“Mo finn gayn enn pikan dan laser, enn anz Satan, pu ki li kontiyn tap mwa.”—2 KORINTYIN 12:7.

1. Ki bann problem dimunn pe bizin fer fas zordi?

 ESKI ansemoman u pe bizin fer fas avek kit difikilte? Si wi, u pa tusel. Dan sa bann “letan kritik” la, bann Kretyin fidel pe fer fas ar enn lopozisyon intans, bann problem familyal, maladi, traka finans, sufrans afektif, lamor enn pros, ek bann lezot problem ankor. (2 Timote 3:1-5) Dan sertin peyi, buku zot lavi menase par mank manze ek lager.

2, 3. Si nu ena bann problem ki kuma bann pikan dan nu laser, ki latitid dekurazan sa kapav fer nu gayne, ek kuma sa kapav vinn danzere?

² Sa kalite problem la kapav fer enn kikenn santi li abat net, sirtu si enn kantite problem vinn an mem tan. Note seki Proverb 24:10 dir: “Eski to finn montre twa dekuraze dan zur maler? Alor, to lafors pu tigit.” Wi, si nu dekuraze akoz nu bann sityasyon difisil, sa kapav anlev lafors ki nu byin bizin ek afebli nu determinasyon pu andire ziska lafin. Ki manyer sa kapav arive?

³ Ebyin, dekurazman kapav fer enn kikenn truv bann kitsoz zis dan move kote. Par egzanp, li fasil pu egzazer lor nu bann leprev ek kumans pleyn lor nu sor. Sertin kapav mem dir Bondye, “Kifer to pe les tusala ariv mwa?” Si sa kalite latitid negatif la pran rasinn dan leker enn dimunn, sa kapav minn so lazwa ek so konfyans. Enn serviter Bondye kapav telman dekuraze ki li aret konbat “bon lager pu lafwa.”—1 Timote 6:12.

4, 5. Dan sertin ka, kuma eski Satan zwe enn rol dan nu bann problem, me mem sa ki konfyans nu kapav ena?

⁴ Byinsir pa Zeova ki met nu dan bann leprev. (Zak 1:13) Nu gayn sertin leprev sinpleman parski nu pe fer zefor pu res fidel ar Li. Avredir, Satan Dyab, prinsipal lennmi Bondye viz tu bann ki servi Zeova. Dan so tigit letan ki li reste, sa move “bondye sa sistem ki egziste la” pe fer zefor pu fer ninport kisannla ki kontan Zeova aret fer So volonte. (2 Korintyin 4:4) Dan lemond antye, Satan pe fer tu seki li kapav pu fer fami internasyonal nu bann frer sufer. (1 Pyer 5:9) Li vre ki Satan pa responsab direkteman tu bann problem, me li kapav profit bann problem nu gayne pu afebli nu plis.

⁵ Me mem ki kantite Satan uswa so bann zarm kapav pwisan, nu kapav gayn viktwar lor li! Kuma eski nu kapav sir? Parski Bondye Zeova lager pu nu. Li’nn fer sir ki so bann serviter pa inyor bann taktik Satan. (2 Korintyin 2:11) Avredir, Parol Bondye dir nu buku kitsoz lor bann leprev ki bann vre Kretyin gayne. Dan ka lapot Pol, Labib ti servi lexpresyon “enn pikan dan laser.” Kifer? Anu gete kuma Parol Bondye explik sa lexpresyon la. Lerla nu pu truve ki pa zis nu tusel ki pe rod led Zeova pu sirmont bann leprev.

