ébed-Mélek ti montré so courage?

¹² Ébed-Mélek, enn serviteur dan palais le Roi Tsidqiya, ti riské so la vie pou Jérémie. Le Roi ti livré Jérémie ar bann prince Juda, ki ti accuse Jérémie. Zot ti dire ki Jérémie ti pé encourage enn rebellion kont le roi. Zot ti mette li dan enn trou kot ti ena la boue, pou li mort. (Jér. 38:4-6) Kan Ébed-Mélek ti al suppliye Tsidqiya pou sauve Jérémie, li ti mette so la vie en danger parski bann dimoune ti ena la haine pou Jérémie. Tsidqiya ti accepté ek ti faire 30 zom accompagne Ébed-Mélek pou al sauve Jérémie. A travers Jérémie, Bondié ti donne Ébed-Mélek l’assurance ki li pa pou mort kan bann Babylonien pou vinn attak Jérusalem.  (Jér. 39:15-18) Bondié recompense bann dimoune ki faire so volonté avek courage.

13. Couma sa trois Hébreu-la ti montré zot courage, ek couma zot l’experience kapav aide nou?

¹³ Dan septieme siecle avant nou lepok, trois Hébreu ki ti servi Jéhovah, ti gagne enn preuve bien clair ki Bondié recompense bann dimoune ki ena la foi ek courage. Le Roi Neboukadnetsar ti rassemblé bann zom ki ti ena enn grand position dan Babylone ek ti donne zot l’ordre pou adore enn grand statue en or. Si enn kikenn ti refuse pou adore sa statue-la, ti pou jette li dan enn four difé. Avek respé, sa trois Hébreu-la ti dire Neboukadnetsar: “Nou Bondié ki nou servi, kapav sap nou. Li pou sap nou dan sa four difé-la, ek dan to la-main, O nou le roi. Sinon, nou faire toi koné, O nou le roi, ki c’est pa to bann bondié ki nou servi, ek sa statue en or ki to’nn faire-la, nou pa pou adore li.” (Dan. 3:16-18) Daniel 3:19-30 decrire dan enn fason bien vivant couma Jéhovah ti sauve sa trois Hébreu-la. Mem si zordi personne pa menace pou jette nou dan enn four difé, nou fidelité passe par bann l’epreuve ek nou kapav sur ki Bondié pou beni nou pou la foi ek courage ki nou montré.

14. Dapré Daniel chapitre 6, couma Daniel ti agir avek courage, ek ki ti arrive li?

¹⁴ Daniel ti montré so la foi ek so courage kan so bann l’ennemi ti influence le Roi Darius pou faire enn la loi. Zot ti dire le roi “si, pendant enn periode trente jour, enn kikenn prié n’importe ki bondié ou-soit n’importe ki zom, a part toi, O nou le roi, alors bizin jette li dan la fosse lion.” Desuite couma Daniel ti aprann ki le roi ti signe sa document-la, li “ti rente dan so lakaz, ek bann la fenetre so la chambre ki ti trouve la-haut, ti ouvert pou li dan direction Jérusalem, oui, trois fois par jour li ti agenou lor so genou, li ti prié ek li ti loué so Bondié, pareil couma li ti habitué faire regulierement avant.” (Dan. 6:6-10) Bann l’ennemi Daniel ti jette li dan enn fosse lion​—mais Jéhovah ti delivré li.​—Dan. 6:16-23.

15. (a) Ki l’exemple Aquila ek Priscille inn donne nou en rapport avek la foi ek courage? (b) Ki bann parole Jésus, ki trouve dan Jean 13:34 vedir, ek couma beaucoup chretien finn montré enn l’amour coumsa?

¹⁵ Dan bann situation ki la Bible pa mentionné, Aquila ek Priscille ‘ti riské zot la vie pou sauve Paul.’ (Actes 18:2; Rom. 16:3, 4) Avek courage, zot ti faire seki Jésus ti dire: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade.” (Jean 13:34) Dapré la Loi Mosaïk, enn dimoune ti bizin content so prochain pareil couma li-mem. (Lév.  19:18) Mais sa commandement Jésus-la ti “nouveau” parski l’amour ki li ti mentionné ti bizin pousse enn dimoune pou al ziska donne so la vie pou lezot, pareil couma Jésus. Beaucoup chretien finn montré sa l’amour-la kan, avek courage, zot inn “riské zot la vie” pou protege zot bann frere pou zot pa souffert ou-soit mort dan la main zot bann l’ennemi.​—Lire 1 Jean 3:16.

