“Fer dimunn dan tu bann nasyon vinn disip, batiz zot o non du Père, du Fils ek lespri sin.”—MATTHIEU 28:19.

1, 2. (a) Ki travay Jésus ti donn so bann disip? (b) Kuma bann Kretyin dan premye syek ti kapav akonpli sa kantite travay-la?

 ENN tipe avan li ti mont dan lesyel, Jésus ti donn so bann disip enn travay pu fer. Li ti dir zot: “Fer bann dimunn dan tu bann nasyon vinn disip, batiz zot lor non Papa, lor non Garson ek lor non lespri sin.” (Matthieu 28:19) Sa ti enn travay extraordiner, pa vre?

² Mazinn enn ku! Pandan la Pentecôte lane 33 N.L., 120 disip ti gayn lespri sin, ek zot finn kumans fer travay ki Jésus ti donn zot. Zot ti pe fer lezot kone ki Jésus ti le Messie promis, par ki zot pu kapav gayn delivrans. (Actes 2:1-36) Me, kuma eski enn ti grup kumsa ti pu kapav pres avek “dimunn dan tu bann nasyon”? Pu bann imin, li ti enn kitsoz inposib, me “pu Bondye, tu kitsoz posib.” (Matthieu 19:26) Sa bann premye Kretyin-la ti gayn led lespri sin Jéhovah, ek zot ti kone ki se enn travay byin irzan. (Zekaria 4:6; 2 Timothée 4:2) Akoz sa, vintwit an plitar, lapot Paul finn kapav dir ki la bonn nuvel ti pe prese “dan tu kreasyon ki truv anba lesyel.”—Colossiens 1:23.

3. Ki kitsoz finn anpes dimunn truv vre “dible” Kretyin?

³ Pandan enn gran parti premye syek, vre relizyon ti kontiyn disperse partu. Me, Jésus ti profetize ki pu ariv enn lepok kot Satan pu sem “move lerb” dan karo “dible.” Pandan sa lepok-la, bann “move lerb” ti pu kuver vre “dible” Kretyin ziska peryod rekolt. Sa profesi-la finn realize apre lamor bann zapot.—Matthieu 13:24-39.

Enn Lakrwasman Rapid Zordi

4, 5. Apartir 1919, ki travay bann Kretyin oints finn kumanse, ek kifer eski sa ti enn gran defi?

⁴ An 1919, ti ariv moman pu vre dible Kretyin separe ar move lerb. Bann Kretyin oints ti kone ki sa gran travay ki Jésus ti donn so bann disip-la, pa ti ankor fini. Zot ti ena konviksyon ki zot ti pe viv dan “bann dernye zur” ek zot ti byin konn sa profesi Jésus-la: “Sa bonn nuvel lor rwayom-la pu prese partu kot dimunn reste lor later kuma enn temwaynaz pu tu bann nasyon; ek lerla la fin pu vini.” (2 Timothée 3:1; Matthieu 24:14) Wi, zot ti kone ki ena ankor buku travay pu fer.

⁵ Me, parey kuma bann disip an lane 33 N.L., sa bann Kretyin oints-la ti ena enn gran travay devan zot. Ti ena selman detrwa milye Temwin antu dan zis detrwa peyi. Kuma eski zot ti pu kapav pres la bonn nuvel “partu kot dimunn reste lor later”? Mazinn enn ku. Popilasyon lemond dan lepok bann César ti apepre 300 milyon. Apre premye lager mondyal, popilasyon finn ogmante ek finn ariv preske 2 milyar. Ek pandan 20 em syek, li ti pu kontiyn ogmante rapidman.

6. Ver 1935, ki progre bann Kretyin oints finn fer?

⁶ Me, parey kuma zot bann frer dan premye syek, bann serviter oints, finn kumans sa travay-la avek ful konfyans an Jéhovah. Ek lespri Jéhovah ti avek zot. Ver 1935, apepre 56,000 proklamater ti anons la verite dan 115 peyi. Buku travay ti fini fer, me ti ena ankor buku pu fer.

7. (a) Ki nuvo defi bann Kretyin oints ti bizin fer fas? (b) Avek led “bann lezot brebi,” kuma eski laktivite predikasyon finn progrese ziska nu lepok?

