“Gete! Mo avek zot tulezur ziska lafin sa sistem ki egziste la.” —MATYE 28:20.

1, 2. (a) Kan Zezi ki ti’nn resisite ti donn lord bann ki ti swiv li pu fer bann disip, ki li ti promet zot? (b) Kuma eski Zezi ti diriz enn fason aktif premye kongregasyon Kretyin?

 AVAN li mont dan lesyel, Zezi Kris, nu Lider ki ti’nn resisite, ti paret ar so bann disip ek li ti dir: “Mo’nn gayn tu lotorite dan lesyel ek lor later. Donk, ale ek fer bann dimunn dan tu bann nasyon vinn bann disip, batiz zot onon Papa, onon Garson ek onon lespri sin, anseyn zot pu pratik tu bann kitsoz ki mo finn komann zot. Ek gete! Mo avek zot tulezur ziska lafin sa sistem ki egziste la.”—Matye 23:10; 28:18-20.

² Zezi pa finn zis sarz zot pu fer sa travay ki sap lavi la, setadir fer plis disip, me li ti promet zot usi ki li ti pu avek zot. Listwar bann premye Kretyin, parey kuma finn rakonte dan Labib dan liv Akt, montre byin ki Kris ti servi lotorite ki li ti’nn gayne pu diriz nuvo kongregasyon ki ti fek etabli. Li ti avoy “asistan” ki li ti promet—lespri sin—pu fortifye so bann disip ek pu gid zot bann zefor. (Zan 16:7; Akt 2:4, 33; 13:2-4; 16:6-10) Zezi ki ti’nn resisite ti servi bann anz pu ed so bann disip. (Akt 5:19; 8:26; 10:3-8, 22; 12:7-11; 27:23, 24; 1 Pyer 3:22) Anplis, nu Lider finn diriz kongregasyon kan li’nn pran dispozisyon pu ki bann zom kalifye servi antan ki enn kolez santral.—Akt 1:20, 24-26; 6:1-6; 8:5, 14-17.

3. Ki bann kestyon pu diskite dan sa lartik la?

³ Donk, ki nu kapav dir lor nu lepok, “lafin sa sistem ki egziste la”? Kuma eski Zezi Kris pe diriz kongregasyon Kretyin zordi? Ek kuma nu kapav montre ki nu aksepte so direksyon?

Zezi, Nu Met, Ena enn Esklav Fidel

4. (a) Kisannla form “esklav fidel ek avize”? (b) Ki nu Met Zezi Kris finn konfye sa esklav la?

⁴ Kan Zezi ti donn profesi lor siyn so  prezans, li ti dir: “Kisannla ki vremem sa esklav fidel ek avize la, ki so met finn etabli lor so bann domestik, pu donn zot, zot manze dan ler ki bizin? Ere sa esklav la si, kan so met vini li truv li pe fer sa. Vremem, mo dir zot, Li pu etabli li lor tu so bann dibyin.” (Matye 24:45-47) “Met” la li nu Lider, Zezi Kris, ek li finn etabli “esklav fidel ek avize”—grup bann Kretyin win ki lor later—pu pran swin tu so bann lintere ki ena enn rapor avek later.

5, 6. (a) Dan enn vizyon ki lapot Zan ti gayne, ki sa “bann set portlanp an or” la “ek sa “bann set zetwal” la reprezante? (b) Lefet ki sa bann “set zetwal” la zot dan lamin drwat Zezi, ki sa vedir?

⁵ Liv Labib Revelasyon montre ki sa esklav fidel ek avize la li direkteman anba kontrol Zezi Kris. Dan enn vizyon lor “zur Senyer,” lapot Zan ti truv “set portlanp an or, ek omilye sa bann portlanp la enn kikenn ki kuma garson enn zom” ki “ti ena set zetwal dan so lamin drwat.” Kan Zezi ti explik Zan sa vizyon la, li ti dir: “Konsernan sin sekre sa bann set zetwal ki to finn truv dan mo lamin drwat la, ek sa bann set portlanp an or la: Set zetwal la reprezant bann anz set kongregasyon, ek set portlanp la reprezant set kongregasyon.”—Revelasyon 1:1, 10-20.

