“Entraine-toi pou ki to kapav developpe l’attachement pou Bondié.”—1 TIMOTHÉE 4:7.

1, 2. (a) Kifer Paul ti felicite Timothée? (b) Couma eski zordi bann jeune pé ‘entraine-zot pou ki zot kapav developpe l’attachement pou Bondié’?

 “APART li, mo pena personne ki ena enn l’attitude couma li li ena, ek ki vrai-mem prend compte bann kitsoz ki concerne zot. . . . Pareil couma enn zenfant avek so papa, li ti travail avek moi couma enn esclave pou faire la bonne nouvelle progressé.” (Philippiens 2:20, 22) Dan so lettre ki li ti ecrire bann premier chrétien dan congregation Philippes, l’apotre Paul ti mentionne aussi sa joli parole felicitation-la. Lor kisannla li ti pé kozé? Lor Timothée, so pli jeune compagnon voyage. Maziné couma sa ti encourage Timothée kan Paul ti donne li l’assurance ki li ti ena l’affection pou li ek aussi confiance en li!

² Bann jeune ki spirituel pareil couma Timothée inn touletan ena enn grand valeur parmi peuple Jéhovah. (Psaume 110:3) Zordi dan l’organisation Bondié ena beaucoup jeune ki pionnier, missionnaire, volontaire dan bann construction ek Béthélite. Ena lezot ki participe avek zèle dan bann l’activité congregation alors ki zot ena lezot responsabilité. Zot aussi zot merite bann felicitation. Sa bann jeune-la konn vrai satisfaction ki gagné kan poursuive bann l’objectif ki honore Jéhovah, nou Papa ki dan le ciel. Zot pé vrai-mem ‘entraine-zot pou ki zot kapav developpe l’attachement pou Bondié.’—1 Timothée 4:7, 8.

3. Ki bann question nou pou examiné dan sa lartik-la?

³ En tant ki jeune, eski ou ena bann l’objectif spirituel precis ki ou envie realisé? Kot-sa ou kapav gagne l’aide ek l’encouragement pou ou faire sa? Couma eski ou kapav resisté kont bann pression ki ena dan sa lé-monde materialiste-la? Ki bann benediction ou kapav attann pou gagné si ou poursuive bann l’objectif ki honore Bondié? Anou examine la vie Timothée ek travail ki li ti choisir pou nou trouve reponse sa bann question-la.

L’environnement kot Timothée ti grandi

4. Raconte enn tipé la vie Timothée kan li’nn vinn chrétien.

⁴ Timothée ti grandi dan Lystres, enn ti la-ville dan Galatie ki ti enn territoire ki ti dirigé par bann Romain. Pena doute ki li ti rente en contact avek la religion chrétien alors ki li ti adolescent, kan Paul ti preché dan Lystres vers 47 n.l. Timothée pa’nn tardé pou gagne enn bon reputation parmi bann frere chrétien dan so l’endroit. Kan Paul ti retourne Lystres deux an plitar, en 49 n.l., ek li ti aprann progré ki Timothée ti’nn faire, li ti choisir Timothée pou vinn so compagnon missionnaire. (Actes 14:5-20; 16:1-3) A mesure ki Timothée ti vinn mur, li ti gagne bann pli grand responsabilité, parmi bann mission important pou fortifié bann frere. Kan Paul, ki ti en prison dan Rome, ti ecrire Timothée vers 65 n.l., Timothée ti pé servi couma ancien dan congregation Éphèse.

5. Dapré 2 Timothée 3:14, 15, ki deux kitsoz important ti aide Timothée dan so decision pou poursuive bann l’objectif spirituel?

⁵ Li clair ki Timothée ti choisir pou poursuive  bann l’objectif spirituel. Mais ki ti pousse li pou faire sa? Paul mentionne deux kitsoz important dan deuxieme lettre ki li ti ecrire Timothée. Li ti ecrire: “Pa abandonne bann kitsoz ki to’nn aprann ek ki finn convaink toi pou croire, parski to koné ar ki dimoune to finn aprann sa ek ki depuis bien tipti, to konn bann l’ecriture sacré.” (2 Timothée 3:14, 15) D’abord, anou examine l’influence ki bann lezot chrétien ti ena lor bann choix ki Timothée ti faire.

