1. Sit sertin sitiasion ki kapav fer nou per.

 ANOU get bann sitiasion difisil ki sertin Temwin inn gagne. Nestor ek so madam, María, ti anvi al servi kot ti bizin plis proklamater. b Pou zot reisi fer sa, zot ti bizin aprann viv ar pli tigit kas. Selman, zot ti per tansion zot pa vremem ere ar pli tigit kas. Biniam viv dan enn pei kot nou laktivite interdi. Kan li’nn vinn enn Temwin Zeova, li’nn konpran ki li pou gagn bann persekision, ek sa ti fer li gagn per. Me seki ti fer li plis per, se kouma so fami ti pou reazir kan zot ti pou aprann ki li’nn sanz so relizion. Valérie ti aprann ki li ti gagn enn kanser, ek si li pa ti opere vit, li ti kapav mor. Selman, li ti gagn difikilte pou trouv enn dokter ki ti respekte so krwayans konsernan disan. Akoz sa, li ti per tansion li mor.

2. Kifer nou bizin fer zefor pou sirmont nou bann laper?

² Boukou parmi nou finn deza resanti sa kalite laper-la. Si nou pa kontrol nou laper, kitfwa nou kapav pran bann move desizion ki pou ena enn move lefe lor nou lamitie avek Zeova. Ek se samem ki Satan anvi. Li esey servi nou laper pou fer nou dezobeir lalwa Zeova. Par exanp, li kapav servi nou laper pou fer nou aret prese. (Rev. 12:17) Satan li bien move, li kriel, ek li ena boukou pouvwar. Selman, to kapav protez tomem kont li. Kouma to kapav fer sa?

3. Ki kitsoz pou ed nou pou sirmont nou bann laper?

 ³ Kan nou sir ki Zeova Li avek nou ek ki Li kontan nou, nou pa pou per Satan. (Ps. 118:6) Par exanp, ekrivin Psom 118 ti fer fas ar bann sitiasion bien difisil. Li ti ena boukou lennmi, ek sertin parmi zot ti bann dimounn bien inportan (verse 9, 10). Parfwa, ti ena boukou presion lor li (verse 13). Ek anplis, Zeova ti disiplinn li (verse 18). Me kanmem sa, sa ekrivin Psom-la ti dir: “Mo pa per nannye.” Kifer li ti santi li an sekirite? Li ti kone ki Zeova bien kontan li, mem si Li ti disiplinn li. Li ti kone ki, dan ninport ki difikilte li ete, so Bondie ki kontan li ti pou touletan pre pou ed li.​—Ps. 118:29.

4. Si nou sir ki Bondie kontan nou, ki bann laper nou pou kapav sirmonte?

⁴ Nou bizin sir ki Zeova kontan nou. Sa pou ed nou pou sirmont trwa laper: (1) laper ki nou pa pou reisi donn nou fami seki zot bizin; (2) per bann dimounn, ek (3) per lamor. Bann frer ek ser ki nou’nn mansione dan koumansman sa lartik-la, ti reisi sirmont zot bann laper parski zot ti sir ki Bondie kontan zot.

5. Sit bann sitiasion ki kapav fer enn sef fami trakase. (Get zimaz lor kouvertir.)

⁵ Pou enn sef fami, li bien inportan ki li pran swin so fami lor plan materyel. (1 Tim. 5:8) Si to enn sef fami, kitfwa pandan sa pandemi-la to ti trakase tansion to perdi to travay. Kitfwa to ti trakase osi tansion to pa kapav donn to fami ase manze, to pa reisi pei lakaz, ouswa ranbours to loan. Kitfwa to ti per ki, si to perdi to travay, to pa reisi gagn enn lot travay. Ouswa parey Nestor ek María, kitfwa to ti panse ki to pa ti pou kapav viv avek pli tigit kas. Satan inn reisi fer boukou dimounn aret servi Zeova parski zot ti ena sa bann laper-la.

6. Ki kitsoz Satan anvi fer nou krwar?

⁶ Satan anvi fer nou krwar ki Zeova pa gagn nou traka ek ki nou bizin debrouy nou par noumem pou ki nou kapav pran swin nou fami. Akoz sa, kitfwa nou panse ki nou bizin fer tou seki nou kapav pou nou pa perdi nou travay. Kitfwa nou kapav mem fer bann kitsoz ki pou gat nou lamitie avek Zeova.

