BEAUCOUP dimoune demann zot: “Eski nou bizin enn Messie?” Et li normal ki nou demandé eski enn Messie kapav change kitsoz dan nou la-vie.

Kitfois ou respecté l’opinion certain dimoune ki pou reponn ou dan enn fason bien clair ki ou bizin enn Messie, pareil couma tou dimoune. Dan 1^er siecle, enn specialiste dan la loi juif ti ecrire concernant Messie: “N’importe ki quantité promesse ki Bondié finn faire, zot inn vinn vrai grace a li.” Par sa bann parole-la, li finn attire l’attention lor role important ki Messie joué dan projet ki nou Createur ena, setadir beni tou bann nation lor la terre. (2 Corinthiens 1:20) Sa role-la tellement important ki bann prophetie biblik tourne autour l’arrivée ek la vie Messie. Dan enn livre ki’nn distribué par million copie pendant plus ki 70 dernier l’année, Henry H. Halley finn dire: “Finn ecrire Ancien Testament pou faire dimoune attann [le Messie] avek impatience ek prepare chemin pou ki li vini.” Eski li vrai-mem necessaire ki Messie vini? Couma eski sa concerne ou?

En fait, “Messie” vedir “Celui ki finn choisir” ek li ena mem signification ki enn terme ki nou konn bien, “Christ.” Enn encyclopedie (Encyclopædia Britannica, edition 1970) qualifié li couma “sa kikenn ki’nn ré-acheté l’humanité enn fois pou tou.” Avredir, li ti bizin vinn lor la terre a cause bann mauvais action ki premier couple humain, Adam ek Ève ti faire. Bondié ti crée zot parfait, ek zot ti ena enn l’avenir extraordinaire: la vie eternel dan Paradi. Mais malheureusement zot inn perdi sa l’esperance-la. Enn ange rebelle, ki plitar finn gagne nom Satan le Diable, ti laisse zot croire ki zot Createur ti trop strict ek ki zot ti pou vive pli bien si zot ti decide par zot-mem seki bon ek seki mauvais.—Genèse 3:1-5.

Ève ti’nn laisse-li trompé ek li ti croire sa mensonge-la. Li parette ki Adam ti pli content pou reste avek so madame ki reste fidel avek Bondié. Alors, li aussi ti’nn vinn complice dan sa rebellion ki Satan ti’nn provoké-la. (Genèse 3:6; 1 Timothée 2:14) Kan zot inn faire sa, Adam ek Ève pa finn zis perdi zot l’esperance pou vive dan Paradi, mais zot inn aussi transmette peché ek so consequence, la mort, ar zot bann futur descendant.—Romains 5:12.

Rebellion Adam ek Ève ti commence enn serie l’evenement ki ti pou ena bann mauvais consequence. Jéhovah, nou Createur, dé-suite finn trouve enn moyen pou cancel sa bann consequence-la. Li ti pou redresse la situation, par enn moyen ki plitar ti pou vinn enn principe legal dan la Loi mosaïk: nâme pou nâme. (Deutéronome 19:21; 1 Jean 3:8) Ti bizin respecté sa principe legal-la pou ki bann descendant Adam ek Ève enn jour gagne la vie eternel dan Paradi lor la terre, pareil couma nou Createur ti’nn decidé au commencement pou bann dimoune. C’est seki amenn nou vers Messie.

Kan Li ti prononce so jugement kont Satan le Diable, Jéhovah ti annonce premier prophetie dan la Bible: “Mo pou mette enn la-haine entre toi ek la femme ek entre to descendance ek so descendance. Li pou crase to la-tête ek toi to pou blesse li lor so talon.” (Genèse 3:15) Enn bibliste finn faire sa remark-la: “L’histoire lor bann promesse concernant Messie, couma la Bible raconté, commence avek sa premier declaration-la.” Enn lot bibliste finn ecrire ki Bondié pou servi le Messie “pou cancel tou bann malheur ki peché finn amené,” ek en mem temps pou amenn beaucoup benediction lor l’humanité.—Hébreux 2:14, 15.

Mais, kitfois ou rann-ou compte ki l’humanité pa pé konn sa bann benediction-la zordi. Au contraire, bann dimoune pé vive dan enn grand desespoir. A cause sa, The World Book Encyclopedia dire ki “beaucoup Juif encore toujours pé attann le Messie” ki “pou repare tou tort ek pou gagne la victoire lor zot l’ennemi.” Mais, la Bible dire ki le Messie inn deja fini vini.