Kifer Bann Leprev Zot Kuma Bann Pikan

6. Ki Pol ti rod dir par “enn pikan dan laser,” ek ki sa pikan la ti kapav ete?

⁶ Apre ki Pol ti’nn pas par buku leprev, li  finn ekrir avek linspirasyon Bondye: “Mo finn gayn enn pikan dan laser, enn anz Satan, pu ki li kontiyn tap mwa, kumsa mo pa tro flat mwa.” (2 Korintyin 12:7) Ki sa pikan ki Pol ti ena dan so laser la? Nu kone ki enn pikan ki’nn rant anba lapo fer vremem dimal. Donk sa lexpresyon la sirman fer referans ar enn kitsoz ki ti fer Pol gayn buku duler—swa fizik, afektif, swa tulede. Kitfwa Pol ti sufer enn maladi lizye uswa enn lot andikap fizik. Uswa kitfwa pikan la ti reprezant bann dimunn ki ti met an dut bann prev ki Pol ti enn zapot ek ki ti dut valer so predikasyon ek so lanseynman. (2 Korintyin 10:10-12; 11:5, 6, 13) Antuka, ninport ki kitsoz sa ti ete, pikan la ti res avek Pol ek pa ti kapav tir li.

7, 8. (a) Ki lexpresyon “kontiyn tape” montre nu? (b) Kifer eski li inportan ki nu fer fas ar ninport ki pikan ki pe fatig nu asterla?

⁷ Note ki sa pikan la ti kontiyn tap Pol. Li interesan pu note ki verb Grek ki Pol ti servi isi sorti dan enn mo ki vedir “bann zwintir ledwa.” Matye 26:67 servi sa mo la dan sans literal ek 1 Korintyin 4:11 servi li dan sans sinbolik. Dan sa bann verse la, li transmet lide gayn kudpwin. Pwiski Satan ena enn gran laenn pu Zeova ek pu so bann serviter, nu kapav sir ki Dyab ti byin kontan ki enn pikan ti kontiyn tap Pol. Zordi usi, Satan byin kontan kan enn pikan dan laser fatig nu.

⁸ Alor, parey kuma Pol, nu bizin kone kuma pu fer fas avek sa bann kalite pikan la. Nu lavi depann lor la! Rapel, Zeova anvi prolonz nu lavi pu tuletan dan so nuvo lemond, kot bann problem ki kuma pikan zame pa pu fatig nu ankor. Pu ed nu pu gayn sa pri extraordiner la, Bondye finn donn nu buku legzanp dan so Parol sakre Labib ki montre kuma so bann serviter fidel finn reysi fer fas avek bann pikan dan zot laser. Zot ti bann dimunn ordiner, inparfe, parey kuma nu. Kan nu get legzanp detrwa parmi sa gran “nyaz temwin” la, sa kapav ed nu pu “galup avek landirans sa lekurs ki devan nu la.” (Ebre 12:1) Si nu medit lor seki zot finn andire, sa kapav fer nu gayn konfyans ki nu kapav fer fas ar ninport ki pikan Satan kapav servi kont nu.

Bann Pikan Ki ti Fatig Mefiboset

9, 10. (a) Kuma eski Mefiboset finn arive gayn enn pikan dan so laser? (b) Ki konsiderasyon Lerwa David ti montre anver Mefiboset, ek kuma eski nu kapav imit David?

⁹ Get legzanp Mefiboset, garson Yonatann kamarad David. Kan Mefiboset ti ena sinkan, ti gayn nuvel ki so papa Yonatann, ek so granper, Lerwa Sail, ti’nn mor dan lager. Nenenn ti garson la finn panike. Li “finn kumans sarye li . . . , me dan panik letan li ti pe galupe pu sove, ti garson la finn tonbe ek li finn vinn bwate.” (2 Samyel 4:4) Sa andikap fizik la ti devet preske  kuma enn pikan ki Mefiboset ti bizin andire amezir li ti grandi.

¹⁰ Plizir lane plitar par lamur pu Yonatann, Lerwa David finn montre so lamur fidel pu Mefiboset. David ti donn li tu later ki Sail ti ena ek li finn met Siba, enn anplwaye Sail, pu okip sa later la. David ti dir Mefiboset usi: ‘To pu manz dipin tuletan lor mo latab.’ (2 Samyel 9:6-10) Pena dut, lamur fidel David ti rekonfort Mefiboset ek ti ed li pu diminye duler so andikap. Sa li enn bon leson! Nu’si nu bizin montre konsiderasyon pu bann ki pe lite avek enn pikan dan laser.

