1-3. (a) Dan ki lepok kitfwa ti ekrir Psom 147? (b) Kan nou examinn Psom 147, ki nou kapav aprann?

 BIEN souvan, nou loue ouswa fer konpliman enn dimounn parski nou inpresione ar seki li’nn dir ouswa fer. Zeova merit ankor plis ki nou loue Li! Nou loue Li pou so gran pouvwar, ki nou trouve atraver bann kitsoz extraordiner ki Li’nn kree. Nou osi loue Li pou gran lamour ki Li ena pou nou. Li’nn montre sa kan Li’nn donn so prop Garson an sakrifis.

² Kan nou lir Psom 147, nou trouv bien ki sa ekrivin-la ti ena enn gran dezir pou loue Zeova. Li ti osi ankouraz lezot pou loue Bondie ansam avek li.​—Lir Psom 147:1, 7, 12, NW.

³ Nou pa kone kisannla ki’nn ekrir Psom 147. Me sa ekrivin-la kitfwa ti viv dan lepok kot bann Izraelit ti retourn Zerizalem, apre ki Zeova ti liber zot depi Babilonn. (Psom 147:2) Sa ekrivin-la ti loue Zeova parski pep Bondie ti pou kapav rekoumans ador Zeova dan zot prop pei.  Apre sa, sa ekrivin-la ti donn lezot rezon pou loue Zeova. Ki sa bann rezon-la sa? Ek ki bann rezon to ena pou dir avek lazwa “Alelouya!,” ouswa “Loue Yah!”?​—Psom 147:1, NW, not.

4. Kan Lerwa Sirus ti liber bann Izraelit, ki zot ti resanti ek kifer?

⁴ Esey mazine seki bann Izraelit ti resanti kan zot ti an exil dan Babilonn. Bann ki ti amenn zot laba ti boufonn zot ek ti dir: “Sant enn sante ki sorti Sion.” Me bann Zwif pa ti anvi sante parski Zerizalem ti’nn detrir ek sa ti fer zot bien tris. (Psom 137:1-3, 6) Zot ti ena gran sagrin dan zot leker, ek zot ti bizin rekonfor. Me parey kouma Parol Bondie ti anonse, Zeova ti ed so pep. Kouma? Lerwa Pers, Sirus, ki ti gagn viktwar lor Babilonn, ti dir konsernan Zeova: “Li finn konfie mwa mision pou ranz enn lakaz pou Li dan Zerizalem.” Sirus ti osi dir bann Izraelit: “Ninport kisannla parmi zot ki form parti dan so pep, mo priye ki Zeova so Bondie ar li, ek les li monte.” (2 Kronik 36:23) Pena dout ki sa ti bien rekonfort bann Zwif ki ti dan Babilonn!

5. Ki sa ekrivin Psom la ti dir konsernan Zeova?

⁵ Zeova pa ti rekonfort zis nasion Izrael, me Li ti osi rekonfort sak Izraelit. Zordi, Zeova fer parey pou nou. Sa ekrivin Psom la ti dir ki Bondie geri bann ki ena “leker brize, li met pansman lor zot blesir.” (Psom 147:3) Kan nou malad ouswa deprime, nou kapav sir ki Zeova gagn nou traka. Zeova bien anvi rekonfort nou ek remont nou moral. (Psom 34:18, NW; Izai 57:15) Li donn nou sazes ek lafors pou ki nou kapav sirmont ninport ki problem ki nou gagne.​—Zak 1:5.

6. Ki nou aprann ar seki sa ekrivin Psom la ti dir dan Psom 147:4? (Get zimaz dan koumansman lartik.)

⁶ Apre sa, sa ekrivin Psom la ti get lesiel ek ti dir ki Zeova “kont kantite zetwal ki ena” ek “Li apel zot tou par zot nom.” (Psom 147:4, NW.) Sa ekrivin-la ti kapav trouv bann zetwal, me li pa ti kone komie zetwal ena. Zordi, bann siantis kone ki ena plizir milyar zetwal dan nou Galaxi. Ek kitfwa ena plizir milyar galaxi dan liniver! Bann dimounn pa kapav kont tou bann zetwal, me nou Kreater Li, Li kapav. Li konn bann zetwal telman bien, ki Li’nn donn sakenn enn nom. (1 Korintien 15:41) Bondie kone kot sak zetwal ete, alor pena dout ki Li konn twa personelman. Li touletan kone kot to ete, seki to pe resanti, ek seki to bizin!

7, 8. (a) Ki Zeova kone lor nou? (b) Donn enn lexanp pou montre ki Zeova konpran nou.

⁷ Zeova konpran seki to pe bizin andire ek Li ena kapasite pou ed twa sirmont to bann difikilte. (Lir Psom 147:5, NW.) Kitfwa to trouv to sitiasion extra difisil ek to panse ki to pa pou kapav sirmont sa. Bondie konpran ki nou  ena bann limit; Li “kone ki nou sorti dan lapousier.” (Psom 103:14) Nou inparfe, alor a-sak fwa nou fer mem erer, ek parfwa sa fer nou dekouraze. Ena fwa kot nou regret sertin kitsoz ki nou’nn dir, sertin move dezir ouswa move panse ki nou finn ena. Zeova Li, Li pa fer okenn erer, me kanmem sa Li konpran seki nou resanti.​—Izai 40:28.