16, 17. Ki bann l’epreuve certain premier chretien ti gagné, ek couma certain chretien dan nou lepok ti bizin faire face ar mem qualité l’epreuve?

¹⁶ Pareil couma Jésus, avek courage bann premier chretien ti adore zis Jéhovah. (Mat. 4:8-10) Zot ti refuse pou brule l’encens pou donne l’honneur l’empereur Romain. (Guette zimage.) Daniel P. Mannix ti ecrire lor zot: “Bien tigit chretien ti ré-vinn lor zot decision mem si dan stade ti ena enn l’autel kot enn difé ti allumé, ki ti’nn reservé pou zot [brule l’encens]. Tou seki enn prisonnier ti bizin faire c’est zis mette enn ti pincée l’encens dan sa difé-la, lerla ti donne li enn Certificat . . . ek li ti libre. Ti bien explik li ki li pa ti pé adore l’empereur; li ti pé zis reconette ki, en tant ki chef l’empire Romain, l’empereur ti couma enn bondié. Kan-mem, preské okenn chretien pa ti profite sa l’occasion-la pou gagne so liberté.”​—Ceux qui vont mourir (en anglais).

¹⁷ Dan nou lepok, bann Chretien ki ti dan bann camp concentration Nazi ek ki ti pé faire face ar la mort, ti ena plusieurs l’occasion pou gagne zot liberté. Zot ti bizin zis signe enn declaration kot zot ti accepté pou nepli adore Jéhovah. Mais zis enn tigit ki ti signé. Dan Rwanda, kan ti ena la guerre racial, bann Témoins de Jéhovah Hutu ek Tutsi ti riské zot la vie pou protege sakenn so camarade. Bann serviteur Bondié bizin ena courage ek la foi dan bann situation coumsa.

18, 19. Cite bann l’exemple la foi ek courage ki mentionné dan la Bible ek ki kapav aide nou pou preché.

¹⁸ Zordi nou ena privilege pou participe dan pli grand travail ki Bondié inn confié so bann serviteur lor la terre​—preche la bonne nouvelle lor so Royaume ek faire bann disciple. (Mat. 24:14; 28:19, 20) Nou bien reconnaissant ki Jésus inn laisse nou enn l’exemple parfait! Li “ti al dan enn la ville apré lot ek dan enn village apré lot, li ti preché ek li ti annonce la bonne nouvelle lor royaume Bondié.” (Luc 8:1) Pareil couma li, nou aussi nou bizin la foi ek courage pou nou kapav preche Royaume Bondié. Avek l’aide Bondié, nou kapav ena courage pareil couma Noé, ki ti enn “predicateur la justice.” Li ti preche ar “enn le monde ki pa ti ena okenn respé pou Bondié,” ek ki ti pré pou detruire dan enn deluge.​—2 Pierre 2:4, 5.

¹⁹ La priere aide nou pou preché. Kan certain disciple Jésus ki ti pé gagne persecution, ti prié pou ki zot ‘annonce parole Bondié avek courage,’ Bondié ti reponn zot la priere. (Lire Actes 4:29-31.) Si ou timide pou preche de porte en porte, prié Jéhovah pou Li donne ou plus la foi ek courage, ek Li pou reponn ou la priere.​—Lire Psaume 66:19, 20. a

20. Ki l’aide nou ena en tant ki bann serviteur Jéhovah?

²⁰ Li difficile pou contigne faire volonté Bondié dan sa mauvais le monde kot nou bizin faire face ar bann l’epreuve-la. Selman, nou pa tousel. Bondié avek nou. So Garson, ki Chef congregation, li aussi li avek nou. Nou ena aussi plus ki 7,000,000 Témoins de Jéhovah partout dan le monde ki avek nou. Ensam avek zot, anou contigne ena la foi ek preche la bonne nouvelle pendant ki nou garde dan nou l’esprit nou texte pou l’année 2013: “Prend courage ek vinn fort. . . . Jéhovah to Bondié avek toi.”​—Jos. 1:9.