“Kisannla ki vremem sa esklav fidel ek avize, ki so met finn etabli lor so bann domestik?”—MATTHIEU 24:45.

1, 2. Kifer li inportan zordi ki nu gayn la nuritir spirityel regilyerman?

 MARDI apremidi, le 11 Nisan lane 33 N.L., bann disip Jésus ti sulev enn kestyon ki ena enn gran sinifikasyon pu nu zordi. Zot ti demann li: “Ki siyn pu montre to prezans ek [ki nu pe viv] lepok la fin sa lemond-la?” Jésus ti reponn zot par enn profesi remarkab. Li ti koz lor bann peryod byin muvmante kot pu ena lager, la faminn, tranbleman deter, ek maladi. Ek sa ti pu zis enn “kumansman bann duler.” Sityasyon-la pu vinn pli pir ankor. Sa fer per, pa vre!—Matthieu 24:3, 7, 8, 15-22; Luc 21:10, 11.

² Depi 1914, laplipar kitsoz ki Jésus ti predir, finn realize. Zordi, limanite pe konn “bann duler” kuma zame zot finn kone avan. Me, fode pa ki bann vre Kretyin per. Jésus ti promet ki li pu sutenir zot avek la nuritir spirityel. Me zordi, Jésus dan lesyel. Alor, ki li’nn fer pu permet nu gayn la nuritir spirityel?

3. Ki bann dispozisyon Jésus finn pran pu nu gayn “manze dan ler ki bizin”?

³ Jésus ti reponn sa kestyon-la limem. Alor ki li ti pe anons sa gran profesi-la, li ti demande: “Kisannla ki vremem sa esklav fidel ek avize, ki so met finn etabli lor so bann domestik, pu donn zot, zot manze dan ler ki bizin?” Apre sa li’nn dir: “Ere sa esklav-la si, kan so met vini, li truv li pe fer sa. Vremem mo dir zot, Li pu met li an sarz tu so bann dibyin.” (Matthieu 24:45-47) Wi, Jésus ti dir ki pu ena enn “esklav” ki pu ena la responsabilite pu donn la nuritir spirityel. Se enn “esklav” ki pu fidel ek an mem tan avize, setadir li pu ena bon zizman. Eski sa esklav-la ti enn dimunn an partikilye, uswa plizir dimunn ki finn ranpli sa rol-la enn apre lot? Ubyin, eski se enn lot kitsoz? Parski sa esklav fidel-la donn nu la nuritir spirityel ki nu byin bizin, li dan nu lintere pu konn la repons.

Enn Dimunn Uswa enn Grup Dimunn?

4. Kuma eski nu kone ki ‘sa esklav fidel ek avize-la’ pa kapav enn sel dimunn?

⁴ ‘Sa esklav fidel ek avize-la’ pa kapav enn sel dimunn. Kifer? Parski se depi premye syek ki li finn kumans servi la nuritir spirityel. Ek dapre Jésus, li ti pu ankor pe kontiyn fer sa kan so Met ti pu vini an 1914. Si li ti reprezant enn sel dimunn, sa vedir ki li ti pu bizin viv anviron 1900 an. Mem Methoushélah pa finn viv sa kantite letan-la!—Genèse 5:27.

5. Explike kifer expresyon “esklav fidel ek avize” pa kapav aplik ar sak Kretyin?

⁵ Alor, eski expresyon “esklav fidel ek avize” kapav aplik ar sak Kretyin? Li vre ki tu bann Kretyin bizin fidel ek avize. Me, kan Jésus ti pe koz lor sa esklav-la, li ti pe pans plis ki sa. Kuma eski nu konn sa? Se parski li ti dir ki, kan “so Met pu vini” li ti pu met esklav-la “an sarz tu so bann dibyin.” Kuma eski Met-la kapav etabli sak Kretyin lor tu kitsoz, lor “tu” so bann dibyin? Inposib!

