1. Kifer sertin dimounn merit loner, ek ki nou pou trouve dan sa lartik-la?

 KOUMA nou donn loner bann dimounn? Nou fer sa kan nou donn zot enn latansion spesial ek kan nou respekte zot. An zeneral, nou onor bann dimounn ki’nn fer enn kitsoz ki merit loner, ouswa bann ki ena enn responsabilite ouswa enn pozision inportan. Dan sa lartik-la, nou pou trouve kisannla nou bizin donn loner ek kifer.

2, 3. (a) Kifer eski se sirtou Zeova ki merit loner? (Get zimaz dan koumansman lartik.) (b) Kisannla “Annyo” ki mansione dan Revelasion 5:13, ek kifer nou bizin donn li loner?

² Revelasion 5:13 dir ki “sa kikenn ki pe asiz lor tronn” ek “Annyo” merit loner. “Sa kikenn ki pe asiz lor tronn” la, se Zeova. Dan Revelasion sapit 4, bann kreatir spiritiel dan lesiel donn nou enn rezon kifer Zeova, sa Kikenn ki viv “pou touzour ek touzour” la, merit loner. Zot dir: “To dign, Zeova, wi nou Bondie, pou gagn laglwar, loner ek  pouvwar, parski to finn kree tou kitsoz, ek akoz to volonte zot existe ek zot finn kree.”​—Revelasion 4:9-11, NW.

³ “Annyo” ki mansione dan Revelasion 5:13 se Zezi Kris. Kouma nou konn sa? Kan Zezi ti lor later, ti apel li “Annyo Bondie ki tir pese lemonn.” (Zan 1:29) Apart Zezi, ki lerwa ti pou dispoze donn so lavi kouma enn ranson pou sov bann dimounn? Sa li enn bon rezon pou donn li loner. Zezi merit loner parski li “Lerwa bann lerwa, Segner tou segner.” (1 Timote 6:14-16) Kitfwa to ena mem santiman ki sa bann kreatir spiritiel dan lesiel ki pe sant sa sante-la: “Annyo . . . to dign pou resevwar pouvwar, rises, lasazes ek lafors, loner, laglwar ek louanz!”​—Revelasion 5:12.

4. Kifer eski li inportan ki nou donn Zeova ek Zezi loner?

⁴ Dan Zan 5:22, 23, nou aprann ki Zeova finn etabli Zezi kouma ziz lor tou bann dimounn. Sa se enn rezon prinsipal pou kifer nou bizin donn Zezi loner. Ek kan nou fer sa, nou donn Zeova osi loner. Kan nou swazir pou donn Zezi ek so Papa loner, nou kapav gagn lavi pou touletan.​—Lir Psom 2:11, 12, NW.

5. Kifer tou dimounn merit loner ek respe?

⁵ Bondie finn kree bann dimounn dan “so resanblans.” (Zenez 1:27) Savedir ki laplipar dimounn ena kapasite pou manifeste bann kalite parey kouma Bondie. Par exanp, bann dimounn kapav manifeste lamour, bonte, ek konpasion. Zeova finn osi kree bann dimounn avek enn konsians, setadir kapasite pou swazir ant seki bon ouswa move, onet ouswa malonet, rezonab ouswa pa rezonab. (Romin 2:14, 15) Laplipar dimounn kontan bann kitsoz ki prop ek ki zoli, ek zot kontan viv anpe avek lezot. Li pa etonan, parski Zeova Li enn Bondie lord ek lape. Alor, li kler ki tou dimounn finn kree avek kapasite pou imit Zeova dan enn sertenn fason. Se pou sa rezon-la ki bann dimounn merit nou loner ek nou respe.​—Psom 8:5.

6, 7. Kan zot donn loner lezot, dan ki fason bann Temwin Zeova diferan ar bann lezot dimounn?

