Bann dimoune agé—Enn benediction pou bann jeune
“Mem ziska la vieillesse ek bann cheveux blanc, ah Bondié, pa quitte moi, ziska ki mo faire sa generation-la konn la force to lé-bras, ek tou bann ki pou vini apré, konn to puissance.”—PSAUME 71:18.
1, 2. Ki bann chrétien agé bizin rann-zot compte, ek ki nou pou examiné dan sa lartik-la?
ENN ancien ki ti vive dan l’Ouest l’Afrique ti al visite enn frere oint ki agé ek ti demann li: “Ki maniere?” Frere-la ti reponn: “Mo kapav galopé ek mo kapav sauté.” En mem temps ki li ti pé dire sa, li ti pé essaye faire sa bann geste-la, ek apré li ti ajouté: “Mais mo pa kapav envolé.” En realité li ti pé rod dire: ‘Seki mo kapav faire, mo content pou faire li, mais seki mo pa kapav faire, mo pa faire.’ Sa ancien ki ti faire sa visite-la ena plus ki 80 an asterla, ek li ena enn bon souvenir lor l’humour ki sa frere-la ti ena ek lor so fidelité.
2 Kan enn dimoune agé ena bann qualité chrétien, sa kapav ena enn bon l’effet lor lezot ek touche zot toute longue zot la-vie. Bien sur, zis l’age tousel pa assez pou ki enn dimoune gagne la sagesse ek bann lezot qualité chrétien. (Ecclésiaste 4:13) La Bible dire: “Bann cheveux blanc, zot couma enn couronne beauté kan zot dan chemin la justice.” (Proverbes 16:31) Si ou enn dimoune agé, eski ou rann-ou compte ki quantité ou bann parole ek ou bann action kapav ena enn bon l’influence lor lezot? Anou examine certain l’exemple biblik ki montré ki quantité bann dimoune agé finn vinn enn grand benediction pou bann jeune.
Enn la-foi ki ena bann l’effet ki dure longtemps
3. Couma fidelité Noé finn amenn bann bienfait pou tou dimoune lor la terre zordi?
3 Noé ti ena la foi ek li ti ferme, ek grace a sa nou encore pé gagne bann bienfait ziska zordi. Noé ti pré pou gagne 600 an kan li ti construire l’arche, kan li ti faire bann zanimo rente dan l’arche, ek kan li ti preche avek bann dimoune dan so lepok. (Genèse 7:6; 2 Pierre 2:5) Parski li ti ena la crainte pou Bondié, Noé ti survive ensam avek so famille kan ti ena enn grand deluge, ek li’nn vinn ancetre tou bann dimoune ki vive lor la terre zordi. Li vrai ki dan lepok Noé, en general bann dimoune ti vive pli longtemps ki zordi. Pourtant, mem dan bann dernier jour so la-vie, Noé ti reste fidel, ek sa finn amenn bann grand benediction. Dan ki fason?
4. Parski Noé ti ferme, ki bienfait sa finn amené pou bann serviteur Bondié zordi?
4 Noé ti pré pou gagne 800 an kan Nimrod ti commence construire la tour Babel pou defié l’ordre ki Jéhovah ti donné pou “rempli la terre.” (Genèse 9:1; 11:1-9) Selman, Noé pa ti participe dan rebellion Nimrod. Alors, li possible ki langue ki li ti pé kozé pa ti changé kan Jéhovah ti change langage bann rebelle. Noé ti ena la foi ek li ti reste ferme toute longue so la-vie, ek li ti contigne ena sa bann qualité-la kan li ti vinn vié. Li vrai-mem enn bon l’exemple ki tou bann serviteur Jéhovah kapav imité, n’importe ki l’age nou ena!—Hébreux 11:7.
L’influence lor la famille
5, 6. (a) Kan Abraham ti ena 75 an, ki Jéhovah ti dire li faire? (b) Couma Abraham ti reagir kan Bondié ti donne li sa l’ordre-la?
5 Nou trouve l’influence ki bann dimoune agé kapav ena lor la foi zot famille, kan nou examine la vie bann patriarche, setadir chef bann grand famille, ki ti vive apré lepok Noé. Abraham ti ena apepré 75 an kan Bondié ti dire li: “Quitte to pays, to famille ek lakaz to papa, ek al dan pays ki mo pou montré toi; ek mo pou faire toi vinn enn grand nation ek mo pou beni toi.”—Genèse 12:1, 2.
