Parole Jéhovah vivant

DEUXIEME livre Chroniques commencé alors ki Salomon le roi lor Israël. Li terminé avek bann parole ki Cyrus, le roi Perse, dire bann Juif ki ti en exil dan Babylonie: “[Jéhovah] Li-mem inn confié moi mission pou construire enn lakaz pou Li dan Jérusalem, ki dan Juda. N’importe kisannla parmi zot ki forme partie dan so peuple, [mo prié] ki Jéhovah so Bondié ar li. Alors laisse li monté [al Jérusalem].” (2 Chroniques 36:23) En 460 a.n.l., Ezra ti termine deuxieme livre Chroniques ki couvert enn period 500 an—a partir 1037 a.n.l. ziska 537 a.n.l.

L’ordre ki Cyrus ti donné permette bann Juif retourne Jérusalem ek retablir l’adoration Jéhovah. Mais, sa bann l’année ki zot inn passé en exil-la, ti ena so bann consequence. Bann Israélite ki retourne Jérusalem pa konn bien l’histoire zot nation. Deuxieme livre Chroniques faire enn resumé bien vivant lor seki finn arrivé pendant règne bann lé-roi ki dan descendance royal David. Seki sa livre-la raconté, li aussi utile pou nou, parski li faire bien ressorti bann benediction ki gagné kan obeir vrai Bondié ek bann consequence ki arrivé kan desobeir Li.

ENN LÉ-ROI CONSTRUIRE ENN LAKAZ POU JÉHOVAH

(2 Chroniques 1:1–9:31)

Jéhovah accorde le roi Salomon, desir so leker—la sagesse ek la connaissance—ek en plus, li donne li bann richesse ek la gloire. Le roi construire enn lakaz extraordinaire pou Jéhovah dan Jérusalem, ek le peuple “dan la joie ek [zot] leker content.” (2 Chroniques 7:10) Salomon vinn “pli riche ek pli sage ki tou bann lezot lé-roi lor la terre.”—2 Chroniques 9:22.

Apré ki li’nn dirige Israël pendant 40 an, Salomon ‘al dormi dan la mort avek so bann ancetre, ek Rehabam, so garson commence regné dan so place.’ (2 Chroniques 9:31) Ezra pa raconté couma Salomon ti detourne ar vrai l’adoration. Deux sel erreur Salomon ki li mentionné, c’est kan Salomon faire vinn enn quantité  cheval depuis l’Égypte, ek kan li marié avek tifi Pharaon. Alors Ezra raconte sa partie-la dan enn fason bien positif.

Reponse pou bann question biblik:

2:14—Kifer seki dire lor famille sa zouvrier-la, pa pareil couma seki dire dan 1 Rois 7:14? Dan premier livre Rois, li dire ki mama sa zouvrier-la, li “enn veuve dan tribu Naphtali” parski li ti’nn marié avek enn missié dan sa tribu-la. Mais veuve-la li, ti sorti dan tribu Dân. Apré la mort so mari, li ti remarié avek enn missié ki sorti Tyr, ek zot ti gagne enn zenfant ki ti vinn sa bon zouvrier-la.

2:18; 8:10—Sa bann verset-la dire ki ti ena 3,600 plus 250 ki ti nommé pou servi en tant ki surveillant ek foreman, alors ki 1 Rois 5:16; 9:23 dire ki ti ena 3,300 plus 550. Kifer eski ena sa difference-la dan bann chiffre? Li parette ki ena enn difference dan fason ki classe sa bann dimoune ki ti’nn nommé-la. Kitfois deuxieme livre Chroniques faire enn difference entre 3,600 ki pa Israélite ek 250 ki Israélite parmi bann ki ti nommé, alors ki Premier livre Rois faire enn distinction entre 3,300 foreman ek 550 supervisor. De tout fason, ti ena en tou 3,850.

4:2-4—Kifer ti pose la mer en metal lor bann representation taureau? Dan la Bible, bann taureau symbolise la force. (Ézékiel 1:10; Révélation 4:6, 7) Li ti approprié ki servi bann taureau parski sa 12 taureau en cuivre-la ti tini sa grand “la-mer” ki ti pese apepré 30 tonne. Sa pa ti kont deuxieme commandement, ki defann faire sa qualité kitsoz-la pou adore zot.—Exode 20:4, 5.

4:5—Ki quantité de l’eau ti kapav mette dan la mer en metal? Kan li ti rempli, la mer ti kapav contenir trois mille baths, setadir apepré 66,000 litre. Mais, en general ti rempli li ziska so trois-quart. Premier Rois 7:26 dire: “Li ti contenir deux mille baths [44,000 litre].”

5:4, 5, 10—Ki meuble ki ti ena dan tabernacle, ti aussi servi dan temple Salomon? L’Arche ti sel meuble ki ti sorti dan la tente reunion ek ki ti contigné servi dan temple Salomon. Apré construction temple, ti prend tabernacle dan Guibéôn ek ti amenn li Jérusalem, ek li parette ki ti garde li là.—2 Chroniques 1:3, 4.

