LARTIK LETID 26
KANTIK 123 Nou Soumet ar Bondie Avek Fidelite
Rekonet Avek Modesti ki To Pa Konn Tou Kitsoz
“Nou pa kapav konpran tou kitsoz lor Tou-Pwisan.”—ZOB 37:23.
PWIN PRINSIPAL
Dan sa lartik-la, nou pou trouve ki mem si nou pa konn tou seki pou arive dan lavenir, si nou reflesi lor seki nou kone ek si nou fer Zeova konfians, sa pou ed nou pou andir bann difikilte.
1. Ki bann kapasite Zeova inn donn nou, ek kifer Li’nn donn nou sa?
ZEOVA inn kree nou dan enn fason extraordiner. Li’nn kree nou avek kapasite pou reflesi, pou aprann bann nouvo kitsoz, ek pou met an pratik seki nou aprann. Kifer Li’nn kree nou koumsa? Parski Li anvi ki nou “trouv konesans Bondie” ek ki nou servi Li avek nou “kapasite pou reflesi.”—Prov. 2:1-5; Rom. 12:1.
2. (a) Ki nou bizin rekonet? (Zob 37:23, 24) (Get zimaz osi.) (b) Kifer nou bizin konpran ki li pa neseser ki nou konn tou kitsoz?
2 Mem si Zeova inn kree nou avek kapasite pou aprann boukou kitsoz, ena boukou kitsoz ki nou pa kone. (Lir Zob 37:23, 24.) Anou get lexanp Zob. Kan Zeova ti poz li plizir kestion, sa ti ed li pou konpran ki ena boukou kitsoz ki li pa ti kone. Sa konversasion-la ti ed Zob pou konpran ki li ti bizin ena modesti ek ki li ti bizin sanz so fason panse. (Zob 42:3-6) Nou osi, nou pou gagn bann bienfe si nou rekonet avek modesti ki nou pa konn tou kitsoz. Kan nou rapel ki ena boukou kitsoz ki nou pa kone, sa pou ed nou pou ena limilite ek pou fer Zeova konfians. Zeova pou touletan dir nou seki nou bizin kone pou ki nou kapav pran bann bon desizion.—Prov. 2:6.
Parey kouma Zob, nou osi nou pou gagn bann bienfe kan nou rekonet ki nou pa konn tou kitsoz (Get paragraf 2)
3. Ki nou pou examine dan sa lartik-la?
3 Dan sa lartik-la, nou pou examinn sertin kitsoz ki nou pa kone ek osi bann difikilte ki nou kapav gagne akoz sa. Nou pou gete osi kifer li bon kan nou pa konn sertin kitsoz. Seki nou pou aprann dan sa lartik-la pou ogmant nou konfians ki Zeova, “sa Kikenn ki ena enn konesans parfe la,” Li touletan dir nou seki nou vremem bizin kone.—Zob 37:16.
NOU PA KONE KAN LAFIN POU VINI
4. Dapre Matie 24:36, ki kitsoz nou pa kone?
4 Lir Matie 24:36. Nou pa kone kan lafin pou vini. Kan li ti lor later, mem Zezi pa ti kone kan “sa zour-la ek sa ler-la” ti pou vini. a Li ti dir so bann zapot ki se Zeova ki ena ‘ena drwa pou deside’ kan sertin levennman pou arive. (Zist. 1:6, 7) Zeova inn fini deside kan lafin pou arive. Parkont nou, nou pa kone exakteman kan sa pou arive.
5. Parski nou pa kone kan lafin pou arive, ki lefe sa kapav ena lor nou?
5 Nou pa kone komie letan ankor nou pou bizin atann ki lafin arive. Akoz sa, nou kapav perdi pasians ouswa nou dekouraze, sirtou si sa fer lontan ki nou pe atann zour Zeova. Ek parski lafin pankor arive, sa kapav dekouraz nou osi si bann manb nou fami ouswa bann lezot dimounn boufonn nou. (2 Pier 3:3, 4) Lerla, nou kapav panse ki, si nou ti kone kan exakteman lafin ti pou arive, li ti pou pli fasil pou nou atann ek nou andire kan lezot boufonn nou.
