Zordi, Li Deplizanpli Inportan ki Nu Veye
“Donk, kontiyn veye, parski zot pa kone ki zur zot Senyer pe vini.”—Matthieu 24:42.
1, 2. Ki montre ki nu pe viv dan lepok la fin?
“PLIS ki tu kitsoz, vintyem syek finn marke par lager,” se seki Bill Emmott, enn ekrivin, ti dir. Byin ki li dakor ki dan listwar limanite, tu lepok inn konn lager ek vyolans, li azute: “Se vre ki avan usi ti ena lager, me pandan vintyem syek, bann lager inn pran enn pli gran proporsyon. Pu premye fwa, finn ena vremem enn lager mondyal . . . Me, kumadir enn sel pa ti ase, vintyem syek finn konn de lager mondyal.”
2 Jésus Christ ti predir ki pu ena lager, ‘nasyon kont nasyon ek rwayom kont rwayom.’ Me selman, lager se zis enn parmi bann evennman dan ‘siyn ki pu montre prezans Christ ek konklizyon sa lemond-la.’ Kan Jésus ti donn sa profesi-la, li ti mansyonn usi la faminn, maladi ek tranbleman-de-ter. (Matthieu 24:3, 7, 8; Luc 21:6, 7, 10, 11) Zordi, dan buku fason, sa bann maler-la inn ogmante ek inn vinn pli grav. Partu, dimunn inn vinn pli move. Nu kapav truv sa dan zot latitid anver Bondye ek la fason ki zot tret zot prosin. Li deplizanpli evidan ki buku dimunn nepli ena okenn valer moral, ek ki krim ek vyolans pe ogmante. Dimunn kontan larzan plis ki Bondye, ek zot obsede par plezir. Tusala montre ki nu pe viv enn “letan kritik.”—2 Timothée 3:1-5.
3. Ki linflyans “bann siyn” ki idantifye nu lepok, bizin ena lor nu?
3 Ki u reaksyon kan u truv sityasyon pe anpire kumsa dan lemond? Buku dimunn indiferan, uswa mem, zot insansib ar seki pe arive tulezur. Bann dimunn intelizan ek ki ena puvwar dan lemond, pa disern sinifikasyon “bann siyn” ki idantifye nu lepok. Bann sef relizye usi pa’nn donn enn bon direksyon dan sa domenn-la. (Matthieu 16:1-3) Me, Jésus ti donn sa lavertisman-la so bann disip: “Donk, kontiyn veye, parski zot pa kone ki zur zot Senyer pe vini.” (Matthieu 24:42) Isi, dapre konsey Jésus, nu bizin pa zis veye detanzantan, me “kontiyn veye.” Pu nu kapav kontiyn veye, nu bizin res tuzur lor nu gard. Sa vedir li pa sifi ki nu zis rekonet ki nu pe viv lepok dernye zur, uswa ki lavi inn vinn byin difisil. Me, nu bizin ena enn ferm konviksyon ki “la fin tu kitsoz finn aprose.” (1 Pierre 4:7) Se selman lerla ki manyer ki nu pe veye pu montre ki nu byin konsyan ki la fin pre pu vini. Ena enn kestyon ki bizin fer nu reflesi: ‘Ki pu ed nu fortifye nu konviksyon ki la fin pre?’
4, 5. (a) Ki pu fer nu ena plis konviksyon ki la fin sa lemond move-la, pre pu vini, ek kifer? (b) Sit enn resanblans ant lepok Noé ek prezans Fils de l’homme.
4 Anu get bann kondisyon ki ti existe zis avan enn levennman exepsionel dan listwar limanite—Déluge dan lepok Noé. Bann dimunn ti telman move, ki Jéhovah “ti santi so leker fermal.” Li ti deklare: “Mo pu tir bann dimunn ki mo’nn kre, lor later.” (Genèse 6:6, 7) Ek se sa mem ki Li ti fer. Jésus ti konpar lepok Noé avek nu lepok, li ti dir: “Parski parey kuma li ti ete dan lepok Noé, kumsa mem prezans Fils de l’homme pu ete.”—Matthieu 24:37.
