“Konportman atiran enn dimunn kapav tronp nu, ek so bote kapav pena okenn valer, me enn fam ki ena la krint pu Bondye, se li ki pu gayn loner.”—PROVERB 31:30.

1. Kontrerman avek lemond, ki Zeova panse lor la bote?

 LEMOND met buku laksan lor bote, sirtu lor bote bann fam. Me Zeova Li, Li sirtu interese ar seki enn dimunn ete ofon limem, ek sa kapav mem vinn pli zoli avek laz. (Proverb 16:31) Donk, Labib donn sa lankurazman-la bann fam: “Pa rod fer zot paret zoli andeor par bann seve trese, ek par bann bizu an lor uswa par zot linz. Me, seki pu fer zot paret zoli, se seki zot ete andan, dan zot leker, setadir enn karakter trankil ek dus ki pa kapav disparet, ek ki ena enn gran valer devan lizye Bondye.”—1 Pyer 3:3, 4.

2, 3. Kuma bann fam finn fer buku pu ki la bonn nuvel progrese dan premye syek, ek kuma sa ti predir alavans?

² Buku fam ki mansyone dan Labib ti ena enn bon karakter kumsa. Dan premye syek, sertin parmi sa bann fam-la ti ena privilez pu servi Zezi ek so bann zapot. (Lik 8:1-3) Plitar, bann fam Kretyenn ti vinn bann predikater zele; lezot ti enn gran sutyin pu bann frer ki ti pran latet dan servis Bondye, kuma lapot Pol. Ti ena usi sertenn fam ki ti montre lospitalite dan enn fason exepsyonel; zot ti mem ofer zot lakaz pu fer bann reynion.

³ Labib ti predir alavans ki Zeova ti pu servi bann fam dan enn fason extraordiner pu realiz so proze. Par egzanp Yoel 2:28, 29 ti anonse ki zom ek fam, tulede, zenn ek vye, ti pu gayn lespri sin ek ti pu partaz la bonn nuvel lor Rwayom Bondye. Sa profesi-la ti kumans realize zur Lapantkot, lane 33 N.L. (Akt 2:1-4, 16-18) Parmi bann fam ki Zeova ti swazire pu al dan lesyel, sertin ti gayn bann don par mirak, par egzanp, don pu profetize. (Akt 21:8, 9) Sa bann ser fidel-la ti form enn gran larme spirityel ek zot ti byin zele dan predikasyon. Grasa zot zel, byin vit, buku dimunn finn adopte relizyon Kretyin dan premye syek. Ver lane 60 N.L., lapot Pol ti ekrir ki la bonn nuvel ti’nn “prese dan tu kreasyon ki truv anba lesyel.”—Kolosyin 1:23.

 Felisite pu Zot Kuraz, Zot Zel, ek Zot Lospitalite

4. Kifer Pol ti ena enn bon rezon pu felisit plizir fam dan kongregasyon premye syek?

⁴ Par egzanp, lapot Pol ti byin apresye servis ki sertin fam ti akonpli. Zordi usi parey, bann ansyin dan kongregasyon ena enn gran lestim pu seki bann fam zele pe fer dan servis Zeova. Parmi bann fam ki Pol ti mansyone par zot non, ti ena “Trifenn ek Trifoz, bann fam ki ‘pe travay dir pu le Senyer.” Ti ena usi “Persis, nu byin-eme, parski li ti akonpli bann travay byin dir pu le Senyer.” (Romin 16:12) Pol ti ekrir ki Evodi ek Sintis ti “travay dir ansam avek [li], pu la bonn nuvel.” (Filipyin 4:2, 3) Ti ena usi Prisil ek so misye Akila, ki ti travay ansam avek Pol. Li ek Akila ti “riske zot lavi” pu Pol. Se pu sa ki Pol ti ekrir: “Pa zis mwa, me usi tu bann kongregasyon bann nasyon, remersye zot.”—Romin 16:3, 4; Akt 18:2.

5, 6. Kuma eski Prisil ti les enn bon legzanp pu bann ser zordi?