⁶ “Sa set portlanp an or la” reprezant tu bann vre kongregasyon Kretyin ki egziste pandan “zur Senyer,” ki finn kumanse an 1914. Me ki “sa set zetwal la reprezante”? Dabor, zot ti reprezant tu bann sirveyan win, ki ti pran swin bann kongregasyon premye syek. a Bann sirveyan ti dan lamin drwat Zezi—anba so kontrol ek so direksyon. Wi, Zezi Kris ti diriz tu bann ki ti form sa klas esklav la. Me, zordi, pena buku sirveyan win. Kuma eski Kris diriz sa plis ki 93,000 kongregasyon bann Temwin Zeova partu lor later la?

7. (a) Kuma eski Zezi servi Kolez Santral pu diriz bann kongregasyon partu lor later? (b) Kifer eski nu kapav dir ki se lespri sin ki nom bann sirveyan Kretyin?

⁷ Parey kuma dan premye syek, zordi ena enn ti grup bann zom kalifye parmi bann sirveyan win ki pe servi antan ki Kolez Santral, ek zot reprezant sa grup esklav fidel ek avize la. Nu Lider servi sa Kolez Santral la pu nom bann zom kalifye—ki zot win uswa non—kuma bann ansyin dan bann kongregasyon lokal. Zisteman, lespri sin, ki Zeova finn donn Zezi puvwar pu servi, zwe enn rol santral. (Akt 2:32, 33) Premyerman, sa bann sirveyan la bizin ranpli bann kondisyon ki dan Parol Bondye, ki finn inspire par lespri sin. (1 Timote 3:1-7; Tit 1:5-9; 2 Pyer 1:20, 21) Se apre ki finn priye ek anba direksyon lespri sin ki fer bann rekomandasyon ek bann nominasyon. Anplis, bann dimunn ki nome donn  prev ki zot manifeste frwi lespri. (Galat 5:22, 23) Lerla, konsey Pol aplik dan enn fason egal ar tu bann ansyin, ki zot manb 144,000 uswa non: “Pran zotmem kont ek pran kont tu zot trupo, lor ki lespri sin finn etabli zot kuma sirveyan.” (Akt 20:28) Sa bann zom nome la gayn direksyon ar Kolez Santral ek zot dispoze pu vey lor kongregasyon. Dan sa fason la, Kris avek nu zordi ek li pe diriz kongregasyon enn fason aktif.

8. Kuma eski Kris servi bann anz pu diriz so bann disip?

⁸ Zezi servi usi bann anz mem pu gid so bann disip zordi. Dapre parabol dible ek move lerb, lepok rekolt pu vinn dan “lafin sa sistem ki pe egziste la.” Kisannla Met la ti pu servi pu fer rekolt? Zezi ti dir ki “Bann anz ki pu fer rekolt.” Li ti azute: “Garson enn zom pu avoy so bann anz, ek li pu ramas an deor so Rwayom tu kitsoz ki fer tonbe ek tu dimunn ki pe dezobeir lalwa.” (Matye 13:37-41) Anplis, parey kuma enn anz ti diriz Filip ver sa fonksyoner Etyopyin la, zordi usi ena enn kantite prev ki montre ki Kris servi so bann anz pu diriz travay bann vre Kretyin pu truv bann dimunn sinser.—Akt 8:26, 27; Revelasyon 14:6.

9. (a) Par ki mwayin Kris diriz kongregasyon Kretyin zordi? (b) Ki kestyon nu bizin egzamine si nu anvi tir profi ar direksyon Kris?

⁹ Nu vremem rasire kan nu kone ki zordi Zezi Kris diriz so bann disip atraver Kolez Santral, lespri sin, ek bann anz. Mem si sertin bann adorater Zeova ti pu separe ar kolez Santral pu enn moman akoz persekisyon uswa pu bann rezon kumsa, kan mem sa Kris ti pu tuzur furni direksyon par mwayin lespri sin ek par sutyin bann anz. Me, nu tir profi ar so direksyon akondisyon  ki nu aksepte li. Kuma eski nu kapav montre ki nu aksepte direksyon Kris?