5 Li lozik pu panse ki dan nu lepok, Jéhovah ena mem santiman ki Li ti ena dan lepok avan Déluge. Parey kuma Li ti detrir lemond move ki ti existe dan lepok Noé, se sir ki Li pu detrir usi sa move lemond ki existe zordi-la. Si nu byin konpran bann resanblans ki ena ant lepok Noé ek nu lepok, sa pu fer nu ena enn ferm konviksyon ki la fin sa lemond-la byin pre. Me, ki sa bann resanblans-la? Ena omwin sink. Premye, se enn lavertisman byin kler ki enn destriksyon pe vini.
Nu’nn Averti lor “Bann Kitsoz Ki Pankor Truve”
6. Ki Jéhovah ti byin determine pu fer dan lepok Noé?
6 Dan lepok Noé, Jéhovah ti dir: “Mo pa pu ena pasyans anver dimunn indefiniman, parski li usi li laser. Akoz sa, li pu viv ziska sanvintan.” (Genèse 6:3) Jéhovah ti anons sa zizman-la dan lane 2490 A.N.L., ek sa lane-la, la fin lemond move sa lepok-la, ti kumanse. Mazinn inpe ki sa ti reprezante pu bann dimunn ki ti pe viv dan sa lepok-la! Ankor zis 120 an, Jéhovah ti pu amenn enn ‘déluge delo lor later, pu tuy tu kreatir ki vivan lor later.’—Genèse 6:17.
7. (a) Kuma Noé ti reazir ar lavertisman ki li ti gayne konsernkan Déluge? (b) Kuma nu bizin reazir ar bann lavertisman konsernan la fin nu lepok?
7 Plizir dizenn lane avan, Noé ti gayn lavertisman ki enn katastrof pe vini, ek li ti servi so letan avek sazes pu prepar so delivrans. Lapot Paul ti dir: “Apre ki li finn gayn lavertisman par Bondye, lor bann kitsoz ki pankor truve, Noé ti montre la krint pu Bondye ek li ti konstrir enn lars pu sov so fami.” (Hébreux 11:7) Ki nu kapav dir lor nu? Apepre 90 an finn pase depi ki dernye zur inn kumanse, an 1914. Se sir ki nu pe viv dan “lepok la fin.” (Daniel 12:4) Kuma nu bizin reazir ar bann lavertisman ki nu finn gayne? La Bib dir: “Seki fer volonte Bondye, pu res pu tuzur.” (1 Jean 2:17) Donk, se asterla ki nu bizin fer volonte Jéhovah, konsyan ki la fin byin-byin pre.
8, 9. Ki lavertisman Jéhovah pe done zordi ek kuma sa pe proklame?
8 Dan nu lepok, bann etidyan sinser ki etidye la Bib, inn aprann ki lemond kot nu pe viv, inn kondane pu detrir. Eski vremem nu krwar sa? Gete ki Jésus ti dir klerman: “Pu ena enn gran tribilasyon, [pli gran] ki zame pa finn ena depi kumansman lemond ziska zordi, non, ek ki pa pu ena ankor.” (Matthieu 24:21) Jésus ti dir usi ki li pu vini antan ki Ziz ki Jéhovah inn swazire, ek li pu separ bann dimunn, parey kuma enn berze separ bann brebi ar bann chèvres (kabri). Bann ki pa merite “pu konn enn destriksyon eternel, me bann ki drwat pu gayn lavi eternel.”—Matthieu 25:31-33, 46.
9 Jéhovah inn fer so pep konn sa bann lavertisman-la grasa bann rapel ki zot inn gayne atraver la nuritir spirityel ki “esklav fidel ek avize” inn donn zot dan ler ki bizin. (Matthieu 24:45-47) Anplis, sak nasyon, tribi, lang, ek pep, ankuraze pu ena “la krint pu Bondye ek pu donn Li la glwar, parski ler so zizman inn arive.” (Révélation 14:6, 7) Byinto Rwayom Bondye pu ranplas bann guvernman imin. Bann Temwin Jéhovah pe donn sa lavertisman-la dan lemond antye. Se an gran parti mesaz ki zot pe prese. (Daniel 2:44) Fode pa ki nu pran sa lavertisman-la a-la-lezer. Nu Bondye Tu-Pwisan tuzur tini so parol. (Isaïe 55:10, 11) Li ti tini so parol dan lepok Noé, ek li pu fer parey dan nu lepok.—2 Pierre 3:3-7.
