Jéhovah So Lamur Fidel Byin Gran
“Jéhovah . . . so lamur fidel byin gran.”—PSAUME 145:8.
1. Ki kantite Jéhovah so lamur li gran?
“BONDYE Li lamur.” (1 Jean 4:8) Sa lexpresyon byin tusan-la pruve ki Jéhovah egzers so direksyon avek lamur. Wi, mem bann dimunn ki pa obeir Li, profit bann byinfe soley ek lapli ki Li done! (Matthieu 5:44, 45) Jéhovah kontan tu bann dimunn. Akoz sa, mem so bann lennmi kapav repanti, turn ver Li, ek gayn lavi pu tuletan. (Jean 3:16) Me, byinto Jéhovah pu detrir tu bann move ki pa anvi sanze. Lerla, tu bann dimunn ki kontan Li pu kapav profit lavi dan enn nuvo lemond.—Psaume 37:9-11, 29; 2 Pierre 3:13.
2. Ki kalite lamur Jéhovah manifeste anver bann ki’nn angaz zot lavi ar Li?
2 Jéhovah montre lamur pu so bann vre serviter dan enn fason dirab. Ena enn mo Hébreu ki dekrir sa kalite lamur-la. So tradiksyon se “lamur fidel.” Le Rwa David, dan ansyin Israël, ti ena enn gran apresyasyon pu lamur fidel Bondye. Grasa so lexperyans personel ek so meditasyon lor fason ki Bondye azir avek lezot, li ti kapav sante avek konfyans: “Jéhovah . . . so lamur fidel byin gran.—Psaume 145:8.
Idantifye Bann Fidel Serviter Bondye
3, 4. (a) Kuma eski Psaume 145 ed nu pu idantifye bann fidel? (b) Kuma eski bann fidel “beni” Bondye?
3 Konsernan Jéhovah, Hanna, mama profet Samuel, ti dir: “Li protez lipye so bann fidel.” (1 Samuel 2:9) Me ki sa ‘bann fidel-la’ sa? Le Rwa David reponn nu. Apre ki li’nn glorifye bann kalite extraordiner Jéhovah, li dir: “To bann fidel pu beni twa.” (Psaume 145:10) Sirman u kapav demande kuma bann imin kapav beni Bondye. Zot fer sa sirtu kan zot glorifye Li uswa kan zot koz an byin lor Li.
4 Donk, nu kapav dir ki bann fidel se bann ki koz an byin lor Bondye. Kan zot rasanble ansam, ek pandan zot bann reynion Kretyin, lor ki kitsoz zot diskisyon baze? Lor Rwayom Jéhovah, byinsir! Bann fidel serviter Jéhovah ena mem santiman ki David ki ti sante: “Zot pu dir la glwar to rwayote, ek zot pu koz lor to pwisans.”—Psaume 145:11.
5. Kuma eski nu kone ki Jéhovah pran kont kan so bann fidel koz an byin lor Li?
5 Eski Jéhovah ekute kan so bann fidel glorifye Li? Wi, Li ekut seki zot dir. Dan enn profesi ki ena enn rapor avek vre ladorasyon dan nu lepok, Malaki ti ekrir: “Sa lepok-la, bann ki ti ena la krint pu Jéhovah finn koz sakenn ant zot, sakenn ar so kamarad ek Jéhovah ti pe kontiyn pran kont ek kontiyn ekute. Ek finn kumans ekrir enn liv suvenir devan Li pu bann ki ena la krint pu Jéhovah ek pu bann ki mazinn so non. (Malaki 3:16) Jéhovah byin kontan kan so bann fidel koz an byin lor Li, ek Li rapel zot.