6. Kuma eski nasyon Israël ti bizin fonksyone kuma “serviter” uswa “esklav” Bondye?

⁶ Donk, sel konklizyon rezonab ki nu kapav tire, se ki kan Jésus ti pe koz lor “esklav  fidel ek avize,” li pa ti pe fer referans ar enn sel Kretyin, me ar enn grup Kretyin. Eski li posib ki enn esklav kapav reprezant enn grup dimunn? Wi. Kan Jéhovah ti koz lor la nasyon Israël an antye, 700 an avan Christ, li ti apel zot “mo bann temwin” ek “mo serviter ki mo finn swazire.” (Isaïe 43:10) Depi 1513 A.N.L., lane kot Israël ti gayn Lalwa Mosaïque, ziska la Pentecôte an lan 33 N.L., sak Israélite ti form parti dan sa grup ki Jéhovah ti apel so serviter. Pa tu Israélites ki ti diriz la nasyon, ek pa tu Israélites ki ti responsab program lanseynman. Jéhovah ti servi bann le rwa, bann ziz, bann profet, bann pret ek bann Levit, pu fer sa bann travay-la. Me, kuma enn sel nasyon, Israël ti bizin reprezant suverennte Jéhovah ek glorifye Li parmi bann nasyon. Sak Israélite ti bizin enn temwin pu Jéhovah.—Deutéronome 26:19; Isaïe 43:21; Malaki 2:7; Romains 3:1, 2.

Enn “Esklav” Perdi So Plas

7. Kifer eski nasyon Israël ti nepli kalifye kuma “serviter” Bondye?

⁷ Pandan plizir syek, Israël ti “serviter” Bondye. Alor, eski sa vedir ki limem ki reprezant sa esklav ki Jésus ti koze-la? Non, parski malerezman nasyon Israël pa finn montre li ni fidel ni avize. Paul rezim sa sityasyon-la kan li sit bann parol ki Jéhovah ti dir zot: “Bann dimunn pe koz an mal lor non Bondye parmi bann nasyon.” (Romains 2:24) Wi, Israël finn al tro lwin dan so rebelyon, ziska ki li finn mem rezet Jésus. Ebyin lerla, Jéhovah usi finn rezet li.—Matthieu 21:42, 43.

8. Kan eski enn “serviter” finn etabli pu ranplas nasyon Israël, ek dan ki sirkonstans?

⁸ Li vre ki Israël, “serviter” Bondye, pa finn montre li fidel. Me sa pa vedir ki bann fidel adorater Bondye ti pu nepli gayn la nuritir spirityel. Sinkant zur apre lamor Jésus, setadir a la Pentecôte lane 33 N.L., lespri sin ti desann lor 120 disip ki ti dan enn lasam a letaz, dan Jérusalem. Enn nuvo nasyon ti pran nesans sa moman-la. Ek tu dimunn finn konn sa, kan bann manb sa nuvo nasyon-la finn kumans anons bann abitan Jérusalem “bann kitsoz extraordiner ki Bondye finn fer.” (Actes 2:11) Se kumsa ki sa nuvo nasyon-la, enn nasyon spirityel, finn vinn sa “serviter” ki pe anons la glwar Jéhovah ar bann nasyon ek ki pe donn la nuritir spirityel dan ler ki bizin. (1 Pierre 2:9) Donk li ti apropriye, kan plitar sa nasyon-la ti gayn non “Israël Bondye.”—Galates 6:16.

9. (a) Ki sinifi lexpresyon “esklav fidel ek avize”? (b) Ki bann “domestik” reprezante?