Limoralite Sexyel, Li Partu
10. Ki kapav dir lor limoralite sexyel dan lepok Noé?
10 Nu lepok resanble lepok Noé dan enn dezyem fason. Jéhovah ti demann premye zom ek premye fam pu “ranpli later” avek zot desandan. Pu sa, zot ti pu servi zot kapasite sexyel dan enn fason onorab antan ki kup marye. (Genèse 1:28) Dan lepok Noé, bann anz dezobeisan ti kontaminn limanite avek bann vis sexyel kont natir. Zot ti pran bann lekor imin ek zot ti desann lor later; la zot ti viv avek bann zoli fam ek zot ti prodir enn desandans ki ti la mwatye imin ek la mwatye demon—bann Nephilim. (Genèse 6:2, 4) La Bib konpar pese sa bann anz visye-la, ar bann pratik imoral ki ti ena dan lavil Sodome ek Gomorrhe. (Jude 6, 7) Nu truve ki limoralite sexyel ti byin kuran dan sa lepok-la.
11. Konsernan moralite, ki resanblans ena ant nu lepok ek lepok Noé?
11 Ki nu kapav dir lor la moralite zordi? Dan dernye zur, lavi buku dimunn turn otur sex. Paul ti dekrir klerman sa bann dimunn-la kuma “bann ki’nn perdi tu sans moralite”; buku ena enn “kondwit devergonde pu pratik tut sort kalite inpirte, san retenir zotmem.” (Éphésiens 4:19) Pornografi, relasyon sexyel avan maryaz, relasyon sexyel avek bann zanfan, ek omosexyalite, tusala inn vinn byin komin zordi. Sertin inn deza fini kumans ‘peye’ pu seki zot inn fer. Zot gayn bann maladi sexyelman transmisib, zot fami brize ek zot konn bann lezot problem sosyal.—Romains 1:26, 27.
12. Kifer nu bizin devlop laenn pu seki move?
12 Dan lepok Noé, Jéhovah ti amenn enn gran Déluge ek li ti met fin ar sa lemond ki ti obsede par sex-la. Nu bizin zame bliye ki nu lepok, li vremem parey ar lepok Noé. “gran tribilasyon” pu netway later, li pu tir tu bann ‘fornikater, adilter, bann prostitye omosexyel, ek bann zom ki dormi avek bann zom.’ (Matthieu 24:21; 1 Corinthiens 6:9, 10; Révélation 21:8) Li vremem inportan zordi ki nu devlop enn laenn pu seki move ek ki nu res lwin ar bann sityasyon ki kapav fer nu komet limoralite!—Psaumes 97:10; 1 Corinthiens 6:18.
Later “Ranpli ar Vyolans”
13. Dan lepok Noé, kifer later “ti ranpli ar vyolans”?
13 Ena enn trwazyem resanblans ant nu lepok ek lepok Noé. La Bib dir: “Later ti pe gate devan lizye vre Bondye, ek later ti ranpli ar vyolans.” (Genèse 6:11) Anrealite, la vyolans pa ti nuvo. Caïn, garson Adam, ti asasinn so frer, ki ti drwat. (Genèse 4:8) Nu kapav konpran latitid vyolan ki ti existe dan sa lepok-la kan nu lir enn poem ki Lamek ti konpoze. Ladan li ti vant li parski li ti tuy enn zennom, par lezitim defans, dapre li. (Genèse 4:23, 24) Seki ti nuvo dan lepok Noé, se kantite vyolans ki ti ena. Amezir ki bann anz dezobeisan ti marye ar bann fam lor later ek gayn bann zanfan—bann Nephilim, vyolans ti ogmante enn fason ki zame pa finn ena avan. Sa bann zean vyolan-la, ti bann “Tombeurs”—“bann ki fer lezot tonbe.” (Genèse 6:4, not) Akoz zot, later ti “ranpli ar vyolans.” (Genèse 6:13) Mazine ki kantite difikilte Noé ti sirman gayne pu elve so fami dan enn lanvironnman kumsa! Me selman, Noé ti montre li ‘drwat devan Jéhovah parmi sa zenerasyon-la.”—Genèse 7:1.
