“Parmi tou bann dimoune ki’nn existé,” Jésus “ti certainement enn parmi bann dimoune ki finn éna plus l’influence.”—“The World Book Encyclopedia.”

NORMALEMENT nou rappelle bann grand personnages pou séki zot inn faire. Alors kifer beaucoup dimoune mazinn Jésus pou so naissance au lieu ki zot rappelle li pou so bann actions? Dans la Chrétienté, la plupart dimoune kapav raconte bann événements ki’nn arrivé en rapport avec naissance Jésus. Mais combien parmi zot ki rappelle so l’enseignement exceptionnel couma nou trouve sa dans Sermon lor Montagne ek faire zeffort pou applique sa dans zot la-vie?

Li vrai ki naissance Jésus ti extraordinaire, mais so bann premiers disciples ti accorde plus  l’importance ar séki li ti faire et séki li ti enseigné. Sûrement ki Bondié jamais pa ti envie ki naissance Jésus prend plus l’importance ki so la-vie en tant ki enn adulte. Pourtant, à cause enn méli-mélo zhistoires traditionnel lor la Nativité, fête Noël inn arrivé prend plus l’importance ki Jésus li-mem en tant ki enn personne.

Éna enn l’autre question ki nou kapav posé en rapport avec façon ki dimoune fête la Noël. Si Jésus ti retourne lor la terre zordi, ki li ti pou pensé lor le fait ki Noël, li enn fête complètement commercial? Éna deux mille ans, Jésus ti visite temple dans Jérusalem. Li ti en colère kan li ti trouve bann ki ti pé change l’argent ek bann marchands ki ti pé profite lor enn fête religieux juif. Li ti dire: “Tire sa bann kitsoz-la ici. Arrête faire lakaz mo Papa vinn enn lakaz commerce!” (Jean 2:13-16) Li clair ki Jésus pa ti d’accord pou mélange commerce ek religion.

Beaucoup Catholiques Espagnol ki sincère, pa trop content kan zot trouvé couma Noël pé vinn de plus en plus commercial. Pourtant, ti bizin atann ki sa arrivé à cause l’origine beaucoup pratiques ki éna rapport avec Noël. Journaliste Juan Arias dire: “Éna bann Chrétiens ki critique façon ki Noël inn rempli ar bann pratiques païens et inn vinn plus enn l’occasion pou faire tam-tam ek pou acheté, au lieu ki li enn fête religieux. Mais en général, sa bann dimoune-la pa au courant ki depuis so l’origine-mem, la Nativité . . . ti déjà éna beaucoup pratiques ki ti pareil couma bann fêtes païen ki bann Romains ti faire [en l’honneur soleil].”—El País, 24 Décembre 2001.

Depuis plusieurs l’années, beaucoup journalistes ek encyclopédies Espagnol inn faire bann commentaires lor l’origine païen bann fêtes ki faire pou Noël, et aussi couma Noël inn commercialisé. Concernant date ki fête Noël, l’Enciclopedia de la Religión Católica dire franchement: “Li parette ki c’est l’habitude ki l’Église Romain éna pou remplace bann fêtes païen par bann fêtes Chrétien ki’nn faire li décidé pou choisir sa date-la pou fête la Noël. . . . Nou koné ki dans sa l’époque-la à Rome, bann païens ti choisir sa jour-la, 25 Décembre, pou fête natalis invicti, naissance ‘soleil lor ki personne pa kapav remporte la victoire.’ ”

L’Enciclopedia Hispánica faire sa commentaire-la li aussi: “Date 25 Décembre pou célébration Noël, li pa basé lor enn calcul exact lor jour ki Jésus ti né mais, plutôt, lor bann fêtes solstice l’hiver ki ti faire à Rome ek ki, après inn vinn bann fêtes Chrétien.” À partir 22 Décembre à Rome, soleil commence vinn pli haute dans le ciel. Couma bann Romains ti fête sa? Zot ti faire tam-tam ek sakenn ti donne cadeaux zot camarades. Bann responsables l’Église pa ti oulé aboli enn fête populaire coumsa, alors zot inn faire li vinn enn fête Chrétien létan zot inn appelle sa naissance Jésus au lieu naissance soleil.

