Mari—Reconette l’autorité Christ ek imite li
“Chef tou bann zom c’est Christ.”—1 Corinthiens 11:3.
1, 2. (a) Couma nou kapav koné si enn dimoune li enn bon mari? (b) Kifer li important nou reconette ki c’est Bondié ki finn crée mariage?
Couma ou pou koné ki enn dimoune li enn bon mari? Eski c’est kan li intelligent ek fort? Eski c’est kan li ena capacité pou gagne beaucoup l’argent? Ou-soit eski c’est kan li traite so femme ek so bann zenfant avek amour ek bonté? Beaucoup mari pa reussi rempli sa dernier condition-la, mais zot laisse-zot influencé par l’esprit sa lé-monde-la ek par bann principe ki dimoune inn etabli. Kifer? Surtout parski zot pa reconette ek zot pa suive direction Celui ki finn crée mariage, setadir Bondié ki ‘ti faire enn femme avek cote ki Li ti prend dan enn zom ek Li ti amenn li vers sa zom-la.’—Genèse 2:21-24.
2 Jésus Christ ti confirme sa recit ki koz lor premier mariage ki Bondié ti faire-la. Li ti dire bann dimoune ki ti critik li: “Eski zot pa finn lire ki celui ki ti crée zot, depuis commencement, ti faire enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la-chair’? Oui, zot nepli deux, mais enn sel la-chair. Alors, seki Bondié finn mette enba enn sel joug, fodé ki personne pa separe sa.” (Matthieu 19:4-6) Avredir pou ki enn mariage reussi, bann couple bizin reconette ki c’est Bondié ki finn crée mariage ek ki si zot pa applik bann principe ki trouve dan so Parole, la Bible, zot pa pou reussi.
Seki faire enn dimoune vinn enn bon mari
3, 4. (a) Couma Jésus ti kapav ena enn grand connaissance lor mariage? (b) Kisannla femme symbolik Jésus, ek couma bann mari bizin traite zot femme?
3 Si enn mari etudié seki Jésus ti dire ek imite seki Li ti faire, sa kapav aide li pou vinn enn bon mari. Jésus ena enn grand connaissance lor mariage, parski li ti là kan Bondié ti crée premier couple humain ek kan Li ti marié zot. Jéhovah ti dire li: “Anou faire dimoune couma nou, dan nou ressemblance.” (Genèse 1:26) Dan sa verset-la, Bondié ti pé koz ar sa kikenn ki Li ti crée avant tou lezot creation ek ki “ti vinn couma enn zouvrier qualifié a coté Li.” (Proverbes 8:22-30) Jésus li-mem ki “premier-né dan tou creation.” Li “commencement creation Bondié” ek li ti existé mem avant creation l’univers.—Colossiens 1:15; Révélation 3:14.
4 La Bible appel Jésus “l’Agneau Bondié,” ek presente li dan enn sens symbolik couma enn mari. Enn fois enn ange ti dire: “Vinn ici, mo pou montré toi la-marié, femme l’Agneau.” (Jean 1:29; Révélation 21:9) Alors, kisannla ki sa la-marié-la, ou-soit “femme l’Agneau”? “Femme l’Agneau” c’est bann disciple fidel Jésus Christ ki oint ar l’esprit saint, ki pou ensam avek li dan le ciel ek ki pou règne dan so Royaume. (Révélation 14:1, 3) Alors, fason ki Jésus ti traite so bann disciple kan li ti avek zot lor la terre, donne bann mari enn model couma zot bizin traite zot femme.
5. Pou kisannla Jésus li enn model?
5 Li vrai ki la Bible dire ki Jésus li enn l’exemple pou tou so bann disciple. Nou lire: “Christ . . . finn souffert pou zot, ek li finn laisse enn model pou zot, pou ki zot suive bien so trace.” (1 Pierre 2:21) Mais, Jésus li enn model surtout pou bann zom. La Bible dire: “Chef tou bann zom c’est Christ; chef enn femme c’est enn zom; ek chef Christ c’est Bondié.” (1 Corinthiens 11:3) Jésus Christ, li chef bann zom, alors bann mari bizin suive so l’exemple. Sa vedir ki, pou enn famille vive heureux, zot bizin applik principe l’autorité dan la famille. Pou la famille kapav heureux, bann mari bizin traite zot femme avek amour, pareil couma Jésus ti traite so femme symbolik, so bann disciple oint.
