Ki Jésus ti pé rod dire kan li ti dire Nicodème: “Personne pa finn monte dan le ciel a part celui ki finn desann depuis dan le ciel, le Fils de l’homme”?—Jean 3:13.

Kan li ti dire sa, Jésus ti lor la terre, ek li pa ti encore monte, ou-soit retourne dan le ciel. Mais, seki nou koné lor Jésus ek contexte sa bann parole-la kapav aide nou pou comprend seki li ti pé rod dire.

Avant ki Jésus vinn lor la terre, li ti pé vive avek so Papa dan le ciel, couma enn l’esprit. Mais kan le temps ti arrivé, Bondié ti transfert la vie so Garson dan ventre Marie, ek Jésus ti né couma enn humain. C’est dan sa sens-la ki li “finn desann depuis dan le ciel.” (Luc 1:30-35; Galates 4:4; Hébreux 2:9, 14, 17) Apré so la-mort, Jésus ti pou ressuscité couma enn creature spirituel ek li ti pou retourne dan le ciel pou li reste avek Jéhovah. A cause sa-mem, zis enn tipé avant so la-mort, Jésus ti kapav demandé dan la priere: “Papa, glorifié moi a coté toi avek la gloire ki mo ti ena kan mo ti avek toi avant ki le monde ti existé.”—Jean 17:5; Romains 6:4, 9; Hébreux 9:24; 1 Pierre 3:18.

Kan li ti koz avek Nicodème, enn Pharisien ek enn enseignant en Israël, Jésus pa ti encore retourne dan le ciel. Bien-sur, okenn lot dimoune pa ti’nn mort ek monte dan le ciel. Jésus li-mem ti dire ki Jean le Baptiste ti pli grand parmi bann prophete Bondié, mais pourtant “enn kikenn ki tipti dan royaume ki dan le ciel, pli grand ki li.” (Matthieu 11:11) Et l’apotre Pierre ti expliké ki mem le roi David ki ti fidel ek ki ti’nn mort, ti encore dan so tombe; David pa ti monte dan le ciel. (Actes 2:29, 34) Ena enn raison kifer bann ki ti mort avant Jésus, pareil couma David, Jean le Baptiste, ek bann lezot dimoune fidel, pa ti al dan le ciel. Zot ti mort avant ki Jésus ouvert chemin, ou-soit possibilité pou bann dimoune ressuscité ek al vive dan le ciel. L’apotre Paul ti ecrire ki Jésus, coumadir finn passe devant ek, “finn ouvert . . . enn chemin ki nouveau ek ki vivant” pou rente dan le ciel.—Hébreux 6:19, 20; 9:24; 10:19, 20.

Jésus pa ti encore mort ek ressuscité. Alors ki li ti pé rod dire kan li ti dire Nicodème: “Personne pa finn monte dan le ciel a part celui ki finn desann depuis dan le ciel, le Fils de l’homme”? (Jean 3:13) Anou examine contexte, ou-soit sa conversation ki Jésus ti ena avek Nicodème-la.

Kan sa chef juif-la ti vinn guette Jésus a-soir, Jésus ti dire li: “Vrai-mem mo dire toi: Si enn kikenn pa né encore enn deuxieme fois, li pa kapav trouve royaume Bondié.” (Jean 3:3) Lerla, Nicodème ti demandé: ‘Couma enn kitsoz coumsa kapav possible? Couma enn zom kapav né enn deuxieme fois?’ Li pa ti comprend sa l’enseignement concernant bann ki dan Royaume Bondié-la. Eski ti ena enn fason pou li kapav aprann plus lor la? Non, parski bann dimoune pa ti pou kapav explik li nanyin lor sa sujet-la. Personne pa ti pou kapav faire li konn plus lor la, parski pa ti ena personne ki ti’nn al dan le ciel ek ki ti kapav expliké couma pou rente dan Royaume Bondié. Zis Jésus ki ti kapav faire sa. Li, li ti pou kapav enseigne Nicodème ek lezot encore parski li ti’nn sorti dan le ciel ek a cause sa li ti qualifié pou enseigne bann dimoune lor sa bann kitsoz-la.

Question ki Nicodème ti pose Jésus, montré enn point important dan l’etude Parole Bondié. Li pa raisonnable ki nou ena doute concernant enn passage la Bible zis parski kan nou lire li coumsa, li parette difficile pou comprend. Pou comprend seki la Bible dire dan enn place, nou bizin guette lezot passage; ek seki li dire bizin en accord avek sa bann lezot passage-la. En plus, souvent contexte, setadir dan ki circonstance ti pé dire sa ou-soit lor ki sujet ti pé discuté, kapav aide nou pou trouve enn explication logik pou enn verset ki parette difficile pou comprend.