14. Ki kantite lemond “ranpli ar vyolans” zordi?
14 La vyolans inn existe lor later pandan tut listwar limanite. Me parey kuma dan lepok Noé, dan nu lepok usi, la vyolans inn pran enn proporsyon ki zame pa finn ena avan. Suvan nu tann vyolans ki ena dan la fami, bann aksyon teroris, masakre dimunn par grup, ek bann zom arme ki tir lor plizir dimunn san okenn rezon. Anplis, ena buku disan ki kule akoz lager. Later inn ranpli ar vyolans ankor enn fwa. Kifer vyolans inn ogmante kumsa? Repons sa kestyon-la montre enn lot resanblans ant nu lepok ek lepok Noé.
15. (a) Sit enn rezon prinsipal kifer vyolans inn ogmante dan nu lepok. (b) Me ki kitsoz nu sir pu arive?
15 Kan Rwayom Messianique ti etabli dan lesyel an 1914, le Rwa Jésus Christ ti pran bann aksyon ki ti pu ena bann gran konsekans. Li ti tir Satan le Diable ek so bann demon dan lesyel ek li ti zet zot lor later. (Révélation 12:9-12) Avan Déluge, bann anz dezobeisan ti kit zot plas dan lesyel volonterman; me dan nu lepok, ti tir zot dan lesyel par fors ek ti zet zot lor later. Anplis, zot nepli ena posibilite pu pran lekor imin pu gayn bann relasyon imoral avek bann fam lor later. Donk, zot byin agase, zot ankoler ek zot ena la krint pu zizman ki pe atann zot. Tusala pus zot pu inflyans bann dimunn ek bann lorganizasyon pu komet buku plis aksyon kriminel ek vyolan, ki seki ti ena dan lepok Noé. Apre ki bann anz dezobeisan ek zot desandan ti ranpli later ar mesanste, Jéhovah ti efas lemond ki ti existe avan Déluge. Nu kapav sir ki Jéhovah pu fer parey dan nu lepok! (Psaumes 37:10) Me, bann ki kontiyn veye zordi, kone ki zot delivrans byin pre.
Enn Mesaz Pe Proklame
16, 17. Mansyonn katriyem resanblans ant lepok Noé ek nu lepok.
16 Katriyem resanblans ant nu lepok ek lepok avan Déluge, konsern travay ki Noé ti gayn lord pu fer. Li ti konstrir enn gran lars. Li ti usi “enn predikater.” (2 Pierre 2:5) Ki mesaz li ti prese? Pena dut ki li ti ankuraz bann dimunn pu repanti ek usi, li ti averti zot ki enn destriksyon pe vini. Jésus ti dir ki bann dimunn dan lepok Noé “pa ti pran kont, ziska ki Déluge ti vini ek ti balye zot tu.”—Matthieu 24:38, 39.
17 Pareyman, amezir ki bann Temwin Jéhovah obeir lord ki zot inn gayne pu prese, mesaz lor Rwayom Bondye pe proklame partu dan lemond. Preske partu lor later, dimunn kapav tann sa mesaz-la ek lir li dan zot prop lang. Peryodik Latur Degard ki anons Rwayom Jéhovah, paret dan plis ki 25,000,000 kopi ek li inprime dan plis 140 lang. Wi, la bonn nuvel lor Rwayom Bondye pe proklame “partu kot dimunn reste lor later an temwaynaz pu tu nasyon.” Kan Bondye pu satisfe ar lakonplisman sa travay-la, nu sir ki la fin pu vini.—Matthieu 24:14.
18. Parey kuma dan lepok Noé, ki manyer bann dimunn pe reazir ar nu mesaz zordi?
18 Bann dimunn avan Déluge pa ti ena okenn lintere pu kitsoz spirityel ek zot pa ti ena enn bon moralite. Zot pa ti krwar mesaz ki Noé ti pe prese. Zot ti sirman bufonn li ek so fami, mok zot ek ridikiliz zot. Purtan, la fin ti vini kanmem! Dan dernye zur usi parey, ena buku ‘moker.’ “Me, zur Jéhovah pu vini kuma enn voler,” se seki la Bib deklare. (2 Pierre 3:3, 4, 10) Wi, se sir ki li pu vini dan letan ki’nn fixe! Li pa pu an retar. (Habaqouq 2:3) Li vremem saz ki nu kontiyne veye!