6. Ki aktivite ed nu idantifye bann fidel?
6 Ena enn lot kitsoz ki idantifye bann fidel. Avek kuraz zot rod tu bann lokazyon pu koz ar bann dimunn ki pa ador vre Bondye. Wi, bann fidel “fer bann imin konn so bann travay pwisan ek bote la glwar so rwayote.” (Psaume 145:12) Eski u rod bann lokazyon ek u sezi sa bann lokazyon-la pu koz avek bann dimunn lor rwayote Jéhovah? So rwayote pa parey kuma bann guvernman imin ki byinto pu disparet. Okontrer, so rwayote li eternel. (1 Timothée 1:17) Li byin inportan ki bann dimunn aprann ki sa vedir rwayote Jéhovah, ek zot pran pozisyon pu so Rwayom. David ti sante: “To rwayote li enn rwayote [ki pu dir] pu tuletan, ek to guvernman pu reste zenerasyon apre zenerasyon.”—Psaume 145:13.
7, 8. Ki ti arive an 1914, ek ki prev ena ki asterla Bondye pe reyne atraver Rwayom so Garson?
7 Depi 1914, nu ena ankor enn lot rezon pu koz lor rwayote Jéhovah. Sa lane-la, Bondye ti etabli so Rwayom Messianique dan lesyel, ek Li ti etabli Jésus Christ, Garson David kuma le Rwa dan sa Rwayom-la. Se kumsa ki Jéhovah ti realiz so promes, setadir ki rwayote David pu etabli solidman pu tuletan.—2 Samuel 7:12, 13; Luc 1:32, 33.
8 Zordi nu kapav truv bann prev ki Jéhovah pe reyne atraver Rwayom so Garson, Jésus Christ. Ki sa bann prev-la sa? Se realizasyon siyn prezans Jésus Christ. Eleman pli extraordiner sa siyn-la, se travay ki bann fidel serviter Jéhovah pe fer. Dayer Jésus ti anons sa kan li ti dir: “Sa bonn nuvel lor rwayom-la pu prese partu kot dimunn reste lor later kuma enn temwaynaz pu bann nasyon, ek lerla la fin pu vini.” (Matthieu 24:3-14) Zordi, ena plis ki sis milyon zom, fam ek zanfan ki pe partisip dan sa gran travay ki zame pa pu ena ankor. Tusala finn arive parski bann fidel serviter Bondye pe realiz avek zel sa profesi-la. Byinto, la fin tu bann dimunn ki opoze ar Rwayom Jéhovah, pu arive.—Révélation 11:15, 18.
Profit Suverennte Jéhovah
9, 10. Ki diferans ena ant Jéhovah ek bann dirizan imin?
9 Si nu bann Kretyin batize, nu relasyon avek Suverin Senyer Jéhovah, fer nu gayn buku byinfe. (Psaume 71:5; 116:12) Par egzanp, parski nu ena la krint pu Bondye ek nu pratik la zistis, nu gayn so faver ek nu vinn pros avek Li lor plan spirityel. (Actes 10:34, 35; Jacques 4:8) Sa li byin diferan avek bann dirizan imin. Suvan nu truv zot ansam avek bann gran-gran dimunn kuma par egzanp bann sef militer, bann biznesmenn byin ris, uswa bann vedet spor uswa sinema. Dan Sowetan, enn lagazet Africain, get seki enn gran minis ti dir konsernan bann landrwa pov dan so peyi: “Mo konpran kifer laplipar parmi nu pa anvi al dan sa bann landrwa-la.” Se zis parski nu anvi bliye ki sa bann sityasyon-la egziste. Sa truble nu konsyans ek nu santi nu zene parski nu pe rul bann gran-gran loto.”
10 Byinsir, ena sertin dirizan ki interese sinserman ar byinet bann dimunn ki zot dirize. Me, mem bann pli bon dirizan pa konn zot lepep afon. Nu kapav mem demann nu: Eski egziste enn dirizan ki telman pran swin so lepep, ki kuma enn kikenn dan problem, tutswit li pre pu ed li? Wi, ena enn dirizan kumsa. David ti ekrir: “Jéhovah sutenir tu bann ki tonbe, ek Li relev tu bann ki kurbe ar traka.”—Psaume 145:14.