⁵ Pu ki rezon Prisil ti ena zel ek kuraz? Kan nu lir Akt 18:24-26, nu truv enn rezon. Nu lir ki li ti sutenir so mari pu ed Apolos, ki ti enn bon orater, pu gayn enn konesans pli azur lor la verite. Donk, li kler ki Prisil ti enn bon etidyan Parol Bondye ek li ti konn byin lanseynman bann zapot. Se akoz sa ki li ti devlop bann bon kalite ki ti fer li ena valer pu Bondye, pu so mari ek pu la kongregasyon. Zordi usi parey, ena bann ser ki travay byin dir; zot bann bon etidyan Labib, ek zot nuri zot spirityelman par lanseynman ki Zeova done atraver esklav fidel. (Lik 12:42) Sa bann ser-la usi ena buku valer.

⁶ Akila ek Prisil ti manifeste lospitalite dan enn fason remarkab. Pol ti res dan zot lakaz kan li ti travay avek zot pu fer bann latant; avredir, sa kup-la ti ena enn komers latant dan lavil Korint. (Akt 18:1-3) Kan Prisil ek Akila ti demenaze pu al res Efez ek plitar Rom, zot ti kontiyne manifeste lospitalite. Zot ti mem ofer zot lakaz pu fer reynion. (Akt 18:18, 19; 1 Korintyin 16:8, 19) Nimfa ek Mari usi, mama Zan-Mark, ti ofer zot lakaz pu fer reynion.—Akt 12:12; Kolosyin 4:15.

Zot Ena enn Gran Valer Zordi

7, 8. Ki bon travay ki merit felisitasyon, bann fam Kretyenn pe fer zordi, ek ki lasirans zot kapav ena?

⁷ Parey kuma dan premye syek, zordi usi bann fam Kretyenn fidel zwe enn rol inportan pu realiz proze Bondye, sirtu dan laktivite predikasyon. Sa bann ser-la fer vremem enn bon travay! Nu pran legzanp Gwen ki’nn servi Zeova avek fidelite pandan plis ki 50 an ziska so lamor an 2002. So mari rakonte: “Gwen ti byin zele dan predikasyon ek dan nu lavil, tu dimunn ti konn sa. Pu li, sak dimunn ti ena posibilite pu benefisye lamur Zeova ek So bann promes. So fidelite anver Bondye, anver So lorganizasyon ek anver nu fami—anplis, so lankurazman dan bann moman difisil—tusala ti sutenir mwa ek nu bann zanfan. Nu finn ena enn lavi ris ek ranpli ar satisfaksyon ansam. Li mank nu buku.” Gwen ek so mari ti marye pandan 61 an.

⁸ Ena plizir milye fam Kretyenn, marye uswa selibater, ki dan servis pyonye ek misyoner. Zot kontant zot avek seki zot ena dan lavi, pu ki zot kapav partaz mesaz lor Rwayom Bondye. Zot fer sa partu, dan bann gran lavil ek dan bann teritwar izole. (Akt 1:8) Buku finn aksepte fer sakrifis dan zot lavi. Par egzanp, zot finn aksepte pu pena enn lakaz  pu zotmem, uswa pu pena zanfan, pu zot kapav servi Zeova ankor plis. Sertenn ser byin sutenir zot mari, ki ena responsabilite pu vizit bann kongregasyon. Plizir milye lezot ser travay dan bann Betel atraver lemond. Pena okenn dut ki sa bann fam ki ena enn gran lespri sakrifis-la, zot parmi “bann kitsoz dezirab, ki sorti dan tu bann nasyon.” Zot ranpli lakaz sinbolik Zeova avek la glwar.—Agai 2:7.

9, 10. Kuma sertin manb bann fami, finn dir aki pwin zot apresye bon legzanp zot madam ek zot mama?