 ⁷ Ver sa mem lepok-la, sa bann Kretyin ki ti pe travay dir-la, finn gayn enn meyer konpreansyon lor idantite “la grand ful” mansyone dan Revelasyon 7:9. Sa ti enn nuvo defi pu zot, me li ti usi enn garanti ki zot pu gayn led. Zot ti pu bizin rasanble enn gran laful “bann lezot brebi” ki pa kapav konte, “dan tu bann nasyon, tribi, pep ek lang. (Jean 10:16) Sa gran laful-la, se bann krwayan ki ena lespwar pu viv lor later. Zot pu “rann Jéhovah enn servis sakre la nwit lizur.” (Révélation 7:15) Sa vedir ki zot pu ede dan laktivite predikasyon ek lanseynman. (Isaïe 61:5) Bann Kretyin oints ti byin kontan pu truv kantite bann proklamater ogmante. Okumansman ti ena zis detrwa milye, me plitar finn ena par milyon. An 2003, finn ena enn nuvo maximem 6,429,351 proklamater ki finn pres la bonn nuvel. Laplipar sa bann proklamater-la form parti dan la grand ful. a Bann Kretyin oints byin rekonesan pu sa led-la. Ek bann lezot brebi zot, zot rekonesan pu privilez ki zot ena pu sutenir zot bann frer oints.—Matthieu 25:34-40.

8. Kuma eski bann Temwin Jéhovah finn reazir devan bann gran presyon ki ti ena pandan dezyem lager mondyal?

⁸ Kan vre “dible” finn revinn vizib, Satan finn lans enn gran lager kont li. (Révélation 12:17) Kuma eski Satan finn reazir kan la grand ful finn kumans aparet? Avek enn gran vyolans! Pena dut ki li ti deryer latak mondyal ki ti ena kont vre ladorasyon pandan dezyem lager mondyal. Dan tulede kan, bann Kretyin finn sibir bann gran presyon. Buku nu bann frer ek ser finn sufer akoz bann leprev terib. Sertin finn mem mor akoz zot lafwa. Me, zot bann aksyon finn montre ki zot ena mem santiman ki sa ekrivin Psaumes ki ti dir: “Ini avek Bondye, mo pu rann glwar so parol. An Bondye mo finn met mo konfyans, mo pa pu per. Ki enn dimunn kapav fer mwa?” (Psaumes 56:4; Matthieu 10:28) Fortifye par lespri Bondye, bann Kretyin oints ek bann lezot brebi finn tini ferm ansam. (2 Corinthiens 4:7) Rezilta: “Parol Bondye ti pe kontiyn grandi.” (Actes 6:7) An 1939, kan lager finn eklate, bann rapor montre ki ti ena 72,475 fidel Kretyin ki ti pe partisip dan laktivite predikasyon. Me kan lager finn arete an 1945, dapre enn rapor inkonple, ti ena 156,299 Temwin aktif ki ti pe pres la bonn nuvel. Sa ti enn vre defet pu Satan, pa vre?

9. Ki bann nuvo lekol finn forme pandan dezyem lager mondyal?

⁹ Wi, malgre bulversman dezyem lager mondyal, bann serviter Jéhovah zame finn dute ki laktivite predikasyon pu akonpli. Dayer, an 1943, alor ki lager ti pe tap plin, de nuvo lekol ti forme. Enn parmi, se seki zordi nu apel Lekol Minister Teokratik. Sa lekol-la ti pu permet sak Temwin dan tu bann kongregasyon gayn enn formasyon pu prese ek fer bann disip. Lot lekol-la se l’École biblique de Guiléad. Se enn lekol ki form bann misyoner ki pu devlop laktivite predikasyon dan bann peyi etranze. Wi, kan finalman lager finn arete net, bann vre Kretyin ti pare pu ogmant zot laktivite.

10. Kuma eski nu finn kapav truv zel lepep Jéhovah an 2003?

¹⁰ Se vremem enn gran travay ki zot finn fer! Grasa formasyon ki zot finn gayne dan Lekol Minister Teokratik, zot tu, bann zenn, bann aze, bann paran, bann zanfan, mem bann andikape, finn partisip ek pe kontiyn partisip dan laktivite predikasyon. Kumsa zot pe montre ki zot pe akonpli gran travay ki Jésus ti done. (Psaumes 148:12, 13; Yoël 2:28, 29) An 2003, an mwayenn sak mwa, 825,185 proklamater ti montre ki zot byin konsyan ki la fin pre, par zot partisipasyon dan servis pyonye permanan uswa oxilyer. Sa mem lane-la, bann Temwin Jéhovah finn depans 1,234,796,477 lertan pu koz la bonn nuvel avek lezot. Wi, sa zel ki lepep Jéhovah  inn montre-la, finn vremem fer Jéhovah kontan!

Dan Bann Peyi Etranze

11, 12. Ki legzanp montre zel bann misyoner?