Profite bon l’influence bann dimoune spirituel

6. Ki formation Timothée ti gagné, ek ki l’influence sa ti ena lor li?

⁶ Timothée ti grandi dan enn lakaz kot tou dimoune pa ti suive mem religion. So papa ti enn Grec, ek so mama, Eunice, ek so grand-mere Loïs ti bann Juif. (Actes 16:1) Depuis so l’enfance, Eunice ek Loïs ti enseigne Timothée bann verité ki ena dan bann l’Écritures hébraïques. Apré ki zot ti vinn chrétien, surement zot ti convaink li pou croire bann l’enseignement chrétien. Li clair ki Timothée ti profite autant ki possible sa bon formation-la. Paul ti remarké: “Mo rappel la foi ki to ena, ki pa hypocrite, ek ki d’abord to grand-mere Loïs ek to mama Eunice ti ena, mais ki mo sur, toi aussi to ena.”—2 Timothée 1:5.

7. Ki benediction beaucoup jeune ena, ek couma zot kapav profite sa?

⁷ Zordi, ena beaucoup jeune ki ena privilege pou ena bann parent ek bann grand-parent ki ena la crainte pou Bondié, ek ki, couma Loïs ek Eunice, reconette l’importance bann l’objectif spirituel. Par exemple, Samira encore rappel bann longue conversation ki li ti ena avek so bann parent kan li ti adolescent. Li raconté: “Mama ek papa ti enseigne moi pou trouve bann kitsoz pareil couma Jéhovah trouvé ek pou faire predication vinn mo priorité. Zot ti toujours motive moi pou prend service a plein temps.” Samira finn suive seki so bann parent ti encourage li faire ek zordi li ena privilege pou servi en tant ki membre famille Béthel dan so pays. Si ou bann parent encourage ou pou concentré lor bann l’objectif spirituel, prend bien compte zot bann conseil. Zot envie seki pli bon pou ou.—Proverbes 1:5.

8. Couma Timothée ti profite bon l’influence bann chrétien?

⁸ Li important aussi ki ou rod compagnie bann frere ek soeur ki pou ena enn bon l’influence lor ou. Bann ancien dan congregation Timothée ek bann ki ti dan congregation Iconium, preské 30 kilometre pli loin, ti bien konn Timothée. (Actes 16:1, 2) Li ti bien camarade avek Paul ki ti rempli ar l’energie ek ki ti touletan pé faire kitsoz. (Philippiens 3:14) Bann lettre ki Paul ti ecrire montré ki Timothée ti accepté conseil ek ki li ti pré pou imite l’exemple bann ki ti ena la foi. (1 Corinthiens 4:17; 1 Timothée 4:6, 12-16) Paul ti ecrire: “Mais toi, to’nn suive bien mo  l’enseignement, mo maniere vive, mo l’objectif, mo la-foi, mo patience, mo l’amour, mo l’endurance.” (2 Timothée 3:10) Oui, Timothée ti suive bien l’exemple Paul. Ou aussi, si ou frequente bann frere ek soeur ki fort lor plan spirituel, sa pou aide ou pou developpe bann bon l’objectif spirituel.—2 Timothée 2:20-22.

Etudié “bann l’ecriture sacré”

9. Apart choisir bann bon frequentation, ki ou bizin faire pou ‘entraine-ou pou ou kapav developpe l’attachement pou Bondié’?

⁹ Eski ou pou kapav realise ou bann l’objectif spirituel zis parski ou choisir bann frequentation ki bizin? Non. Pareil couma Timothée, ou bizin examine avek attention “bann l’ecriture sacré.” Kitfois ou pa trop content etudié, mais pa blié ki Timothée ti bizin ‘entraine-li pou ki li kapav developpe l’attachement pou Bondié.’ Souvent bann athlete faire bann l’entrainement dur pendant plusieurs mois pou ki zot kapav realise zot l’objectif. Li pareil pou ou realise bann l’objectif spirituel—ou bizin faire sacrifice ek contigne faire zeffort. (1 Timothée 4:7, 8, 10, note) Mais ou kapav demandé, ‘couma l’etude la Bible kapav aide moi pou realise mo bann l’objectif ?’ Anou guette trois fason ki l’etude la Bible kapav aide ou.

