“Rann temoignage lor Jésus, c’est sa ki pousse bann prophete pou prophetisé.”—RÉVÉLATION 19:10.

1, 2. (a) A partir l’an 29 N.L., ki decision bann Israélite ti bizin prend? (b) Ki nou pou examiné dan sa l’article-la?

 NOU en l’an 29 N.L. Éna enn certain excitation parmi bann habitant en Israël, zot pé koz lor enn sel kitsoz, le Messie ki Bondié inn promette. Predication Jean le Baptiste inn faire zot pli envi koné si le Messie finn arrivé. (Luc 3:15) Mais Jean dir ki c’est pa li le Christ. Au contraire, li montré Jésus de Nazareth avek so lé-doigt, ek li dir: “Mo finn temoigné ki c’est li-mem Garson Bondié.” (Jean 1:20, 34) Bien vite bann la-foule dimoune commence suive Jésus pou écoute so l’enseignement ek pou faire li guéri zot.

² Pendant bann mois ki’nn vinn apré, Jéhovah donne enn quantité preuve concernant so Garson. Bann ki finn etudié Parole Bondié ek ki observe séki Jésus pé faire, zot éna bann bon raison pou mette zot la-foi en li. Mais, la majorité parmi peuple Bondié, péna la foi en li. Bien tigit reconette ki Jésus li-mem le Christ, Garson Bondié. (Jean 6:60-69) Ki ou ti pou faire si ou ti vive dan sa lepok-la? Eski ou ti pou accepté ki Jésus, li-mem le Messie et eski ou ti pou vinn so disciple? Anou guetté ki preuve Jésus ti donné lor so l’identité, kan bann Juif ti accuse li ki li ti pé viole Sabbat, ek remark deux lézot preuve ki li ti donné plitar pou fortifié la foi so bann disciple fidel.

Jésus Li-mem Donne Bann Preuve

3. Dan ki circonstance Jésus ti senti-li obligé pou donne bann preuve lor so identité?

³ Pendant Pâque l’an 31 N.L., Jésus dan la ville Jérusalem. Li’nn fek guéri enn missié ki ti malade pendant 38 an. Mais bann Juif zot, zot pé persecute li parski li’nn faire sa miracle-la pendant Sabbat. Zot accuse li aussi ki li’nn blasphemé ek zot rod touye li, parski li’nn appel Bondié so Papa. (Jean 5:1-9, 16-18) Là, pou  defann li, Jésus presente trois argument solide ki ti pou kapav convaink n’importe ki Juif sincere, pou montré kisannla li été vrai-mem.

4, 5. Kifer Jean ti accompli so ministere, ek couma li ti accompli sa?

⁴ D’abord, Jésus attire l’attention lor temoignage Jean le Baptiste, ki ti vinn annonce so l’arrivé. Li dir: “Zot finn envoye bann zom ar Jean, ek li finn rann temoignage lor la vérité. Sa zom-la ti pareil couma enn la-lampe ki allumé ek ki donne la lumiere, ek pou enn ti-moment zot ti bien content pou trouve so la-lumiere.”—Jean 5:33, 35.

⁵ Jean le Baptiste, ti pareil couma “enn la-lampe ki allumé ek ki donne la lumiere” parski avant ki Hérode ti mette li dan prison, li ti rempli mission ki Bondié ti donne li pou prepare chemin pou le Messie. Jean ti dir: “La raison kifer mo finn vinn baptise dimoune dan delo c’est pou ki Israël kapav koné kisannla [le Messie]. . . . Mo ti trouve l’esprit desann dan le ciel couma enn colombe, ek li ti reste lor li. Moi aussi mo pa ti konn li, mais Celui ki finn envoye moi pou baptise dimoune dan delo, Li-mem ti dir moi, ‘Lor n’importe kisannla to trouve l’esprit desann ek resté, c’est li-mem ki baptise dan l’esprit-saint.’ Ek mo finn trouve sa, ek mo finn rann temoignage ki c’est li-mem Garson Bondié.” a (Jean 1:26-37) Jean ti identifié clairement Jésus couma Garson Bondié—le Messie ki Bondié ti promette. So temoignage ti tellement clair ki environ huit mois apré so la-mort, beaucoup Juif sincère ti reconette: “Tou séki Jean ti dir lor sa zom-la, ti bien vrai.”—Jean 10:41, 42.

