Jéhovah Faire Toujours Séki Droite
“Jéhovah Li droite dan tou séki Li faire.”—PSAUME 145:17.
1. Couma ou reagir kan enn kikenn mal juge ou, ek ki leson nou kapav tiré par enn l’experience coumsa?
ESKI finn deja arrivé ki enn dimoune finn mal juge ou, kitfois li finn mette en doute ou bann action ou-soit ou bann mobile sans ki li konn tou bann detail? Surement, sa ti’nn bien blesse ou, pa vrai, ek sa li normal. Enn l’experience coumsa faire nou tir enn leson bien important: Li pa bon ki nou tir bann conclusion trop vite kan nou péna tou l’information lor enn kitsoz.
2, 3. Ki reaction certain dimoune éna kan zot lire bann zistoire dan la Bible kot péna assez detail pou reponn tou zot question, mais pourtant ki la Bible dir nou lor Jéhovah?
2 Li bon ki nou rappel sa leson-la kan nou tir bann conclusion lor Jéhovah. Kifer? Parski éna certain zistoire dan la Bible ki kapav troublé nou si nou pa bien reflechi lor la. Sa concerne kitfois bann kitsoz ki certain parmi so bann serviteur finn faire, ou-soit bann jugement ki Bondié finn faire dan le passé. Li possible ki dan sa bann zistoire-la, péna assez detail ki reponn tou nou bann question. Li triste ki certain servi sa pou critik Bondié, zot mem demandé si Bondié Li droite. Pourtant, la Bible dir nou ki Bondié “Li droite dan tou séki Li faire.” (Psaume 145:17) En plus, So Parole aussi donne nou l’assurance ki Li “pa faire séki mauvais.” (Job 34:12; Psaume 37:28) Maziné asterla séki Li ressenti kan dimoune mal juge Li!
3 Anou examine cinq raison kifer nou bizin accepté bann jugement Jéhovah. Lerla, avek sa cinq raison-la dan nou l’esprit, nou pou examine deux zistoire dan la Bible ki kitfois certain trouve difficile pou comprend.
Kifer Nou Accepté Bann Jugement Jéhovah?
4. Kifer nou bizin éna l’humilité kan nou considere bann action Bondié? Donne enn l’exemple.
4 Premièrement, Jéhovah konn tou detail lor tou situation, alors ki nou, non. C’est pou sa ki nou bizin éna l’humilité kan nou considere bann action Bondié. Anou prend enn l’exemple: Enn juge prononce enn jugement dan la cour. Sa juge-la éna enn bon reputation parski li habitué prend bann decision sans faire preference. Ki ou pou pensé si enn kikenn critik decision sa juge-la sans ki li konn tou bann detail ek sans ki li comprend tou bann la-loi ki impliké? Li pou enn grand erreur si enn dimoune critik enn zaffaire, sans ki li bien informé lor la. (Proverbes 18:13) Li pou enn pli grand erreur encore si bann simple humain critik “Juge ki lor la terre entier”!—Genèse 18:25.
5. Ki fodé pa nou blié kan nou lire bann zistoire dan la Bible, lor bann jugement ki Bondié finn faire lor certain dimoune?
5 Enn deuxième raison pou accepté bann jugement Bondié, c’est ki Bondié, Li pa couma dimoune; Li, Li kapav lire dan leker. (1 Samuel 16:7) Nou lire dan so Parole: “Moi Jéhovah, mo fouille dan leker, mo examine lé-rein, oui pou mo rann sakenn dapré séki ki li’nn faire, dapré consequence so conduite.” (Jérémie 17:10) Donc, kan nou lire bann zistoire dan la Bible lor fason ki Bondié inn juge certain dimoune, anou toujours rappel ki, parski Li trouve tou kitsoz, Li finn trouve bann pensé secret, bann mobile, ek bann l’intention, ki la Bible pa’nn mentionné.—1 Chroniques 28:9.
6, 7. (a) Couma Jéhovah finn montré ki Li respecté so bann principe droite ek juste, mem si sa coute Li beaucoup? (b) Ki fodé pa nou blié kan nou lire enn kitsoz dan la Bible ki faire nou demandé si Bondié finn faire séki droite?