“Obeir . . . Sumet”

10. Kuma eski nu kapav montre konsiderasyon pu bann ansyin ki finn nome dan kongregasyon?

¹⁰ Nu Lider finn donn bann kongregasyon “bann don zom”—“sertin kuma bann predikater levanzil, sertin kuma bann berze ek anseynan.” (Efezyin 4:8, 11, 12) Nu latitid ek nu bann aksyon anver zot montre klerman si nu aksepte direksyon Kris. Li bon ki nu ‘montre numem rekonesan’ anver sa bann zom kalifye ki Kris finn done la. (Kolosyin 3:15) Zot usi zot merit nu respe. Lapot Pol finn ekrir: “Fode rekonet ki bann ansyin ki pe dirize byin zot merit de fwa plis loner.” (1 Timote 5:17) Kuma eski nu kapav montre nu rekonesans ek nu lestim pu bann zom mir—bann ansyin uswa bann sirveyan—dan kongregasyon? Pol reponn: “Obeir bann ki pe diriz zot ek sumet ar zot.” (Ebre 13:17) Wi, nu bizin obeir ek sumet ar zot.

11. Kifer eski respekte dispozisyon pu etabli bann ansyin li enn kestyon fidelite anver nu batem?

¹¹ Nu Lider li parfe. Bann don zom ki li finn done zot, zot pa parfe. Donk defwa zot kapav fer erer. Purtan, li inportan ki nu res fidel ar dispozisyon Kris. Dayer, kan nu azir dapre nu langazman ek nu batem sa vedir ki nu rekonet drwa lotorite ki finn nome par lespri sin dan kongregasyon ek nu pu sumet ar li volonterman. Nu batem ‘onon lespri sin’ li enn deklarasyon piblik ki nu rekonet ki ete lespri sin ek rekonet rol ki li zwe dan bann proze Zeova. (Matye 28:19) Sa kalite batem la inplik ki nu korper avek lespri sin ek pa fer nanyin pu anpes li azir parmi bann disip Kris. Pwiski lespri sin zwe enn rol inportan dan rekomandasyon ek nominasyon bann ansyin, eski vremem nu pu res fidel ar nu langazman si nu pa korper avek sa dispozisyon pu etabli bann ansyin dan kongregasyon la?

12. Ki bann legzanp lor mank respe pu lotorite Zid site, ek ki zot anseyn nu?

¹² Dan Labib ena bann legzanp ki anseyn nu linportans pu obeir ek sumet. Disip Zid atir latansyon lor trwa legzanp avertisman, pu fer referans ar bann ki finn koz an mal kont bann zom ki ti etabli dan kongregasyon. Li dir: “Tanpi pu zot, parski zot finn pran semin ki Kain ti pran, ek zot finn lans zot dan move semin Balaam pu enn rekonpans, ek zot finn mor dan diskur rebelyon ki Kora ti fer!” (Zid 11) Kain pa ti pran kont konsey plin ar lamur ki Zeova ti donn li ek volonterman li finn persiste dan so laenn pu fer krim. (Zenez 4:4-8) Malgre ki Bondye ti donn li enn kantite lavertisman, Balaam ti sey modi pep Bondye pu enn rekonpans larzan. (Nonm 22:5-28, 32-34; Deteronom 23:5) Kora ti ena enn pozisyon onorab parmi pep Bondye an Izrael, me li pa ti satisfe ar sa. Li finn sulev enn rebelyon kont Moiz serviter Bondye, zom lor later ki ti ena plis limilite. (Nonm 12:3; 16:1-3, 32, 33) Maler finn tom lor Kain, Balaam, ek Kora. Sa bann legzanp la anseyn nu klerman linportans pu ekut bann konsey ek respekte bann zom ki Zeova servi dan bann pozisyon responsabilite.