11. Ki Siba ti pretann lor Mefiboset, me kuma eski nu kone ki seki li ti dir la ti manti? (Get not.)

¹¹ Plitar, Mefiboset ti bizin fer fas avek enn lot pikan dan so laser. So serviter Siba ti koz manti lor li avek Lerwa David, ki ti pe bizin kit Zerizalem sove akoz so garson Absalon ti pe rebele. Siba ti pretann ki Mefiboset finn fer malonet, li’nn res Zerizalem dan lespwar pu vinn lerwa limem. a David finn krwar mansonz Siba ek li’nn donn tu later Mefiboset sa manter la!—2 Samyel 16:1-4.

12. Kuma eski Mefiboset ti reazir devan so sityasyon, ek kuma eski li enn bon legzanp pu nu?

¹² Me, kan finalman Mefiboset finn zwenn David, li finn rakont lerwa seki finn arive vremem. Avredir, li ti’nn prepar li pu al zwenn David kan Siba finn anbet li ek finn port li volonter pu al dan so plas. Eski David ti repar sa tor la? An parti selman. Li finn diviz later la ant sa de zom la. Ala ankor enn lot kitsoz ki ti kapav enn pikan dan laser Mefiboset. Eski sa ti desevwar li buku? Eski li ti proteste kont desizyon David, ek pleyne ki sa ti inzis? Non, avek limilite li ti dakor avek seki lerwa ti deside. Li finn aret so latansyon lor bon kote sa sityasyon la, ek li ti kontan ki lerwa fidel Izrael ti’nn returne an sekirite. Mefiboset finn vremem les enn bon legzanp par fason ki li’nn siport so andikap, mansonz ki ti koze lor li, ek desepsyon ki li’nn gayne.—2 Samyel 19:24-30.

Neemya Ti Fer Fas Avek So Bann Leprev

13, 14. Ki bann pikan Neemya ti bizin siporte kan li ti returne pu reranz bann miray Zerizalem?

¹³ Pans bann pikan sinbolik ki Neemya ti bizin andire kan li ti return Zerizalem, lavil ki ti nepli ena miray, dan sinkyem syek A.N.L. Li ti truv lavil la pena okenn defans, ek bann Zwif ki ti’nn returne ti mal organize, zot ti dekuraze, ek inpir devan lizye Zeova. Mem si li ti gayn permisyon avek Lerwa Artagzerses pu reranz bann miray Zerizalem, Neemya finn al aprann ki bann guverner dan bann peyi vwazin pa ti ule tann koz so misyon. “Pu zot sa finn paret move ki enn dimunn finn vinn rod bon kitsoz pu bann garson Izrael.”—Neemya 2:10.

¹⁴ Sa bann lennmi etranze la finn fer tu zot posib pu aret travay Neemya. Zot bann menas, zot bann mansonz, ek zot bann presyon—plis bann espyon ki zot ti avoye pu dekuraz li—ti sirman bann pikan ki ti tas dan so laser. Eski li finn sede devan latak sa bann lennmi la? Non! Li finn fer Bondye ful konfyans, ek li pa finn afebli. Donk, kan bann miray Zerizalem ti’nn finalman reranze, sa ti enn temwaynaz permanan ki Zeova ti sutenir Neemya avek lamur.—Neemya 4:1-12; 6:1-19.