6. Kifer li bon ki nou pa kone kan lafin pou vini?
6 Selman, parski Zeova pa dir nou exakteman kan lafin pou vini, sa donn nou lokazion pou montre Li ki nou servi Li parski nou kontan Li ek nou fer Li konfians. Nou anvi servi Zeova pou touletan, pa zis ziska ki lafin arive. Kifer? Parski nou lafwa dan Zeova pena enn dat expirasion. Alor, olie ki nou reflesi tro boukou lor kan lafin pou arive, li pli bon ki nou reflesi lor bann bon kitsoz ki pou arive apre lafin. Kan nou fer sa, sa pou ed nou pou vinn pli pros ar Zeova, pou fer Li konfians, ek pou fer tou seki nou kapav pou fer Li plezir.—2 Pier 3:11, 12.
7. Ki kitsoz nou kone?
7 Li bien inportan ki nou konsantre nou lor bann kitsoz ki nou kone. Nou kone ki bann dernie zour inn koumanse an 1914. Dan Labib, Zeova pa’nn zis donn nou boukou profesi ki montre ki bann dernie zour ti pou koumanse sa lane-la, me Li’nn osi donn nou boukou detay lor kouma lemond ti pou ete apre sa lane-la. Ek parski sa bann profesi-la pe realize, nou sir ki “gran zour Zeova bien pre.” (Sof. 1:14) Nou kone osi seki Zeova anvi nou fer. Li anvi ki nou fer maximum dimounn konn “bon nouvel lor Rwayom.” (Mat. 24:14) Nou pe pres sa bon nouvel-la dan apepre 240 pei ek dan plis ki 1,000 lang. Avredir, nou pa bizin konn “sa zour-la ek sa ler-la” pou ki nou res aktif dan predikasion.
NOU PA KONE EXAKTEMAN KOUMA ZEOVA POU ED NOU
8. Lexpresion “travay vre Bondie,” ki savedir? (Ekleziast 11:5)
8 Nou pa touletan konn “travay vre Bondie.” (Lir Ekleziast 11:5.) Lexpresion “travay vre Bondie” vedir bann kitsoz ki Zeova fer arive, ouswa bann kitsoz ki Li permet arive, pou ki so proze realize. Nou pa kone exakteman kifer Zeova permet enn kitsoz arive ouswa kouma Li pou ed nou. (Ps. 37:5) Labib konpar “travay vre Bondie” ar fason ki enn ti-baba grandi dan vant so mama; mem bann siantis pa konpran exakteman kouma sa arive. Ek nou osi, nou pa kone exakteman kouma Zeova pou fer sertin kitsoz.
9. Kan nou pa kone exakteman kouma Zeova pou ed nou, ki difikilte nou kapav gagne?
9 Kan nou pa kone exakteman kouma Zeova pou ed nou, sa kapav fer nou ezite pou pran sertin desizion. Kitfwa nou pou ezite pou fer bann sakrifis pou fer plis dan nou servis pou Zeova, kouma par exanp sinplifie nou lavi ouswa al servi dan enn teritwar kot bizin plis proklamater. Ek si nou pa pe reisi realiz nou bann lobzektif, ouswa si nou pa pe gagn bann bon rezilta dan predikasion mem si nou pe fer boukou zefor, kitfwa nou kapav panse ki nou pena faver Bondie. Kitfwa nou kapav pans koumsa osi si nou pe gagn bann difikilte lor enn proze lorganizasion.
10. Kan nou pa kone exakteman kouma Zeova pou ed nou, ki bann kalite sa ed nou pou devlope?
10 Avredir, kan nou pa kone kouma Zeova pou ed nou, sa kapav ed nou pou devlop bann kalite inportan kouma limilite ek modesti. Sa ed nou pou konpran ki bann panse Zeova ek so fason azir, “pli ot” ki pou nou. (Iza. 55:8, 9) Sa ed nou osi pou fer Zeova plis konfians ek pou kont lor Li pou ki nou kapav realiz nou bann lobzektif. Kan nou gagn bann bon rezilta dan predikasion, ouswa kan nou’nn travay lor enn proze lorganizasion, nou donn Zeova laglwar ki Li merite. (Ps. 127:1; 1 Kor. 3:7) Me si bann kitsoz pa ariv dan fason ki nou pe atann, fode pa nou bliye ki Zeova konn tou kitsoz. (Iza. 26:12) Nou bizin fer nou par, ek nou bizin ena konfians ki Zeova pou touletan ed nou. Mem si Zeova pa fer bann mirak kouma Li ti fer dan lepase, nou kapav sir ki Li pou touletan gid nou.—Zist. 16:6-10.