7. Kouma Zezi rasir nou?

⁷ Zezi, ki konn bien so Papa, rasir nou ki nou Bondie “kone ki bon pou [nou] avan mem ki [nou] dimann li.” (Mat. 6:8) Zezi kone osi ki Zeova pre pou donn nou seki nou bizin. Antan ki Kretien, nou form parti dan fami Zeova. Zeova Li nou Sef fami. Alor, to kapav sir ki Li pou fer seki ena dan 1 Timote 5:8, parey kouma Li demann tou bann sef fami pou fer.

8. (a) Si nou per ki nou pa reisi donn nou fami seki zot bizin, ki kitsoz kapav ed nou pou sirmont sa laper-la? (Matie 6:31-33) (b) Dapre zimaz pou sa paragraf-la, kouma nou kapav imit lexanp sa koup ki pe vinn kit manze pou sa fami-la?

⁸ Kan nou sir ki Zeova kontan nou ek ki Li kontan nou fami, nou pou sir ki nou pou gagn seki nou bizin. (Lir Matie 6:31-33.) Zeova enn Bondie ki ena boukou lamour, Li zenere, ek Li anvi donn nou seki nou bizin! Kan Li’nn kree later, Li pa’nn zis donn  nou seki nou bizin pou viv. Li’nn kree osi boukou lezot kitsoz pou fer nou plezir. (Zen. 2:9) Mem si parfwa nou ena zis seki nou bizin ek ki nou pena plis ki sa, nou bizin rapel ki se Zeova ki’nn donn nou sa. (Mat. 6:11) Nou bizin touletan rapel ki, ninport ki sakrifis ki nou fer asterla, li bien tigit konpare ar seki Zeova pe donn nou asterla ek ar seki Li pou donn nou dan lavenir. Se seki Nestor ek María ti konpran.​—Iza. 65:21, 22.

9. Ki nou kapav aprann ar lexanp Nestor ek María?

⁹ Nestor ek María res Kolonbi. Zot ti ena enn zoli lakaz ek enn bon travay. Zot dir: “Nou ti anvi viv enn lavi sinp ek fer plis dan nou minister, . . . me nou ti per tansion nou pa vremem ere ar pli tigit kas.” Ki kitsoz ti ed zot pou sirmont zot laper? Zot ti reflesi kouma Zeova, dan plizir fason, ti montre zot ki Li kontan zot. Mem si zot travay ti pe pey bien, zot ti sir ki Zeova ti pou pran zot swin. Alor, zot ti kit zot travay, zot ti vann zot lakaz, ek zot ti al res dan enn lot landrwa kot ti bizin plis proklamater. Ki zot panse lor desizion ki zot inn pran? Nestor dir: “Seki’nn ekrir dan Matie 6:33 bien vre. Nou pa finn mank nanye lor plan materyel. Ek asterla, nou pli ere ki avan.”

10. Kifer nou pa etone ki bann dimounn per lezot dimounn?

¹⁰ Depi ki Adan ek Ev inn rebel kont Zeova, “dimounn finn dominn dimounn pou zot prop maler.” (Ekle. 8:9) Par exanp, bann dimounn pe servi zot lotorite pou fer dominer ar lezot, ek bann kriminel pe azir avek violans. Dan lekol, bann zanfan boufonn zot bann kamarad ek zot fer dominer ar bann ki pli feb. Sertin dimounn bien violan, mem anver zot prop fami. Alor, nou pa etone ki bann dimounn per lezot dimounn! Kouma Satan esey servi sa laper-la kont nou?

11-12. Si nou per bann dimounn, kouma Satan kapav servi sa kont nou?

¹¹ Satan esey fer nou per bann dimounn pou ki nou aret prese ek aret servi Zeova. Li servi bann gouvernman pou interdi nou laktivite predikasion ek pou persekit nou. (Lik 21:12;  Rev. 2:10) Dan lemond Satan, boukou dimounn fann bann fos linformasion ek koz manti lor bann Temwin Zeova. Bann dimounn ki krwar sa bann mansonz-la, kitfwa zot kapav boufonn nou ouswa mem atak nou. (Mat. 10:36) Selman, nou pa etone ki Satan servi sa metod-la, pa vre! Li ti pe deza servi sa metod-la dan premie siek.​—Zist. 5:27, 28, 40.