⁹ Sak manb “Israël Bondye” li enn Kretyin ki’nn angaz so lavi ar Bondye, ki batize, ki oint par lespri sin, ek ki ena lesperans pu viv dan lesyel. Donk, lexpresyon “esklav fidel ek avize” reprezant tu bann manb oints ki lor later a enn moman done, apartir lane 33 N.L. ziska zordi, antan ki grup. Li parey kuma sak Israélite ki ti viv dan ninport ki moman ant 1513 A.N.L. ziska la Pentecôte lane 33 N.L., ki ti form parti dan sa grup ki Jéhovah ti apel so “serviter,” avan lepok Kretyin. Me ki reprezant bann “domestik” ki gayn la nuritir spirityel atraver sa esklav-la?  Dan premye syek, sak Kretyin ti ena lesperans pu viv dan lesyel. Donk, bann domestik ti bann Kretyin oints lor plan individyel, pa antan ki grup. Tu bann Kretyin oints, mem bann ki ti pran latet dan la kongregasyon, ti bizin la nuritir spirityel ki sa esklav-la done.—1 Corinthiens 12:12, 19-27; Hébreux 5:11-13; 2 Pierre 3:15, 16.

“Sakenn So Travay”

10, 11. Kuma eski nu kone ki sak manb esklav fidel ek avize pena mem travay pu fer?

¹⁰ “Israël Bondye” limem esklav fidel ek avize, ek antan ki grup li ena enn travay pu fer. Me, sak manb sa nasyon-la ena so prop responsabilite personel. Bann parol Jésus ki truv dan Marc 13:34, montre sa klerman. Nu lir: “Li parey kuma enn misye ki pe al an vwayaz. Li’nn kit so lakaz ek li’nn donn so bann esklav lotorite, li’nn donn sakenn so travay, ek li’nn donn portye lord pu veye.” Donk, sak manb ki fer parti dan esklav fidel ek avize, finn gayn enn travay, setadir pu ogmant dibyin ki Christ finn konfye zot isi lor later. Sakenn fer sa travay-la dapre so kapasite ek so sityasyon personel.—Matthieu 25:14, 15.

¹¹ Pa fini, lapot Pierre usi ti dir bann Kretyin oints dan so lepok: “Les sakenn servi lezot avek sa don ki li’nn gayne-la. Kumsa, zot pu bann bon serviter ki Bondye servi pu montre so faver imerite dan diferan fason.” (1 Pierre 4:10) Donk, sa bann Kretyin oints-la ena responsabilite pu servi zot kamarad avek bann don ki Bondye finn donn zot. Anplis, dapre bann parol Pierre, pa tu Kretyin ki pu ena mem kapasite, mem responsabilite uswa mem privilez. Me, sakenn kapav fer so par pu fer sa nasyon spirityel-la grandi. Kuma?

12. Kuma sak manb esklav fidel ek avize, ki li enn zom uswa enn fam, ti fer so par pu fer sa nasyon spirityel-la grandi?

¹² Dabor, sakenn bizin enn temwin pu Jéhovah, setadir li bizin pe pres la bonn nuvel lor Rwayom Bondye. (Isaïe 43:10-12; Matthieu 24:14) Zis avan li mont dan lesyel, Jésus ti donn lord tu so bann fidel disip, zom ek fam tulede, pu vinn bann anseynan. Li ti dir zot: “Donk, ale ek fer bann disip parmi tu bann nasyon, batiz zot [au nom du Père, du Fils ek de l’esprit saint], anseyn zot pu swiv tu bann kitsoz ki mo finn dir zot fer. Ek gete! Mo avek zot tulezur ziska lafin sa sistem-la.”—Matthieu 28:19, 20.

13. Ki privilez tu bann Kretyin oints ti ena?

¹³ Kan zot ti truv bann nuvo disip, zot ti bizin anseyn bannla pu swiv tu bann kitsoz ki Christ ti’nn dir zot fer. Avek letan, bann dimunn sinser, zot usi zot finn kalifye pu anseyn lezot. La nuritir spirityel ti disponib pu bann dimunn ki ti pu vinn manb sa esklav-la, dan tu buku nasyon. Tu bann Kretyin, zom ek fam tulede, ti partisip dan travay pu fer bann disip. (Actes 18:24-26) Sa travay-la ti pu kontiyne ziska lafin sa sistem-la.