11. Ki bann kitsoz nou kone lor Zeova?
11 Enn kitsoz ki kapav ed nou, se kan nou reflesi lor bann kalite ki Zeova ena. Zeova ena lamour, Li ena sazes, ek tou seki Li fer, Li drwat. Nou kone osi ki seki nou fer pou Zeova ek pou nou bann frer ek ser, ena boukou valer pou Li. Anplis, nou kone ki Zeova touletan rekonpans so bann fidel serviter.—Ebre 11:6.
NOU PA KONE KI POU ARIVE DAN LAVENIR
12. Dapre Zak 4:13, 14, ki kitsoz nou pa kone?
12 Lir Zak 4:13, 14. Labib dir ki nou “pa kone kouma [nou] lavi pou ete demin.” Dan sa lemond-la, “bann moman difisil ek bann sitiasion ki personn pa atann” kapav ariv nou tou. (Ekle. 9:11) Akoz sa, nou pa kone si nou bann proze pou reisi ouswa si nou pou ankor vivan pou realiz zot.
13. Kan nou pa kone ki pou arive dan lavenir, ki lefe sa kapav ena lor nou?
13 Kan nou pa kone ki pou arive dan lavenir, nou kapav trouv sa difisil pou andire. Kifer? Parski nou kapav perdi nou lazwa si nou trakase plis ki bizin pou bann kitsoz ki kapav arive. Par exanp, san ki nou atann, nou lavi kapav sanze ouswa bann move kitsoz kapav ariv nou, ek sa kapav rann nou tris ek fer nou trakase. Anplis, kan bann kitsoz pa ariv dan fason ki nou nou anvi, sa kapav dekouraz nou.—Prov. 13:12.
14. Ki nou bizin kone ek ki nou bizin fer pou ki nou vremem ere? (Get zimaz osi.)
14 Kan nou andir bann difikilte, sa montre ki nou servi Zeova parski nou vremem kontan Li. Bann zistwar ki ena dan Labib montre ki fode pa nou atann ki Zeova protez nou kont tou bann problem ki nou kapav gagne, ek Li pa desid alavans osi seki pou ariv nou dan lavenir. Zeova kone ki nou kapav ere, mem si nou pa konn tou seki kapav ariv nou dan lavenir. Nou pou ere si nou obeir Li ek rod so direksion. (Zer. 10:23) Ek parey kouma Zak, si nou kont lor Li kan nou pran bann desizion, nou pou kapav dir: “Si Zeova anvi, nou pou viv ek nou pou fer sesi-sela.”—Zak 4:15.
Kan nou obeir ek rod direksion Zeova, Li protez nou (Get paragraf 14-15) b
15. Ki nou kone konsernan lavenir?
15 Mem si nou pa kone seki kapav arive demin, nou kone ki Zeova inn promet nou lavi pou touletan, ki li dan lesiel ouswa lor later. Nou kone ki Zeova pa koz manti ek ki nanye pa kapav anpes Li realiz tou so bann promes. (Tit 1:2) Li tousel kapav “fer konn lafin, ek depi bien lontan [li] fer konn bann kitsoz ki pankor arive.” Tou seki Li ti predir dan lepase inn realize, ek tou bann kitsoz ki Li’nn predir pou lavenir, pou osi realize. (Iza. 46:10) Nou kone ek nou sir ki nanye pa kapav anpes Zeova kontan nou. (Rom. 8:35-39) Li pou donn nou sazes, rekonfor, ek lafors ki nou bizin pou ki nou kapav andir ninport ki difikilte. Alor, nou pena okenn dout ki Zeova pou ed nou ek ki Li pou beni nou.—Zer. 17:7, 8.