11. Ki bann difikilte bann fidel serviter Jéhovah kone, ek ki led zot ena?
11 Bann fidel serviter Jéhovah konn buku difikilte ek maler akoz zot prop inperfeksyon ek parski zot viv dan enn lemond ki dan puvwar Satan, “le méchant.” (1 Jean 5:19; Psaume 34:19) Bann Kretyin konn persekisyon. Sertin sufer akoz enn maladi kronik uswa parski zot finn perdi enn kikenn dan la mor. Defwa, akoz zot bann erer, bann fidel serviter Jéhovah kapav santi zot “kurbe” ar dekurazman. Me, mem ki kalite difikilte zot kapav kone, Jéhovah tuzur pre pu donn rekonfor ek lafors spirityel sakenn parmi zot. Le Rwa Jésus Christ, li usi li interes li parey ar bann dimunn ki li dirize.—Psaume 72:12-14.
Enn Bon Nuritir dan Ler Ki Bizin
12, 13. Kuma eski Jéhovah donn “tu seki vivan” bann kitsoz ki zot bizin?
12 Akoz so gran lamur fidel, Jéhovah donn so bann serviter tu seki zot bizin, ek parmi ena enn bon nuritir. Le Rwa David ti ekrir: “Ver twa [Jéhovah] nu lizye gete avek lespwar, ek to pe donn bannla zot manze dan zot sezon. To pe uver to lamin ek to pe satisfer dezir tu seki vivan.” (Psaume 145:15, 16) Mem dan bann moman difisil, Jéhovah kapav turn bann sityasyon pu ki so bann fidel serviter gayn ‘zot dipin tulezur.’—Luc 11:3; 12:29, 30.
13 David ti dir ki “tu seki vivan” gayn seki zot bizin. Parmi ena usi bann zanimo. San sa kantite plant ki ena lor later ek dan lamer, bann kreatir ki viv dan delo, bann zwazo, ek bann zanimo ki viv lor later pa ti pu gayn oxizenn pu respire ni nuritir pu manze. (Psaume 104:14) Me, Jéhovah asire ki zot gayn tu seki zot bizin.
14, 15. Kuma eski nu gayn nuritir spirityel zordi?
14 Me bann imin zot, zot ena usi enn bezwin spirityel. (Matthieu 5:3) Dan enn fason extraordiner, Jéhovah donn so bann fidel serviter tu seki zot bizin lor plan spirityel. Avan li mor, Jésus ti promet so bann disip ki “esklav fidel ek avize” pu donn zot nuritir spirityel “dan ler ki bizin.” (Matthieu 24:45) Le res 144,000 oints ki ankor lor later, reprezant sa esklav-la zordi. Atraver zot, Jéhovah finn vremem donn la nuritir spirityel an abondans.
15 Par egzanp, zordi, laplipar serviter Jéhovah kapav lir enn tradiksyon la Bib ki egzak, dan zot prop lang. Wi, Les Saintes Écritures—Traduction du monde nouveau li vremem enn benediksyon pu nu! Anplis, par milyon, bann piblikasyon baze lor la Bib, pe kontiyn pibliye dan plis ki 300 lang. Tu sa nuritir spirityel-la li enn gran benediksyon pu bann vre adorater dan lemond antye. Me, kisannla ki merit luanz pu sa? Bondye Jéhovah. So gran lamur fidel finn pus Li pu fer ansort ki esklav fidel ek avize kapav donn “nuritir dan ler ki bizin.” Atraver sa bann dispozisyon-la, “tu seki vivan” kapav gayn seki zot bizin dan sa paradi spirityel ki existe-la asterla-mem. Nu sir ki tu bann serviter Jéhovah pe atann avek inpasyans pu truv later transforme an enn vre paradi!—Luc 23:42, 43.
16, 17. (a) Sit bann legzanp ki montre ki Jéhovah finn donn la nuritir spirityel dan ler ki bizin. (b) Kuma eski Psaume 145 exprim santiman ki bann fidel serviter Bondye ena konsernan kestyon prinsipal ki Satan ti suleve?