¹¹ Pandan plizir lane, bann diplome l’École de Guiléad, ek pli resaman, bann diplome l’École de formation ministérielle finn etabli enn repitasyon extraordiner. Par egzanp, kan bann premye misyoner ti ariv Brésil an 1945, ti ena mwins ki 400 proklamater. Sa bann misyoner-la, ek lezot ki finn vinn apre, finn travay dir ansam avek bann frer Brésiliens. Ek Jéhovah finn beni zot bann zefor. Tu bann ki rapel sa kumansman-la, sirman zot resanti enn gran lazwa kan zot truve ki Brésil finn ena enn nuvo maximem 607,362 proklamater an 2003!

¹² Asterla anu get seki finn pase an Japon. Pandan dezyem lager mondyal, ti ena apepre 100 proklamater dan sa peyi-la. Pandan lager, kantite proklamater finn byin diminye akoz persekisyon. Ek ver la fin lager, ti ena zis detrwa Temwin ki ti ankor vivan lor plan spirityel ek fizik. (Proverbes 14:32) Sa bann fidel proklamater-la sirman ti byin kontan pu akeyir 13 premye misyoner l’École de Guiléad, an 1949. Byin vit sa bann misyoner-la finn devlop enn lafeksyon pu zot bann frer Japonais ki ti byin antuzyas ek zenere. Plis ki 50 an plitar, an 2003, Japon finn raport enn maximem 217,508 proklamater! Wi, Jéhovah finn byin beni so pep dan sa peyi-la. Ena bann lezot rapor kumsa ki sorti dan enn kantite lezot peyi. Bann ki’nn kapav pres dan sertin teritwar etranze, finn zwe enn gran rol pu partaz la bonn nuvel. Grasa sa, an 2003, bann dimunn finn kapav tann sa bonn nuvel-la dan 235 peyi, lil, ek teritwar dan lemond antye. Wi, la grand ful pe sorti dan “tu bann nasyon.”

“Dan Tu . . . Tribi, Pep ek Lang”

13, 14. Kuma eski Jéhovah finn montre linportans pu pres la bonn nuvel dan “tu . . . lang”?

¹³ Apre ki bann disip ti gayn lespri sin pandan la Pentecôte lane 33 N.L., premye mirak ki finn ena se kan zot finn koz an lang ar laful ki ti rasanble. Li posib ki tu bann ki ti tann zot, ti koz enn lang internasyonal, kitfwa Grec. La Bib dir nu ki zot ti bann “zom ki ena la krint pu Bondye.” Sa vedir ki zot ti konpran usi bann servis dan tanp ki ti fer an Hébreu. Me kan zot ti tann la bonn nuvel dan zot lang maternel, sa ti kapte zot latansyon.—Actes 2:5, 7-12.

¹⁴ Zordi usi, bann Temwin servi buku lang pu prese. Dapre la Bib, la grand ful ti pu sorti pa selman dan bann nasyon, me usi dan bann “tribi, pep ek lang”. An akor avek sa, atraver Zekaria, Jéhovah ti anons sa profesi-la: “Pu ena dis zom ki sorti dan tu lang bann nasyon, wi vremem zot pu trap enn zom Juif par but so linz, ek zot pu dir: ‘Nu pu al avek zot, parski nu finn tande ki Bondye avek zot.’ ” (Zekaria 8:23) Mem si bann Temwin Jéhovah nepli ena don koz an lang, zot kone ki li byin inportan zot anseyn bann dimunn dan zot prop lang.

15, 16. Kuma eski bann misyoner ek lezot proklamater finn relev defi pu pres dan bann lang lokal?

¹⁵ Li vre ki zordi ena detrwa lang ki servi partu, kuma par egzanp Anglais, Français ek Espagnole. Me, bann ki’nn kit zot peyi pu servi dan lezot landrwa, zot sey aprann bann lang lokal. Kumsa “bann dimunn ki zot leker byin dispoze pu lavi eternel” zot usi zot kapav tann la bonn nuvel. (Actes 13:48) Me, parfwa, sa byin difisil. Kan bann frer dan Tuvalu, dan Pacifique Sud, ti bizin bann piblikasyon dan zot prop lang, enn parmi bann misyoner finn aksepte pu relev sa defi-la. Pwiski pa ti ena okenn diksyoner disponib, li finn kumans fer enn koleksyon tu bann mo an Tuvalu. Avek letan, liv Vous pouvez vivre éternellement sur une terre qui deviendra un paradis b finn pibliye dan sa lang-la. Kan bann misyoner ti ariv Curaçao, pa ti ena okenn piblikasyon Biblik ni okenn diksyoner an Papiamento, lang ki bann dimunn koze dan sa peyi-la. Ti ena usi buku dezakor lor kuma bizin ekrir sa lang-la. Me, malgre sa, dezan apre ki bann premye misyoner finn arive, premye trak finn pibliye dan sa lang-la. Zordi, Papiamento li enn parmi sa 133 lang kot Latur Degard pibliye ansam avek Anglais.