14. Dan la kongregasyon, ki bann ki ti ena privilez pu anseyne, ek kuma bann fidel ser oints ti truv sa?

¹⁴ Apre zot batem, lezot Kretyin oints ti  vinn manb sa esklav-la. Mem si se enn lot dimunn ki ti fer zot letid, zot ti kontiyn les zot anseyne par bann frer dan la kongregasyon, ki dapre la Bib, ti ranpli bann kondisyon pu servi kuma ansyin. (1 Timothée 3:1-7; Tite 1:6-9) Donk, sa bann frer nome-la ti pe ede dan enn fason spesyal, pu fer sa nasyon-la grandi. Bann fidel ser oints pa ti agase parski se selman bann frer ki ti ena privilez pu anseyne dan la kongregasyon. (1 Corinthiens 14:34, 35) Okontrer, zot ti byin kontan pu profit travay dir ki bann frer ti pe fer dan la kongregasyon. Ek zot ti byin rekonesan usi pu bann privilez ki zot, zot ti ena, kuma par egzanp anons la bonn nuvel. Zordi, bann ser oints manifeste sa mem limilite-la anver bann ansyin, mem si se pa bann frer oints.

15. Ki nuritir spirityel bann premye Kretyin ti gayne, ek kisannla ki ti pe donn sa nuritir-la?

¹⁵ Let ki bann zapot ek lezot disip ti ekrir, se sa ki ti la nuritir spirityel pu bann Kretyin dan premye syek. Sa bann let-la, sirtu bann let ki truv parmi sa 27 liv inspire ki form les Écritures grecques chrétiennes-la, ti sirkile dan bann kongregasyon. Ek se seki bann ansyin ti servi pu anseyn la kongregasyon. Dan sa fason-la, bann reprezantan esklav fidel ek avize ti kontiyn distribye enn bon nuritir spirityel pu bann Kretyin sinser. Wi, dan premye syek esklav fidel ek avize, ti akonpli so travay kuma bizin.

Sa ‘Esklav-la,’ 19 Syek Plitar

16, 17. Kuma eski esklav fidel ek avize ti pe fer so travay fidelman an 1914?

¹⁶ Kuma sa pe pase zordi? Kan prezans Jésus finn kumanse an 1914, eski li finn truv enn grup Kretyin oints ki fidelman pe servi manze dan ler ki bizin? Wi. Ti kapav fasilman idantifye sa grup-la grasa bann frwi ki li ti pe prodir. (Matthieu 7:20) Depi sa, listwar finn pruve ki se sa grup-la mem ki reprezant esklav fidel ek avize.

¹⁷ Kan Jésus ti vini dan enn fason invizib, ti ena apepre 5,000 domestik ki ti pe okipe pu fer bann dimunn konn la verite ki truv dan la Bib. Pa ti ena buku travayer, me esklav fidel ek avize ti servi enn kantite nuvo metod pu partaz la bonn nuvel. (Matthieu 9:38) Par egzanp, zot ti pran bann dispozisyon pu ki preske 2,000 lagazet pibliy bann sermon lor diferan size Biblik. Kumsa, la verite dan Parol Bondye finn kapav tus enn pli gran kantite lekter enn sel ku. Pa fini, zot ti prepar usi enn prozeksyon fim ek zimaz an kuler, pu enn dire 8 ertan. Grasa sa nuvo prezantasyon-la, apepre nef milyon dimunn lor trwa kontinan finn kapav tann  mesaz Biblik, depi kumansman la kreasyon ziska la fin Reyn Milan Christ. Enn lot metod ankor ki zot finn servi se bann piblikasyon. An 1914, par egzanp, ti pibliy 50,000 kopi Latur Degard.

