Jeune, choisir par zot-mem pou servi Jéhovah
“Zordi, choisir pou zot-mem kisannla zot pou servi.”—JOSUÉ 24:15.
1, 2. Ki qualité bapteme ki contraire ar la Bible, la chrétienté finn pratiké?
“LAISSE [bann zenfant] vinn bann chrétien kan zot [assez grand] pou konn Christ.” C’est seki Tertullien ti ecrire vers la fin deuxieme siecle nou lepok. Li ti pé protesté kont bapteme bann ti-baba, enn pratik ki ti pé commence etabli dan religion chrétien apostat dan so lepok. Mais Augustin, enn parmi bann ‘Père de l’Église,’ pa ti d’accord ar sa. Li ti pretann ki sa bapteme-la retire tache peché originel, ek ki si bann zenfant mort sans ki zot inn baptisé, zot condamné pou al dan l’enfer. Sa croyance-la finn encourage bann dimoune pou baptise zot ti-baba pli vite possible apré zot naissance.
2 Beaucoup grand religion la chrétienté encore toujours baptise bann ti-baba. En plus, pendant toute l’histoire, certain dirigeant ek chef religieux bann nation ki dire zot chrétien, ti oblige bann soi-disant païen pou faire zot baptisé, kan zot ti gagne victoire lor zot pays. Mais, la Bible pa dire ki bizin baptise bann ti-baba ou-soit baptise bann adulte par force.
Voué nou la-vie, c’est enn decision personnel
3, 4. Ki pou aide zenfant bann chrétien pou decidé pou servi Jéhovah par zot-mem?
3 Dapré la Bible, Bondié considere enn jeune zenfant couma saint, mem si c’est enn sel parmi so bann parent ki enn chrétien fidel. (1 Corinthiens 7:14) Eski sa vedir ki sa zenfant-la li voué ar Jéhovah? Non. Mais bann zenfant ki elevé par bann parent ki voué ar Jéhovah, zot gagne enn formation ki kapav encourage zot pou decidé par zot-mem pou voué zot la-vie ar Jéhovah plitar. Salomon, ki ti enn lé-roi sage, ti ecrire: “Mo garson, obeir bann commandement to papa, ek pa abandonne la loi to mama. . . . Partout kot to allé, li pou guide toi; kan to dormi, li pou protege toi; ek kan to levé, li pou occupe toi. Parski commandement, li enn la-lampe, ek la loi, li enn la-lumiere, ek bann correction ki nou gagné avek la discipline, zot chemin ki donne la vie.”—Proverbes 6:20-23.
4 Direction ki bann parent chrétien donne zot zenfant kapav protege zot a condition ki bann zenfant accepté sa. Salomon ti dire: “Enn garson sage, faire enn papa content, ek enn garson ki bet, faire so mama chagrin.” “Toi mo garson, ecouté ek vinn sage, ek dirige to leker lor sa chemin-la.” (Proverbes 10:1; 23:19) Jeune, pou ki zot kapav tire profit ar l’education ki zot parent donne zot, zot bizin accepté avek tou zot leker bann conseil ek discipline ki zot gagné. Zot pa finn né sage, mais zot kapav “vinn sage” ek decidé par zot-mem pou choisir “chemin ki donne la vie.”
Ki sa vedir bann “l’avertissement” Jéhovah?
5. Ki conseil Paul ti donne bann zenfant ek bann papa?
5 L’apotre Paul ti ecrire: “Zenfant, obeir zot parent pareil couma le Seigneur inn dire, parski sa li enn kitsoz ki droite: ‘Honore to papa ek to mama’; sa c’est premier commandement avek enn promesse: ‘Pou ki tou kapav marche bien pou toi, ek ki to vive longtemps lor la terre.’ Ek zot, bann papa, pa enerve zot zenfant, mais contigne elevé zot dan discipline ek dan bann l’avertissement Jéhovah.”—Éphésiens 6:1-4.
6, 7. Ki sa vedir elevé bann zenfant dan “l’avertissement Jéhovah,” ek kifer sa pa vedir ki bann parent pé manipule zot zenfant kan zot faire sa?
6 Eski nou kapav blame bann parent chrétien ki zot pé influence zot zenfant kan zot pé elevé bannla dan “discipline ek dan bann l’avertissement Jéhovah”? Non. Kisannla ki kapav critik bann parent parski zot pé enseigne zot zenfant d’apré seki zot, zot consideré couma droite ek bon lor plan moral? Personne pa critik bann dimoune athée parski zot enseigne zot zenfant ki Bondié pa existé. Bien rare nou tann kikenn critik bann Catholique parski zot senti ki zot ena enn devoir pou enseigne zot zenfant zot croyance. Alors, fodé pa accuse bann Témoins de Jéhovah ek pretann ki zot pé manipule l’esprit zot zenfant kan zot pé enseigne bannla bann pensée ek bann principe Jéhovah.