6 Maziné ki dire ou quitte ou lakaz, ou bann camarade, pays kot ou finn né, ek securité ki ou ena dan enn grand famille, pou al dan enn pays ki ou pa koné. Pourtant c’est sa-mem l’ordre ki Abraham ti gagné. Li “ti allé, pareil couma Jéhovah ti dire li,” ek ziska la fin so la-vie, li ti vive dan bann la-tente couma enn etranger ek enn nomade dan pays Canaan. (Genèse 12:4; Hébreux 11:8, 9) Mem si Jéhovah ti dire ki Abraham pou vinn “enn grand nation,” li ti mort bien avant ki so bann descendant ti vinn beaucoup. Abraham ti’nn gagne enn sel garson, Isaac, avek so femme Sara, ek c’est apré ki li’nn reste 25 an dan la Terre promise ki sa finn arrivé! (Genèse 21:2, 5) Pourtant, Abraham pa ti decouragé ek li pa ti retourne dan la ville kot li ti sorti. Li vrai-mem enn bon l’exemple la foi ek l’endurance, pa vrai?
7. Ki l’effet l’endurance Abraham inn ena lor so garson Isaac, ek ki resultat sa finn ena pou bann dimoune lor la terre?
7 L’endurance Abraham ti ena enn grand l’effet lor so garson Isaac. Li aussi li ti passe tou so la-vie, setadir 180 an, couma enn etranger dan pays Canaan. L’endurance Isaac ti basé lor so la-foi dan promesse Bondié. Li ti developpe sa la-foi-la grace a so bann parent ki ti agé ek plitar sa ti vinn pli fort par seki Jéhovah Li-mem ti dire li. (Genèse 26:2-5) Fermeté ki Isaac ti ena ti joué enn role bien important dan realisation promesse Jéhovah. Dapré sa promesse-la, enn “descendant” ki ti pou enn benediction pou tou dimoune lor la terre ti pou sorti dan descendance Abraham. Plusieurs centaine l’année apré, grace a partie principal sa ‘descendance-la,’ setadir Jésus Christ, tou dimoune ki ena la foi en li, ti pou kapav regagne bann bon relation avek Bondié ek gagne la vie eternel.—Galates 3:16; Jean 3:16.
8. Couma Jacob inn manifesté enn la-foi solid, ek ki l’effet sa finn ena?
8 Isaac li aussi ti aide so garson Jacob pou developpe enn la-foi solid ki ti aide li kan li ti vinn vié. Jacob ti ena 97 an kan li ti laguerre avek enn ange toute enn la-nuit pou gagne enn benediction. (Genèse 32:24-28) Avant li mort l’age 147 an, Jacob ti rassemblé tou so la-force pou li kapav beni sakenn parmi so 12 garson. (Genèse 47:28) Bann parole prophetik ki li ti dire ek ki trouve dan Genèse 49:1-28 inn realisé, ek certain encore pé realisé.
9. Ki nou kapav dire lor l’influence ki bann chrétien agé ki mur lor plan spirituel ena lor zot famille?
9 Li clair ki bann serviteur Jéhovah ki agé ek fidel, kapav ena enn bon l’influence lor bann membre zot famille. Bann l’enseignement biblik ek bann bon conseil ki zot donné ek zot l’exemple l’endurance kapav aide enn jeune beaucoup pou li developpe enn la-foi solid a mesure ki li grandi. (Proverbes 22:6) Fodé jamais ki bann chrétien agé pensé ki zot pa pou kapav ena enn bon l’influence lor zot famille.
L’influence lor bann lezot chrétien
10. Ki ‘l’ordre Joseph ti donné concernant so bann lezo,’ ek ki l’effet sa ti ena?
10 Bann chrétien agé kapav aussi ena enn bon l’influence lor bann lezot chrétien. Kan li ti agé, Joseph, garson Jacob, ti faire enn kitsoz bien simple ki ti montré so la-foi. Sa ti ena enn grand l’effet lor plusieurs million adorateur Jéhovah ki ti vive apré li. Joseph ti ena 110 an kan “li ti donne enn l’ordre concernant so bann lezo.” Li ti donne l’ordre ki apré so la-mort, bann Israélite amenn so bann lezo avek zot kan zot quitte l’Égypte. (Hébreux 11:22; Genèse 50:25) Sa l’ordre-la ti donne bann Israélite plus l’espoir kan zot ti esclave pendant plusieurs l’année apré la mort Joseph. Sa ti donne zot l’assurance ki zot delivrance pou vini.
11. Ki l’influence kitfois Moïse ti ena lor Josué kan li ti agé?
11 Moïse li enn parmi bann serviteur Jéhovah ki ti fortifié par la foi Joseph. Kan Moïse ti ena 80 an, li ti ena privilege pou amenn lezo Joseph en dehors l’Égypte. (Exode 13:19) Apepré sa lepok-la, li ti faire connaissance Josué ki ti beaucoup pli jeune ki li. Apré, pendant 40 an, Josué ti serviteur personnel Moïse. (Nombres 11:28) Li ti accompagne Moïse lor montagne Sinaï, ek li ti joinde Moïse kan li ti desann ar les Dix Commandement. (Exode 24:12-18; 32:15-17) Nou sur ki sagesse ki Moïse ti ena ek so bann bon conseil ti bien aide Josué!
