BANN PARAN
6: Disipline
KI SAVEDIR
Disiplinn vedir gide ouswa ansegne. Parfwa, sa inplik koriz move manier enn zanfan. Me bien souvan, sa inplik form zanfan-la ek ansegn li bann prinsip moral ki pou ed li aprann pran bann bon desizion depi koumansman mem.
KIFER LI INPORTAN
Dan bann dernie dizenn lane ki’nn pase, disiplinn inn preske disparet dan sertin fami. Kifer? Parski bann paran per tansion sa fer zot zanfan perdi konfians an zotmem. Me selman, bann paran ki ena sazes etabli bann reg ki rezonab ek zot form zot zanfan pou swiv sa bann reg-la.
“Bann zanfan bizin bann limit, setadir bizin dir zot seki zot ena drwa ek pena drwa fer. Sa pou ed zot grandi ek vinn bann adilt ki responsab. San disiplinn, bann zanfan kouma enn bato ki pena gouvernay, ki pou perdi so sime ouswa mem fer nofraz.”—Pamela.
SEKI TO KAPAV FER
To bizin ferm. Si to zanfan pa respekte to bann reg, pini li. Me si li swiv to bann reg, felisit li.
“Souvan mo felisit mo bann zanfan parski zot montre zot obeisan dan enn lemond kot lobeisans bien rar. Parski mo abitie felisit zot, zot aksepte pli fasilman ki mo disiplinn zot kan mo bizin fer li.”—Christine.
PRINSIP LABIB: “Enn dimoun li rekolte seki li finn seme.”—Galat 6:7.
To bizin rezonab. Kan to disiplinn to zanfan, pran an konsiderasion so laz, so kapasite, ek ki kantite sa betiz ki li’nn fer la li grav. Bien souvan, bann pinision pli efikas kan zot ena enn lien avek erer ki zanfan-la inn fer. Par exanp, si li pa obeir bann reg ki to’nn fixe lor fason ki li bizin servi so portab, to kapav pran portab-la avek li ouswa to limit so itilizasion pandan enn sertenn tan. Me anmemtan, evit ankoler pou bann kitsoz ki pa inportan zis parski sa agas twa.
“Mo esey konpran si mo zanfan inn dezobeir mwa par expre ouswa si li’nn zis fer enn erer. Ena enn diferans ant enn move tandans ki bizin derasine ek enn erer ki zis bizin korize.”—Wendell.
PRINSIP LABIB: “Pa pous zot zanfan abou atansion zot dekouraze.”—Kolosien 3:21.
To bizin ena lamour. Bann zanfan aksepte disiplinn pli fasilman kan zot kone ki rezon prinsipal sa disiplinn-la se lamour ki zot paran ena pou zot.
“Kan nou garson ti fer bann erer, nou ti fer li konpran ki nou ti fier pou tou bann bon desizion ki li ti pran dan lepase. Nou ti explik li ki so erer pa ti pou gat so repitasion tanki li fer bann sanzman ki neseser, ek ki nou ti la pou ed li.”—Daniel.
PRINSIP LABIB: “Lamour bien pasian, lamour li bon.”—1 Korintien 13:4.