⁹ Byinsir, buku fam Kretyenn ena bann responsabilite familyal, me kanmem sa, zot kontiyn met Rwayom Bondye an premye dan zot lavi. (Matye 6:33) Enn ser selibater ki pyonye ti ekrir: “Si zordi mo dan servis pyonye permanan, se grasa lafwa solid mo mama ek so bon legzanp. Avredir, li ti mo pli bon konpayn dan servis pyonye.” Enn mari fer sa remark-la lor so fam, mama sink gran tifi: “Nu lakaz ti tuzur prop ek an ord. Li ti sinp ek Bonnie pa ti ranpli li avek bann kitsoz ki pa ti neseser. Kumsa nu fami ti kapav konsantre lor bann lobzektif spirityel. Li ti fer byin atansyon lor fason ki nu ti servi nu larzan; se sa ki finn permet mwa travay amitan pandan 32 an. Sa finn permet mwa pas plis letan avek nu fami ek okip bann kitsoz spirityel. Mo fam ti usi montre nu bann zanfan linportans pu travay dir. Mo pena nanyin pu repros li, me okontrer li merit mo felisitasyon.” Zordi, Bonnie ek so mari servi dan biro santral bann Temwin Zeova, an Amérique.

¹⁰ Enn mari finn ekrir lor so fam, ki mama plizir gran zanfan: “Bann kalite ki mo plis admire an Susan se so gran lamur pu Bondye ek pu so prosin. Li konpran dimunn, li kapav met li dan zot plas ek limem, li enn dimunn onet. Li’nn tuzur panse ki nu bizin donn Zeova le meyer ki nu kapav done—enn prinsip ki li’nn aplike dan so lavi antan ki enn serviter Bondye ek antan ki enn mama.” Grasa sutyin so madam, sa mari-la finn kapav aksepte buku privilez dan kongregasyon. Li servi kuma ansyin, pyonye, ranplasan sirveyan sirkonskripsyon ek li usi manb dan Comité de liaison hospitalier. Sa bann fam-la, zot vremem ena enn gran valer pu zot mari, pu bann lezot Kretyin ek sirtu pu Zeova!—Proverb 31:28, 30.

Bann Fam Ki Ena Valer, ek Ki Pena enn Mari

11. (a) Kuma Zeova ti montre ki li interese ar bann fam fidel, sirtu bann vev? (b) Ki lasirans bann vev ek lezot ser fidel ki pena enn mari, kapav ena?

¹¹ Dan le pase, suvan Zeova ti dir ki Li konserne par byinet bann vev. (Deteronom 27:19; Psom 68:5; Izai 10:1, 2) Li pa’nn sanze. Li ankor tuzur pran byin kont bann vev, pa zis bann vev tusel, me usi bann mama ki elve zot zanfan tusel. Zeova pran kont usi bann ser ki finn swazir pu res selibater uswa ki selibater parski zot pa finn truv enn Kretyin konvenab pu marye. (Malaki 3:6; Zak 1:27) Si u enn parmi bann fam ki pe servi Zeova fidelman san sutyin enn mari Kretyin, u kapav sir ki u ena valer dan lizye Bondye.

12. (a) Kuma sertenn ser montre zot fidelite anver Zeova? (b) Avek ki kalite santiman, sertin parmi nu bann ser pe viv?

¹² Nu pran legzanp bann ser ki pa’nn  marye parski zot obeir fidelman lord Zeova pu “marye zis dan le Senyer.” (1 Korintyin 7:39; Proverb 3:1) Zot ena sa lasirans-la dan Labib: “Avek enn kikenn ki fidel, [Zeova] pu azir fidelman.” (2 Samyel 22:26) Selman, pu buku parmi sa bann ser-la, li byin difisil pu res selibater. Enn ser dir: “Mo’nn byin deside pu marye zis dan la verite, me mo finn vers buku larm kan mo finn truv mo bann kamarad marye ar bann bon frer, alor ki mwa mo kontiyn res tusel.” Enn lot ser dir: “Mo finn servi Zeova pandan 25 an. Mo byin deside pu res fidel ar Li, me suvan mo santi mwa tusel ek sa rann mwa byin tris.” Li dir usi: “Bann ser kuma mwa, nu byin anvi gayn lankurazman.” Kuma nu kapav ed sa bann Kretyenn fidel-la?