16 Anu get enn legzanp remarkab ki montre ki nu gayn manze spirityel dan ler ki bizin. Dezyem lager mondyal ti kumanse an 1939 an Europe. Sa mem lane-la, dan Latur Degard 1 Novam, ti ena enn lartik ki ti apel “Neutralité.” Sa lartik-la ti donn bann linformasyon byin kler konsernan sa size-la. Grasa sa, bann Temwin Jéhovah dan lemond antye ti pran konsyans ki zot bizin pa pran par dan okenn aktivite pu sa bann nasyon ki pe lager-la. Akoz sa, zot finn konn lakoler bann guvernman dan tulede kote, pandan sa lager ki ti dire sizan-la. Mem si zot aktivite ti interdi ek zot ti konn persekisyon, bann fidel serviter Bondye ti kontiyn pres la bonn nuvel. Apartir 1939 ziska 1946, zot ti gayn enn lakrwasman 157 pursan. Enn gran benediksyon, pa vre? Anplis, zot gran legzanp fidelite pandan sa lager-la, li ankor ed bann dimunn pu idantifye vre relizyon.—Isaïe 2:2-4.
17 Jéhovah pa zis donn nuritir spirityel dan ler ki bizin, me Li usi donn enn manze ki byin nurisan. Pandan dezyem lager mondyal, bann nasyon ti angaze net dan lager. Me bann serviter Jéhovah zot, zot ti gayn led pu konsantre lor enn kitsoz ki buku pli inportan ki zot prop delivrans. Jéhovah ti ed zot pu konpran ki la kestyon prinsipal ki Satan finn suleve ki konsern liniver an antye, se suverennte Jéhovah. Wi, nu gayn enn gran lazwa kan nu kone ki grasa zot fidelite, sak Temwin Jéhovah finn zwe enn ti rol dan zistifikasyon suverennte Jéhovah. Zot fidelite pruve ki Satan li vremem enn manter! (Proverbes 27:11) Satan tuletan dir bann foste lor Jéhovah ek lor fason ki Li dirize. Me, bann serviter Jéhovah zot, zot kontiyn deklar devan tu dimunn: “Jéhovah Li drwat dan tu so bann aksyon.”—Psaume 145:17.
18. Sit enn legzanp resan ki montre ki Jéhovah donn nu la nuritir spirityel dan ler ki bizin?
18 Enn lot legzanp la nuritir spirityel done dan ler ki bizin se liv Approchez vous de Jéhovah, ki ti paret dan santenn Lasanble Distrik “Bann Proklamater Ki Zele” dan lemond antye an 2002/03. Sa liv ki “esklav fidel ek avize” finn prodir-la, ek ki finn pibliye par bann Temwin Jéhovah, koz lor bann kalite extraordiner Bondye Jéhovah. Parmi, ena usi bann kalite ki nu truve dan Psaume 145. Nu sir ki sa zoli liv-la pu ed bann fidel pu vinn ankor pli pros avek Bondye.
Enn Ler pu Vinn Pros ar Jéhovah
19. Ki moman inportan pe aprose, ek kuma nu kapav fer fas ar sa sityasyon-la?
19 Enn moman inportan kot kestyon suverennte Jéhovah pu regle, pe aprose. Parey kuma Ezékiel sapit 38 ti anonse, byinto Satan pu konplet so rol kuma “Gog de Magog.” Sa vedir ki li pu atak lepep Jéhovah lor later antye. Satan pu fer tu pu kas fidelite bann serviter Jéhovah. Plis ki zame, bann serviter Jéhovah pu bizin invok Li avek tu zot leker, kitfwa mem kriye pu demann Li so led. Me, eski zot la krint pu Bondye ek zot lamur pu Li pu tom dan delo? Non, byinsir, parski Psaume 145 dir: “Jéhovah pre avek tu bann ki invok Li, tu bann ki invok Li avek la verite. Tu bann ki ena la krint pu Li, Li pu donn zot seki zot demande. Li pu tann zot kan zot demann Li led, ek Li pu sov zot. Jéhovah protez tu seki kontan Li, me Li pu detrir tu bann ki move.”—Psaume 145:18-20.
