1, 2. Ki kitsoz Lediab ti servi pou fer bann imin plis ditor?

 SERTIN linvansion kouma telefonn, glob, loto, ek frizider inn amelior nou lavi toulezour. Ena lezot linvansion kouma fizi, sigaret, bann bom ki kasiet anba later, ek bann bom atomik, inn fer nou lavi vinn pli danzere. Me ena enn kitsoz ki pli vie ki tousala ek ki’nn fer bann imin plis ditor ankor. Ki sa kitsoz-la? Mansonz! Mansonz se dir enn kitsoz ki fos pou anbet ouswa tronp enn kikenn. Kisannla ti koz manti pou premie fwa? Lediab! Zezi Kris ti apel li “papa mansonz.” (Lir Zan 8:44, NW. a) Kan eski li ti koz manti pou premie fwa?

² Plizir milye lane finn pase depi ki Satan ti koz manti pou premie fwa dan zardin Edenn. Adan ek Ev ti pe viv ere dan enn zoli Paradi ki Zeova ti kree pou zot. Bondie ti dir zot ki, si zot ti manz frwi “pie konesans bon ek  move,” zot ti pou mor. Mem si Satan ti konn sa, li ti servi enn serpan pou dir Ev: “Non, vremem zot pa pou mor.” Samem ti premie mansonz. Satan ti dir osi: “Bondie kone ki zour zot manz sa frwi-la, zot lizie pou ouver, ek zot pou vinn kouma Bondie, zot pou konn seki bon ek seki pa bon.”​—Zenez 2:15-17; 3:1-5.

3. Kifer mansonz Satan ti fer ditor, ek ki ti arive akoz sa?

³ Satan ti koz manti pou fer ditor, parski li ti kone ki si Ev ti krwar li ek ti manz sa frwi-la, Ev ti pou mor. Ek se samem ki ti arive! Ev ek plitar Adan osi ti dezobeir lord Zeova, ek finalman zot inn mor. (Zenez 3:6; 5:5) Anplis, akoz pese Adan, “lamor finn tous tou dimoun.” An realite, “lamor finn manifeste so pouvwar, mem lor bann dimoun ki pa finn komet pese kouma Adam ti fer.” (Romin 5:12, 14) Se pou sa rezon-la ki nou inparfe ek ki nou pa viv pou touletan, kouma Bondie ti anvi pou nou. Me plito, nou viv zis “swasanndis-an, katrovin si lasante bon,” ek nou lavi ranpli ar “traka ek sagrin.” (Psom 90:10) Tousala inn arive parski Satan ti koz manti!

4. (a) Ki bann kestion nou bizin kapav reponn? (b) Dapre Psom 15:1, 2, kisannla kapav vinn kamarad Zeova?

⁴ Konsernan Satan, Zezi ti dir: “Li pa’nn tini ferm dan laverite, parski laverite pa dan li.” Satan pa’nn sanze. Li ankor touzour pe “met tou bann dimounn lor later antie dan lerer” avek so bann mansonz. (Revelasion 12:9, NW) Me nou, nou pa anvi ki Satan met nou dan lerer. Alor, nou bizin konn repons sa trwa kestion-la: Kouma eski Satan pe met bann dimounn dan lerer azordi? Kifer bann dimounn koz manti? Ek kouma nou kapav koz laverite touletan, pou ki nou pa perdi nou lamitie avek Zeova, parey kouma Adan ek Ev ti perdi sa lamitie-la?​—Lir Psom 15:1, 2, NW. b

5. Kouma Satan pe met bann dimounn dan lerer azordi?

⁵ Nou kapav anpes Satan anbet nou. Lapot Pol ti dir: “Nou kone ki li pe maniganse.” (2 Korintien 2:11) Nou kone ki Satan pe kontrol lemond antie. Li ena kontrol lor fos relizion, lor bann gouvernman koronpi, ek lor bann biznes ki gourman kas. (1 Zan 5:19) Alor, nou pa etone ki Satan ek so bann demon inflians bann ki ena pouvwar dan sa lemond-la pou vinn bann “manter.” (1 Timote 4:1, 2) Par exanp, sertin gran konpagni koz manti dan zot bann piblisite pou ankouraz bann dimounn aste zot bann prodwi ki danzere, ouswa zot anbet bann dimounn pou gagn zot kas.