Couma pou faire face ar bann problem familial
6. Dapré 1 Pierre 3:7, couma bann mari bizin reste ar zot femme?
6 Parski zordi nou pé vive dan enn lé-monde ki rempli ar problem, li bien important ki bann mari imite l’exemple Jésus setadir zot bizin ena patience, l’amour ek montré-zot ferme pou applik bann principe ki droite. (2 Timothée 3:1-5) Guette seki la Bible dire concernant model ki Jésus inn laissé: “Zot bann mari, contigne reste ar bannla [zot femme] dapré la connaissance.” (1 Pierre 3:7) Oui, bann mari bizin servi zot connaissance pou faire face ar bann problem familial, pareil couma Jésus ti faire face ar bann difficulté. Li ti passe par bann grand l’epreuve ki ti faire li souffert plus ki n’importe ki dimoune. Mais li ti conscient ki c’est Satan, so bann demon ek sa mauvais lé-monde-la ki ti responsable so bann l’epreuve. (Jean 14:30; Éphésiens 6:12) Jamais Jésus ti etonné kan li ti gagne bann l’epreuve. Alors, fodé pa ki bann conjoint etonné kan zot gagne bann “problem dan zot la-vie.” La Bible averti bann ki marié ki zot bizin attann pou gagne bann problem.—1 Corinthiens 7:28.
7, 8. (a) Couma enn mari reste avek so femme dapré la connaissance? (b) Kifer bann femme merite gagne l’honneur?
7 La Bible dire ki bann mari bizin reste ar zot femme “dapré la connaissance, [ek] donne zot l’honneur pareil couma enn recipient pli fragile, enn vase feminin.” (1 Pierre 3:7) La Bible ti annoncé ki en general, bann mari pou brite ek pou faire dominere ar zot femme. (Genèse 3:16) Mais enn mari ki envie gagne faveur Bondié pou donne so femme l’honneur. Li pou envie traite li couma enn di-bien ki ena valeur ek jamais li pa pou servi so la-force pou blesse li. Au contraire, li pou prend compte so bann sentiment, ek li pou toujours traite li avek respé ek dignité.
8 Kifer bann mari bizin donne zot femme l’honneur? La Bible reponn: “Parski ensam avek bannla, zot aussi, zot pou herite la vie, ki enn faveur ki personne pa merité, pou ki pena nanyin ki bloque zot la-priere.” (1 Pierre 3:7) Fodé ki bann mari bien comprend ki Jéhovah pa considere enn zom ki adore Li, couma pli superieur ki enn femme ki adore Li. Bann femme ki digne pou gagne faveur Bondié pou gagne mem recompense ki bann zom, setadir la vie eternel—beaucoup femme pou mem gagne la vie dan le ciel kot “pena ni zom ni femme.” (Galates 3:28) Alors bann mari bizin rappel ki c’est fidelité enn dimoune ki faire li ena valeur devant Bondié, pa si li enn zom ou-soit enn femme, pa mem si li enn zenfant.—1 Corinthiens 4:2.
9. (a) D’apré Pierre, kifer bann mari bizin donne l’honneur zot femme? (b) Couma Jésus ti donne l’honneur bann femme?
9 L’apotre Pierre ti montré l’importance pou enn mari donne so femme l’honneur, kan li ti dire a la fin 1 Pierre 3:7: “Pou ki pena nanyin ki bloque zot la-priere.” Li pou bien dangereux ki enn situation coumsa arrivé! Si enn mari pa donne so femme l’honneur, so bann la-priere pou kapav bloqué, pareil couma sa ti arrive certain serviteur Bondié ki ti negligent, dan le passé. (Lamentations 3:43, 44) Li bon ki bann zom chrétien—bann ki marié ou-soit bann ki pense pou marié—etudié couma Jésus ti traite bann femme dan enn fason digne. Jésus ti accepté ki bann femme forme partie dan group ki ti accompagne li dan so ministere, ek li ti traite zot avek bonté ek respé. Enn fois, Jésus ti mem annonce enn verité extraordinaire ar bann femme en premier, ek li ti dire zot al dire sa bann zom!—Matthieu 28:1, 8- 10; Luc 8:1-3.