⁶ Nou kone ki nou bizin donn loner lezot dimounn. Me parfwa, li kapav difisil pou kone ki kalite ek ki kantite loner nou bizin donn zot. Kifer? Parski laplipar dimounn inflianse par latitid ki ena dan lemond Satan. Boukou dimounn fer bann zom ouswa bann fam vinn zot zidol. Olie ki zot donn sa bann dimounn-la loner ek respe dan fason ki Zeova aksepte, zot donn bannla tro boukou loner ek mem tret zot kouma bann bondie. Par exanp, zot imit fason abiye ek konportman bann politisien, bann sef relizie, bann atlet, bann vedet, ek bann lezot dimounn seleb.

⁷ Bann vre Kretien kone ki li pa bon pou donn sa kantite loner-la bann dimounn. Parmi tou bann dimounn ki’nn viv lor later, se zis Zezi ki finn les enn lexanp parfe pou nou imite. (1 Pier 2:21) Nou bizin rapel ki “tou finn fer pese e tou mank seki bizin pou rant dan laglwar Bondie.” (Romin 3:23) Okenn dimounn pa merite ki ador li.  Kan nou donn bann dimounn loner plis ki bizin, sa pa fer Zeova plezir.

8, 9. (a) Kouma bann Temwin Zeova konsider bann fonksioner gouvernman? (b) Kan eski nou pa pou obeir bann gouvernman?

⁸ Sertin dimounn merite ki nou donn zot loner ek respe akoz pozision ki zot ena. Par exanp, reflesi lor bann fonksioner gouvernman ek seki zot fer pou nou. Zot veye ki nou landrwa an sekirite ek zot pran swin popilasion. Zot travay bien itil pou tou dimounn. Lapot Pol ti dir ki nou bizin konsider bann gouvernman kouma bann “lotorite siperyer.” Li ti dir osi ki nou bizin swiv zot bann lalwa: “Donn tou dimounn seki bizin donn zot, seki demann tax, donn li tax” ek “seki demann loner, donn li loner.”​—Romin 13:1, 7, NW.

⁹ Antan ki bann Temwin Zeova, nou fer tou seki nou kapav pou respekte bann fonksioner gouvernman. Biensir, sak pei ena so prop lalwa, alor seki enn fonksioner pou demann nou fer dan enn landrwa, sa kapav diferan dan enn lot landrwa. Kanmem sa, nou korper avek bann fonksioner gouvernman kan zot fer zot travay. Me selman, si zot demann nou pou fer enn kitsoz ki pou fer nou dezobeir Zeova, nou pa pou fer li. Dan sa ka-la, nou donn loner ek obeir Zeova olie ki bann zom.​—Lir 1 Pier 2:13-17.

10. Kouma bann serviter Zeova dan lepase finn les enn bon lexanp pou nou azordi?

¹⁰ Nou kapav aprann ar bann serviter Zeova dan lepase, ki ti donn loner bann gouvernman ek zot bann fonksioner. Anou get lexanp Zozef ek Mari. Kan bann Romin ti anvi fer enn resansman dan pei, Zozef ek Mari ti al Betleem pou anrezistre zot. Ek zot ti ale mem si Mari ti pre pou akouse. (Lik 2:1-5) Lapot Pol osi ti respekte bann dirizan imin. Kan ti met enn lakizasion lor li, ki li ti fer enn kitsoz ki pa ti bon, li ti defann li avek respe devan Lerwa Erod Agripa ek devan Festus, gouverner Romin dan provins Zida.​—Zistwar Bann Apot 25:1-12; 26:1-3.

11, 12. (a) Kifer eski nou pa donn bann sef relizie enn loner spesial? (b) Ki ti arive kan enn Temwin dan l’Autriche ti respekte enn politisien?