7 Dapré enn dictionnaire biblik, (Theological Dictionary of the New Testament), mot grec ki’nn traduire par “l’avertissement” dan Éphésiens 6:4 vedir enn method ki servi pou “essaye corrige l’esprit, pou corrige seki mauvais, pou ameliore l’attitude envers Bondié.” Ki pou arrivé si enn adolescent pa accepté direction so bann parent a cause l’influence so bann camarade ek parski li envie faire pareil couma zot? Kisannla pé manipule sa jeune-la—so bann parent ou-soit so bann camarade? Si so bann camarade pé encourage li pou prend la drogue, pou boire plus ki bizin, ou-soit pou commette l’immoralité sexuel, eski nou bizin accuse so bann parent parski zot pé essaye aide li pou change so l’attitude ek pou faire li realisé ki danger so conduite kapav ena?
8. Ki mama ek grand-mere Timothée ti faire pou ‘convaink li pou croire’?
8 L’apotre Paul ti ecrire Timothée ki ti encore jeune: “Contigne garde bann kitsoz ki to finn aprann ek ki finn convaink toi pou croire, parski to koné ar ki dimoune ki to finn aprann sa, ek ki depuis tipti, to konn bann l’Écriture sacré, ki kapav faire toi vinn sage pou to gagne la vie sauve, grace a la foi concernant Jésus Christ.” (2 Timothée 3:14, 15) Mama ek grand-mere Timothée ti enseigne li bann l’Écriture sacré depuis ki li ti bien tipti, pou ki li ena enn la-foi solid dan Bondié. (Actes 16:1; 2 Timothée 1:5) Plitar, kan zot ti vinn bann chrétien, zot pa ti force Timothée pou croire, mais zot ti “convaink” li kan zot ti faire li raisonne lor Parole Bondié.
Jéhovah invite zot pou choisir
9. (a) Couma Jéhovah finn donne nou l’honneur, ek pou ki raison? (b) Couma Garson Bondié ti servi so liberté pou choisir?
9 Jéhovah ti kapav faire nou couma bann robot, ki’nn programmé pou faire zis so volonté. Mais non, au contraire, Li finn donne nou enn certaine l’honneur kan Li finn crée nou avek liberté pou choisir. Nou Bondié envie ki nou servi Li volontairement. Li content kan Li trouve so bann serviteur, jeune ek vié, servi Li parski zot content Li. Pli grand l’exemple ki nou ena dan sa domaine-la c’est so Garson ki Li finn crée direct. Jéhovah ti dire lor sa Garson-la: “Sa-mem mo Garson ki mo bien content ek ki mo finn approuvé.” (Matthieu 3:17) Garson premier-né Bondié ti dire so Papa: “Ah Bondié, mo finn prend plaisir pou faire to volonté, ek to la-loi dan fond mo leker.”—Psaumes 40:8; Hébreux 10:9, 10.
10. Ki Jéhovah attann ar bann ki servi Li?
10 Jéhovah attann ki bann dimoune ki servi Li enba direction so Garson, zot aussi zot soumette-zot volontairement pou faire So volonté. Dan enn psaume prophetik, nou lire sa bann parole-la: “To peuple pou porte-li volontaire, jour ki to rassemblé to l’armée. To ena to l’armée jeune-gens ki sorti couma bann goutte la-rosée kan soleil commence levé, zot saint dan enn fason extraordinaire.” (Psaume 110:3) Tou seki dan l’organisation Jéhovah, ki zot dan le ciel ou-soit lor la terre, zot tou zot soumette avek amour pou faire volonté Jéhovah. C’est coumsa ki l’organisation Jéhovah marché.
11. Ki choix bann jeune ki finn elevé par bann parent chrétien, ena?
11 Alors jeune, comprend bien ki, ni zot parent, ni bann ancien dan congregation pa pou force zot pou prend bapteme. Fodé ki par zot-mem zot envie servi Jéhovah. Josué ti dire bann Israélite: “Servi [Jéhovah] avek fidelité ek la verité . . . Zordi, choisir pou zot-mem kisannla zot pou servi.” (Josué 24:14-22) Li pareil pou zot, bann jeune, fodé ki par zot-mem zot decidé pou voué-zot ar Jéhovah ek consacré zot la-vie pou faire so volonté.
