TU DESIZYON ki bann paran pran bizin ena enn lefe lor zot bann zanfan. Sa li vre zordi parey kuma sa ti arive dan zardin Edenn. Dezobeisans Adan ek Ev finn ena enn gran lefe lor limanite. (Zenez 2:15, 16; 3:1-6; Romin 5:12) Kan mem sa, sakenn parmi nu kapav devlop enn bon relasyon avek nu Kreater si nu anvi. Nu konpran sa pwin la kan nu get zistwar Kain ek Abel, de premye frer dan listwar imin.

Okenn plas dan Labib pa dir ki Bondye ti koz avek Adan ek Ev apre ki Li ti fini pus zot andeor Edenn. Me, sa pa finn anpes Zeova koz avek zot bann garson. Sirman ki atraver zot bann paran, Kain ek Abel ti aprann seki ti finn arive. Zot ti kapav truv “bann seribin ek lepe dife ki ti pe tuletan turne pu bar semin ki al kot pye lavi.” (Zenez 3:24) Sa bann zom la finn usi temwin seki Zeova ti dir, ki laswer ek duler ti pu fer parti dan lavi enn dimunn.—Zenez 3:16, 19.

Sirman Kain ek Abel ti konn usi bann parol ki Zeova ti dir serpan: “Mo pu met enn laenn ant twa ek sa fam la ek ant to semans ek so semans. Li pu kraz to latet ek to pu mord so talon.” (Zenez 3:15) Seki Kain ek Abel ti kone konsernan Zeova ti pu ed zot devlop avek Li enn relasyon ki Li apruve.

Letan zot finn reflesi lor profesi ki Zeova ti fer ek lor so bann kalite kuma enn Kikenn ki fer dibyin ek ki ranpli ar lamur, sirman Kain ek Abel finn devlop enn dezir pu gayn faver Bondye. Me ziska ki pwin zot ti pu kiltiv sa dezir la? Eski zot ti pu azir dapre dezir ki ti dan zot depi zot nesans, pu ador Bondye ek devlop zot spirityalite ziska ki zot gayn lafwa an Li?—Matye 5:3.

Bann Frer Amenn Bann Ofrand

Apre enn sertin letan, Kain ek Abel finn amenn bann ofrand pu Zeova. Kain finn prezant bann kitsoz ki later finn raporte ek Abel finn ofer bann premye-ne dan so trupo. (Zenez 4:3, 4) Kitfwa sa ler la zot ti ena apepre 100 an, parski Adan ti ena 130 an kan li ti vinn papa so trwazyem garson, Set.—Zenez 4:25; 5:3.

Zot bann ofrand ti indike ki Kain ek Abel ti rekonet ki zot ti bann peser ek zot ti anvi gayn faver Bondye. Sirman, zot finn bizin reflesi inpe lor promes ki Zeova ti fer an rapor avek serpan ek Semans sa fam la. Labib pa dir nu komye letan ek ki kalite zefor Kain ek Abel finn bizin furni pu devlop enn relasyon apruve avek Zeova. Me manyer ki Zeova finn reazir anver zot bann ofrand donn nu enn lide seki sakenn ti ena dan fon so leker.

Sertin spesyalis Labib panse ki Ev ti krwar ki Kain ti sa “semans” ki ti pu detrir serpan la, parski letan Kain ti ne, Ev ti dir: “Mo finn donn nesans enn zom avek led Zeova.” (Zenez 4:1) Si Kain ti krwar sa, abe li ti pe fer bel erer. Parkont, Abel li, li ti ofer so sakrifis avek lafwa. Akoz sa, “par lafwa Abel ti ofer Bondye enn sakrifis ki ti ena enn pli gran valer ki sakrifis Kain.”—Ebre 11:4.

Abel ti ena lintelizans spirityel, ki Kain li, li pa ti ena. Me, sa li pa ti sel diferans ki ti  ena ant zot. Ti ena usi enn diferans dan zot latitid. Ala kifer, “Zeova ti pe get Abel ek so sakrifis avek faver, me li pa ti get Kain ek so sakrifis avek okenn faver.” Kitfwa Kain pa ti reflesi lor valer so ofrand; li ti fer sa zis parski bizin fer. Me Bondye pa aksepte enn ladorasyon zis par form. Kain finn devlop enn leker move, ek Zeova ti fini dekuver so bann move lintansyon. Kain finn montre so vre latitid par fason ki li finn reazir kan Bondye ti rezet so sakrifis. Olye ki li sey koriz so latitid ek so bann lintansyon, “Kain finn byin an koler, ek so figir finn vinn long.” (Zenez 4:5) So manyer azir finn montre so bann move lide ek so bann move lintansyon.

Lavertisman ek Reaksyon

Pwiski Bondye ti konn latitid Kain, Li finn konsey li: “Kifer eski to pe an koler kumsa ek kifer to figir finn vinn long? Si to sanze ek to fer seki bon, eski to pa pu gayn loner? Me si to pa sanze ek to pa fer seki bon, ena pese dan lantre, ek li pe atann twa avek inpasyans, ek eski twa, to pu vinn so met?”—Zenez 4:6, 7.

Nu kapav tir enn leson ladan. An realite, pese li deryer laport; li pe rod lokazyon pu devor nu. Me, Bondye finn donn nu liberte pu swazir, ek nu kapav swazir pu fer seki bon. Zeova ti invit Kain pu ‘sanze ek fer seki bon,’ me Li pa ti fors li pu sanze. Kain finn swazir pu fer kuma li anvi.