Enn l’exemple surtout pou bann mari
10, 11. (a) Kifer c’est surtout bann mari ki bizin etudié l’exemple Jésus? (b) Couma bann mari bizin montré l’amour pou zot femme?
10 Couma nou ti dire avant, la Bible compare lien ki ena entre mari ek femme, pareil couma lien ki ena entre Christ avek so ‘la-marié,’ setadir congregation bann chrétien oint. La Bible dire: “Enn mari li chef so femme pareil couma Christ aussi li chef congregation.” (Éphésiens 5:23) Sa bann parole-la bizin encourage bann mari pou examine fason ki Jésus ti montré so l’autorité couma enn chef lor so bann disciple. C’est zis si zot faire sa ki bann mari pou kapav suive bien l’exemple Jésus ek donne zot femme enn bon direction, l’amour ek l’attention, pareil couma Jésus ti faire pou so congregation.
11 La Bible donne sa l’encouragement-la bann chrétien: “Mari, contigne content zot femme, pareil couma Jésus Christ aussi finn content la congregation ek finn donne so la-vie pou sauve li.” (Éphésiens 5:25) Éphésiens chapitre quatre appel “la congregation,” “lekor Christ.” Dan sa lekor symbolik-la, ena plusieurs membre, bann zom ek femme toulé-deux. Zot tou aidé pou ki lekor-la fonctionne bien. Bien-sur, c’est Jésus ki “la tête sa lekor-la, setadir la tête congregation.”—Éphésiens 4:12; Colossiens 1:18; 1 Corinthiens 12:12, 13, 27.
12. Couma Jésus ti montré l’amour pou so lekor symbolik?
12 Jésus ti montré l’amour pou so lekor symbolik, setadir pou “la congregation,” surtout kan li ti prend compte l’interet bann ki ti pou vinn membre sa congregation-la. Par exemple, kan so bann disciple ti fatigué, li ti dire zot: “Vini, vinn a part dan enn l’endroit kot pena personne, ek repose-zot enn tigit.” (Marc 6:31) Enn parmi bann zapotre ti ecrire seki Jésus ti faire dan bann dernier l’heure avant so la-mort. Li ti dire: “Jésus, ki ti content bann ki ti pou li [setadir bann membre so lekor symbolik] . . . , ti content zot ziska la fin.” (Jean 13:1) C’est vrai-mem enn bon l’exemple ki Jésus inn donne bann mari lor fason ki zot bizin traite zot femme.
13. Couma la Bible encourage bann mari pou content zot femme?
13 L’apotre Paul ti reprend l’exemple ki Jésus ti laisse bann mari, kan li ti donne sa l’encouragement-la: “Bann mari bizin content zot femme pareil couma zot prop lekor. Enn kikenn ki content so femme content li-mem, parski jamais personne pa finn ena la haine pou so prop la-chair; au contraire li nourri li ek li prend li soin, pareil couma Christ aussi faire pou la congregation.” Paul ti ajouté: “Fodé ki sakenn content so madame pareil couma li content li-mem.”—Éphésiens 5:28, 29, 33.
14. Couma eski enn mari traite so lekor ki imparfait, ek ki sa montré lor fason ki li bizin traite so femme?
14 Pense enn tipé lor seki Paul inn ecrire. Eski enn zom ki ena tou so l’esprit pou faire li-mem di-tort par expré? Si enn missié cogne so pouce lipié, eski li pou batte pouce-la parski li’nn manké faire li tombé? Jamais! Eski enn mari pou abaisse li-mem devant so bann camarade ou-soit pou faire palab lor so prop erreur? Non! Alors, kifer eski li pou faire bann remark blessant lor so madame, ou-soit-mem batte li si li faire enn erreur? Fodé ki bann mari pa guette zis zot prop l’interet, mais aussi l’interet zot femme.—1 Corinthiens 10:24; 13:5.