6. Kifer bann bon action ki Jésus ti pé faire, ti bizin convaink bann dimoune ki li éna soutien Bondié?

⁶ Ensuite, Jésus servi enn lot raisonnement pou confirmé ki li-mem le Messie. Pou montré ki li éna soutien Bondié, li attire l’attention lor bann bon action ki li pé faire. Li dir: “Mo éna enn pli grand temoignage ki Jean, parski travail ki mo Papa finn donne moi pou faire, sa bann travail-la mem rann temoignage lor moi ki c’est le Père ki finn envoye moi.” (Jean 5:36) Mem bann l’ennemi Jésus pa ti kapav nié sa preuve-la, ni nié tou bann miracle ki li ti pé faire. Plitar, certain ti demandé: “Ki nou bizin faire, parski sa zom-la pé accompli beaucoup miracle.” (Jean 11:47) Mais certain éna enn bon reaction, zot dir: “Kan Christ pou vini, li pa pou faire plus miracle ki sa zom-la inn faire, pa vrai?” (Jean 7:31) Bann dimoune avek ki Jésus ti pé kozé, zot ti bien placé pou comprend ki Jésus, Garson Bondié, pé manifesté bann qualité so Papa.—Jean 14:9.

7. Couma bann Écritures Hébraïque rann temoignage lor Jésus?

⁷ Finalement, Jésus attire l’attention lor enn temoignage ki personne pa pou kapav nié. Li dir: “Bann Écritures . . . zot-mem ki rann temoignage lor moi.” Li ajouté: “Si zot ti croire Moïse zot ti pou croire moi, parski li finn ecrire lor moi.” (Jean 5:39, 46) Bien-sur, Moïse ti zis enn parmi beaucoup serviteur Jéhovah ki ti vive avant Jésus, ki ti écrire lor Christ. Dan séki zot inn ecrire, éna plusieurs centaine prophetie ek bann la-liste bann famille bien detaillé ki ti pou permette identifié le Messie. (Luc 3:23-38; 24:44-46; Actes 10:43) Ki nou kapav dir lor La Loi Mosaïk? L’apotre Paul ti ecrire: “La loi finn vinn nou tuteur ki amenn ver Christ.” (Galates 3:24) Oui, “rann temoignage lor Jésus, c’est pou sa ki pousse bann prophete pou prophetisé.”—Révélation 19:10.

8. Kifer beaucoup Juif pa ti mette zot la-foi en Jésus en tant ki Messie?

⁸ Tou sa bann preuve-la—temoignage clair ki Jean inn donné, bann miracle ki Jésus inn faire ek bann qualité ki reflete personnalité Bondié, ek sa quantité temoignage ki éna dan bann Écritures—eski tousala pa ti pou convaink ou ki Jésus ti le Messie? N’importe kisannla ki ti éna enn vrai l’amour pou Bondié ek pou so Parole, ti pou comprend sa bien vite, ek zot ti pou éna la foi ki Jésus li-mem le Messie ki Bondié ti’nn  promette. Mais la plupart bann habitant Israël pa ti éna sa qualité l’amour-la. Jésus ti dir so bann adversaire: “Mo bien koné ki zot péna l’amour Bondié en zot.” (Jean 5:42) Au lieu ki zot “rod la gloire ki sorti kot sel Bondié,” zot ti pé “accepté la gloire sakenn so camarade.” Li pa drole ki zot pa ti d’accord avek Jésus ki, pareil couma so Papa, ti détesté sa fason pensé-la!—Jean 5:43, 44; Actes 12:21-23.

Fortifié par enn Vision Prophetik

9, 10. (a) Kifer sa signe ki Jésus ti donne so bann disciple-la, ti vinn dan enn bon moment pou zot? (b) Ki promesse extraordinaire Jésus ti faire so bann disciple?