Bann leson pou nou:

1:11, 12. Seki Salomon ti demandé ti montré Jéhovah ki sagesse ek connaissance ti ena beaucoup valeur pou li. Nou bann la-priere faire koné ki kitsoz ki important pou nou. Alors li bon ki nou analyse bann parole ki nou dire dan nou bann la-priere.

6:4. Enn reconnaissance sincere pou l’amour fidel ek la bonté Jéhovah bizin pousse nou pou beni Jéhovah, setadir loué Li avek l’affection ek reconnaissance.

6:18-21. Mem si okenn batiment pa kapav contenir Jéhovah, temple ti bizin servi couma centre l’adoration Jéhovah. Zordi, bann la-Salle du Royaume, zot bann centre vrai l’adoration dan nou l’endroit.

6:19, 22, 32. Jéhovah ti kapav tann la priere tou dimoune—depuis le roi ziska pli ti-dimoune dan nation Israël—mem la priere enn etranger ki ti tourne vers Li avek sincerité. a—Psaume 65:2.

BANN LÉ-ROI KI DAN DESCENDANCE DAVID

(2 Chroniques 10:1–36:23)

Royaume Israël ki ti enn sel royaume, divisé en deux—royaume dix tribu dan le nord ek royaume deux tribu, Juda ek Benjamin, dan le sud. Bann pretre ek bann Lévite partout dan Israël mette zot fidelité envers l’alliance pou enn Royaume, avant nationalisme, ek zot soutenir Rehabam, garson Salomon. Enn tipé plus ki 30 an apré ki’nn termine construction temple, temple-la perdi tou so bann tresor.

 Parmi sa 19 lé-roi ki regné apré Rehabam-la, cinq ladan fidel, trois commence zot règne bien, mais zot pa reste fidel apré sa, ek enn quitte mauvais chemin ki li ti’nn prend. Le reste bann lé-roi faire seki mauvais devant lizié Jéhovah. b Deuxieme livre Chroniques koz beaucoup lor sa cinq lé-roi ki ti mette zot confiance en Jéhovah-la. Seki raconté lor Hizqiya, ki ti retabli bann service dan temple, ek lor Yoshiya ki ti prend bann disposition pou celebré enn grand Pâques, ti bizin inn bien encourage bann Juif ki ti envie retabli l’adoration Jéhovah dan Jérusalem.

Reponse pou bann question biblik:

13:5—Ki vedir l’expression “l’alliance di-sel”? Parski di-sel kapav conserve kitsoz, li’nn vinn enn symbole seki permanent ek seki pa changé. Alors,“enn l’alliance di-sel” represente enn l’engagement serieux.

14:2-5; 15:17—Eski le roi Asa ti tire tou bann “l’endroit dan hauteur”? Apparemment non. Kitfois Asa ti enleve bann l’endroit dan hauteur kot ti adore bann fausse Bondié, mais pa bann l’endroit dan hauteur kot le peuple ti adore Jéhovah. Kitfois aussi ki dan bann dernier l’année ki li ti regné, le peuple ti construire bann lezot l’endroit dan hauteur. C’est so garson, Yehoshaphat, ki ti enleve sa bann l’endroit-la. Avredir, bann l’endroit dan hauteur pa ti disparette net, mem pendant ki Yehoshaphat ti le roi.—2 Chroniques 17:5, 6; 20:31-33.

15:9; 34:6—Ki ti position tribu Siméon kan royaume Israël ti divisé? Parski zot ti’nn herite plusieurs territoire ki ti dan Juda, tribu Siméon ti situé en plein royaume Juda ek Benjamin. (Josué 19:1) Mais zot ti prend partie lor plan religieux ek politik ensam avek royaume le nord. (1 Rois 11:30-33; 12:20-24) Alors, ti compte Siméon dan royaume dix tribu.

16:13, 14—Eski ti brule lekor Asa? Non, kan sa verset-la koz “enn extra grand difé,” li pé koz lor bann de-l’huile ek bann zepice ki ti brulé pou gagne enn bon parfum, pa lor lekor Asa.—Note dan la Bible.

35:3—A partir ki l’endroit Yoshiya ti faire tire l’Arche sacré pou mette li dan temple? La Bible pa dire si enn parmi bann mauvais lé-roi ki ti regné avant Yoshiya ti’nn tire l’Arche dan temple, ou-soit si Yoshiya ti’nn faire garde l’Arche dan enn lot place pou protege li pendant ki ti pé faire bann grand reparation dan temple. Sel fois kot mentionne l’Arche apré lepok Salomon, c’est kan Yoshiya ti faire remette sa dan temple.

Bann leson pou nou:

13:13-18; 14:11, 12; 32:9-23. Sa vrai-mem montré nou l’importance pou compte lor Jéhovah, pa vrai?

16:1-5, 7; 18:1-3, 28-32; 21:4-6; 22:10- 12; 28:16-22. Kan faire l’alliance avek bann etranger ou-soit bann incroyant, sa ena bann mauvais consequence. Li bon ki nou evite tou relation ki pa necessaire avek le monde.—Jean 17:14, 16; Jacques 4:4.

