“Bann mari bizin kontan zot madam parey kouma zot prop lekor. Enn misie ki kontan so madam kontan limem, parski zame personn pa’nn ena laenn pou so prop lekor, okontrer li nouri li ek li pran li swin.”​—EFEZIEN 5:28, 29, NW.

Enn mari, limem sef lafami. (Efezien 5:23, NW) Me selman, enn bon mari, li pa enn kikenn ki dir ouswa exizan. Okontrer, li donn so madam loner ek li pran li swin lor plan materyel ek emosionel. Li pa touletan atann ki bann kitsoz pas kouma li, li anvi, me plito, li fer zefor pou fer so madam plezir. (Filipien 2:4) Li partaz so bann santiman ek so bann panse avek so madam, ek li ekout so madam kan li koze. Li pa pou vinn “amer” ar li, fer li ditor fizikman ouswa dir li bann kitsoz ki pou bles li.​—Kolosien 3:19, NW.

“Madam-la . . . bizin ena enn profon respe pou so mari.”​—EFEZIEN 5:33, NW.

Kan enn madam respekte so mari ek soutenir so bann desizion, li ede pou ki ena lape dan lafami. Si so mari fer enn erer, li pa pou denigre li, okontrer li pou kontign azir avek douser ek respe. (1 Pier 3:4) Kan li ena pou koz ar so mari lor enn problem, li pou swazir bon moman pou fer li ek li pou koz avek respe.​—Ekleziast 3:7.

“Enn zom pou . . . atase ar so madam, ek zot pou vinn enn sel laser.”​—ZENEZ 2:24.

Kan enn misie ek enn madam marye, zot vinn enn nouvo fami. Alor, enn koup bizin fer boukou zefor pou gard zot maryaz for. Par exanp, zot kapav fer sa, kan zot ouver zot leker ar zot kamarad ek fer bann ti kitsoz pou montre ki zot kontan zot kamarad. Zot bizin osi res fidel anver zot kamarad ek pa gagn bann relasion sexiel andeor maryaz. Enn kikenn ki infidel li kriel parski li fer so konzwin boukou ditor. Sa kapav kas konfians ki ena dan enn koup ek mem separ enn fami.​—Ebre 13:4.

“Ansegn enn [zanfan] ki semin li bizin pran; mem kan li pou vinn vie, li pa pou kit li.”​—PROVERB 22:6.

Bondie finn donn bann paran responsabilite pou form zot zanfan. Sa vedir ki zot bizin ansegn zot bann zanfan kouma pou konport zot ek donn zot enn bon lexanp. (Deteronom 6:6, 7) Kan enn zanfan pa azir bien, enn paran ki ena sazes pa pou ankoler brit. Okontrer, li pou ‘rapid pou ekoute, me li pa pou prese pou koze, ek li pa pou ankoler vit.’ (Zak 1:19) Si enn paran trouve ki li bizin koriz so zanfan, li pou fer li avek lamour, pa kan li ankoler.

“Bann zanfan zot bizin obeir zot paran . . . ‘Ena respe pou to papa ek to mama.’”​—EFEZIEN 6:1, 2.

Bann zanfan bizin obeir zot bann paran ek ena enn profon respe pou zot. Kan bann zanfan respekte zot paran, sa fer ki ena lazwa ek lape dan lakaz ek dan lafami. Bann zanfan ki adilt montre ki zot respekte zot paran kan zot veye ki bannla bien. Par exanp, zot kapav ede pou ki lakaz zot paran res dan enn bon leta ouswa donn zot paran enn ti kas si zot bizin.​—1 Timote 5:3, 4.