¹¹ Konsernan bann sef relizie, eski nou bizin donn zot enn loner spesial? Nou donn zot mem loner ki nou ti pou donn ninport kisannla. Me li pa pou bon ki nou donn zot enn loner spesial mem si zot atann sa. Kifer? Parski bann fos relizion pa ansegn laverite lor Bondie ek so Parol, Labib. Zezi ti repros bann ansegnan fos relizion ek li ti dir ki zot bann ipokrit ek bann move dirizan. (Matie 23:23, 24) Parkont, pena nanye demal ki nou donn bann fonksioner gouvernman enn loner ouswa enn respe spesial. Dan lepase, kan nou finn fer sa, parfwa zot finn ed nou.

¹² Nou ena par exanp enn ofisie ki ti apel Dr. Heinrich Gleissner, ki ti enn politisien dan l’Autriche. Pandan Deziem Lager Mondial, bann Nazi ti aret li ek ti avoy li dan enn kan konsantrasion. Dan trin ki ti pe amenn li laba, li ti zwenn Leopold Engleitner, enn Temwin bien zele dan l’Autriche. Frer Engleitner ti explik so bann krwayans avek respe ar Dr. Gleissner ki ti ekout li avek  boukou latansion. Apre lager, plizir fwa Dr. Gleissner ti servi so pozision pou ed bann Temwin dan l’Autriche. Kitfwa to konn lezot lexanp ankor ki montre kouma bann kitsoz finn bien pase kan bann Kretien finn respekte bann fonksioner gouvernman.

13. Kisannla sirtou merite ki nou donn zot loner ek respe, ek kifer?

¹³ Nou bann frer ek ser merite ki nou donn zot loner ek respe. Sirtou bann frer ki diriz nou, kouma bann ansien, bann sirveyan sirkonskripsion, bann manb Komite Biro Nasional, ek bann manb Komite Santral. (Lir 1 Timote 5:17, NW.) Sa bann zom-la pran swin pep Bondie, ek Labib apel zot “bann don.” (Efezien 4:8, NW.) Alor li lozik ki nou donn zot loner ek respe mem si zot ena diferan nasionalite, ledikasion, ran sosial, ouswa ninport ki kantite larzan ki zot ena. Bann Kretien dan premie siek inn les nou enn bon lexanp. Zot ti donn loner bann zom ki ti pran latet, ek nou osi nou fer parey azordi. Kan nou avek sa bann zom-la, nou pa tret zot koumadir zot bann anz, setadir pli siperyer ki bann dimounn. Me nou respekte zot ek nou donn zot loner pou travay dir ki zot fer ek limilite ki zot manifeste.​—Lir 2 Korintien 1:24; Revelasion 19:10.

14, 15. Kouma eski bann ansien diferan ar boukou sef relizie?

¹⁴ Sa bann ansien-la zot kouma bann berze ki ena limilite. Zot pa anvi ki nou tret zot kouma bann dimounn seleb. Zot bien diferan ar boukou sef relizie  ki ena azordi ek ki ti ena dan lepok Zezi. Kan li ti koz lor bannla, Zezi ti dir: “Zot kontan bann premie plas dan bann fet e bann meyer plas dan sinagog. Zot kontan kan dimoun salye zot dan bann plas piblik.”​—Matie 23:6, 7.

¹⁵ Bann ansien obeir sa bann parol Zezi la: “Me zot, fode pa ki zot fer apel zot Rabi, parski zot ena enn sel met e zot tou so zelev. Pa apel ninport ki lor later papa, parski Li tousel zot papa ki dan lesiel. Pa fer apel zot met parski zot ena enn sel met, Lemesi. Dimoun ki pli gran parmi zot, li pou zot serviter. Dimoun ki anvi gagn laglwar pou imilie li, dimoun ki imilie li pou gagn laglwar.” (Matie 23:8-12) Kan bann ansien dan lemond antie manifeste limilite ek obeir bann parol Zezi, zot bann frer ek ser pou kontan zot, respekte zot, ek donn zot loner.