¹² Me Satan pa zis servi bann gouvernman pou persekit nou. Sertin kapav gagn per fason ki zot fami pou reazir kan bann-la pou aprann ki zot inn vinn enn Temwin. Reaksion zot fami fer zot plis per ki violans fizik. Zot bien kontan zot fami ek zot anvi ki bann-la aprann konn Zeova ek kontan Li. Zot bien sagrin kan zot tann zot fami dir bann move kitsoz lor Zeova ek lor so bann serviter. Li kapav arive osi ki, sertin manb nou fami, ki avan ti opoze ar laverite, avek letan zot vinn bann Temwin. Me fer koumadir nou fami aret frekant nou parski nou’nn vinn enn Temwin, kouma nou pou reazir?

13. Kan nou sir ki Zeova kontan nou, kouma sa kapav ed nou si nou fami rezet nou? (Ps 27:10)

¹³ Bann zoli parol ki ena dan Psom 27:10 bien rekonfortan. (Lir.) Kan nou rapel ki kantite Zeova kontan nou, nou pa pou per, mem si nou fami rezet nou. Ek nou kapav sir ki Li pou rekonpans nou pou nou landirans. Zeova pou pran nou swin lor plan fizik, emosionel ek spiritiel, ek Li pou fer sa pli bien ki ninport kisannla! Se seki Biniam ti konpran.

14. Ki nou kapav aprann ar lexanp Biniam?

¹⁴ Biniam ti vinn enn Temwin Zeova mem si li ti kone ki gouvernman ti pe persekit bann Temwin dan so pei. Li ti kone ki Zeova kontan li, ek sa ti ed li pou pa per bann dimounn. Li dir: “Bann persekision-la ti pli pir ki seki mo ti panse. . . . Me mo ti plis per lopozision mo fami ki persekision bann gouvernman. Mo ti per ki mo desizion pou vinn enn Temwin Zeova desevwar mo papa, ek mo ti per ki mo fami rezet mwa.” Selman, Biniam ti sir ki Zeova touletan pran swin bann ki Li kontan.  Biniam dir: “Mo ti reflesi lor kouma Zeova ti ed bann dimounn ki ti gagn bann difikilte ekonomik, ek bann ki ti bizin fer fas ar diskriminasion ek laviolans. Mo ti kone ki, si mo ti res fidel ar Zeova, Li ti pou beni mwa. Mo’nn al dan prizon plizir fwa, ek bann dimounn inn mem tortir mwa. Selman, mo’nn trouve kouma Zeova inn touletan ed nou, parski nou ti res fidel anver Li.” Zeova ti vinn enn vre Papa pou Biniam, ek bann Temwin Zeova ti vinn enn vre fami pou li.

15. Kifer li normal ki nou per lamor?

¹⁵ Labib dir ki lamor se nou lennmi. (1 Kor. 15:25, 26) Kitfwa nou per kan nou pans lamor, sirtou kan nou ouswa enn kikenn ki nou kontan malad. Kifer nou per lamor? Parski Zeova inn kree nou avek dezir pou viv pou touletan. (Ekle. 3:11) Selman, kan enn kikenn per lamor, sa kapav ed li pou protez so lavi. Par exanp, sa kapav motiv li pou pran bann bon desizion konsernan seki li bizin manze, ouswa bann lexersis ki li bizin fer pou ki li res an bonn sante. Sa pou motiv li osi pou al get enn dokter ouswa pou pran bann medsinn kan bizin, ek pou li pa met so lavi an danze.