⁸ Eski tomem to’nn deza resanti kouma Zeova finn ed twa sirmont enn difikilte avek so lame bien pwisan? (Izai 41:10, 13) Anou pran lexanp enn ser ki apel Kyoko. Li ti enn pionie ek li ti gagn enn nouvo afektasion. Selman, li ti bien dekouraze kan li ti al dan so nouvo teritwar. Me kouma eski Kyoko ti kone ki Zeova ti konpran so problem? Dan so nouvo kongregasion, ti ena boukou dimounn ki ti konpran seki li ti pe resanti. Li ti ena linpresion ki Zeova ti pe dir li: “Mo kontan twa, pa zis parski to enn pionie, me parski to mo tifi ek parski to’nn vwe to lavi ar mwa. Mo anvi ki to kontan lavi ki to pe amene antan ki mo Temwin!” Kouma Zeova finn montre twa ki gras-a “so lintelizans [ki] pena limit” Li kapav konpran twa?

9, 10. Kan Zeova ed nou, ki kitsoz pli inportan Li donn nou? Donn enn lexanp.

⁹ Nou tou nou bizin bann kitsoz kouma manze, linz ek enn plas pou reste. Kitfwa to trakase tansion to pa pou ena ase manze pou manze. Me Zeova inn fer later dan enn fason ki li prodir ase manze pou tou So bann kreatir. Mem “pou ti korbo kan zot reklam nouritir.” (Lir Psom 147:8, 9.) Si Zeova nouri bann korbo, nou kapav sir ki Li pou donn nou bann kitsoz materyel ki nou bizin.​—Psom 37:25.

¹⁰ Me seki pli inportan, Zeova donn nou seki nou bizin pou ki nou kontign ena enn lafwa for, ek Li donn nou “lape Bondie ki depas tou lintelizans.” (Filipien 4:6, 7) Enn frer ki apel Mutsuo ek so madam ti trouve kouma Zeova ti ed zot. Kan ti ena enn tsunami dan Japon an 2011, zot ti manke mor. Me erezman zot ti reisi mont lao zot lakaz. Sa zour-la, zot ti perdi preske tou zot bann zafer. Zot ti pas lanwit dan enn lasam kot fer nwar ek fre lor deziem letaz zot lakaz. Landemin gramatin, zot ti rod enn kitsoz ki ti pou ankouraz zot. Sel kitsoz ki zot ti trouve, se l’Annuaire 2006 des Témoins de Jéhovah. Kan Mutsuo ti pe tourn bann paz sa l’Annuaire-la, li’nn trouv tit « Le tsunami le plus meurtrier jamais recensé ». Sa lartik-la ti pe koz lor enn tranbleman-de-ter ki ti ena dan Sumatra an 2004, ek ki ti provok tsunami ki’nn fer pli boukou dega dan listwar. Kan Mutsuo ek so madam ti pe lir lexperyans zot bann frer ek ser, sa ti fer zot plore. Zot ti santi ki Zeova ti pe donn zot lankourazman ki zot ti bizin. Me, Zeova ti osi pran zot swin dan lezot fason. Par exanp, bann Temwin dan lezot parti dan Japon ti amenn manze ek linz pou zot. Me seki ti plis donn zot lafors, se kan lorganizasion Zeova ti avoy bann frer pou vinn vizit zot kongregasion. Mutsuo dir: “Mo ti santi ki Zeova ti akote sakenn parmi nou ek ki Li ti pe gagn nou traka. Sa ti bien  rekonfortan!” An premie, Zeova donn nou seki nou bizin pou gard nou lafwa for, ek apre Li donn nou bann kitsoz materyel ki nou bizin.

11. Ki nou bizin fer pou gagn led Bondie?

¹¹ Zeova “relev bann ki ena limilite.” Zeova kontan nou ek Li touletan pre pou ed nou. (Psom 147:6a, NW.) Ki nou bizin fer pou gagn so led? Nou bizin ena bann bon relasion avek Li. Ek pou nou kapav fer sa, nou bizin ena limilite. (Sefania 2:3) Bann dimounn ki ena limilite kont lor Zeova pou eliminn tou bann linzistis ek pou tir tou zot soufrans. Sa bann dimounn-la ena faver Zeova.

12, 13. (a) Pou ki Bondie ed nou, ki bann kitsoz nou bizin rezete? (b) Ki kalite dimounn Zeova kontan?