13. Ki benediksyon profet Izai ti anonse pu bann ki sumet ar dispozisyon pu etabli bann ansyin?

¹³ Kisannla pa ti pu kontan tir profi ar gran laranzman sirveyan ki nu Lider finn etabli dan kongregasyon Kretyin? Profet Izai ti anons sa bann benediksyon la, kan li’nn dir: “Gete! Enn lerwa pu reyne pu lazistis; ek konsernan bann prins, zot pu guverne kuma bann prins pu seki drwat. Ek sakenn bizin kuma enn plas kasyet kont divan, enn refiz kont siklonn, parey kuma bann ti larivyer dan enn peyi kot pena delo, parey kuma lonbraz enn gro ros dan  enn later fatige.” (Izai 32:1, 2) Sak ansyin bizin kuma “enn plas” proteksyon ek sekirite. Mem si li difisil pu nu pu sumet ar lotorite, anu priye pu fer zefor pu nu obeir ek sumet ar lotorite ki Bondye finn etabli dan kongregasyon.

Kuma Bann Ansyin Sumet ar Direksyon Kris

14, 15. Kuma bann ki dirize dan kongregasyon montre ki zot sumet ar direksyon Kris?

¹⁴ Sak Kretyin—sirtu bann ansyin—bizin swiv direksyon Kris. Bann sirveyan, uswa bann ansyin, ena enn sertenn lotorite dan kongregasyon. Me zot pa rod pu ‘dominn lor lafwa zot bann frer’ kan zot rod kontrol lavi bannla. (2 Korintyin 1:24) Bann ansyin pran aker bann parol Zezi: “Zot kone ki bann sef bann nasyon komann bannla kuma bann met ek ki bann gran egzers puvwar lor bannla. Pa kumsa ki fer parmi zot.” (Matye 20:25-27) Kan bann ansyin ranpli zot responsabilite, zot sinserman rod servi lezot.

¹⁵ Bann Kretyin gayn sa lankurazman la: “Rapel bann ki pe diriz zot, . . . ek tandiki zot pe obzerv ki rezilta bannla zot kondwit done, imit zot lafwa.” (Ebre 13:7) Pa parski bann ansyin dirize ki bann Kretyin bizin imit zot. Zezi ti dir: “Zot ena enn sel Lider, Kris.” (Matye 23:10) Se lafwa bann ansyin ki nu bizin imite parski zotmem zot imit Kris, nu vre Lider. (1 Korintyin 11:1) Get detrwa domenn kot bann ansyin fer zefor pu vinn kuma Kris dan zot relasyon avek lezot dan kongregasyon.

16. Malgre lotorite ki li ti ena, kuma eski Zezi ti tret so bann disip?

¹⁶ Mem si dan tu domenn Zezi ti siperyer ar bann imin inparfe ek ki so Papa finn donn li enn lotorite ki personn pena ankor, Zezi pa ti deklare ar so bann disip. Li pa ti fer letalaz so konesans ar lezot. Li ti montre so bann bon santiman ek so konpasyon ek li ti pran an konsiderasyon zot bann bezwin. (Matye 15:32; 26:40, 41; Mark 6:31) Zame li pa finn demann so bann disip plis ki seki zot ti kapav done, ek zame li’nn fer zot sarye plis ki zot ti kapav sarye. (Zan 16:12) Zezi ti “dus ek li ti ena limilite dan so leker.” Donk, li pa etonan ki buku ti truv rekonfor ar li.—Matye 11:28-30.

17. Parey kuma Kris, kuma bann ansyin kapav montre ki zot pa deklare ar lezot dan kongregasyon?

¹⁷ Si Kris ki Lider, pa ti deklare, komye plis bann ki dirize dan kongregasyon bizin fer parey! Wi, zot fer atansyon pu pa abiz lotorite ki finn konfye zot. Ek zot “pa vinn koz gran-gran koze,” pu sey inpresyonn lezot. (1 Korintyin 2:1, 2) Olye sa, zot fer zefor pu koz bann parol laverite Labib dan enn manyer sinp ek sinser. Anplis, bann ansyin fer zefor pu montre zot rezonab dan seki zot atann ar lezot ek zot ena konsiderasyon pu bann bezwin lezot. (Filipyin 4:5) Pwiski zot kone ki tu dimunn ena bann limit, zot siport zot bann frer avek lamur. (1 Pyer 4:8) Eski bann ansyin ki ena limilite dan zot leker pa donn vremem rekonfor? Wi zot vremem kumsa.