12. Couma Josué ti ena enn bon l’influence lor nation Israël toute longue so la-vie?
12 Josué, li aussi ti encourage nation Israël tant ki li ti vive. Juges 2:7 dire nou: “Le peuple ti contigne servi Jéhovah toute longue la-vie Josué ek toute longue la-vie bann ancien ki ti contigne vive apré Josué ek ki ti’nn trouve tou bann grand kitsoz ki Jéhovah ti faire pou Israël.” Mais zis apré ki Josué ek bann ancien ti’nn mort, bann Israélite ti hesité pou choisir entre vrai ek fausse l’adoration pendant enn period 300 an, ek sa ti contigné ziska lepok prophete Samuel.
Samuel ti “pratik la justice”
13. Couma Samuel ti “pratik la justice”?
13 La Bible pa dire ki l’age Samuel ti ena kan li ti mort, mais bann l’evenement ki ena dan livre Premier Samuel couvert enn period apepré 102 an, ek Samuel ti temoin la plupart parmi sa bann l’evenement-la. Dan Hébreux 11:32, 33, nou lire ki bann juge ek bann prophete ki ti droite ti “pratik la justice.” Oui, Samuel ti influence certain dimoune ki ti vive dan so lepok pou zot evite faire le mal ou-soit pou arrete pratik li. (1 Samuel 7:2-4) Couma li ti faire sa? Li ti reste fidel envers Jéhovah pendant toute longue so la-vie. (1 Samuel 12:2-5) Li pa ti peur pou donne bann conseil bien ferme, mem avek le roi. (1 Samuel 15:16-29) En plus, mem si Samuel ti’nn ‘vinn vié ek so cheveux ti’nn vinn blanc,’ li ti donne enn bon l’exemple parski li ti prié pou lezot dimoune. Li ti dire ki ‘jamais sa pa pou vinn dan so l’esprit pou faire peché kont Jéhovah kan li arrete prié’ pou bann lezot Israélite.—1 Samuel 12:2, 23.
14, 15. Couma bann chrétien agé zordi kapav imite Samuel concernant la priere?
14 Tousala montré enn kitsoz important ki bann chrétien agé kapav faire pou ena enn bon l’influence lor bann lezot serviteur Jéhovah. Malgré ki zot limité a cause zot la-santé ou-soit a cause lezot situation, zot kapav prié pou lezot. Frere ou soeur ki agé, eski ou rann-ou compte ki quantité bienfait congregation gagné grace a ou bann la-priere? Parski ou ena la foi dan di-sang ki Jésus Christ inn versé, ou ena faveur Jéhovah, ek parski ou finn enduré pendant longtemps, ou la-foi ki ‘finn passe par l’epreuve’ finn gagne valeur. (Jacques 1:3; 1 Pierre 1:7) Jamais pa blié sa: “Kan enn dimoune droite suppliyé Bondié, so la-priere kapav faire beaucoup kitsoz.”—Jacques 5:16.
15 Nou bizin bann la-priere ki ou faire pou soutenir l’activité lor Royaume Jéhovah. Certain parmi nou bann frere dan prison a cause zot neutralité. Ena lezot ki’nn victime bann catastrophe naturel, la guerre ek bann bagarre civil. Ena lezot encore, kitfois dan nou congregation-mem ki pé faire face ar bann tentation ou-soit ar l’opposition. (Matthieu 10:35, 36) Bann ki prend la tête dan predication ek dan congregation, zot aussi zot bizin ki ou prié regulierement pou zot. (Éphésiens 6:18, 19; Colossiens 4:2, 3) Oui, li vrai-mem bon ki ou mentionne ou bann frere ek soeur dan ou la-priere pareil couma Épaphras ti faire!—Colossiens 4:12.
Enseigne generation ki pé vini
16, 17. Ki Psaume 71:18 ti annoncé, ek couma sa finn realisé?
16 Bann membre “lezot brebis” ki ena l’espoir pou vive lor la terre finn gagne enn bon formation kan zot finn travail ensam avek bann membre “ti troupeau” ki pou al dan le ciel. (Jean 10:16; Luc 12:32) Sa ti annoncé dan Psaume 71:18 kot nou lire: “Mem ziska la vieillesse ek bann cheveux blanc, ah Bondié, pa quitte moi, ziska ki mo faire sa generation-la konn la force to lé-bras, ek tou bann ki pou vini apré, konn to puissance.” Avant ki bann chrétien oint al dan le ciel kot zot pou glorifié avek Jésus Christ, zot ena enn grand desir pou forme zot bann compagnon ki faire partie dan lezot brebis pou prend bann pli grand responsabilité.