6 Anou guette enn troisième raison kifer nou accepté bann jugement Jéhovah. C’est parski Li reste fidel ar so bann principe juste, mem kan sa coute Li beaucoup. Anou prend enn l’exemple. Kan Li ti donne So Garson couma enn ranson pou sape bann dimoune obeissant dan peché ek la mort, Jéhovah ti respecté so bann principe juste ek droite. (Romains 5:18, 19) Pourtant, Jéhovah finn konn pli grand douleur ki kapav éna, kan Li’nn trouve So garson souffer ek mort lor enn poteau. Ki sa montré nou lor Bondié? Concernant “ranson ki Christ Jésus finn payé,” la Bible dir: “Bondié finn faire sa pou montré so prop justice.” (Romains 3:24-26) Enn lot version traduir Romains 3:25 par: “Sa montré ki Bondié faire toujours séki droite ek juste.” (New Century Version) Oui, parski Jéhovah ti disposé pou al bien loin pou donne la ranson, sa montré ki péna okenn kitsoz ki compte plus pou Li, ki “séki droite ek juste.”
7 Alors, kan nou lire enn kitsoz dan la Bible ki faire certain demandé si Bondié finn faire séki droite, anou rappel sa point-la: Parski Jéhovah fidel ar so bann principe droite ek juste, Li finn mem accepté ki So Garson konn enn la-mort terrible. Eski Li kapav al contre sa bann principe-la dan lezot domaine? La verité, c’est ki Jéhovah jamais pa al kont so bann principe ki droite ek juste. Nou éna assez raison ki convaink nou ki Jéhovah faire toujours séki droite ek juste.—Job 37:23.
8. Kifer li pa logik pou pensé ki Jéhovah péna la justice ek Li pa faire séki droite?
8 Anou considere quatrième raison kifer nou bizin accepté bann jugement Jéhovah: Jéhovah ti crée bann dimoune dan so ressemblance. (Genèse 1:27) Donc, bann dimoune finn gagne bann qualité ki Bondié éna, sa vedir ki zot éna, zot aussi la justice dan zot-mem. Li pa pou logik ki nou prop justice faire nou pensé ki Jéhovah Li, Li péna la justice ek Li pa faire séki droite. Si éna enn zistoire dan la Bible ki troublé nou, nou bizin rappel ki, a cause nou l’imperfection, la justice ki nou éna en nou, li imparfait. Nou finn crée dan ressemblance Jéhovah, Celui ki éna enn justice parfait. (Deutéronome 32:4) Li pou vrai-mem bet si enn dimoune osé pensé ki bann dimoune kapav pli juste ek pli droite ki Bondié!—Romains 3:4, 5; 9:14.
9, 10. Kifer Jéhovah pa obligé donne nou l’explication ou-soit rod excuse pou bann action ki Li faire?
9 Enn cinquième raison pou accepté bann jugement Jéhovah c’est ki Li “le Très-Haut lor la terre entier.” (Psaume 83:18) Sa vedir ki Li pa obligé donne l’explication ou-soit rod excuse pou bann action ki Li faire. Li couma enn Grand Potier, ek nou couma l’argile ar ki Li finn faire bann recipient; Li kapav faire séki Li envie avec nou. (Romains 9:19-21) Ki nou été nou, alors ki nou couma bann pot ki Li finn faire, pou mette en doute so bann decision ek so bann action? Kan Job pa ti comprend fason ki Jéhovah ti pé traite bann dimoune, Jéhovah ti corrige li, ek ti demann li: “Ki, eski to pou cancel mo justice? Eski to pou declare moi coupable, pou ki toi, to éna raison?” Kan plitar, Job ti realisé ki li finn kozé sans reflechi, li ti repenti. (Job 40:8; 42:6) Oui, anou determiné pou ki jamais nou pa faire erreur pou critik Bondié!
10 Li clair ki nou éna bann bon raison pou croire ki Jéhovah faire toujours séki droite. Aster ki nou éna enn base pou comprend fason ki Jéhovah agir, anou examine deux zistoire dan la Bible ki kapav troublé certain. Premier-la concerne séki enn serviteur Bondié inn faire, ek deuxième-la koz lor enn jugement ki Bondié Li-mem Li’nn faire.
Kifer Lot Ti Offer So Bann Tifi ar enn la-Foule en Colere?