Zistwar la kontiyne: “Apre sa Kain dir so frer Abel: ‘Anu al dan karo.’ Lerla, kan zot finn ariv dan karo, Kain kumans bat li avek vyolans ziska ki li tuy li.” (Zenez 4:8) Alor, Kain finn vinn enn kriminel dezobeisan, ki san pitye. Kan Zeova finn demann li: “Kot Abel, to frer?”, li pa finn ena enn su regre. Plito, san okenn santiman ek respe, li finn reponn: “Mo pa kone. Eski mo gardyin mo frer mwa?” (Zenez 4:9) Pwiski li finn koz enn gro manti ek li finn rezet tu responsabilite, sa montre byin kuma li ti ena enn leker ros.

Zeova finn modi Kain ek finn pus li andeor bann vwazinaz Edenn. Zeova ti deza fini modi later avan. Me asterla, sa malediksyon la pu ena plis lefe lor Kain parski later kot li pu plante pa pu raport nanyin. Li ti pu vinn enn vakabon ek enn kikenn ki tuletan pe  bizin sove lor later. Kain ti truv zizman Zeova tro sever, parski li ti per pangar enn kikenn rod tuy li pu vanz lamor Abel. Me, li pa finn montre ditu ki li finn repanti sinserman. Kan mem, Zeova finn etabli “enn siyn” pu Kain—sirman enn lord ofisyel ki tu dimunn sa lepok la ti kone ek ti obeir, ki ti defann tuy Kain par vanzans.—Zenez 4:10-15.

Lerla Kain “finn al lwin ar figir Zeova ek li finn al res dan enn peyi dan Les Edenn, ki apel Peyi Fizitif.” (Zenez 4:16) Apre ki li finn pran enn madam parmi so bann ser uswa so bann nyes, li finn ranz enn lavil ek li finn apel li Enok, dapre non so premye garson. Lamek, enn desandan Kain, ti gayn li usi bann tandans vyolan parey kuma so anset, ki pa ti ena okenn latasman pu Bondye. Me desandans Kain ti detrir net dan Deliz lepok Noe.—Zenez 4:17-24.

Bann Leson pu Nu

Nu kapav tir leson dan sa zistwar Kain ek Abel la. Lapot Zan ti ankuraz bann Kretyin pu kontan zot kamarad, “pa kuma Kain, ki ti sorti kot sa kikenn ki move la ek ki ti tuy so frer.” “Bann travay [Kain] ti move, me travay so frer ti drwat.” Zan dir usi: “Tu dimunn ki ayir so frer, li enn kriminel, ek zot kone ki okenn kriminel pena lavi pu tuletan dan li.” Wi, fason ki nu tret nu bann frer ek ser Kretyin ena enn lefe lor nu relasyon avek Bondye ek lor nu lavenir. Nu pa kapav ayir nu bann frer ek ser ek an mem tan gayn faver Bondye.—1 Zan 3:11-15; 4:20.

Pena dut ki Kain ek Abel bizin finn elve dan mem fason, me purtan Kain ti mank lafwa dan Bondye. Avredir, li finn manifeste lespri Dyab, ki premye ‘kriminel ek papa mansonz.’ (Zan 8:44) Kondwit Kain montre ki nu tu nu ena enn swa. Bann ki swazir pu fer pese separ zot ar Bondye, ek Zeova amenn so bann zizman lor bann ki pa repanti.

Par kont Abel li, li ti ena lafwa dan Zeova. Dayer, “par lafwa Abel finn ofer Bondye enn sakrifis ki ti ena enn pli gran valer ki sakrifis Kain; ek par so lafwa li finn gayn temwaynaz ki li ti drwat letan Bondye finn rann temwaynaz konsernan so bann don.” Mem si dan Labib pa sit okenn parol ki Abel ti prononse, par so bon legzanp lafwa, Abel “pe tuzur koze.”—Ebre 11:4.

Abel premye dan enn long lalis bann dimunn ki finn gard zot latasman fidel ar Bondye. Pa finn bliye so disan, ki ‘ti kriy ver Zeova depi lor later.’ (Zenez 4:10; Lik 11:48-51) Si nu ena lafwa kuma Abel, nu’si nu kapav gayn enn relasyon ki ena valer ek ki dir pu tuletan avek Zeova.

[Lankadre lor paz 20]

PLANTER EK BERZE

Kiltiv later ek pran swin bann zanimo ti parmi bann premye travay ki Bondye ti donn Adan. (Zenez 1:28; 2:15; 3:23) So garson Kain ti swazir pu vinn planter, ek Abel ti vinn enn berze. (Zenez 4:2) Me pwiski bann dimunn ti pe manz zis frwi ek legim ziska lepok apre Deliz, kifer alor ti bizin elve muton?—Zenez 1:29; 9:3, 4.

Pu ki bann muton kapav byin devlope, zot bizin ki dimunn okip zot. Travay Abel montre ki depi kumansman listwar limanite, bann dimunn ti elve bann zanimo domestik. Labib pa dir si bann premye imin ti nuri zot avek dile bann zanimo, me mem si zot ti vezetaryin, sa pa ti anpes zot servi lalenn muton. Pa fini, kan bann muton mor, kapav servi zot lapo pu fer enn kantite kitsoz.

Par egzanp, pu abiy Adan ek Ev, Zeova ti donn zot “bann long linz an lapo.”—Zenez 3:21.

Antuka, li paret rezonab pu panse ki avan, Kain ek Abel ti pe korper avek zot kamarad. Sakenn ti pe amenn enn kitsoz dan lakaz pu ki bann manb zot fami ena linz pu mete ek manze pu nuri zot.

[Zimaz lor paz 21]

“Bann travay [Kain] ti move, me bann travay so frer ti drwat”