6, 7. (a) Kifer li pli move ankor kan bann sef relizie koz manti? (b) Ki bann fos lansegnman to finn deza tann bann sef relizie koze?

⁶ Li pli move ankor kan bann sef relizie koz manti. Kifer? Parski si enn dimounn krwar zot bann fos lansegnman ek fer bann kitsoz ki Bondie pa kontan, sa dimounn-la kapav perdi posibilite pou viv pou touletan. (Oze 4:9) Zezi ti  kone ki bann sef relizie dan so lepok ti pe anbet bann dimounn. Avek kouraz, li ti dir zot: “Maler lor zot, bann skrib ek Farizien! Ipokrit! Parski zot fer letour lamer ek later pou konverti enn sel dimounn, ek kan li’nn konverti, zot fer li vinn enn kikenn ki merite al dan Lazeenn,” setadir detrir pou touletan. (Matie 23:15, NW) Zezi ti dir ki sa bann fos sef relizie la ti parey kouma zot papa Lediab, ki “enn kriminel.”​—Zan 8:44, NW.

⁷ Azordi osi ena boukou sef relizie. Kitfwa apel zot paster, pret, rabin, swami, ouswa zot ena bann lezot tit, me zot parey kouma bann Farizien. Zot pa ansegn laverite ki ena dan Parol Bondie, me zot finn “ranplas laverite lor Bondie par enn mansonz.” (Romin 1:18, 25) Zot ansegn bann fos lansegnman kouma lanfer dife, nam ki pa mor, reinkarnasion, ek zot dir ki Bondie aksepte lomosexialite ek maryaz ant bann dimounn mem sex.

8. Ki manti bann dirizan politik pou koze biento, me kouma eski nou bizin reazir?

⁸ Bann politisien osi finn servi mansonz pou anbet bann dimounn. Enn parmi bann pli gran manti ki zot pou koze biento, se ki zot finn amenn “lape ek sekirite” lor later. Me lerla, “enn sel kou enn destriksion pou vinn lor zot, san ki zot atann.” Alor, kan sa bann dirizan politik la dir ki sitiasion lemond pe ameliore, fode pa nou krwar zot. Laverite se ki nou “bien kone ki zour Zeova pe vini parey kouma enn voler dan lanwit.”​—1 Tesalonisien 5:1-4, NW.

9, 10. (a) Kifer bann dimounn koz manti, ek ki konsekans sa ena? (b) Ki kitsoz fode pa nou bliye lor Zeova?

⁹ Azordi, pa zis bann dimounn ki ena pouvwar dan sa lemond-la ki koz manti. Dan lartik “Kifer Nou Koz Manti,” Y. Bhattacharjee dir ki “koz manti deza form parti dan natir imin.” Setadir, boukou dimounn panse ki li normal pou koz manti. Bann dimounn souvan koz manti pou protez zotmem, kitfwa pou kasiet enn move kitsoz ouswa enn erer ki zot inn fer. Zot osi koz manti pou gagn pli boukou kas, ouswa pou gagn bann lavantaz. Sa lartik-la dir osi ki sertin pena okenn problem pou koz manti “ar bann etranze, bann koleg travay, bann kamarad, ek bann dimounn ki zot kontan.”