⁹ Sa faire plus ki enn an depuis ki Jésus finn donne sa preuve ki mentionné là-haut-la, pou montré ki li-mem le Messie. Pâque l’an 32 N.L. fini passé. Beaucoup ki ti croire en Jésus, finn arrete suive li, kitfois a cause persecution, materialisme ek bann tracas ki éna dan la vie. Lezot finn éna doute ek finn decouragé parski Jésus pa ti accepté ki bann dimoune faire li vinn lé-roi. Kan bann chef religieu Juif ti mette li au défi, Jésus ti refusé pou donne enn signe ki sorti dan le ciel, ki ti pou glorifié li. (Matthieu 12:38, 39) Certain pa ti comprend kifer Jésus ti refusé. En plus, Jésus ti commence dir so bann disciple enn kitsoz ki zot ti trouve difficile pou comprend. Li ti dir zot ki “li pou bizin al Jérusalem, ek bann ancien, bann pretre ek bann scribe pou faire li passe par beaucoup souffrance, ek [zot] pou faire touye li.”—Matthieu 16:21-23.

¹⁰ Dan environ neuf a dix mois, pou arrive l’heure “pou [Jésus] quitte sa lé-monde-la ek al kot so Papa.” (Jean 13:1) Tellement li tracassé pou so bann disciple fidel, ki li promette pou donne certain, exactement séki li ti refuse pou donne bann Juif ki pa ti éna la foi en li—enn signe ki sorti dan le ciel. Jésus dir: “Mo dir zot vrai-mem, ki certain ki ici pa pou trouve la mort, avant ki d’abord zot trouve Fils de l’homme vini dan so royaume.” (Matthieu 16:28) Bien-sur, Jésus pa pé dir ki certain parmi so bann disciple pou vive ziska ki Royaume Messianique etabli dan le ciel en 1914. Séki Jésus pé pensé, c’est donne trois disciple avek ki li pli proche, enn vision lor la gloire ki li pou éna dan so Royaume. Sa vision-la appel la transfiguration.

11. Decrire ki ti arrivé pendant la transfiguration.

¹¹ Six jour plitar, Jésus prend Pierre, Jacques ek Jean ek li amenn zot lor enn montagne bien haute, kitfois lor montagne Hermôn. Là, Jésus ‘transfiguré devant zot, ek so figure brillé couma soleil, ek so linge eclairé couma la lumiere.’ Prophete Moïse ek Éliya, apparette zot aussi, ek zot koz avek Jésus. Li possible ki sa l’evenement impressionant-la pé arrivé a-soir, a cause sa li parette encore pli vivant. Avrédir, sa vision-la tellement réel ki Pierre propose pou monte trois la-tente, enn pou Jésus, enn pou Moïse ek enn pou Éliya. Alors ki Pierre encore pé kozé, enn nuage brillant vinn couver zot ek enn la-voix sorti dan sa nuage-la ek dir: “Li-mem mo Garson ki mo bien content ek ki mo finn approuvé, ecoute li.”—Matthieu 17:1-6.

12, 13. Ki l’effet la transfiguration ti éna lor bann disciple Jésus, ek kifer?

 ¹² Li vrai ki Pierre ti fek dir ki Jésus li-mem “le Christ, Garson Bondié ki vivant.” (Matthieu 16:16) Mais mazinn sa enn coup, ou tann Bondié Li-mem donne so temoignage, Li confirme l’identité so Garson ki Li finn choisir, ek role ki li éna! Oui, sa vision-la vrai-mem fortifié la foi Pierre, Jacques ek Jean! Asterla, zot pli bien preparé pou bann l’evenement ki pé atann zot, ek pou role important ki zot pou joué dan congregation ki ti pou formé apré.

¹³ La transfiguration impressionne tellement sa bann disciple-la, ki zot pa pou blié sa jamais. Plus ki 30 an apré, Pierre ecrire: “[Jésus] finn gagne l’honneur ek la gloire avek so Papa, kan dan enn la-gloire extraordinaire, Bondié ti dir sa bann parole-la: ‘Li-mem mo Garson ki mo bien content ek ki mo-mem mo’nn approuvé.’ Oui, sa bann parole ki sorti dan le ciel-la, nou ti tann sa kan nou ti avek li lor montagne sacré.” (2 Pierre 1:17, 18) Jean aussi bien touché par sa l’evenement-la. Plus ki 60 an apré, li possible ki li pé faire reference ar la transfiguration kan li écrire: “Nou finn trouve so la-gloire, enn la-gloire ki enn papa pou donne so sel Garson.” (Jean 1:14) Seulement, la transfiguration li pa dernier vision ki bann disciple Jésus ti pou gagné.