15. Ki bann problem ki ti ena parmi bann Zwif ti fatig Neemya buku?

¹⁵ Antan ki guverner, Neemya ti bizin  usi fer fas avek buku problem parmi lepep Bondye. Sa bann problem la ti kuma bann pikan ki ti fatig li buku parski zot ti afekte relasyon ki lepep ti ena avek Zeova. Bann ris ti pe demann gro lintere ar zot bann frer ki pli pov, ek sa bannla ti bizin abandonn zot later ek mem vann zot zanfan an esklavaz pu pey zot bann det ek pey usi tax Pers. (Neemya 5:1-10) Buku Zwif pa ti pe fer Saba ek zot pa ti pe sutenir ni bann Levit, ni tanp. Pa fini, sertin ti marye avek “bann fam Asdodit, Amonit ek Moabit.” Ki kantite lapenn devet sa ti fer Neemya! Me okenn sa bann pikan la pa’nn fer li bes lebra. Ankor ek ankor, li’nn pran latet kuma enn kikenn ki sutenir enn fason aktif bann lalwa drwat Bondye. Parey kuma Neemya, nu bizin pa les kondwit infidel lezot anpes nu servi Zeova fidelman.—Neemya 13:10-13, 23-27.

Buku Lezot Fidel Finn Fer Fas Avek Bann Pikan dan Laser

16-18. Kuma eski Izaak ek Rebeka, Ana, David, ek Osea ti sufer bann problem familyal?

¹⁶ Dan Labib ena buku lezot legzanp bann dimunn ki’nn fer fas ar bann sityasyon difisil ki ti kuma bann pikan. Enn lakoz popiler sa bann pikan la ti problem familyal. Sa de madam ki Ezai ti ena la “ti rann lavi Izaak ek Rebeka [bann paran Ezai] amer.” Rebeka ti mem dir ki li ti degut so lavi akoz sa bann fam la. (Zenez 26:34, 35; 27:46) Pans usi Ana ek ki kantite Penina, so rival, lot madam so misye, “ti rann so lavi byin amer” parski li pa ti gayn zanfan. Kitfwa suvan Ana ti sufer dan so lasam akoz sa. Penina ti usi arsel li an piblik—devan bann fami ek bann kamarad—kan bann fami ti al asiste fet dan Silo. Pu Ana, kumadir ti pe anfons pikan la ankor plis dan so laser.—1 Samyel 1:4-7.

¹⁷ Get seki David ti andire akoz zaluzi derezonab so boper, Lerwa Sail. Pu sap so prop lavi, David ti oblize res dan bann kavern dan dezer An-Gedi, kot li ti bizin pas ant bann gro ros, dan bann semin danzere ki mont an pik. Devet sa linzistis la ti agas li, parski li pa ti fer nanyin move kont Sail. Kan mem sa, pandan plizir lane David finn bizin tuletan sove—tusala akoz zaluzi Sail.—1 Samyel 24:14, 15; Proverb 27:4.

¹⁸ Mazinn bann diskisyon familyal ki ti fatig profet Osea. So fam ti fer ladilter. Sirman kondwit imoral so madam ti kuma bann pikan ki ti’nn antere dan so leker. Ek so duler ti pli gran ankor kan madam la finn al gayn de zanfan par so ladilter!—Osea 1:2-9.

19. Ki persekisyon profet Mikaya ti gayne?

¹⁹ Persekisyon li enn lot pikan dan laser. Anu get legzanp profet Mikaya. Sirman Mikaya ki ti enn kikenn drwat, ti turmante kan li ti truv move Lerwa Aab anture ar bann fos  profet, ek krwar zot bann gro mansonz. Apre sa, kan Mikaya ti dir Aab ki tu sa bann profet la ti pe koz par “enn lespri ki anbet dimunn,” ki sef tu sa bann frod la finn fer? Li finn “tap Mikaya enn kalot lor so lazu”! Seki pli pir ankor se fason ki Aab finn reazir kan Zeova finn averti li ki so kanpayn pu repran Ramot-gilead pa ti pu reysi. Li’nn donn lord pu zet Mikaya dan prizon ek diminye so rasyon manze. (1 Lerwa 22:6, 9, 15-17, 23-28) Rapel usi Zeremi ek manyer ki so bann persekiter ki ti anvi tuy li, ti tret li.—Zeremi 20:1-9.