16. Kifer nou bizin kontign fer zefor pou donn loner lezot?

¹⁶ Kitfwa sa pou pran letan pou nou aprann donn loner lezot. Bann Kretien dan premie siek osi ti pran letan pou aprann donn loner lezot. (Zistwar Bann Apot 10:22-26; 3 Zan 9, 10) Me li vo lapenn ki nou fer sa zefor-la. Kan nou donn loner lezot dan fason ki Zeova anvi, nou pou gagn boukou benediksion.

17. Ki benediksion nou gagne kan nou donn loner bann dimounn ki ena lotorite?

¹⁷ Kan nou donn loner ek respe bann dimounn ki ena lotorite dan sa lemond-la, zot pou pli dispoze pou defann drwa ki nou ena pou prese. Kitfwa zot kapav mem ena enn latitid pozitif lor nou travay predikasion. Se seki ti arive dan l’Allemagne inn gagn plizir lane, kan enn pionie ki apel Birgit ti al dan lekol so tifi zour ki li ti gagn so diplom. Bann profeser ti dir Birgit ki zot ti bien kontan pou ena bann zanfan Temwin dan zot klas pandan tou sa bann lane-la. Dapre zot, bann zanfan Temwin ti enn gran bienfe pou lekol. Birgit ti dir zot: “Nou aprann nou bann zanfan pou swiv bann prinsip Bondie, kouma par exanp, respekte ek donn loner zot bann profeser.” Enn profeser ti dir ki si tou bann zelev ti kouma bann zanfan Temwin, li ti pou pli fasil pou ansegne. Bann profeser-la ti telman ena enn bon lopinion lor bann zanfan Temwin ki, plizir semenn apre, enn parmi zot ti asiste enn lasanble.

18, 19. Ki nou bizin rapel kan nou donn loner bann ansien?

¹⁸ Bann prinsip ki ena dan Parol Bondie kapav ed nou pou konpran kouma nou bizin donn loner bann ansien. (Lir  Ebre 13:7, 17, NW.) Nou kapav ek nou bizin felisit zot pou travay dir ki zot fer. Kan nou korper avek bann ansien, sa ed zot pou asim zot responsabilite dan lazwa. Labib dir ki nou bizin osi imit zot lafwa. Me sa pa vedir ki nou bizin kopie exakteman fason abiye, koze, ek ansegne enn ansien ki “popiler.” Si nou fer sa se koumadir nou pe swiv bann zom olie ki nou swiv Zezi Kris. Fode pa nou bliye ki bann ansien zot inparfe parey kouma nou.

¹⁹ Kan nou donn loner ek respekte bann ansien, ek kan nou pa tret zot kouma bann dimounn popiler, sa pou ed zot. Kouma? Sa pou ed zot pou kontign ena limilite, ek evit panse ki zot pli bon ki lezot ouswa ki touletan zot ena rezon.

20. Ki benediksion nou gagne kan nou donn loner lezot?

²⁰ Nou gagn boukou benediksion kan nou donn loner lezot dan enn bon fason. (1) Sa anpes nou vinn egois, ek sa ed nou pou kontign ena limilite kan lezot donn nou enn latansion spesial. (2) Sa pou osi enn proteksion pou nou parski sa pou anpes nou tonbe mem si enn kikenn ki nou respekte fer enn kitsoz ki desevwar nou. (3) Sa ed nou pou res ini avek lorganizasion Zeova, parski sa lorganizasion-la pa donn personn enn loner plis ki bizin, ki li enn Temwin ouswa non.

21. Ki pli gran benediksion nou gagne kan nou donn loner lezot?

²¹ Pli gran benediksion nou gagne kan nou donn loner lezot, se ki sa fer Zeova plezir. Nou pe fer seki Li demann nou ek nou pe res fidel ar Li. Lerla Zeova pou kapav reponn Satan, ki ti dir ki personn pa pou kapav res fidel ar Bondie. (Proverb 27:11) Laplipar dimounn dan lemond pa kone kouma pou donn loner dan enn bon fason. Nou bien rekonesan ki nou kone kouma pou donn loner lezot dan fason ki fer Zeova plezir!