10, 11. Kifer la Bible pou pousse ou pou realise bann l’objectif spirituel? Donne enn l’exemple.

¹⁰ Premierement la Bible pou donne ou motivation ki bizin. Li faire ou konn personnalité extraordinaire nou Papa ki dan le ciel, pli grand action ki Li’nn faire parski Li content nou, ek bann benediction eternel ki Li reservé pou so bann serviteur ki fidel. (Amos 3:7; Jean 3:16; Romains 15:4) A mesure ki ou connaissance lor Jéhovah grandi, ou l’amour pou Li ek ou desir pou voué ou la-vie ar Li aussi pou grandi.

¹¹ Pou beaucoup jeune chrétien, seki finn vrai-mem aide zot pou prend la verité serieux, c’est enn l’etude la Bible personnel regulier. Par exemple, Adele ti grandi dan la verité mais jamais li pa ti ena okenn l’objectif spirituel. Li raconté: “Mo ti al la Salle du Royaume avek mo bann parent, mais mo pa ti ena enn l’etude personnel ni mo ti ecouté pendant reunion.” Apré ki so pli grand soeur ti prend bapteme, Adele ti commence prend la verité pli serieux. Li ti dire: “Mo ti commence lire la Bible en entier. Mo ti lire enn tigit ek lerla mo ti ecrire enn note lor seki mo ti fek lire. Mo encore ena tou mo bann note. Mo ti lire la Bible dan enn an.” Resultat: Adele ti senti-li poussé pou voué so la-vie ar Jéhovah. Malgré enn handicap physik ki grave, asterla li pionnier.

12, 13. (a) Ki changement l’etude la Bible pou aide enn jeune faire, ek couma? (b) Cite bann l’exemple sagesse pratik ki ena dan Parole Bondié.

¹² Deuxiemement, la Bible pou aide ou pou faire bann changement ki bizin dan ou personnalité. Paul ti dire Timothée ki “bann l’ecriture sacré,” zot “utile pou enseigné, pou corrigé, pou mette bann kitsoz en ordre, pou discipliné dan la justice, pou ki dimoune ki servi Bondié kapav bien qualifié, bien equipé pou tou bon travail.” (2 Timothée 3:16, 17) Kan ou medite souvent lor bann kitsoz ki ena rapport avek Parole Bondié ek kan ou applik bann principe la Bible, ou pou laisse l’esprit Bondié affine ou personnalité. Sa pou faire ou developpe bann qualité important couma l’humilité, perseverance, zèle, ek vrai l’amour pou ou bann frere ek soeur. (1 Timothée 4:15) Timothée ti ena sa bann qualité-la, ek sa ti faire li vinn enn kikenn ki ti ena enn grand valeur pou Paul ek pou bann congregation kot li ti servi.—Philippiens 2:20-22.

¹³ Troisiemement, Parole Bondié rempli ar sagesse pratik. (Psaume 1:1-3; 19:7; 2 Timothée 2:7; 3:15) Li pou aide ou pou konn choisir ou bann camarade, pou choisir bann bon distraction, ek pou prend beaucoup lezot decision ki difficile. (Genèse 34:1, 2; Psaume 119:37; 1 Corinthiens 7:36) Pou ou kapav realise ou bann l’objectif spirituel, li bien important ki ou prend bann bon decision depuis asterla-mem.