20. Ki bann pikan Naomi ti bizin andire, ek ki rekonpans li finn gayne?

²⁰ Perdi nu bann pros dan lamor, sa usi enn lot sityasyon amer ki kapav kuma enn pikan dan nu laser. Naomi ti bizin andir sufrans lamor so mari ek so de garson. Alor ki li ti ankor pe resanti sa bann ku dir la, li finn return Betleem. Li ti dir so bann kamarad pa apel li Naomi, me Mara, enn non ki ti reflekte so lavi amer ki li ti pe amene la. Kan mem sa, alafin, Zeova finn rekonpans so landirans kan Li’nn donn li enn ti zanfan ki ti pu ena privilez plitar pu ena Mesi dan so desandans.—Rit 1:3-5, 19-21; 4:13-17; Matye 1:1, 5.

21, 22. Kuma eski Zob ti afekte par seki li ti’nn perdi, ek kuma li finn reazir?

²¹ Pans ki kantite Zob ti gayn sok kan li ti aprann ki enn sel ku so dis zanfan finn konn enn lamor vyolan, san kont lapert so bann zanimo ek so bann serviter. Enn sel ku, tu so lemond finn degringole! Apre sa, alor ki Zob ti ankor tuzur bulverse avek sa bann maler la, Satan finn avoy enn maladi lor li. Kitfwa Zob ti panse ki sa move maladi la ti pu tuy li. So bann duler ti telman for ki li ti santi ki lamor ti pu enn sulazman.—Zob 1:13-20; 2:7, 8.

²² Dan so lapenn ek so traka, so madam vinn kriy ar li: “Modi Bondye ek mor!” Kuma dir ti mank zis sa! Sa ti vremem enn pikan dan so laser, ki li pe sufer deza! Apre sa, trwa kamarad Zob, olye konsol li, finn vinn atak li avek enn fos rezonnman. Zot ti akiz li ki li finn komet bann pese an sekre ek zot ti pretann ki li ti responsab so maler. Zot bann fos largiman finn fer sa bann pikan la anter plis ankor dan so laser. Rapel usi ki Zob pa ti kone kifer li ti pe gayn tu sa bann kitsoz la, ni li ti kone ki Bondye pa ti pu les li mor. Kan mem sa, “dan tusala Zob pa finn fer pese, ni li pa finn koz okenn mal lor Bondye.” (Zob 1:22; 2:9, 10; 3:3; 14:13; 30:17) Mem si li ti afekte par buku pikan alafwa, zame li pa finn abandonn so latasman fidel ar Bondye. Sa vremem ankuraz nu!

23. Kifer eski bann fidel ki nu finn egzamine finn kapav andir diferan pikan dan laser?

²³ Ena ankor enn gran kantite legzanp parey kuma bann ki nu’nn fek site. Dan Labib ena ankor buku lezot legzanp. Tu sa bann serviter fidel la ti bizin lit avek zot prop pikan sinbolik. Ek zot ti bizin fer fas avek plizir kalite problem. Purtan, zot tu ti ena enn kitsoz an komin. Personn pa ti abandonn so servis pu Zeova. Malgre tu zot bann leprev difisil, zot finn vink Satan avek lafors ki Zeova ti donn zot. Kuma? Prosin lartik pu reponn sa kestyon la ek pu montre nu kuma nu’si nu kapav fer fas avek ninport ki kitsoz ki kuma enn pikan dan nu laser.

[Not anba paz]

Kuma Eski U Pu Reponn?

• Kifer eski kapav konpar bann problem ki nu gayne kuma bann pikan dan laser?

• Ki bann pikan Mefiboset ek Neemya ti bizin andire?

• Parmi bann legzanp zom ek fam ki finn andir plizir pikan dan laser ki Labib site, lekel u truv partikilyerman tusan, ek kifer?

[Kestyon]

[Zimaz lor paz 9]

Mefiboset ti bizin fer fas avek so andikap, mansonz, ek dekurazman

[Zimaz lor paz 11]

Neemya ti persevere malgre lopozisyon