¹² Me dan enn lot kote, Bondie “zet  bann move anba.” (Psom 147:6b, NW.) Nou pa’le ki sa ariv nou! Nou anvi ki Bondie montre nou so lamour fidel. Alor, nou bizin ena laenn pou bann kitsoz ki Li deteste. (Psom 97:10) Par exanp, nou bizin ena laenn pou bann pratik sexiel ki imoral. Savedir ki nou bizin rezet bann kitsoz ki kapav pous nou pou komet sa bann pratik-la. Parmi ena pornografi. (Psom 119:37; Matie 5:28) Parfwa li bien difisil pou lit kont sa, me li vo lapenn nou fer li parski nou pou gagn benediksion Zeova.

¹³ Nou pa pou kapav fer sa konba-la tousel. Nou bizin kont lor Zeova. Eski Li pou kontan si nou kont lor bann kitsoz ki ena dan sa lemond-la, kouma bann dimounn fer? Non, Zeova “pa donn gran valer lafors enn seval.” Eski nou bizin kont lor nou prop lafors ouswa lor lezot dimounn? Zeova pa inpresione ar “vites enn atlet.” (Psom 147:10) Okontrer, nou bizin kontign priye Zeova pou gagn so led ek sipliy Li pou ed nou konbat nou bann febles. Nou kapav sir ki Zeova zame pa pou fatige tann bann lapriyer koumsa. Labib dir: “Zeova kontan bann ki ena lakrint pou Li, bann ki pe atann so lamour fidel.” (Psom 147:11, NW.) Zeova fidel ek Li kontan nou, alor nou kone ki Li pou kontign ed nou pou konbat nou bann move dezir.

14. Ki lasirans sa ekrivin Psom la ti ena?

¹⁴ Zeova rasir nou ki Li pou ed nou kan nou pas par bann difikilte. Kan bann Izraelit ti retourn Zerizalem, sa ekrivin Psom la ti medit lor fason ki Zeova ti pe ed So pep. Li ti sante: “Li ranforsi sekirite bann laport lantouraz lavil; li beni lepep ki viv dan lavil-la. Li vey sekirite frontier pei pou ki ena lape.” (Psom 147:13, 14) Sa ekrivin Psom la ti santi li an sekirite parski Zeova ti pou ranforsi laport lavil. Sa ti rasir li ki Zeova ti pou protez so pep.

15-17. (a) Ki santiman parfwa nou kapav ena kan nou pe pas par bann difikilte, me kouma Zeova servi so Parol pou ed nou? (b) Donn enn lexanp pou montre ki Parol Bondie ‘toutswit galoupe’ pou ed nou.

 ¹⁵ Kitfwa to trakase parski to pe gagn bann difikilte, me Zeova kapav donn twa sazes pou fer fas ar to bann difikilte. Ekrivin Psom 147 ti dir ki Bondie “avoy so lord lor later e so parol toutswit galoup ver so destinasion.” Apre sa, sa ekrivin-la ti koz lor lanez, glason, ek lagrel ek li ti demande: “Ki sannla kapav tini kont sa freser la?” Apre sa li ti dir ki Zeova “donn lord e . . . [zot] fonn.” (Psom 147:15-18) Nou Bondie konn tou kitsoz ek kapav fer ninport ki kitsoz. Li kontrol lagrel ek lanez. Alor, pena dout ki Li kapav ed twa pou sirmont ninport ki problem.

¹⁶ Azordi, Zeova gid nou par so Parol Labib. Sa ekrivin Psom la ti dir ki Parol Zeova ‘toutswit galoupe’ pou ed nou. Bondie gid nou dan bon fason ek dan bon moman. Reflesi kouma Li finn ed twa atraver Labib, bann piblikasion ki “lesklav fidel ek saz” prodir, Program Televizion JW, jw.org, bann ansien, ek bann frer ek ser. (Matie 24:45, NW.) Kitfwa tomem to finn deza trouve kouma Zeova finn ed twa toutswit.

¹⁷ Enn ser ki apel Simone finn trouve kouma Parol Bondie finn ed li. Li ti santi li initil, ek li ti panse ki li pa pe fer Zeova plezir. Me, kan li ti dekouraze, li ti kontign priye ek ti sipliy Zeova pou ed li. Li ti osi kontign etidie Labib. Simone ti dir: “Zame mo’nn trouv mwa dan enn sitiasion kot mo pa finn santi ki Zeova pe ed mwa ek pe gid mwa.” Sa finn ed li pou vinn pli pozitif.

18. Kifer to santi ki Zeova pros ar twa, ek ki bann rezon to ena pou “Loue Yah!”?

¹⁸ Sa ekrivin Psom la ti kone ki Zeova ti swazir nasion Izrael parmi tou bann nasion lor later pou vinn so pep. Zot ti sel nasion ki ti gagn “parol” Bondie ek so bann “regleman.” (Lir Psom 147:19, 20.) Zordi, nou ena enn gran loner pou port nom Bondie. Nou ena enn gran rekonesans ki nou konn Li, ki nou ena so Parol ki gid nou ek ki nou kapav ena bann bon relasion avek Li. Parey kouma ekrivin Psom 147, to ena boukou rezon pou “Loue Yah!” ek pou ankouraz lezot pou fer sa.