13. (a) Ki legzanp bann Izraelit ki ti al vizit tifi Yifta, inn les nu? (b) Dan ki lezot fason nu kapav montre ki nu pran kont nu bann ser selibater ki dan kongregasyon?

¹³ Nu truv enn premye fason pu ed sa bann ser-la, dan enn legzanp ki ti arive dan lepase. Kan tifi Yifta ti aksepte pu res selibater, bann dimunn ti realize ki li ti pe fer enn sakrifis. Ki zot ti fer pu ankuraz li? Labib dir: “Lane apre lane, bann tifi an Izrael ti al felisit tifi Yifta, enn Gileadit, kat zur dan lane.” (Ziz 11:30-40) Pareyman, nu’si, nu bizin felisit sinserman bann ser selibater ki obeir lalwa Bondye avek fidelite. a Ki nu kapav fer ankor? Dan nu lapriyer, nu bizin sipliy Zeova pu sutenir sa bann ser byin-eme ki res fidel-la, afin ki zot kontiyne persevere fidelman dan zot servis. Zot merite ki nu asir zot ki Zeova ek tut la kongregasyon, byin kontan zot ek nu ena enn gran lapresyasyon pu zot.—Psom 37:28.

Bann Paran Ki Elve Zot Zanfan Tusel—Kuma Zot Kapav Reysi

14, 15. (a) Kifer bann ser ki elve zot zanfan tusel, bizin priye Zeova pu Li ed zot? (b) Kuma enn paran ki elve so zanfan tusel, kapav azir an armoni avek so lapriyer?

¹⁴ Bann ser ki elve zot zanfan tusel bizin fer fas ar buku problem. Me, zot kapav priye Zeova pu ed zot elve zot zanfan an armoni avek bann prinsip Labib. Li vre ki si u tusel paran, u pa pu kapav tuletan amenn rol mama ek papa tulede. Me, Zeova pu donn u lafors pu asim u responsabilite, si u priye Li avek lafwa. Nu pran enn legzanp. Fer kumadir u bizin amenn enn sak komisyon byin lur kot u, ek u res lao dan enn batiman plizir letaz. Si dan sa batiman-la ena enn lasanser, eski u pu fatig u pu mont leskalye? Non! Pareyman, pa rod sarye tusel u bann gran problem emosyonel ki pez lor u, alor ki u kapav priye Zeova pu ed u. Anrealite, Li demann u pu priye Li. Psom 68:19 dir: “Nu beni Zeova,  ki sarye nu fardo tulezur.” Dan 1 Pyer 5:7 usi, u invite pu zet tu u traka lor Zeova, “parski Li pran [u] swin.” Donk, kan u santi u abat, telman u ena problem ek traka, zet tu u fardo lor u Papa Zeova, ek fer sa “sanses.”—1 Tesalonisyin 5:17; Psom 18:6; 55:22.

¹⁵ Par egzanp, si u enn mama, sirman u santi u preokipe par linflyans ki bann kamarad lekol kapav ena lor u zanfan; uswa par bann leprev ki zot bizin afronte. (1 Korintyin 15:33) U ena rezon pu santi u preokipe. Me selman, li bon usi ki u priye Zeova lor sa size-la. Avredir, kifer u pa priye lor sa bann kitsoz-la avek u bann zanfan kan u fini fer tex dizur ansam avek zot, avan zot al lekol? Bann lapriyer presi ek sinser, kapav ena enn gran lefe lor lespri u bann zenn zanfan. Me anplis, u pu gayn benediksyon Zeova si, avek pasyans, u fer tu seki u kapav pu grav parol Bondye dan lespri u bann zanfan ek fer sa tus zot leker. (Deteronom 6:6, 7; Proverb 22:6) Rapel ki “lizye Zeova lor bann dimunn drwat, ek so zorey ekut zot siplikasyon.”—1 Pyer 3:12; Filipyin 4:6, 7.

16, 17. (a) Ki enn garson ti dir lor lamur ki so mama ti manifeste? (b) Kuma spirityalite sa mama-la ti inflyans so bann zanfan?