Plus Eclaircissement pou Bann Fidel

14, 15. Dan ki sens eski l’apotre Jean ti pou resté ziska ki Jésus vini?

¹⁴ Apré so resurrection, Jésus apparette ar so bann disciple pré kot la Mer Galilée. Là, li dir Pierre: “Si mo envi ki [Jean] resté ziska ki mo vini, couma sa concerne toi?” (Jean 21:1, 20-22, 24) Eski sa bann parole-la montré ki l’apotre Jean ti pou vive pli longtemps ki bann lezot zapotre. Coumadir oui, parski li’nn servi Jéhovah fidèlement pendant preské 70 an encore. Seulement, Jésus pé rod dir enn kitsoz beaucoup pli important ki sa.

¹⁵ L’expression “ziska ki mo vini” rappel nou bann parole Jésus kan li ti dir ki ‘Fils de l’homme pou vinn dan so royaume.’ (Matthieu 16:28) Jean inn resté ziska ki Jésus vini, dan le sens ki plitar, li finn gagne enn vision prophetik lor Jésus kan li vini couma lé Roi dan so Royaume. Ver la fin so la-vie, kan Jean ti enn prisonnier lor l’île Patmos, li ti gagne la Révélation ek tou bann signe prophetik lor bann l’evenement ki ti bizin arrivé pendant “jour du Seigneur.” Jean ti tellement touché par sa bann vision extraordinaire-la ki, kan Jésus ti dir: “Mo pé vinn vite,” Jean ti dir: “Amen! Vini Seigneur Jésus.”—Révélation 1:1, 10; 22:20.

16. Kifer li important ki nou contigne fortifié nou la-foi?

¹⁶ Dan premier siècle, bann dimoune sincère ti accepté Jésus couma le Messie ek zot ti éna la foi en li. Mais, zot ti pou bizin fortifié zot la-foi, pa seulement parski zot ti entouré par bann dimoune ki pa ti éna la foi en Jésus, mais aussi a cause travail ki zot ti pou éna pou faire, ek bann l’epreuve ki zot ti pou gagné. Pou encourage so bann disciple fidel, Jésus finn donne beaucoup preuve pou montré ki li-mem le Messie, ek li finn donne bann vision prophetik ki finn eclairci zot. Zordi, nou bien avancé dan “jour du Seigneur.” Bientot, Christ pou detruire sa lé-monde mauvais ki Satan pé dirigé-la, ek li pou delivré bann serviteur Bondié. Nou aussi nou bizin fortifié nou la-foi. Nou kapav faire sa kan nou profite tou bann disposition ki Jéhovah inn prend pou fortifié nou lor plan spirituel.

 Protegé Malgré enn Period Bien Sombre ek Difficile

17, 18. Dan premier siècle, ki grand difference ti éna entre bann disciple Jésus ek bann ki ti kont projet Bondié, et couma sa ti fini pou toulé-deux group?

¹⁷ Apré la mort Jésus, avek courage, bann disciple ti obeir l’ordre ki li ti donne zot pou rann temoignage “dan Jérusalem, partout dan Judée ek Samarie ek ziska dan region pli loin lor la terre.” (Actes 1:8) Malgré bann period persecution terrible, Jéhovah ti beni congregation Chretienne ki ti’nn fek formé kan Li ti donne zot bann l’eclaircissement spirituel ek bann nouveau disciple.—Actes 2:47; 4:1-31; 8:1-8.

¹⁸ De lot coté, tigit par tigit, l’avenir bann dimoune ki kont la bonne nouvel pé vinn pli pir. Proverbes 4:19 dir : “Chemin bann mauvais dimoune li pareil couma kan faire bien sombre, zot pa koné lor ki zot pé contigne manque tombé.” Sa noirté-la finn vinn pire en l’an 66 N.L kan l’armée Romain ti entoure Jérusalem. Pou enn raison ki nou pa koné, bann Romain ti’nn allé pou enn certain lé-temps, mais en 70 N.L., zot inn revini, sa fois-la pou detruire la ville. Dapré Joseph, enn historien Juif, plus ki enn million Juif finn mort. Mais bann Chrétien fidel ti sapé. Kifer? Parski kan l’armée Romain ti’nn allé premier fois, zot ti obeir l’ordre ki Jésus ti donne zot pou sauvé.—Luc 21:20-22.