Zis enn Tigit Ki Sape
19, 20. Ki resanblans ena ant Déluge ek destriksyon sa lemond-la?
19 Resanblans ant lepok Noé ek nu lepok pa aret zis avek mesanste bann dimunn ek zot destriksyon. Parey kuma ti ena bann dimunn ki ti sirviv dan Déluge, pareyman pu ena bann sirvivan kan la fin pu vini. Bann ki ti sirviv pandan Déluge, ti ena limilite, zot pa ti ena mem fason viv ki bann dimunn dan zot lepok. Zot ti pran kont lavertisman ki Bondye ti done ek zot ti separ zotmem ar bann move dimunn dan sa lepok-la. La Bib dir ki: “Noé ti gayn faver Jéhovah.” “Li ti enn zom san defo parmi bann dimunn ki ti pe viv dan so lepok.” (Genèse 6:8, 9) Dan tut limanite, zis enn fami, “enn tigit dimunn, setadir, wit nam, ki finn transporte an sekirite atraver delo.” (1 Pierre 3:20) Ek se avek zot ki Jéhovah ti donn sa lord-la: “Gayn zanfan, vinn buku ek ranpli later.”—Genèse 9:1.
20 Parol Bondye donn nu lasirans ki “enn grand ful” pu “sorti dan la gran tribilasyon.” (Révélation 7:9, 14) Komye dimunn pu ena dan sa gran laful-la? Jésus limem ti dir: “Laport-la tipti ek semin ki amenn ver lavi, li sere, ek se enn tigit dimunn mem ki truv li.” (Matthieu 7:13, 14) Kan nu konpar milyar dimunn ki viv lor later zordi, bann ki pu sirviv gran tribilasyon, zot byin tigit. Me zot kapav ena mem privilez ki bann sirvivan Déluge. Bann ki pu sirviv gran tribilasyon, pu kapav pandan enn sertenn letan, gayn bann zanfan ki pu form parti dan nuvo sosyete ki pu viv lor later.—Isaïe 65:23.
“Kontiyn Veye”
21, 22. (a) Apre legzamin seki’nn arive pandan Déluge, ki profi u’nn tire? (b) Ki tex-de-lane pu 2004, ek kifer nu bizin pran kont konsey ki li donn nu?
21 Mem si Déluge inn arive byin lontan, sa levennman-la donn nu enn lavertisman ki nu bizin pran kont. (Romains 15:4) Resanblans ki ena ant lepok Noé ek nu lepok fer nu plis konsyan sinifikasyon bann kitsoz ki pe arive zordi. Sa atir usi nu latansyon ki zur Jésus pu vini pu ziz bann move dimunn, sa zur-la pu vinn kuma enn voler.
22 Zordi, Jésus Christ pe diriz enn gran travay konstriksyon spirityel. Ena usi enn paradi spirityel ki existe, ek parey kuma lars, li permet bann vre adorater gayn lavi sov ek gayn sekirite. (2 Corinthiens 12:3, 4) Pu nu sirviv pandan gran tribilasyon, nu bizin res dan sa paradi-la. Tut otur sa paradi spirityel-la, ena lemond Satan, ki pre pu devor ninport kisannla ki pe dormi lor plan spirityel. Li byin-byin inportan ki nu “kontiyn veye” ek montre ki nu’nn pare pu gran zur Jéhovah.—Matthieu 24:42, 44.
Eski U Rapel?
• Ki lavertisman Jésus ti done konsernan zur ki li pu vini?
• Avek kwa Jésus ti konpar lepok so prezans?
• Dan ki fason, nu lepok parey avek lepok Noé?
• Kuma, kan nu reflesi lor resanblans ki ena ant nu lepok ek lepok Noé, sa fer nu pran plis konsyans ki la fin pre?
[Kestyon]
[Komanter lor paz 14]
Tex-de-lane pu 2004 se: “Kontiyn veye . . . Montre ki zot inn pare.”—Matthieu 24:42, 44.