18. Kan eski Jésus ti etabli sa esklav-la lor tu sa bann dibyin, ek kifer?

¹⁸ Wi, kan so Met finn vini, li finn truve ki so esklav fidel ti pe nuri bann domestik kuma bizin, ek zot ti pe pres la bonn nuvel. Asterla, ti ena bann pli gran responsabilite ki ti pe atann sa esklav-la. Jésus ti dir: “Vremem mo dir zot, Li pu met li an sarz tu so bann dibyin.” (Matthieu 24:47) Sa-mem ki Jésus finn fer an 1919, apre ki sa esklav-la finn pas par enn peryod leprev. Me, kifer eski “esklav fidel ek avize” finn gayn bann pli gran responsabilite? Se parski dibyin so Met ti’nn ogmante. Jésus ti vinn le Rwa an 1914.

19. Explike kuma “la grand ful” finn gayn seki li bizin lor plan spirityel.

¹⁹ Ki dibyin le Rwa Jésus Christ finn konfye esklav fidel ek avize? Se tu so bann dibyin spirityel ki Li ena lor later. Par egzanp, 20 an apre ki Christ finn vinn le Rwa an 1914, “enn grand ful” bann “lezot brebi” finn fer zot aparisyon. (Révélation 7:9; Jean 10:16) Zot pa ti bann manb oints ki fer parti dan “Israël Bondye.” Me se bann zom ek bann fam sinser ki ti ena lespwar pu viv lor later, ki ti kontan Jéhovah ek ki ti anvi servi Li parey kuma bann manb oints. Anfet, se kumadir zot ti pe dir “esklav fidel ek avize”: “Nu pu al avek zot, parski nu finn tande ki Bondye Li avek zot.” (Zekaria 8:23) Sa bann nuvo Kretyin-la, ti manz mem nuritir spirityel ki bann “domestik” ki oints, ek depi sa moman-la, tulede grup Kretyin manz lor mem latab. Pu bann manb “la grand ful” sa ti vremem enn gran benediksyon!

20. Ki rol “la grand ful” finn ena pu ogmant dibyin nu Senyer Jésus Christ?

²⁰ Avek enn gran lazwa, bann manb “la grand ful” finn asosye ansam avek bann manb oints pu pres la bonn nuvel. Amezir zot finn prese, dibyin zot Met finn ogmante lor later, ek byinsir sa finn ogmant usi bann responsabilite “esklav fidel ek avize.” Etandone, ki plis dimunn pe aksepte la verite, li finn vinn neseser pu agrandi bann linprimri pu prodir plis piblikasyon ki baze lor la Bib. Finn bizin etabli diferan filyal bann Temwin Jéhovah dan buku peyi. Ek finn avoy bann misyoner “dan bann rezyon pli lwin lor later.” (Actes 1:8) An 1914, ti ena apepre 5,000 manb oints. Zordi, ena plis ki sis milyon proklamater ki pe glorifye Bondye, ek la mazorite form parti dan “la grand ful.” Wi, bann dibyin Jésus finn byin ogmante depi ki li finn vinn le Rwa an 1914!

21. Ki de parabol nu pu egzamine dan nu prosin letid?

²¹ Tusala montre ki sa esklav-la finn montre li vremem “fidel ek avize.” Jésus ti atir latansyon lor sa de kalite-la dan de parabol ki li ti site, zis apre ki li ti’nn fini koz lor “esklav fidel ek avize.” Premye parabol la se parabol bann vyerz avize ek bann vyerz bet, ek dezyem-la se parabol bann talan. (Matthieu 25:1-30) Sirman, sa evey nu lintere! Ki sinifikasyon sa bann parabol-la ena pu nu zordi? Nu pu egzaminn sa kestyon-la dan prosin lartik.

Ki U Panse?

• Kisannla form parti dan “esklav fidel ek avize”?

• Kisannla bann “domestik”?

• Kan eski le Senyer finn etabli sa esklav-la lor tu so bann dibyin, ek kifer nu dir sa?

• Kisannla finn ede pu ogmant dibyin nu Senyer Jésus Christ, ek kuma?

[Kestyon]

[Zimaz lor paz 24]

Dan premye syek, esklav fidel ek avize finn fer so travay fidelman