“Combatte sa joli combat pou la foi-la”

14. Kifer poursuive bann l’objectif spirituel, li pa enn kitsoz ki facile pou faire?

¹⁴ Pli bon kitsoz ki ou kapav faire, c’est donne  priorité bann l’objectif ki honore Jéhovah, mais li pa enn kitsoz ki facile pou faire. Par exemple, kan ou bizin choisir ki travail ou pou faire, lezot kapav faire beaucoup pression lor ou. Kitfois sa kapav ou bann famille, camarade, ek professeur ki ena bann bon l’intention ek ki croire ki kan ou ena enn pli grand l’education ek enn travail kot gagne bien l’argent, sa-mem ki pou faire ou reussi vrai-mem ek trouve bonheur. (Romains 12:2) Pareil couma Timothée, ou pou bizin “combatte sa joli combat pou la foi-la” pou ou “saisi bien la vie eternel” ki Jéhovah offert ou.—1 Timothée 6:12; 2 Timothée 3:12.

15. Ar ki l’opposition kitfois Timothée ti bizin faire face?

¹⁵ Kan bann membre ou famille ki pa Témoin de Jéhovah pa d’accord avek ou bann choix, sa l’epreuve-la kapav bien dur. Li possible ki Timothée ti ena pou faire face ar sa qualité l’opposition-la. Dapré enn livre reference, kitfois famille Timothée “ti enn parmi bann famille ki ti ena plus l’education ek ki ti pli riche.” Kitfois papa Timothée ti attann ki so garson faire bann grand l’etude ek contigne business familial. a Maziné couma li ti reagir kan li ti decouvert ki Timothée ti prefere bann danger ek bann problem financier ki li ti pou gagné dan service missionnaire ensam avek Paul!

16. Couma eski enn jeune ti faire face ar l’opposition so parent?

¹⁶ Bann jeune chrétien faire face ar bann mem difficulté zordi. Matthieu ki Béthélite, rappel: “Kan mo ti commence faire pionnier, mo papa ti bien chagrin. Li ti pensé ki kan mo ti travail couma enn cleaner pou aide moi faire mo service, mo ti pé ‘gaspille’ l’education ki mo ti’nn gagné. Li ti bouffonne moi kan li ti rappel moi comié l’argent mo ti kapav gagné si mo ti prend enn travail a plein temps.” Couma Matthieu inn faire face ar sa l’opposition-la? “Mo pa ti mank mo lecture la Bible ek mo ti touletan prié, surtout dan bann moment kot mo ti kapav mette-moi en colere vite.” Jéhovah inn recompense Matthieu pou so determination. Avek le temps, so relation avek so papa inn amelioré. Matthieu inn aussi vinn pli proche avek Jéhovah. Li dire: “Mo’nn trouve Jéhovah prend moi soin, donne moi courage, ek empeche moi prend bann mauvais decision. Mo pa ti pou vive tousala si mo pa ti fixé-moi bann l’objectif spirituel.”

Garde ou l’esprit fixé lor bann l’objectif spirituel

17. Couma, sans ki zot rann-zot compte, certain kapav decourage bann ki ena l’objectif pou prend service a plein temps? (Matthieu 16:22)

¹⁷ Mem bann frere ek soeur kapav, sans ki zot rann-zot compte, decourage ou pou poursuive  bann l’objectif spirituel. Certain kapav demann ou, ‘Kifer to bizin faire pionnier? To kapav amenn enn la-vie normal ek preché en mem temps. Rod enn bon travail ki pou garanti to securité lor plan materiel.’ Sa kapav parette enn bon conseil, mais eski ou pé entraine-ou pou ou kapav developpe l’attachement pou Bondié si ou suive sa conseil-la?

18, 19. (a) Couma ou kapav garde ou l’esprit fixé lor bann l’objectif spirituel? (b) Raconté ki sacrifice ou, en tant ki enn jeune, ou pé faire pou Royaume Bondié.