18. Ki bann ansyin kapav aprann ar fason ki Zezi ti tret bann zanfan?

 ¹⁸ Zezi ti abordab, mem avek bann ti dimunn. Get repons ki li ti done kan so bann disip ti repran bann dimunn parski “zot ti amenn zot bann ti zanfan ar li.” Zezi ti dir: “Les sa bann ti zanfan la vinn ar mwa, ek pa rod anpes zot.” Apre sa “li finn pran bann zanfan la dan so lebra ek li’nn kumans beni zot, li finn poz lamin lor zot.” (Mark 10:13-16) Zezi ti salere ek bon, ek lezot ti atire ver li. Bann dimunn pa ti per Zezi. Mem bann zanfan ti alez an so prezans. Bann ansyin usi abordab, ek pwiski zot montre lafeksyon ek bonte enn fason salere, lezot—mem bann zanfan—santi zot alez avek zot.

19. Ki vedir “ena panse Kris,” ek ki zefor sa demande?

¹⁹ Kantite ki bann ansyin kapav imit Zezi Kris depann lor ki kantite zot konn li byin. Pol ti demande: “Kisannla finn arive konn panse Zeova, pu ki li anseyn Li?” Apre sa li’nn azute: “Me nu, nu ena panse Kris.” (1 Korintyin 2:16) Ena panse Kris inplik konn model so panse ek tu laspe so personalite pu kone seki li ti pu fer dan enn sityasyon partikilye. Mazine ki u arive konn nu Lider kumsa! Wi, sa vedir pran kont bann resi Levanzil ek regilyerman ranpli nu lespri avek konpreansyon lavi ek legzanp Zezi. Kan bann ansyin fer zefor pu byin swiv direksyon Kris, bann ki dan kongregasyon plis motive pu imit zot lafwa. Ek bann ansyin gayn satisfaksyon pu truv lezot swiv bann pa nu Lider avek lazwa.

Kontinye Anba Direksyon Kris

20, 21. Alor ki nu pe get devan ver nuvo lemond ki finn promet, ki bizin nu determinasyon?

²⁰ Li inportan ki nu tu nu kontiyn sumet ar direksyon Kris. Amezir nu pe koste ar lafin sa sistem ki egziste la, nu sityasyon parey ar bann Izraelit ki ti dan bann Laplenn Moab an 1473 A.N.L. Zot ti devan laport Later ki Bondye ti’nn promet zot, ek par mwayin Moiz, Bondye ti dir: “Twa [Zozye] to pu diriz lepep dan peyi ki Zeova finn promet zot bann anset pu donn zot.” (Deteronom 31:7, 8) Zozye ti lider ki Zeova ti etabli. Pu rant dan Later ki ti’nn Promet, bann Izraelit ti bizin sumet ar direksyon Zozye.

²¹ Labib dir nu: “Zot ena enn sel Lider, Kris.” Selman Kris ki pu diriz nu dan nuvo lemond ki finn promet ek kot pu ena lazistis. (2 Pyer 3:13) Alor, anu determine pu sumet ar so direksyon dan tu domenn nu lavi.

[Not anba paz]

Eski U Rapel?

• Kuma eski Kris ti diriz kongregasyon premye syek?

• Kuma eski Kris diriz so kongregasyon dan nu lepok?

• Kifer eski nu bizin sumet ar bann ki dirize dan kongregasyon?

• Ki manyer bann ansyin montre ki Kris zot Lider?

[Kestyon]

[Zimaz lor paz 15]

Kris diriz so kongregasyon ek li pe tini bann sirveyan dan so lamin drwat

[Zimaz lor paz 16]

“Obeir bann ki pe dirize parmi zot ek sumet ar zot”

[Zimaz lor paz 19]

Zezi ti salere ek abordab. Bann ansyin fer zefor pu fer kuma li