11, 12. (a) Raconté séki finn arrivé kan Bondié ti envoye deux ange ki ti prend forme humain dan Sodome. (b) Ki question certain finn demann zot-mem kan zot inn lire sa zistoire-la?
11 En Genèse chapitre 19, nou trouve séki ti arrivé kan Bondié ti envoye deux ange ki ti prend enn forme humain, dan la ville Sodome. Lot ti insisté ki sa bann visiteur-la reste kot li. Mais sa soir-la, enn la-foule zom ki ti reste dan sa la-ville-la, ti entoure lakaz Lot, ek ti demann li pou faire so bann visiteur sorti dehors, pou zot kapav gagne bann relation immoral avek zot. Lot ti essaye raisonne avek sa la-foule-la mais zot pa ti ecoute li. Li ti envie protege so bann invité, alors li ti dir: “S’il-vous-plaît, mo bann frere, pa faire séki mauvais. S’il-vous-plaît, guetté mo éna deux tifi ki jamais pa finn gagne relation avec enn zom. S’il-vous-plaît, laisse moi faire [sa deux tifi-la] sorti dehors ver zot. Lerla, faire séki zot envie avec sa deux-la. Mais pa faire nanyin sa bann zom-la, parski c’est a cause sa-mem ki zot finn vinn dan mo lakaz, pou gagne protection.” La foule pa ti ecoute li ek zot ti manqué defonce la-porte. Finalement, bann ange-la finn faire sa la-foule excité-la vinn aveugle.—Genèse 19:1-11.
12 Nou comprend kifer sa zistoire-la finn faire certain dimoune pose zot-mem bann question. Zot finn demandé: ‘Couma Lot finn kapav rod protege so bann invité, ek offer so bann tifi ar enn la-foule immoral coumsa? Eski li pa finn mal agir?’ Zot finn mem demandé si Lot pa finn agir coumsa parski li ti manque courage? Kan nou prend sa zistoire-la en consideration, nou kapav demann nou kifer Bondié ti faire Pierre appel Lot enn “dimoune droite”? Eski séki Lot ti faire ti approuvé par Jéhovah? (2 Pierre 2:7, 8) Anou raisonne lor sa sujet-la pou ki nou pa tir enn mauvais conclusion.
13, 14. (a) Ki nou bizin noté lor bann action ki Lot ti faire, ki finn ecrire dan la Bible? (b) Ki montré ki Lot pa finn manque courage?
13 D’abord, li bon nou noté ki la Bible pa ni approuve ni condamne séki Lot ti faire, li zis dir séki finn arrivé. La Bible pa dir nou aussi séki Lot ti pé pensé ou-soit séki ti pousse-li pou agir coumsa. Kan li pou ‘ressuscité parmi bann juste’ kitfois lerla li pou donne nou bann detail.—Actes 24:15.
14 Lot pa ti manque courage. Li ti dan enn situation difficile. Kan li ti dir ki so bann visiteur ti ‘vinn dan so lakaz pou gagne protection,’ Lot ti montré ki li ti senti-li obligé pou protege zot. Mais sa pa ti pou facile. Joseph, enn historien Juif dir ki bann Sodomite ti “injuste enver bann dimoune, ek sans respé pou Bondié. . . Zot ti éna la haine pou bann etranger, ek zot ti pratik l’homosexualité.” Pourtant, Lot pa ti reculé devant sa la-foule rempli ar la haine-la. Au contraire, li ti sorti dehors ek li ti raisonne avek sa bann zom en colere-la. Li ti mem “ferme la porte derriere li.”—Genèse 19:6.
15. Kifer nou kapav dir ki li possible ki Lot finn agir par la foi?
15 Kan-mem, certain kapav demandé: ‘Kifer Lot ti bizin offer so bann tifi ar sa la-foule-la?’ Au lieu ki nou supposé ki li ti éna bann mauvais mobile, kifer nou pa guette lezot possibilité ki ti pousse li pou agir coumsa? Premièrement, li possible ki Lot ti agir par la foi. Kifer nou dir sa? Surement Lot ti koné couma Jéhovah ti protege Sara, femme Abraham, so tonton. Nou rappel ki, parski Sara ti bien joli, Abraham ti demann li pou dir lezot ki li so frere, sinon zot ti pou kapav touye li pou prend Sara. a Zis apré, Pharaon ti faire amenn Sara dan so lakaz. Mais Jéhovah ti agir pou empeche Pharaon viole Sara. (Genèse 12:11-20) Kitfois Lot ti éna la foi ki Jéhovah pou kapav protege so bann tifi aussi pareil. Li interessant pou noté ki Jéhovah vrai-mem ti agir atraver so bann ange, ek sa deux tifi-la finn gagne protection.
