ESKI NOU PLANET POU KAPAV SIRVIV?
Nou Bann Lafore
SERTIN siantifik konpar bann lafore ki ena lor later, ar “poumon” ki enn dimounn servi pou respire ek ki permet li res vivan. Kifer? Parski parey kouma bann poumon, bann pie filtre ler ki nou respire. Zot absorb carbon dioxide, enn gaz ki kapav fer nou ditor. Zot osi larg loxizenn, enn gaz ki neseser dan ler ki nou bizin pou respire. Anviron 80% bann plant ek bann zanimo ki viv lor later res dan bann lafore. San sa bann lafore-la, zot pa ti pou kapav kontign viv.
Seki Pe Afekte Nou Bann Lafore
Sak lane, bann dimounn koup plizir milyar pie, sirtou pou fer bann terin agrikol. Depi lafin bann lane 1940, lamwatie bann Lafore (rain forests) ki ena dan lemond antie finn disparet.
Kan detrir enn lafore, tou bann plant ek bann zanimo ki viv ladan disparet osi.
Nou Planet Inn Kree dan enn Fason pou Sirviv
Sertin bann lafore ki’nn detrir, finn montre ki zot ena kapasite pou repouse ek mem vinn pli boukou. Pa tro lontan, bann ekolozis inn trouve ki bann pie ki’nn koupe dan enn lafore, kapav repouse bien vit ek lerla revinn enn lafore an bonn sante. Anou get de-trwa lexanp:
-
Bann siantifik inn obzerve ki ariv bann lafore ki’nn detrir pou fer bann terin agrikol, ek ki plitar bann dimounn inn abandonn sa bann terin-la. Enn letid ki’nn fer lor 2,200 terin dan Lamerik ek dan lwes Lafrik, finn montre ki sa bann terin abandone la kapav revinn bann lafore dan mwins ki di-z-an.
-
Dapre enn letid ki’nn pibliye dan magazinn Science, bann siantifik estime ki dan apepre 100 an, sa bann lafore-la kapav retourn kouma zot ti ete avan ki ti koup sa bann pie-la.
-
Pa tro lontan, bann siantifik dan Brezil ti fer enn letid pou gete si bann lafore ti pou repouse pli vit si bann dimounn ti replant bann pie laba.
-
Gete ki National Geographic dir lor sa letid-la: “Sa bann siantifik-la ti etone pou trouve ki li pa ti neseser ki bann dimounn met lame pou replant bann pie.” Dan zis sink an, sa bann terin-la “ti ranpli ar bann pie ki’nn pouse par zotmem.”
Seki Bann Dimounn Pe Fer
Dan lemond antie, bann dimounn pe fer zefor pou protez bann lafore ki deza existe ek pou replant bann pie dan bann lafore ki’nn andomaze. Nations unies dir ki gras-a sa bann zefor-la, “destriksion bann lafore dan lemond antie finn diminie par plis ki 50%” konpare ar 25 an avan.
Me sa bann zefor-la zot pa ase pou sov nou bann lafore. Enn rapor ki’nn pibliye par lorganizasion Global Forest Watch dir ki “kantite bann lafore tropikal ki bann dimounn pe kontign detrir, pa’nn diminie sa bann dernie lane-la.”
Bann konpagni ki koup bann pie san lotorizasion gouvernman, pe fer plizir milyar dolar profi ar sa bann dibwa-la. Akoz zot gagn boukou kas ar sa, zot pe kontign detrir bann lafore tropikal.
Bann lekip ki travay pou protez bann lafore pe planifie ki bann pie zot kapav koupe ek kotsa zot kapav plant bann nouvo lafore
Ki Lespwar Nou Ena—Seki Labib Dir
“Zeova a ti fer tou kalite pie ki zoli pou gete ek ki bon pou manze, pouse lor later.”—Zenez 2:9.
Kreater tou bann lafore ti kree bann lafore dan enn fason kot bann imin ti pou kapav kontign servi ek profit bann lafore-la. Li anvi prezerv nou bann lafore, bann plant ek bann zanimo ki viv ladan.
Labib montre nou ki Bondie pa pou permet bann dimounn egois detrir nou planet ek tou bann kreatir ki viv lor la. Get lartik “Bondie Promet ki Nou Planet Pou Sirviv,” lor paz 15.
a Zeova se nom Bondie.—Psom 83:18, NW.
