EN 1786, enn docteur français ti ecrire enn livre ki appel Traité d’anatomie et de physiologie (Enn l’etude lor bann zanimo ek bann dimoune ek lor fason ki zot fonctionné). Bann dimoune considere sa livre-la couma livre pli exact ki’nn ecrire dan sa lepok-la, lor fason ki nou lekor fonctionné, ek pa trop longtemps ti vann enn parmi bann copie rare ki encore existé, pou plus ki 850,000 roupie! Pourtant zordi, bien tigit malade pou ena confiance dan enn docteur ki base-li lor bann vié recherche medical ki ena dan sa livre-la, pou li faire bann l’operation. Sa livre-la ek seki’nn ecrire ladan, ena enn certaine valeur. Mais pa a cause sa ki li pou aide enn dimoune ki malade dan nou lepok.

Beaucoup dimoune pensé ki li pareil pou seki zot appel Ancien Testament. Zot apprecié seki li raconté lor l’histoire peuple Israël ek zot admire so langage poetik. Pourtant zot pa croire ki li raisonnable pou suive so bann conseil ki ena plus ki 2,400 an. Zordi connaissance scientifik, commerce ek mem la vie familial bien different ar seki zot ti été kan ti ecrire la Bible. Philip Yancey, ki longtemps ti publié journal Christianity Today, ecrire dan so livre La Bible que Jésus lisait: “Li [Ancien Testament] pa toujours logik ek bann partie ki logik, zot offense bann dimoune zordi. A cause sa ek pou lezot raison encore, souvent bann dimoune pa lire Ancien Testament, setadir trois-quart la Bible.” Sa pensée-la pa nouveau.

Moins ki 50 an apré la mort l’apotre Jean, vers l’année 100 n.l., enn jeune homme ki ti riche ek ki ti appel Marcion pa ti peur pou dire devant tou dimoune ki bann chrétien bizin rejette Ancien Testament. Dapré Robin Lane Fox, enn historien anglais, Marcion ti pretann ki “ ‘Bondié’ dan Ancien Testament ti enn [Bondié] ‘bien cruel’ ki ti favorise bann bandit ek bann terrorist pareil couma David ki ti le roi en Israël. Parkont grace a Christ , bann dimoune inn konn enn Bondié superieur ki ti nouveau ek ti different net ar Bondié ki dan Ancien Testament.” Fox ecrire ki “plitar ti appel sa bann croyance-la ‘Marcionisme’ ek sa ti contigne attire bann dimoune ziska pendant enn bon partie quatrieme siecle, surtout dan l’Est l’Europe kot ti koz langage syriaque. a” Certain dimoune encore toujours croire dan sa bann l’idée-la. Resultat: plus ki 1,600 an plitar, couma Philip Yancey ecrire, “connaissance Ancien Testament pé disparette bien vite parmi bann chrétien ek li’nn preské disparette dan culture modern.”

Eski Nouveau Testament inn remplace Ancien Testament? Couma nou kapav retablir enn l’harmonie entre “Jéhovah, chef bann l’armée” dan Ancien Testament, ek “Bondié l’amour ek la paix” dan Nouveau Testament? (Isaïe 13:13; 2 Corinthiens 13:11) Eski Ancien Testament kapav aide ou zordi?

[Note]