16, 17. (a) Couma Lot kitfois ti essaye choc bann zom dan Sodome, ou-soit ti rod mette zot dan enn situation difficile? (b) N’importe ki raisonnement Lot ti éna, ki nou kapav sur?
16 Anou guette enn lot possibilité. Li possible ki Lot ti essaye faire sa bann zom-la gagne enn choc, ou-soit li ti rod mette zot dan enn situation difficile. Kitfois li ti pensé ki sa la-foule-la pa ti pou oulé so bann tifi, parski bann Sodomite ti éna bann tendance homosexuel. (Jude 7) En plus, so bann tifi ti fiancé ar bann zom ki ti reste dan la ville. Alors, kitfois dan la foule ti éna bann famille, bann camarade ou-soit bann dimoune avek ki sa bann fiancé-la travail. (Genèse 19:14) Kitfois Lot ti esperé ki, a cause sa bann relation-la, certain zom dan sa la-foule-la ti pou defann so bann tifi. Enn la-foule divisé pa ti pou aussi dangereux. b
17 N’importe ki raisonnement ek mobile Lot ti éna, nou kapav sur enn kitsoz: Parski Jéhovah faire toujours séki droite, surement Li ti éna enn bon raison pou considere Lot couma enn “dimoune droite.” Kan nou guetté couma sa la-foule Sodomite-la finn agir, eski nou kapav douté ki Jéhovah ti éna enn bon raison pou touye bann dimoune ki ti reste dan sa mauvais la-ville-la?—Genèse 19:23-25.
Kifer Jéhovah Ti Touye Ouzza?
18. (a) Ki ti arrivé kan David ti essaye amenn l’arche dan Jérusalem? (b) Ki question sa zistoire-la faire nou posé?
18 Enn lot zistoire ki kapav troublé certain dimoune, c’est kan David ti rod amenn l’arche de l’alliance dan Jérusalem. Zot ti mette l’arche lor enn charrette ki Ouzza ek so frere ti dirigé. La Bible dir: “Finalement, zot ti arrive dan enn l’endroit ki appel Nakôn, kot batte bann cereal, ek là Ouzza ti avance so la-main pou trappe l’arche vrai Bondié ek pou tini li, parski bann boeuf ti manqué faire li tombé. Mais Jéhovah ti bien en colere kont Ouzza, ek vrai Bondié ti touye li a cause sa manque respé ki li finn éna-la, ek li finn mort là, pré kot l’arche vrai Bondié.” Dé-trois mois plitar, kan zot ti rod sarrié l’arche enn deuxième fois, zot ti reussi, parski zot ti faire sa dapré l’ordre ki Bondié ti donné, setadir lor zepaule bann Lévite Qehathite. (2 Samuel 6:6, 7; Nombres 4:15; 7:9; 1 Chroniques 15:1-14) Certain kapav demandé: ‘Kifer Jéhovah finn severe coumsa? Ouzza ti pé zis essaye protege l’arche.’ Li bon ki nou guette certain detail dan sa zistoire-la ki kapav aide nou pou pa tir enn mauvais conclusion.
19. Kifer li impossible pou Jéhovah agir dan enn fason injuste?
19 Nou bizin rappel ki li impossible ki Jéhovah agir dan enn fason injuste. (Job 34:10) Si Li agir coumsa, sa vedir ki Li péna l’amour, ek dapré nou l’etude la Bible en general, nou koné ki “Bondié, Li l’amour.” (1 Jean 4:8) En plus, Parole Bondié dir nou ki “to trone [Bondié] fixé lor la justice ek jugement.” (Psaume 89:14) Couma alors, Jéhovah ti pou kapav agir avek l’injustice? Si Li ti faire sa, Li ti pou detruire fondation mem so souveraineté, setadir so droit pou dirige l’humanité.