16. Satan kone ki nou per lamor, alor kouma li servi sa laper-la kont nou?

¹⁶ Satan kone ki nou kontan nou lavi, ek li dir ki nou kapav abandonn Zeova si nou lavi an danze. (Zob 2:4, 5) Me li ena tor! Selman, li “ena pouvwar touy dimoun,” ek li kone ki nou per lamor. Alor, li servi sa laper-la pou esey fer nou abandonn Zeova. (Ebre 2:14, 15) Parfwa, Satan servi bann dimounn pou menas bann serviter Zeova. Zot dir nou ki zot pou touy nou si nou kontign servi Zeova. Ouswa, si nou bien malad ek ki nou lavi an danze, Satan kapav servi sa pou esey fer nou dezobeir bann prinsip Zeova. Bann dokter ouswa nou fami ki pa Temwin kapav met presion lor nou pou ki nou met disan. Ouswa, enn kikenn kapav esey konvink nou pou aksepte enn tretman ki kont bann prinsip Biblik.

17. Dapre Romin 8:37-39, kifer fode pa nou per lamor?

¹⁷ Mem si nou pa anvi mor, nou kone ki Zeova pou kontign kontan nou mem si nou mor. (Lir Romin 8:37-39.) Kan Zeova so bann kamarad mor, Li kontign rapel zot. Pou Li, se koumadir zot ankor vivan. (Lik 20:37, 38) Li ena enn gran dezir pou resisit zot. (Zob 14:15) Zeova inn pey enn pri bien for pou ki nou “gagn lavi eternel.” (Zan 3:16) Nou kone ki Zeova kontan nou ek ki Li gagn nou traka. Alor, olie ki nou abandonn Li kan nou malad, ouswa kan bann dimounn menas pou touy nou, nou kont lor Li pou gagn rekonfort, sazes, ek lafors. Se seki Valérie ek so misie ti fer.​—Ps. 41:3.

18. Ki nou kapav aprann ar lexanp Valérie?

¹⁸ Kan li ti ena 35 an, Valérie ti aprann ki li ti ena enn kanser bien rar ek ki so lavi ti an danze. Valérie ti per tansion li mor. Anou gete kouma lamour finn ed li pou sirmont sa laper-la. Li dir: “Kan mo ti aprann ki mo ti ena enn kanser, sa ti enn gran sok pou mwa ek pou mo mari. Mo ti bizin fer enn gran loperasion  pou ki mo pa mor. Mo ti get plizir dokter, me zot tou ti refiz pou oper mwa san disan. Mo ti gagn bien per! Me akoz lalwa Bondie, mo ti refiz met disan! Toutlong mo lavi, Zeova inn montre boukou lamour anver mwa. Asterla, mo ti gagn lokazion pou montre Li ki mo kontan Li. Sak fwa ki mo ti gagn enn move nouvel, mo ti plis determine pou fer Zeova plezir ek pou pa les Satan gagne. Finalman, mo’nn reisi opere san disan ek sa finn pas bien. Mem si mo lasante pa tro bon, Zeova ankor pe donn mwa seki mo bizin. Par exanp, avan ki mo’nn aprann ki mo ti ena enn kanser, dan renion wikenn nou ti etidie lartik ‘Faire face ar bann difficulté avek courage.’ c Sa lartik-la ti bien rekonfort mwa ek mo mari. Nou’nn lir li plizir fwa. Bann lartik koumsa, ek nou bann bon labitid spiritiel, inn ed nou pou res kalm ek pou pran bann bon desizion.”

19. Ki pou arive biento?

¹⁹ Avek led Zeova, bann Kretien dan lemond antie inn reisi sirmont zot bann difikilte ek zot inn reisi opoz zot ar Lediab. (1 Pier 5:8, 9) Twa osi to kapav fer sa! Biento, Zeova pou donn Zezi ek bann 144,000 lord pou “detrir travay diab.” (1 Zan 3:8) Apre sa, bann serviter Bondie “pa pou per nanye ek pa pou ena nanye ki pou fer [zot] per.” (Iza. 54:14; Mish. 4:4) Me atandan, nou bizin kontign fer zefor pou sirmont nou bann laper.

20. Ki kitsoz pou ed nou pou sirmont nou bann laper?

²⁰ Nou bizin touletan rapel ki Zeova kontan so bann serviter ek ki Li protez zot. Pou ed nou rapel sa, nou bizin reflesi lor kouma Zeova inn protez so bann serviter dan lepase ek nou bizin koz sa ar lezot. Nou bizin rapel osi kouma Li’nn ed nou pou fer fas ar nou bann difikilte. Wi, avek led Zeova, nou kapav sirmont nou bann laper!​—Ps. 34:4.