¹⁶ Get legzanp Olivia ki ena sis zanfan. So mari pa ti enn serviter Zeova ek li ti abandonn so fami zis apre ki Olivia ti gayn so dernye zanfan. Olivia ti fer tu pu elve so zanfan dapre bann prinsip Labib. Darren, so garson, ki asterla ena 31 an, pe servi antan ki ansyin ek pyonye. Me kan so papa ti kit lakaz, li ti ena anviron 5 an. So mama ti gayn ankor plis traka kan Darren ti tom byin malad, dayer li ankor tuzur ena sa problem la sante-la zordi. Kan li pans so lanfans, Darren dir: “Mo ankor rapel kan mo ti pe asize lor mo lili dan lopital ek mo ti pe vey mo mama vini. Kan li ti vini, li ti asiz kot mwa ek li ti lir Labib avek mwa tulezur. Apre, li ti sant kantik ‘Merci, ô Jéhovah.’ b Ziska zordi se mo kantik prefere.”

¹⁷ Si Olivia inn reysi elve so zanfan dan la verite mem si li ti tusel, se grasa so konfyans an Zeova ek so lamur pu Li. (Proverb 3:5, 6) Li ti ena enn bon latitid ek ti kapav truv sa par bann lobzektif ki li ti fixe pu so bann zanfan. Darren dir: “Mama ti tuzur ankuraz nu pu fixe lobzektif servis aplintan. Rezilta: kat parmi mo sink ser ek momem, nu dan servis aplintan. Selman, zame nu mama ti fer vantar devan lezot akoz sa. Mo fer tu pu imit so bann bon kalite.” Li vre, pa tu zanfan ki servi Zeova kan zot grandi, parey kuma bann zanfan Olivia. Me kan enn mama fer tu seki li kapav pu viv dapre bann prinsip Biblik, li kapav  sir ki Zeova pu gid li ek pu sutenir li avek lamur.—Psom 32:8.

18. Kuma nu kapav montre ki nu apresye dispozisyon ki Zeova donn nu atraver la kongregasyon?

¹⁸ Zeova donn enn gran sutyin atraver la kongregasyon, kot nu nuri spirityelman par mwayin enn program regilye. Nu gayn usi sutyin nu bann frer ek ser, ek bann ansyin ki ena lexperyans lor plan spirityel, ki Labib apel bann “dons en hommes.” (Efezyin 4:8) Bann ansyin fidel travay dir pu fortifye tu bann manb dan kongregasyon ek zot pran kont sirtu bann “orfelin ek bann vev dan zot difikilte.” (Zak 1:27) Donk, res tuzur atase ar pep Bondye ek zame pa res tusel dan u kwin.—Proverb 18:1; Romin 14:7.

Sumisyon—Enn Kalite Atiran

19. Kifer sumisyon enn madam pa vedir ki li inferyer, ek ki legzanp Biblik montre sa?

¹⁹ Zeova ti kre enn fam pu li konplet enn zom. (Zenez 2:18) Donk, sumisyon enn madam ar so mari pa vedir ki li inferyer. Okontrer kan li sumet, sa onor li ek donn li posibilite pu servi so bann talan ek kapasite an armoni avek volonte Bondye. Proverb sapit 31 dekrir enn kantite laktivite ki enn fam kapab ti fer dan lepase, an Izrael. Li ti ed bann pov, okip plantasyon rezin, ek li ti aste terin. Wi, “leker so propriyeter . . . ti ena konfyans an li, ek profi pa [ti] manke.”—Verse 11, 16, 20.

20. (a) Kuma enn fam Kretyenn bizin konsider bann talan ek kapasite ki Bondye inn donn li? (b) Ki kalite remarkab Ester ti ena, ek kuma sa ti permet Zeova servi li apre?