20. Cite bann raison kifer Ouzza ti bizin konn bien bann la-Loi concernant l’Arche.
20 Rappel ki Ouzza ti bizin konn bien la Loi. L’Arche ti represente presence Jéhovah. Dapré la Loi, okenn dimoune ki pa ti autorisé, pa ti gagne droit touche li, ek si zot ti faire sa, ti pou mette zot a-mort. (Nombres 4:18-20; 7:89) Alors, kan ti transporte sa coffre sacré-la, zot pa ti bizin faire sa travail-la avek negligence. Ouzza ti surement enn Lévite (mem si li pa ti enn pretre), alors li ti bizin konn bien la Loi. En plus, plusieurs l’année avant, ti garde l’Arche en securité dan lakaz so papa. (1 Samuel 6:20–7:1) L’Arche ti reste là pendant 70 an, ziska ki David ti decidé pou bouge li. Sa vedir ki depuis tipti, Ouzza ti konn bien bann la-Loi concernant l’Arche.
21. Dan cas Ouzza, kifer li important pou rappel ki Jéhovah trouve bann mobile ki éna dan leker enn dimoune?
21 Couma nou ti dir avant, Jéhovah kapav lire dan leker enn dimoune. Alors, si Parole Bondié dir ki Ouzza finn agir par “manque respé,” li possible ki Jéhovah finn trouve certain mobile egoïst, ki la Bible pa mentionné. Eski Ouzza ti enn dimoune ki ti éna enn trop grand l’opinion lor li-mem, ki ti éna tendance pou depasse bann limite ki Bondié inn fixé? (Proverbes 11:2) Eski li ti senti-li trop important, kan devant tou sa dimoune-la, li ti dirige l’Arche ki so famille finn gardé en privé kot zot? (Proverbes 8:13) Eski la foi Ouzza ti tellement faible ki li ti pensé ki la main Jéhovah trop courte pou empeche sa coffre sacré ki represente so presence-la, tombé? En tou cas, nou kapav sur ki Jéhovah ti faire séki droite. Surement Li ti trouve kitsoz dan leker Ouzza ki ti faire Li condamne li dé-suite.—Proverbes 21:2.
Enn Base Solide pou Éna Confiance
22. Couma nou trouve sagesse Jéhovah kan parfois so Parole pa donne certain detail?
22 Nou trouve grand sagesse Jéhovah kan parfois so Parole pa donne certain detail. Par là, Jéhovah donne nou l’occasion pou montré ki nou éna confiance en Li. Dapré séki nou finn examiné, eski li pa clair ki nou éna bann bon raison pou accepté bann jugement Jéhovah? Oui, kan nou etudié so Parole avek enn leker sincere ek avek enn l’esprit ouver, nou gagne enn grand connaissance lor Jéhovah ki convaink nou ki Li faire toujours séki droite ek juste. Alors, si kan nou lire certain zistoire dan la Bible nou pose nou-mem bann question, ek nou pa gagne bann reponse dé-suite, anou éna enn confiance total ki Jéhovah finn faire séki droite.
23. Ki confiance nou kapav éna concernant séki Jéhovah pou faire dan l’avenir?
23 Nou kapav éna mem confiance concernant séki Jéhovah pou faire dan l’avenir. Lerla, nou kapav sur ki kan pou arrive l’heure pou Li faire so jugement pendant la grande tribulation ki pé kosté, li pa pou “touye bann juste ensam avek bann mauvais.” (Genèse 18:23) Jamais so l’amour pou séki droite ek pou la justice, pou permette Li faire sa. Nou kapav sur aussi ki dan le monde nouveau ki pé vini, Li pou donne nou tou séki nou bizin dan pli bon fason ki kapav.—Psaume 145:16.
[Note]
a Abraham ti éna raison pou li peur, parski enn vieux papyrus raconté couma enn Pharaon ti faire bann zom armé attrape enn joli femme ek ti faire touye so mari.
b Pou plus renseignement, guette La Tour de Garde 1er Mars 1980, page 31.
Eski Ou Rappel?
• Pou ki raison nou kapav accepté bann jugement Jéhovah?
• Ki kapav aide nou pou evite tir enn mauvais conclusion kan Lot ti offer so bann tifi ar enn la-foule en colere?
• Ki kitsoz kapav aide nou pou comprend kifer Jéhovah ti touye Ouzza?
• Ki confiance nou kapav éna concernant séki Jéhovah pou faire dan l’avenir?
[Questions d’étude]