15. (a) Ki Jésus ti faire kan so bann disciple ti montré zot faiblesse parski zot ti imparfait? (b) Ki bann leson nou kapav tiré ar so l’exemple?
15 Guette par exemple couma Jésus ti ena consideration pou so bann disciple la nuit avant li mort kan bannla ti montré zot faiblesse parski zot ti imparfait. Malgré ki li ti dire zot plusieurs fois ki zot bizin prié, zot ti gagne sommeil trois fois kan zot ti dan jardin Gethsémané. Enn coup, bann zom armé ti entoure zot. Jésus ti demann sa bann zom-la: “Kisannla zot pé rodé?” Kan zot ti reponn: “Jésus, ki sorti Nazareth,” li ti dire zot: “Mo-mem sa.” Parski li ti koné ki ‘l’heure ti’nn arrivé’ pou li mort, li ti dire zot: “Alors, si c’est moi ki zot pé rodé, laisse sa bannla allé.” Jésus ti toujours montré consideration pou bien-etre so bann disciple ki ti forme so femme symbolik, ek li ti rod enn moyen pou faire zot sapé. Si bann mari etudié couma Jésus ti traite so bann disciple, zot pou trouve beaucoup principe ki zot kapav appliké lor fason ki zot bizin traite zot femme.—Jean 18:1-9; Marc 14:34-37, 41.
Jésus pa ti laisse-li aveuglé par bann sentiment
16. Ki sentiment Jésus ti ena pou Marthe, mais pourtant couma li ti corrige li?
16 La Bible dire: “Jésus ti content Marthe ek so soeur ek Lazare,” bann dimoune ki souvent ti recevoir li kot zot. (Jean 11:5) Pourtant, Jésus pa ti hesité pou conseil Marthe kan li ti pé trop prend compte enn repas ki li ti pé preparé ek ki sa ti pé empeche li pou passe le temps avek Jésus ek pou gagne enn l’enseignement spirituel. Li ti dire Marthe: “Marthe, Marthe, to pé tracassé ek to pé abruti ar beaucoup kitsoz. Pourtant, enn tigit kitsoz-mem ki necessaire, ou-soit mem enn sel.” (Luc 10:41, 42) Pena doute ki li pa ti difficile pou Marthe accepté conseil Jésus parski li ti clair ki Jésus ti ena l’affection pou li. Li pareil aussi pou bann mari, zot bizin traite zot femme avek bonté, amour, ek bien choisir zot mot kan zot kozé. Mais, si enn femme bizin faire bann changement, fodé pa ki so mari hesité pou dire li, pareil couma Jésus ti faire avek Marthe.
17, 18. (a) Couma Pierre ti reprend Jésus, ek kifer Pierre ti bizin correction? (b) Ki responsabilité enn mari ena?
17 Enn lot fois, Jésus ti explik so bann zapotre ki li ti bizin al Jérusalem kot li ti pou gagne persecution ar “bann ancien, bann chef pretre ek bann scribe . . . ek zot pou faire touye li, ek troisieme jour, li pou ressuscité.” Kan Jésus ti dire sa, Pierre ti amenn li a part ek ti commence reprend-li. Li ti dire Jésus: “To bizin bon avek to-mem Seigneur, non, to pa pou konn sa sort-la.” Li clair ki Pierre ti’nn laisse-li aveuglé par so sentiment. Ti bizin corrige li. Alors Jésus ti dire li: “Passe derriere moi, Satan! To enn l’obstacle ki kapav faire moi tombé, parski to pa pense bann pensée Bondié, mais bann pensée bann zom.”—Matthieu 16:21-23.