Accepté zot responsabilité
12. (a) Bann parent kapav forme zot zenfant, mais ki zot pa kapav faire dan place bannla? (b) Kan eski enn jeune li responsable devant Jéhovah pou bann choix ki li faire?
12 Pou arrive enn jour kot fidelité zot parent pou nepli protege zot. (1 Corinthiens 7:14) Disciple Jacques ti ecrire: “Si enn kikenn konn faire seki bon ek pourtant li pa faire sa, c’est enn peché pou li.” (Jacques 4:17) Bann parent pa kapav servi Bondié dan place zot zenfant, ni bann zenfant dan place zot parent. (Ézékiel 18:20) Jeune, eski to finn aprann konn Jéhovah ek so bann projet? Eski to assez grand pou comprend seki to finn aprann ek pou commence developpe enn relation personnel avek Li? Dan sa cas-la, eski li pa raisonnable ki Bondié attann ki to prend to prop decision pou servi Li?
13. Ki question bann adolescent ki pankor baptisé bizin pose zot-mem?
13 Eski to enn jeune ki pankor baptisé ek ki pé elevé par bann parent chrétien? Eski to pé assisté bann reunion, ek to pé mem preché? Si oui, demann to-mem honnetement: ‘Kifer mo pé faire sa? Eski mo al reunion ek predication a cause mo bann parent, ou-soit parski mo envie faire Jéhovah plaisir?’ Eski to finn verifié par to-mem ki “volonté Bondié, li bon, li agreable ek li parfait”?—Romains 12:2.
Kifer attann plitar pou prend bapteme?
14. Ki bann l’exemple biblik montré ki fodé pa trop tardé pou prend bapteme?
14 “Ki empeche moi prend bapteme?” Kan l’eunuque Éthiopien ti pose sa question-la Philippe, li ti fek aprann ki Jésus li-mem le Messie. Mais sa Éthiopien-la ti ena assez connaissance lor bann l’Écriture pou comprend seki li ti bizin faire dé-suite: montré tou dimoune ki a partir sa jour-la li pou servi Jéhovah avek la congregation. Sa ti faire li bien content. (Actes 8:26-39) Li ti pareil aussi pou enn madame ki ti appel Lydie. Avek tou so leker, ‘li ti prend compte seki Paul ti pé dire.’ Dé-suite li ek so famille ti “prend bapteme.” (Actes 16:14, 15) Mem zaffaire ti arrivé pou enn gardien prison dan la ville Philippe. Kan Paul ek Silas ti “dire li parole Jéhovah,” “li ek so famille ti prend bapteme dé-suite.” (Actes 16:25-34) Eski to ena enn connaissance de base lor Jéhovah ek lor so bann projet? Eski to sincere ek to envie faire so volonté? Eski to ena enn bon reputation dan congregation, ek to assisté bann reunion ek to sorti dan predication regulierement? Si oui, alors, kifer to pé attann plitar pou prend bapteme?—Matthieu 28:19, 20.
15, 16. (a) Ki mauvais raisonnement kapav empeche bann jeune pou prend bapteme? (b) Kan enn jeune voué so la-vie ar Jéhovah ek li baptisé, couma sa kapav protege li?
15 Jeune, eski zot hesité pou prend bapteme parski zot peur pangar zot pou bizin rann compte si jamais zot faire enn kitsoz ki pa bon? Si oui, reflechi lor la: Eski zot pou refuse pou passe zot permis conduire, zis parski zot peur pangar enn jour zot faire enn accident? Non! Alors fodé pa zot hesité pou prend bapteme si zot rempli bann condition ki bizin. En realité, si zot finn voué zot la-vie ar Jéhovah ek zot finn accepté pou faire so volonté, sa pou faire zot plus determiné pou pa faire le mal. (Philippiens 4:13) Jeune, pa pensé ki si zot attann plitar pou prend bapteme, sa vedir ki zot pa pou ena okenn compte pou rann Jéhovah. Ki zot baptisé ou-soit non, kan zot finn arrive enn l’age kot zot kapav prend bann responsabilité, zot ena bann compte pou rann Jéhovah lor fason ki zot amenn zot la-vie.—Romains 14:11, 12.
16 Beaucoup Témoins de Jéhovah finn trouvé ki parski zot finn prend bapteme kan zot ti jeune, sa finn aide zot beaucoup. Prend l’exemple enn frere ki ena 23 an ki reste l’Europe. Li ti prend bapteme kan li ti ena 13 an ek li rappel ki sa finn aide li pou pa tombe dan piege bann “desir la jeunesse.” (2 Timothée 2:22) Depuis bien jeune, li ti fixé l’objectif pou faire service a plein temps. Zordi, li pé servi dan enn Béthel, ek li bien heureux. Oui, ena bann grand benediction ki pé attann bann jeune ki choisir pou servi Jéhovah. Ou aussi ou kapav gagne sa bann benediction-la.