²⁰ Enn fam modes, ki ena la krint pu Bondye pa pu elev limem par anbisyon, ni li pu parye ar so mari. (Proverb 16:18) So lobzektif prinsipal se pa pu rod so satisfaksyon personel atraver bann laktivite profann. Me, li pu servi bann talan ki Bondye inn donn li sirtu pu servi lezot—so fami, so bann frer ek ser spirityel, so bann vwazin, me avan tu, Zeova. (Galat 6:10; Tit 2:3-5) Nu pran legzanp Larenn Ester, ki site dan Labib. Mem si li ti byin zoli, li ti enn fam modes ki ti sumet. (Ester 2:13, 15) Kan li ti marye, li ti montre enn gran respe pu so mari, Lerwa Asyeris. Li pa ti fer kuma Vasti, premye fam Asyeris. (Ester 1:10-12; 2:16, 17) Ester ti usi aksepte avek respe, lopinyon Mordekay, so kuzin, lor sertin size—mem kan li ti fini vinn Larenn. Me selman, li ti enn fam byin determine! Avek kuraz, li ti denons Amann, enn zom san pitye ki ti ena enn gran puvwar ek ki ti konplote pu tuy tu bann Zwif. Zeova ti servi Ester dan enn fason extraordiner pu prezerv so pep.—Ester 3:8–4:17; 7:1-10; 9:13.

21. Kuma eski enn fam Kretyenn kapav ena ankor plis valer pu Zeova?

²¹ Li kler ki depi dan lepase ek ziska zordi, finn ena bann fam fidel ki’nn met Zeova ek so ladorasyon an premye dan zot lavi. Donk, bann fam ki ena la krint pu Bondye, ena enn gran valer dan So lizye. Ser, les Zeova par so lespri sin, form u, tigit par tigit, pu ki u vinn kuma enn “resipyan” ki ena ankor plis valer, enn kikenn ki “finn prepare pu tu bon travay.” (2 Timote 2:21; Romin 12:2) Gete ki Parol Bondye dir lor sa bann serviter ki ena valer-la: “Donn li frwi so lamin, ek les so travay fer li gayn loner dan bann laport [lavil].” (Proverb 31:31) Ser, nu swete ki kapav dir parey pu sakenn parmi zot!

[Notes]

Eski U Rapel?

• Kuma sertenn fam Kretyenn dan premye syek ti montre ki zot ena valer devan Zeova?

• Kuma buku ser dan nu lepok pe montre ki zot ena valer devan Bondye?

• Dan ki fason Zeova sutenir bann mama ki elve zot zanfan tusel, ek bann lezot ser ki pena enn mari?

• Kuma enn fam kapav montre enn respe sinser pu lotorite ki Zeova inn etabli dan la fami?

[Questions]

[L’encadré page 31]

BANN LEGZANP LOR KI NU KAPAV REFLESI

Eski u ti pu kontan get ankor lezot legzanp bann fam fidel mansyone dan Labib? Si wi, lir bann tex Labib ki’nn site anba. Pandan ki u medit lor sa bann legzanp-la, esey truv bann prinsip ki u pu kapav aplik pli byin dan u lavi.—Romin 15:4.

◆ Sara: Zenez 12:1, 5; 13:18a; 21:9-12; 1 Pyer 3:5, 6.

◆ Bann fam Izraelit zenere: Egzod 35:5, 22, 25, 26; 36:3-7; Lik 21:1-4.

◆ Debora: Ziz 4:1–5:31.

◆ Rut: Rut 1:4, 5, 16, 17; 2:2, 3, 11-13; 4:15.

◆ Fam lavil Sunem: 2 Lerwa 4:8-37.

◆ Enn fam Fenisyenn: Matye 15:22-28.

◆ Mart ek Mari: Mark 14:3-9; Lik 10:38-42; Zan 11:17-29; 12:1-8.

◆ Tabita: Akt 9:36-41.

◆ Kat tifi Filip: Akt 21:9.

◆ Febe: Romin 16:1, 2.

[Zimage page 29]

Eski u felisit bann ser selibater ki obeir fidelman lalwa Bondye?

[Zimage page 30]

Ki kitsoz presi u kapav demande dan lapriyer avan bann zanfan al lekol?