Avant, dans quatrième ek cinquième siècle, pa ti facile pou arrête reste attaché avec l’adoration soleil ek so bann coutumes. Enn “Saint” Catholique, Augustin (354-430 N.L.) ti senti-li obligé pou conseille bann Catholiques pou pa fête le 25 Décembre pareil couma bann païens, ki ti faire sa en l’honneur soleil. Mem zordi, sa bann coutumes ancien ki éna enn rapport avec l’adoration soleil par bann  Romains parette encore éna enn bien grand l’influence.

L’Occasion Idéal pou Faire Tam-Tam ek Commerce

Avec le temps, plusieurs kitsoz inn joué enn rôle important pou faire Noël vinn fête pli populaire ek international pou faire tam-tam ek commerce. Aussi, bann coutumes ki ti sorti dans bann lézot fêtes ki ti faire en hiver, surtout bann ki ti célébré dans l’Europe du Nord, doucement-doucement finn rentre dans sa fête ki ti commence à Rome-la. a Et dans vingtième siècle, bann vendeurs ek bann spécialistes marketing inn encourage fort-fort n’importe ki coutume ki ti pou kapav faire zot gagne bann grand-grand profits.

Ki résultat sa inn donné? Sa fête-la inn vinn beaucoup pli important ki signification naissance Christ. Dans certains cas, presque mem pa koz Christ dans fête Noël. Journal Espagnol El País dire: “Noël, li enn fête mondial, enn fête pou la famille et sakenn célébré li dans so propre façon.”

Sa commentaire-la montré bien tendance ki pé vinn pli courant en Espagne et dans bann lézot pays à travers le monde. Alors ki fête Noël pé vinn encore pli extravagant, la connaissance lor Christ pé diminué. En réalité, bann festivités Noël inn plus ou moins retourne à séki zot ti été au commencement dans l’époque bann Romains—tam-tam, ek échange bann cadeaux.

Enn Zenfant Ki’nn Né pou Nou

Si Noël traditionnel péna okenn rapport avec Christ, couma bann vrai Chrétiens bizin rappelle naissance ek la vie Christ? Sept cents ans avant naissance Jésus, Isaïe ti prophétisé lor Li. Li ti dire: “Éna enn zenfant ki’nn né pou nou, finn donne nou enn garçon, et responsabilité pou régné couma enn prince pou lor so zépaule.” (Isaïe 9:6) Kifer Isaïe ti dire ki naissance Jésus et so rôle, par la suite, pou éna sa l’importance-la? Parski Jésus ti pou vinn enn chef puissant.  Ti pou appelle li Prince de Paix, et la paix et so règne en tant ki Prince pa pou fini jamais. En plus, gouvernement Jésus pou régné “par moyen la justice ek par moyen séki droite.”—Isaïe 9:7.

Ange Gabriel ti répète séki Isaïe ti proclamé kan li ti annonce Marie ki Jésus ti pou né bientôt. Li ti prédire: “Li pou vinn enn kikenn ki grand et pou appelle li Garçon Très-Haut, et Jéhovah pou donne li trône David, so papa, et li pou dirigé couma lé-roi lor lakaz Jacob [famille Jacob et zot bann descendants] pou toujours, et so royaume pa pou fini jamais.” (Luc 1:32, 33) Li clair ki raison, pou kifer naissance Jésus important, éna enn rapport avec travail ki Christ pou faire en tant ki lé-Roi ki’nn choisir pou dirigé dans Royaume Bondié. Ou avec ou bann proche ki ou content pou kapav profite règne Christ ensam avec tou dimoune. En réalité, bann anges ti faire nou comprend ki so naissance ti pou amène “la paix lor la terre pou bann dimoune ki Bondié content.”—Luc 2:14.