NOU PA KAPAV KONPRAN EXAKTEMAN KI KANTITE ZEOVA KONN NOU
16. Ki Zeova kone lor nou, ek ki sa fer twa resanti? (Psom 139:1-6)
16 Lir Psom 139:1-6. Zeova, nou Kreater, konn tou kitsoz lor nou. Li kone kifer nou pans ek nou azir dan enn sertenn fason. Li konn tou seki nou dir, ek kifer nou dir sa. Li konn osi tou seki nou fer, ek kifer nou fer sa. Lerwa David ti dir ki Zeova ena kapasite pou ed nou ek ki Li touletan pre pou ed nou. Ki to resanti kan to mazine ki Bondie Tou-Pwisan, sa Kikenn ki’nn kree lesiel ek later la, Li interese ar twa sa kantite-la? David ti dir: “Sa kalite konesans-la li tro difisil pou mwa. Li telman boukou ki mo pa reisi konpran tou.”—Ps. 139:6.
17. Kifer sertin kapav trouv sa difisil pou krwar ki Zeova konn zot sa kantite-la?
17 Akoz fason ki nou’nn grandi, nou kiltir, ouswa bann krwayans ki nou ti ena dan lepase, kitfwa nou trouv sa difisil pou konsider Zeova kouma enn Papa ki ena lamour ek ki interese ar nou. Kitfwa nou panse osi ki Zeova pa anvi konn nou ouswa ki Li lwin ar nou akoz bann erer grav ki nou’nn fer dan lepase. Parfwa, mem David ti ena sa bann santiman-la. (Ps. 38:18, 21) Enn kikenn ki pe viv enn lavi imoral ek ki pe fer zefor pou sanze ek pou viv dan enn fason ki fer Bondie plezir, kitfwa kapav demann limem, ‘Si Bondie vremem konn mwa, kifer Li anvi ki mo sanze olie ki Li aksepte mwa kouma mo ete?’
18. Kan nou aksepte ki Zeova konn nou pli bien ki nou-mem, ki bienfe nou kapav gagne? (Get zimaz osi.)
18 Nou bizin fer zefor pou rekonet ek pou aksepte ki Zeova konn nou pli bien ki nou-mem ek ki Li kapav trouv seki ena debon dan nou. Li vre ki Zeova trouv nou bann defo, selman Li kone ki kalite dimounn nou anvi vini ek Li kontan nou. (Rom. 7:15) Zeova trouve ki kalite dimounn nou kapav vini. Kan nou konpran sa, sa kapav donn nou lafors ki nou bizin pou servi Li avek fidelite ek lazwa.
Kan nou ranforsi nou lafwa gras-a bann zoli promes ki Zeova fer nou konsernan lemond nouvo, sa kapav ed nou pou fer fas ar bann difikilte ki nou gagne (Get paragraf 18-19) c
19. Konsernan Zeova, ki kitsoz nou kapav sir?
19 Nou kone ki Zeova Li lamour, ek nou pena okenn dout lor la. (1 Zan 4:8) Nou kone ki se parski Li kontan nou ek ki Li anvi ki nou ena enn pli bon lavi, ki Li demann nou pou fer ouswa pou pa fer sertin kitsoz. Nou kone ki Zeova anvi ki nou viv pou touletan. Se akoz sa ki Li’nn donn nou laranson. Gras-a lamor Zezi, nou kapav sir ki, mem si nou fer bann erer, nou kapav servi Zeova kouma Li, Li anvi. (Rom. 7:24, 25) Anplis, nou kone ki “Bondie pli gran ki nou leker ek li konn tou kitsoz.” (1 Zan 3:19, 20) Zeova konn tou lor nou, ek Li ena konfians ki nou pou reisi fer so volonte.
20. Ki kitsoz kapav ed nou pou pa trakase plis ki bizin lor bann kitsoz ki nou pa kone?
20 Zeova pa’nn kasiet nou nanye. Li’nn dir nou tou seki nou vremem bizin kone. Alor, fode pa nou trakase plis ki bizin lor bann kitsoz ki nou pa kone. Nou bizin plito konsantre nou lor bann kitsoz ki vremem inportan. Kan nou fer sa, nou montre ki nou fer Zeova, “sa Kikenn ki ena enn konesans parfe la,” foul konfians. (Zob 36:4) Mem si nou pa konpran sertin kitsoz aster-la, nou kone ki Zeova pou kontign ansegn nou bann nouvo kitsoz. Ek nou atann sa moman-la avek inpasians parski zame nou pa pou aret aprann bann nouvo kitsoz lor nou Bondie ki extraordiner!—Ekle. 3:11.
KANTIK 104 Bondie, Donn Mwa To Lespri Sin