 ¹⁶ An Namibie, bann premye misyoner pa ti pe truv enn Temwin lokal pu tradir pu zot. Anplis, dan Nama, enn lang lokal, pa ti ena tu bann mo ki bizin pu tradir bann expresyon ki nu servi dan nu bann piblikasyon, kuma par egzanp “parfe.” Enn misyoner rakonte: “Pu tradiksyon, mo ti servi sirtu bann profeser lekol ki ti pe etidye la Bib. Pwiski zot ti ena byin tigit konesans la verite, mo ti bizin asiz avek zot, pu asire ki sak fraz egzak.” Malgre sa, finn kapav tradir trak La vie dans un monde nouveau, dan kat lang ki koze dan sa peyi-la. Zordi, Latur Degard pibliye regilyerman an Kwanyama ek Ndonga.

17, 18. Ki bann defi bann Temwin pe reysi releve an Mexique ek dan lezot peyi?

¹⁷ Lang prinsipal dan Mexique se Espagnole. Me, avan ki bann Espagnole ti arive, bann dimunn ti pe koz enn kantite lezot lang, ek zordi zot ankor servi plizir sa bann lang-la. Zordi, ena bann piblikasyon dan set lang Mexicains, ek Langaz Siyn Mexicain. Premye piblikasyon ki ti aparet dan enn lang Indien Americain, se Minister DiRwayom an Maya. Wi, ena plizir milye Mayas ek Aztèques ki form parti dan sa 572,530 proklamater ki truv dan Mexique.

¹⁸ Resaman, enn kantite dimunn finn oblize kit zot peyi pu al refizye dan bann peyi etranze, uswa zot finn kite akoz bann problem ekonomik. Rezilta: Zordi, pu premye fwa, dan buku peyi, nu truv bann ase gran grup dimunn ki koz enn lang etranze. Me bann Temwin Jéhovah finn relev sa defi-la. An Italie par egzanp, ena bann kongregasyon ek bann grup dan 22 lang apar Italien. Resaman, pu ed bann frer pu pres avek bann dimunn ki koz lezot lang, ti organiz bann klas dan 16 lang, ek parmi ti ena usi langaz siyn an Italien. Dan buku lezot peyi ankor, bann Temwin Jéhovah finn fer bann zefor parey pu kapav tus gran popilasyon bann imigre. Wi, avek led Jéhovah, la grand ful vremem pe sorti dan buku lang.

“Lor Later Antye”

19, 20. Ki bann parol Paul pe realize dan enn fason remarkab zordi? Explike.

¹⁹ Dan premye syek, lapot Paul ti ekrir: “Zot finn byin tande pa vre? Wi, ‘partu lor later, finn tann zot lavwa, ek ziska dan but later ki abite, tann seki zot dir.’ ” (Romains 10:18) Si sa ti vre dan premye syek, li ankor pli vre zordi! Plis ki zame dan listwar, zordi par milyon dimunn pe dir: “Mo pu beni Jéhovah, tuletan, so luanz pu tuzur dan mo labus.”—Psaumes 34:1.

²⁰ Anplis, travay-la pa pe ralanti. Kantite proklamater pe kontiyn ogmante. Letan ki pe pase pu prese, pe ogmante deplizanpli. Bann Temwin pe fer par milyon vizit ek par san mil letid la Bib. Ena tuzur bann nuvo ki pe interese ar la verite. Lane dernyer ti ena enn nuvo maximem 16,097,622 asistan pu Mémorial lamor Jésus. Wi, ena enn kantite travay ankor pu fer. Donk, anu kontiyn imit fidelite nu bann frer ki finn andir bann gran persekisyon. Anu kontiyn ena mem zel ki nu bann frer ki depi 1919 finn donn tu dan servis Jéhovah. Wi, anu kontiyn dir ansam avek enn ekrivin Psaumes: “Tu seki respire—ki li donn Yah la glwar! Donn Yah la glwar, zot bann pep!”—Psaumes 150:6.

[Not anba paz]

Eski U Kapav Explike?

• Ki travay bann frer finn kumans fer an 1919, ek kifer sa ti enn defi?

• Kisannla ti rasanble pu sutenir laktivite predikasyon?

• Ki bann misyoner ek bann ki finn servi dan bann peyi etranze finn fer?

• Ki prev u kapav site pu montre ki Jéhovah pe beni travay so pep zordi?

[Kestyon]

 [Tablo lor paz 26-29]

RAPOR SERVIS MONDYAL BANN TEMWIN JÉHOVAH POU LANE 2003