16:7-12; 26:16-21; 32:25, 26. L’orgueil ti faire le roi Asa faire seki mal dan bann dernier l’année so la-vie. Enn l’esprit l’orgueil ti faire Ouzziya perdi tou. Hizqiya pa ti agir avek sagesse, ek kitfois li ti agir avek l’orgueil kan li ti montré so bann tresor, bann zom ki le roi Babylone ti envoyé. (Isaïe 39:1-7) La Bible averti nou: “Avant la ruine, ena l’orgueil, ek avant enn mauvais pas, ena enn l’esprit vantard.”—Proverbes 16:18.

16:9. Jéhovah aide bann ki ena leker complet envers Li, ek Li ena enn grand desir pou servi so puissance dan zot faveur.

18:12, 13, 23, 24, 27. Pareil couma Mikaïa, nou bizin ena courage pou koz concernant Jéhovah ek seki Li pou faire.

19:1-3. Jéhovah rod seki bon dan nou, mem kan nou donne Li bann raison pou en colere ar nou.

 20:1-28. Nou kapav ena confiance ki Jéhovah pou laisse nou trouve Li, si nou tourne vers Li avek humilité, pou rod so direction.—Proverbes 15:29.

20:17. Pou “guetté couma Jéhovah sauve [nou],” nou bizin “prend [nou] position” kan nou soutenir activement Royaume Bondié. Au lieu ki nou rod faire kitsoz couma nou envie, nou bizin “pa bougé,” ek mette tou nou confiance en Jéhovah.

24:17-19. L’idolatrie ti vinn enn piege pou Yehoash ek so garson Amatsia. Zordi aussi nou kapav tombe dan sa piege-la, surtout dan bann forme l’idolatrie couma desir pou gagne seki lezot possedé, ou-soit nationalisme.—Colossiens 3:5; Révélation 13:4.

32:6, 7. Nou aussi nou bizin ena courage ek montré ki nou fort kan nou “mette lor [nou] l’equipement complet ki Bondié donné,” ek amenn nou la-guerre spirituel.—Éphésiens 6:11-18.

33:2-9, 12, 13, 15, 16. Enn dimoune montré vrai repentance kan li quitte so mauvais chemin ek faire bann zeffort bien serieux pou faire seki droite. Si li repenti sincerement, mem enn dimoune ki’nn faire bann kitsoz aussi mauvais ki le roi Manassé, kapav gagne pardon Jéhovah.

34:1-3. Si nou finn konn enn l’enfance difficile, sa pa bizin empeche nou konn Bondié ek servi Li. Kan Yoshiya ti encore bien jeune, kitfois li ti beneficié l’influence positif so grand-pere, Manassé, ki ti manifesté repentance. En tou cas, bann bon l’influence ki Yoshiya inn koné, finn finalement produire bann bon resultat. Sa kapav vrai pou nou aussi.

36:15-17. Jéhovah ena compassion ek patience. Mais so compassion ek so patience ena limite. Bann dimoune bizin reagir dan enn fason favorable ar travail predication si zot envie gagne la vie sauve kan la fin sa system-la vini.

36:17, 22, 23. Parole ki Jéhovah dire, li touletan arrivé.—1 Rois 9:7, 8; Jérémie 25:9-11.

Enn livre ki pousse nou pou agir

Dan 2 Chroniques 34:33 nou lire: “Yoshiya ti tire tou bann kitsoz detestable ki ti dan tou bann territoire Israël, ek li ti faire tou bann ki ti dan Israël engage-zot pou servi Jéhovah zot Bondié.” Ki ti pousse Yoshiya pou faire sa? Kan so secretaire, Shaphân ti donne li livre la Loi ki zot ti’nn fek decouvert dan temple, Yoshiya ti faire lire sa fort pou li ecouté. Li ti tellement touché par seki li ti tendé ki tout longue so la-vie, li ti favorise vrai l’adoration avek zèle.

Kan nou lire Parole Bondié ek nou medite lor seki nou lire, sa kapav ena enn grand l’effet lor nou. Kan nou reflechi lor seki deuxieme livre Chroniques raconté lor bann lé-roi ki’nn regné apré David, eski sa pa encourage nou pou imite l’exemple bann ki ti mette tou zot confiance dan Jéhovah, ek pou rejette conduite bann ki ti faire le contraire? Sa livre-la faire nou plus envie donne vrai Bondié tou nou l’attachement, ek reste fidel envers Li. Message ki ena ladan, li vrai-mem vivant ek li puissant.—Hébreux 4:12.

[Note]

[Zimage, page 14]

Eski ou koné kifer bann representation taureau lor ki ti pose la mer en metal, ti enn symbol approprié?

[Zimage, page 17]

Mem si li pa ti gagne beaucoup l’aide kan li ti zenfant, Yoshiya ti vinn enn dimoune fidel envers Jéhovah