¹⁰ Ki konsekans tou sa bann mansonz-la ena? Bann dimounn nepli ena konfians ant zot, ek sa gat bann relasion. Par exanp, mazine ki kantite enn mari kapav abat kan li aprann ki so fam inn tronp li ek inn koz manti pou kasiet seki li finn fer. Ouswa, mazinn enn kikenn ki maltret so madam ek so bann zanfan me kan li an piblik, li fer  lezot krwar ki li kontan so fami ek ki li pran zot swin. Bann dimounn koumsa, zot kapav anbet lezot, me fode pa nou bliye ki zot pa kapav anbet Zeova. Labib dir ki “tou kitsoz okler ek bien expoze” devan lizie Bondie.​—Ebre 4:13, NW.

11. Ki leson nou tire ar move lexanp Ananias ek Safira? (Get zimaz dan koumansman lartik.)

¹¹ Labib koz lor enn koup Kretien ki Satan ti inflianse pou koz manti ar Bondie. Ananias ek Safira ti esey anbet bann zapot. Zot ti vann sertin dibien ki zot ti ena ek zot ti donn bann zapot zis enn parti kas ki zot ti gagne. Ananias ek Safira ti anvi inpresionn lezot dan kongregasion, alor zot ti dir bann zapot ki zot ti donn tou kas ki zot ti gagne. Me Zeova ti kone ki zot ti pe koz manti, ek li ti pini zot.​—Zistwar Bann Apot 5:1-10.

12. Ki pou ariv bann manter ki pa repanti, ek kifer?

¹² Ki Zeova panse lor bann dimounn ki koz manti? Tou bann dimounn ki koz manti pou fer ditor ek ki pa repanti pou al dan “lak dife,” parey kouma Satan. Savedir ki zot pou detrir net. (Revelasion 20:10, NW; 21:8, NW; Psom 5:6) Kifer? Parski pou Zeova, sa bann manter-la parey kouma bann ki azir kouma “bann lisien,” setadir bann dimounn ki fer bann kitsoz ki degoutan pou Bondie.​—Revelasion 22:15.

13. Ki nou kone lor Zeova, ek ki sa motiv nou pou fer?

¹³ Nou kone ki Zeova “pa kouma enn imin, ki koz manti,” ek ki “li inposib pou Bondie koz manti.” (Nonb 23:19; Ebre 6:18, NW) “Zeova pa kontan . . . enn lalang ki koz manti.” (Proverb 6:16, 17) Si nou anvi fer Li plezir, nou bizin  koz laverite. Alor, fode pa nou ‘koz manti ar nou kamarad.’​—Kolosien 3:9, NW.

14. (a) Dan ki fason bann vre Kretien zot diferan ar bann manb fos relizion? (b) Explik prinsip ki ena dan Lik 6:45.

¹⁴ Dan ki fason bann vre Kretien zot diferan ar bann manb fos relizion? Nou “koz laverite.” (Lir Zakari 8:16, 17. c) Pol ti dir: “Nou prezant noumem dan tou sirkonstans kouma bann serviter Bondie, . . . par parol laverite.” (2 Korintien 6:4, 7) Ek Zezi ti dir ki bann dimounn “exprim seki debord dan leker.” (Lik 6:45) Savedir ki enn dimounn ki onet pou koz laverite. Li pou dir laverite ar bann etranze, bann koleg travay, bann kamarad, ek bann dimounn ki li kontan. Anou get sertin sitiasion kot nou kapav montre ki nou pe esey res onet dan tou sirkonstans.

15. (a) Kifer li pa bon ki nou amenn enn doub lavi? (b) Ki kapav ed bann zenn pou reziste presion zot bann kamarad? (Get not.)