20. Kuma eski bann parol Psaume 145:18-20 pu realize byinto?
20 Li pu vremem extraordiner pu truve ki Jéhovah pros ar so bann serviter kan Li pu detrir tu bann move dimunn ek delivre so pep grasa so puvwar! Dan sa moman ki byin pre-la, Jéhovah pu ekut zis bann ki “invok Li avek la verite.” Li pa pu ekut bann ipokrit. Parol Bondye montre klerman ki li pa pu vo nanyin, si dan dernye minit enn kikenn nek deside pu invok non Bondye.—Proverbes 1:28, 29; Mika 3:4; Luc 13:24, 25.
21. Kuma eski bann fidel serviter Jéhovah montre ki zot kontan servi non Bondye?
21 Zordi, li ankor pli irzan pu bann ki ena la krint pu Jéhovah “invok Li avek la verite.” Bann fidel serviter Jéhovah kontan pu servi so non kan zot priye ek kan zot fer bann komanter pandan bann reynion. Zot servi non Bondye dan zot bann konversasyon personel. Ek avek kuraz zot anons non Jéhovah dan predikasyon.—Romains 10:10, 13-15.
22. Kifer eski li byin inportan ki nu reziste bann latitid ek dezir sa lemond-la?
22 Pu tir profi grasa relasyon byin pros ki nu ena avek Jéhovah, li byin inportan ki nu kontiyn reziste bann danze spirityel. Par egzanp ena materyalis, bann divertisman ki pa bon, tandans pu pa pardonn lezot, uswa nu montre nu indiferan pu ed bann ki dan bezwin. (1 Jean 2:15-17; 3:15-17) Si nu pa koriz sa bann defo-la, sa kapav devlope ek vinn enn pese grav ek fer nu perdi faver Jéhovah. (1 Jean 2:1, 2, 3:6) Li pu saz si nu gard dan nu lespri ki Jéhovah pu kontiyn montre so lamur fidel anver nu, selman si nu res fidel ar Li.—2 Samuel 22:26.
23. Ki gran lavenir pe atann bann fidel serviter Bondye?
23 Donk, anu gard nu bann panse fixe lor sa gran lavenir ki pe atann tu bann fidel serviter Jéhovah. Kan nu fer sa, nu ena lespwar extraordiner pu truv nu parmi bann ki glorifye Jéhovah “tutlong la zurne” ek “pu tuzur.” (Psaume 145:1, 2) Donk, anu kontiyn “res dan lamur Bondye . . . pu gayn lavi eternel.” (Jude 20, 21) Anu kontiyn profit bann gran kalite nu Papa, ek lamur fidel ki Li manifeste anver tu bann ki kontan Li. Lerla, nu pu ena mem santiman ki David ti exprime dan bann dernye parol Psaume 145: “Mo labus pu glorifye Jéhovah; tu kitsoz pu beni so non sin pu tuletan, wi pu tuzur.”
Kuma Eski U Pu Reponn?
• Kuma eski Psaume 145 ed nu pu idantifye bann fidel serviter Bondye?
• Kuma eski Jéhovah “satisfer dezir tu seki vivan”?
• Kifer eski nu bizin vinn pli pros ar Jéhovah?
[Kestyon]
[Zimaz lor paz 9]
Bann fidel serviter Bondye pran plezir pu koz lor so bann aksyon pwisan
[Zimaz lor paz 10]
Avek kuraz, bann serviter Jéhovah ed bann dimunn ki pa konn Jéhovah pu aprann lor la glwar so rwayote
[Bann Zimaz lor paz11]
Jéhovah nuri “tu seki vivan”
[Orizinn]
Bann zanimo: Parque de la Naturaleza de Cabárceno
[Zimaz lor paz 12]
Jéhovah donn la fors ek direksyon so bann fidel serviter ki rod so led dan lapriyer