Kisannla ki pa envie vive dans enn lé-monde kot éna la paix ek la justice? Mais pou nou kapav profite sa la-paix ki gouvernement Christ pou amené-la, nou bizin faire plaisir Bondié ek éna enn bon relation avec Li. Jésus ti dire ki premier kitsoz ki nou bizin faire pou kapav éna sa qualité relation-la, c’est aprann lor Bondié ek Christ. “Ala séki veut-dire la vie éternel; c’est aprann konn toi, seul vrai Bondié, et celui ki to’nn envoyé, Jésus Christ.”—Jean 17:3.

Enn fois ki nou’nn gagne enn connaissance exact lor Jésus, nou népli bizin demann nou couma li envie ki nou garde so souvenir. Eski c’est kan nou mangé-boire ek donne bann cadeaux mem date ki enn fête païen? Pa ditou! La nuit avant li mort, Jésus ti dire so bann disciples séki li ti préféré: “Celui ki éna mo bann commandements et obéir zot, c’est li-mem ki content moi. Séki content moi, en retour, mo Papa pou content li, et moi, mo pou content li.”—Jean 14:21.

Bann Témoins de Jéhovah inn passe beaucoup lé-temps pou étudié la Bible. Sa finn aide zot pou comprend ki bann commandements ki Bondié ek Jésus inn donné. Zot ti pou content aide ou pou comprend sa bann commandements important-la pou ki ou rappelle Jésus couma bizin rappelle li.

[Note]

[L’encadré ek zimage page 6, 7]

Eski la Bible Dire Ki Li Pa Bon pou Faire Fête ek Donne Bann Cadeaux?

Donne Bann Cadeaux

La Bible pa défann donne bann cadeaux, parski li appelle Jéhovah Li-mem, Celui ki donne “tou joli don ek tou cadeau parfait.” (Jacques 1:17) Jésus ti montré ki bann bon parents donne bann cadeaux zot zenfants. (Luc 11:11-13) Bann camarades ek bann familles Job ti donne li bann cadeaux kan li ti retrouve so la-santé. (Job 42:11) Mais pa ti bizin enn jour spécial kot ti éna enn fête pou donne sa bann cadeaux-la. C’est zot léker ki ti pousse zot pou donne bann cadeaux.—2 Corinthiens 9:7.

Bann l’Occasions Kot Bann Familles Joinde

Bann l’occasions kot bann familles joinde, kapav faire beaucoup pou uni bann membres enn famille, surtout si zot népli reste dans mem lakaz. Jésus ek so bann disciples ti assisté enn mariage à Cana; sa ti sûrement enn grand l’occasion kot bann familles ek bann camarades ti joinde. (Jean 2:1-10) Et dans l’illustration ki Jésus ti donné lor le fils prodigue, pou fête retour so garçon, papa-la ti faire enn grand fête familial, kot ti éna la musique ek dansé.—Luc 15:21-25.

Kan Nou Profite enn Bon Repas Ensam

Souvent la Bible koz lor bann serviteurs Bondié ki ti profite enn bon mangé ensam avec zot famille, zot bann camarades, ou-soit zot bann compagnons dans la foi. Kan trois anges ti vinn guette Abraham, li ti prépare enn festin pou zot, kot ti éna la viande boeuf, du lait, du beurre ek bann gâteaux rond. (Genèse 18:6-8) Salomon ti décrire ‘mangé, boire, ek faire fête’ couma enn don Bondié.—Ecclésiaste 3:13; 8:15.

Li clair ki Bondié envie ki nou profite enn bon mangé ensemble avec nou bann camarades ek nou famille, et li d’accord kan nou donne cadeaux. Nou éna enn quantité l’occasions pou faire sa, n’importe kan pendant l’année.