18 Jésus ti’nn fek dire so bann zapotre seki Bondié ti envie li faire: li ti bizin passe par beaucoup souffrance ek la mort. (Psaume 16:10; Isaïe 53:12) Alors, Pierre ti ena tort pou reprend Jésus. Oui, Pierre ti bizin gagne enn correction bien ferme, pareil couma nou aussi nou bizin gagné parfois. Enn mari, li chef so famille, li ena l’autorité ek responsabilité pou corrige so famille ek so femme aussi. Li vrai ki parfois li bizin ferme, mais kan li corrigé, fodé ki li faire sa avek amour ek bonté. Alors, pareil couma Jésus ti aide Pierre pou redresse so fason pensé, bann mari aussi bizin parfois faire pareil avek zot femme. Par exemple, kitfois enn mari pou bizin dire so femme avek bonté kifer li bizin faire certain changement concernant so l’habillement, bann bijou ki li metté ou-soit so maquillage, si so femme pé commence mank modestie ki la Bible encourage bann femme pou ena.—1 Pierre 3:3-5.
Li bon ki bann mari ena patience
19, 20. (a) Ki problem ti developpé parmi bann zapotre, ek couma Jésus ti faire face ar sa? (b) Eski Jésus ti reussi dan so bann zeffort?
19 Si ena certain kitsoz ki bizin corrigé, fodé pa ki enn mari attann ki li pou gagne bann bon resultat dé-suite pou so bann zeffort. Jésus ti bizin contigne faire bann zeffort pou change l’attitude so bann zapotre. Par exemple, ti ena enn rivalité entre zot ek zot ti ré-manifesté sa encore vers la fin ministere Jésus. Zot ti laguerre pou koné kisannla ti parette pli important parmi zot. (Marc 9:33-37; 10:35-45) Enn tipé apré ki so bann zapotre ti laguerre pou mem zaffaire enn deuxieme fois, Jésus ti faire bann l’arrangement pou celebré so dernier Pâque avek zot. Pendant sa l’evenement-la, personne parmi zot pa ti prend l’initiative pou lave lipié zot camarade, alors ki sa ti enn coutume dan sa lepok-la. C’est enn travail ki ti demann l’humilité ek Jésus ti faire sa. Apré sa li ti dire: “Mo finn donne zot l’exemple.”—Jean 13:2-15.
20 Kan bann mari manifesté l’humilité pareil couma Jésus, zot femme pou cooperé ek pou soutenir zot. Mais bann mari bizin ena patience. Plitar, pendant sa mem soirée-la, bann zapotre ti ré-laguerre encore pou koné kisannla ki pli grand. (Luc 22:24) Oui, pou ki enn dimoune faire bann changement dan so l’attitude ek so conduite, souvent sa prend le temps ek sa arrivé tigit par tigit. Pourtant, sa faire plaisir kan li gagne bann bon resultat, pareil couma dan cas bann zapotre!
21. Kan bann mari faire face ar bann difficulté zordi, ki zot bizin rappel ek ki zot bizin faire?
21 Zordi, bann mariage pé konn bann pli grand difficulté ki avant. Beaucoup nepli prend bann voeu ki zot ti faire jour zot mariage couma enn kitsoz serieux. Alors mari, reflechi lor l’origine mariage. Rappel ki c’est Jéhovah, nou Bondié ki content nou, ki finn crée ek finn etabli mariage. Li ti envoye so Garson, Jésus, pa zis pou li donne so la-vie couma enn ranson pou sauve nou, mais pou li vinn enn model ki bann mari bizin suive.—Matthieu 20:28; Jean 3:29; 1 Pierre 2:21.
Couma ou pou reponn?
• Kifer li important ki nou reconette l’origine mariage?
• Couma la Bible encourage bann mari pou content zot femme?
• Cite bann l’exemple lor fason ki Jésus ti traite so bann disciple ek ki montré couma bann mari bizin servi zot l’autorité pareil couma Jésus.
[Bann question pou l’étude]
[Zimage, page 11]
Kan so bann disciple ti fatigué, Jésus ti ena consideration pou zot
[Zimage, page 12]
Kan bann mari conseil zot femme, zot bizin faire sa avek bonté ek bien choisir zot mot