¹⁵ Si to enn zenn, kitfwa to anvi ki to bann kamarad aksepte twa. Me selman, akoz sa lanvi-la, sertin zenn pe amenn enn doub lavi. Kan zot avek zot fami ouswa dan kongregasion, zot fer krwar ki zot prop lor plan moral. Me zot bien diferan lor bann rezo sosial ouswa kan zot avek bann dimounn ki pa servi Zeova.Kitfwa zot koz dan enn fason vilger, zot met bann linz ki pa modes, zot ekout bann lamizik avek bann parol ki pa bon, zot bwar ziska sou, zot pran ladrog, zot sorti ar enn kikenn an sekre, ouswa zot fer bann lezot move kitsoz ankor. Zot pe koz manti ar zot paran, ar zot bann frer ek ser, ek ar Zeova. (Psom 26:4, 5) Me Zeova kone kan nou pe fer sanblan ki nou pe onor Li ek ki apre nou pe fer bann kitsoz ki Li deteste. (Mark 7:6) Vomie nou fer seki sa proverb-la dir: “Fode pa ki to leker zalou bann dimounn ki fer pese, me ena lakrint pou Zeova toutlong lazourne.”​—Proverb 23:17. d (Get not.)

16. Kan nou pe ranpli enn form pou rant dan servis aplintan, kouma nou bizin reponn bann kestion ki ena lor la?

¹⁶ Si to anvi vinn enn pionie permanan ouswa to anvi rant dan servis aplintan, kouma servis Betel, to bizin ranpli enn form. Li bien inportan ki to donn bann repons onet pou bann kestion ki konsern to lasante, ki kalite divertisman to swazir, ek lor to moralite. (Ebre 13:18) Me ki to bizin fer si to’nn fer enn kitsoz ki Zeova pa kontan, ouswa enn kitsoz ki pe tourmant to konsians ek ki to pa finn koz sa ar bann ansien? Rod led bann ansien, pou ki to kapav servi Zeova avek enn konsians kler.​—Romin 9:1; Galat 6:1.

17. Ki nou bizin fer kan bann persekiter kestionn nou lor nou bann frer ek ser?

¹⁷ Ki to bizin fer si nou laktivite interdi dan to landrwa ek ki bann lotorite aret twa ek kestionn twa lor to bann  frer ek ser? Eski to bizin dir zot tou seki to kone? Ki Zezi ti fer kan enn gouverner Romin ti kestionn li? Zezi ti aplik prinsip Labib ki dir ki ena “enn ler pou res trankil ek enn ler pou koze,” ek parfwa li pa ti dir nanye! (Ekleziast 3:1, 7; Matie 27:11-14) Si nou dan enn sitiasion parey, nou bizin bien pridan ek fer bien atansion pou ki nou pa met lavi nou bann frer ek ser an danze.​—Proverb 10:19; 11:12.

18. Ki responsabilite nou ena si bann ansien poz nou bann kestion lor nou bann frer ek ser?

¹⁸ Ki to bizin fer si to kone ki enn kikenn dan kongregasion inn fer enn pese grav? Bann ansien ena responsabilite pou veye ki kongregasion res pir lor plan moral, alor kitfwa zot pou demann twa seki to kone. Ki to pou fer, sirtou si sa dimounn-la enn bon kamarad ouswa enn fami ar twa? Labib dir: “Enn temwin fidel dir laverite.” (Proverb 12:17; 21:28) Alor, se to responsabilite pou dir bann ansien tou laverite ek pa kasiet nanye. Bann ansien ena drwa konn tou seki finn arive, pou ki zot kapav trouv meyer fason pou ed sa dimounn-la regagn enn bon relasion avek Zeova.​—Zak 5:14, 15.

19. Ki nou pou examine dan prosin lartik?

¹⁹ David ti dir Zeova dan enn lapriyer: “To kontan laverite ki dan profon nou leker.” (Psom 51:6, NW) David ti kone ki seki pli inportan, se seki nou ena dan nou leker. Bann vre Kretien ‘koz laverite ar zot kamarad’ touletan. Enn lot fason pou montre ki nou diferan ar bann manb bann fos relizion se kan nou ansegn laverite ki ena dan Labib. Dan prosin lartik, nou pou examine kouma nou kapav fer sa dan nou minister.