¹⁸ Li parette ki certain chrétien dan lepok Timothée ti raisonne coumsa. (1 Timothée 6:17) Pou aide Timothée garde so lizié fixé lor bann l’objectif spirituel, Paul ti encourage li kan li ti dire li: “Okenn zom ki pé servi couma soldat pa embarrasse-li avek bann zaffaire commercial ki ena dan la vie, pou li kapav gagne faveur sa dimoune ki’nn engage li couma soldat-la.” (2 Timothée 2:4) Enn soldat ki lor duty pa gagne droit laisse bann l’objectif ki ena dan la vie normal distraire li. Li bizin toujours paré pou suive bann l’ordre ki sa officier ki en charge-la donné. So la-vie ek la vie lezot dimoune depann lor la. Ou, ou enn soldat ki travail pou Jésus Christ. Alors ou aussi ou bizin pense enn sel kitsoz, ek pa laisse bann l’objectif materialiste ki pa necessaire empeche ou accompli couma bizin ou travail pou sap la vie bann dimoune.—Matthieu 6:24; 1 Timothée 4:16; 2 Timothée 4:2, 5.

¹⁹ Au lieu ki ou poursuive l’objectif pou amenn enn la-vie facile, developpe l’esprit sacrifice. “Couma enn bon soldat Jésus Christ, accepté to part souffrance.” (2 Timothée 2:3) Timothée ti aprann enn secret kan li ti avek Paul—li ti aprann pou contente-li ar seki li ti ena mem dan bann situation pli difficile. (Philippiens 4:11, 12; 1 Timothée 6:6-8) Ou aussi ou kapav faire pareil. Eski ou paré pou faire sacrifice pou Royaume Bondié?

Bann benediction asterla ek dan l’avenir

20, 21. (a) Mentionne certain benediction ki ou kapav gagné kan ou poursuive bann l’objectif spirituel. (b) Ki ou determiné pou faire?

²⁰ Timothée ti travail ensam avek Paul pendant apepré 15 an. Li ti temoin formation bann nouveau congregation a mesure ki la bonne nouvelle ti preché dan preské la plupart pays ki trouve dan nord la mer Méditerranée. Jamais li pa ti pou’nn konn enn la-vie pli interessant ki ti pou donne li plus satisfaction, si li ti’nn choisir enn la-vie “normal.” (2 Corinthiens 11:26, 27) Ou aussi ou pou gagne bann benediction spirituel ki ena beaucoup valeur si ou poursuive bann l’objectif spirituel. Ou pou vinn proche avek Jéhovah ek ou pou gagne l’amour ek respé ou bann frere ek soeur. Au lieu bann problem ek chagrin ki gagné kan poursuive bann richesse materiel, ou pou konn vrai bonheur ki gagné kan ou pa hesité pou donné. Seki pli important, c’est ki ou pou “saisi vrai la vie”—la vie eternel lor enn la-terre ki pou vinn enn paradi.—1 Timothée 6:9, 10, 17-19; Actes 20:35.

²¹ Alors si ou pankor commence entraine-ou pou ki ou kapav developpe l’attachement pou Bondié, nou encourage ou sincerement pou commence faire sa asterla-mem. Vinn proche avek bann ki dan congregation ki kapav aide ou pou realise bann l’objectif spirituel, ek demann zot conseil. Faire ou l’etude la Bible personnel regulier vinn enn priorité. Faire tou pou resisté kont l’esprit materialiste ki ena dan sa lé-monde-la. Ek jamais pa blié ki Bondié “ki donne nou tou kitsoz en abondance pou nou plaisir,” promette ou ki ou kapav gagne bann grand benediction asterla-mem ek dan l’avenir aussi si ou choisir bann l’objectif ki honore Li.—1 Timothée 6:17.

[Note]

Eski ou rappel?

• Kot-sa bann jeune kapav gagne l’aide pou realise zot bann l’objectif spirituel?

• Kifer li bien important pou ena enn l’etude la Bible ki serieux?

• Couma bann jeune kapav resisté kont l’influence materialiste ki ena dan sa lé-monde-la?

• Ki benediction ou kapav gagné kan ou poursuive bann l’objectif spirituel?

[Bann question pou l’étude]

[Zimage, page 28]

Timothée ti poursuive bann bon l’objectif

[Zimage, page 29]

Kisannla ti ena enn bon l’influence lor Timothée?

[Zimage, page 31]

Eski ou’nn fixé-ou bann l’objectif spirituel?