19, 20. (a) Kifer bann serviteur Bondié péna okenn raison pou peur, alors ki la fin sa lé-monde-la pré pou vini? (b) Ki Jéhovah inn faire so bann serviteur comprend plusieurs l’année avant 1914?

¹⁹ Nou situation pareil zordi. La grande tribulation ki pé vini pou annonce la fin sa lé-monde mauvais ki Satan pé dirigé-la. Mais peuple Bondié péna pou peur, parski Jésus ti faire sa promesse-la: “Guetté! Mo avek zot toulé-jours ziska la fin sa system-la.” (Matthieu 28:20) Pou fortifié la foi bann premier disciple, ek pou prepare zot pou séki pou arrivé, Jésus ti donne zot enn vision lor la gloire ki li pou éna kan li pou vinn le roi dan le ciel. Ki nou kapav dir zordi? En 1914, sa vision-la finn vinn enn realité. Ek vrai-mem, depuis ki sa finn realisé, la foi bann serviteur Bondié finn bien fortifié! Parski Royaume Bondié finn etabli dan le ciel, nou éna encore plus confiance dan l’avenir extraordinaire ki pé atann nou. Ek tigit par tigit, bann serviteur Jéhovah finn gagne plus l’eclaircissement lor sa Royaume-la. Au milieu bann condition ki pé empiré dan le monde, la Bible dir ki “chemin bann dimoune droite li pareil couma la lumiere ki eclaire fort, ek ki pé vinn encore pli fort, ziska ki’nn bien faire li-jour.”—Proverbes 4:18.

²⁰ Mem avant 1914, enn ti-group Chretien oint ti commence comprend bann verité important lor fason ki le Seigneur pou retourné. Par exemple, zot ti comprend ki so retour ti pou invisible. C’est sa-mem ki sa deux ange-la ti rod faire comprend kan zot ti apparette ar bann disciple en l’an 33 N.L. pendant ki Jésus ti monte dan le ciel. Apré ki enn nuage ti empeche bann disciple pou contigne trouve Jésus, bann ange-la ti dir: “Sa Jésus ki finn enlevé parmi zot pou al dan le ciel-la, pou vinn dan mem fason ki zot finn trouve li al dan le ciel.”—Actes 1:9-11.

21. Ki nou pou examiné dan prochain l’article?

²¹ C’est seulement bann disciple fidel Jésus ki ti trouve li allé. Pareil couma kan ti éna la transfiguration, sa pa ti arrivé devant tou dimoune. Le monde en general pa ti mem koné  séki ti’nn arrivé. Mem zaffaire ti pou arrivé kan Christ ti pou retourné en tant ki lé-roi. (Jean 14:19) Zis so bann fidel disciple oint ti pou comprend ki aster li pé regné couma lé-roi. Dan prochain l’article, nou pou trouvé couma sa connaissance-la ti pou éna enn grand l’effet lor zot, ek grace a sa, plusieurs million dimoune ki éna l’espoir pou vive dan paradi lor enn la-terre dirigé par Jésus, pou rassemblé.—Révélation 7:9, 14.

[Note]

Eski Ou Rappel?

• Kan bann l’ennemi Jésus ti accuse li ki li ti pé viole le Sabbat, ek ki li pé blasphemé, ki preuve Jésus ti donné pou montré ki li-mem le Messie?

• Ki bienfait bann premier disciple Jésus ti gagné a travers la transfiguration?

• Ki Jésus ti pé rod dir kan li ti dir ki Jean pou resté ziska ki li vini?

• En 1914, ki vision ti vinn enn realité?

[Questions d’étude]

[Zimage, page 3]

Jésus ti donne bann preuve ki li-mem le Messie

[Zimage, page 5]

La transfiguration ti enn vision ki ti fortifié la foi

[Zimage, page 6]

Jean ti pou resté ziska ki Jésus ‘vini’