17. Dan ki domaine li necessaire ki nou contigne comprend ki vedir “volonté Jéhovah”?
17 Kan nou voué nou la-vie pou servi Jéhovah, ek nou prend bapteme, sa vedir ki nou pé engage nou pou prend compte volonté Jéhovah dan tou domaine nou la-vie. Pou nou kapav garde sa l’engagement-la, fodé ki nou “ré-acheté le temps ki bizin.” Couma nou kapav faire sa? C’est kan nou prend le temps ki nou ti pou consacré pou faire bann kitsoz inutile, pou nou etudié la Bible avek serieux, pou assisté reunion regulierement, ek pou preche ‘la bonne nouvelle lor Royaume Bondié’ tant ki nou kapav. (Éphésiens 5:15, 16; Matthieu 24:14) Parski nou finn voué nou la-vie ar Jéhovah ek nou envie faire so volonté, sa ena enn bon l’effet dan tou domaine nou la-vie. Par exemple, sa ena enn l’influence lor nou bann divertissement, lor nou l’habitude mangé ek boire, ek lor qualité la musik ki nou ecouté. Kifer zot pa choisir bann divertissement ki zot pou kapav profité pou l’eternité? Plusieurs millier jeune Témoins de Jéhovah pou dire zot ki ena beaucoup bon fason ki nou kapav amusé, sans ki nou al kont “volonté Jéhovah.”—Éphésiens 5:17-19.
“Nou pou al avek zot”
18. Ki question bann jeune bizin pose zot-mem?
18 Entre 1513 a.n.l., ziska la Pentecôte l’an 33 n.l., Jéhovah ti ena enn peuple organisé lor la terre, enn peuple ki Li ti choisir pou ki zot adore Li ek pou vinn so bann temoin. (Isaïe 43:12) Bann jeune israélite ti né dan sa nation-la. Depuis la Pentecôte l’an 33 n.l., Jéhovah ena enn nouveau “nation” lor la terre: l’Israël spirituel, “enn peuple pou so nom.” (1 Pierre 2:9, 10; Actes 15:14; Galates 6:16) L’apotre Paul ti ecrire ki Christ finn purifié pou li-mem “enn peuple ki vinn so prop di-bien, ki zelé pou bann bon action.” (Tite 2:14) Jeune, zot libre pou decidé par zot-mem kisannla sa peuple-la. Kisannla zordi ki forme enn ‘peuple ki droite ki garde enn conduite fidel,’ ek ki pé vive en accord avek bann principe la-Bible? Kisannla ki bann Témoins fidel pou Jéhovah, ek ki pé preche so Royaume couma sel l’espoir pou l’humanité? (Isaïe 26:2-4) Guette bann dimoune ki dan bann l’eglise la chrétienté ek dan bann lezot religion, ek compare zot conduite avek conduite ki la Bible demann bann vrai serviteur Bondié pou ena.
19. Ki conviction plusieurs million dimoune dan le monde entier finn gagné?
19 Dan le monde entier, plusieurs million dimoune, ek parmi ena beaucoup jeune, finn gagne conviction ki bann Témoins de Jéhovah oint ki encore lor la terre, zot-mem sa ‘peuple ki droite-la.’ Zot dire sa bann Israélite spirituel-la: “Nou pou al avek zot, parski nou finn tann dire ki Bondié avek zot.” (Zekaria 8:23) Jeune, nou vrai-mem souhaité ek nou prié ki zot decidé pou forme partie dan peuple Bondié, ek coumsa, zot pou “choisir la vie”—la vie eternel dan le monde nouveau ki Jéhovah finn promette.—Deutéronome 30:15-20; 2 Pierre 3:11-13.
Revision
• Ki sa vedir bann “l’avertissement” Jéhovah?
• Avek ki l’attitude Jéhovah envie ki nou servi Li?
• Ki choix bann jeune ki finn elevé par bann parent Témoins de Jéhovah, bizin faire?
• Kifer fodé pa nou trop attann pou prend bapteme?
[Question pou l’étude]
[Zimage, page 28]
Kisannla to pou ecouté?
[Zimage, page 30]
Ki protection to pou gagné kan to voué to la-vie ar Jéhovah ek to prend bapteme?
[Zimage, page 31]
Ki pé empeche toi prend bapteme?