17 En principe, seki Psaume 71:18 dire concernant l’importance pou enseigne “bann ki pou vini apré,” kapav applik aussi avek bann membre lezot brebis ki finn gagne l’enseignement avek bann chrétien oint. Jéhovah finn confié bann chrétien agé privilege pou rann temoignage lor Li ar bann ki pé commence servi Li asterla. (Yoël 1:2, 3) Bann membre lezot brebis considere tou seki zot finn aprann ar bann chrétien oint couma enn benediction ek zot senti ki zot ena enn devoir pou partage l’enseignement ki zot inn gagné lor la Bible avek lezot dimoune encore ki envie servi Jéhovah.—Révélation 7:9, 10.
18, 19. (a) Ki bann l’enseignement bien important beaucoup serviteur Jéhovah ki agé kapav donne lezot? (b) Ki bann chrétien agé kapav sur?
18 Bann chrétien agé ki servi Jéhovah, ki zot oint ou-soit ki zot forme partie dan lezot brebis, zot finn temoin bann l’evenement important ki finn arrivé dan l’histoire bann Témoins de Jéhovah. Ena enn tigit parmi zot ki encore vivant zordi ek ki ti là kan ti presente pou premier fois “ Photo-Drame de la Création .” Certain inn konn personnellement bann frere ki ti prend la tête dan l’organisation ek ki ti emprisonné en 1918. Ena ki finn participe dan bann program dan station radio la Societé Tour de Garde, WBBR. Ena beaucoup ki kapav koz lor lepok kan ti bizin defann liberté bann Témoins de Jéhovah pou pratik zot religion, devant bann grand tribunal. Ena encore lezot ki finn tini ferme pou reste attaché ar vrai l’adoration dan bann pays ki ti dirigé par bann dictateur. En plus, bann chrétien agé kapav raconté couma Bondié inn aide so bann serviteur pou comprend la verité tigit par tigit. La Bible encourage nou pou profite sa grand l’experience ki bann chrétien agé ena-la.—Deutéronome 32:7.
19 La Bible encourage bann chrétien agé pou ki zot bann bon l’exemple pou bann jeune. (Tite 2:2-4) Kitfois zordi, ou pa trouve bon l’effet ki ou l’endurance, ou bann la-priere ek ou bann conseil ena lor lezot. Noé, Abraham, Joseph, Moïse ek lezot pa ti kapav koné ki quantité l’effet zot fidelité ti pou ena lor bann generation ki ti pou vini apré. Pourtant, zot la-foi ek zot l’integrité, c’est bann l’heritage ki ena enn grand valeur. Alors ou la-foi ek ou l’integrité aussi ena enn grand valeur.
20. Ki benediction pé attann bann ki garde zot l’esperance ferme ziska la fin?
20 Ki ou traverse “grand tribulation” vivant ou-soit ki ou ressuscité, li pou vrai-mem enn grand la-joie pou konn “vrai la vie”! (Matthieu 24:21; 1 Timothée 6:19) Mazinn lepok kot Jésus Christ pou regné pendant mille an, kan Jéhovah pou tire l’effet la vieillesse ek pou faire ou ré-vinn jeune. Au lieu ki nou trouve nou lekor contigne deterioré, chaque jour kan nou pou levé, nou pou senti-nou pli bien lor plan physik—nou pou ena plus la-force, nou pou trouve pli bien, tann pli bien ek nou pou pli joli! (Job 33:25; Isaïe 35:5, 6) Bann ki pou gagne privilege pou vive dan le monde nouveau ki Bondié pou faire, pou reste toujours jeune comparé avek l’eternité ki pou devant zot. (Isaïe 65:22) Alors, nou tou ki pé servi Jéhovah, anou faire tou seki nou kapav pou garde nou l’esperance ferme ziska la fin ek contigne servi Jéhovah avek tou nou leker. Nou kapav sur ki Jéhovah pou realise tou so bann promesse ek ki, seki Li pou faire, pou depasse enn quantité tou seki nou kapav esperé.—Psaume 37:4; 145:16.
Ki ou pou reponn?
• Couma fermeté ki Noé ti ena kan li ti vié finn amenn bann benediction pou tou dimoune lor la terre?
• Ki l’effet la foi bann patriarche finn ena lor zot bann descendant?
• Alors ki zot ti agé, couma Joseph, Moïse, Josué ek Samuel ti fortifié bann lezot serviteur Jéhovah dan zot lepok?
• Ki l’heritage bann chrétien agé kapav laissé?
[Bann question pou l’étude]
[Zimage, page 29]
L’endurance Abraham ti ena enn grand l’effet lor Isaac
[Zimage, page 32]
Bann jeune tire profit kan zot ecoute bann chrétien fidel ki agé