1. Kifer Komemorasion Lamor Zezi se zour pli inportan dan lane? (Lik 22:​19, 20)

 POU bann serviter Zeova, zour Komemorasion Lamor Zezi se zour pli inportan dan lane. Se sel levennman ki Zezi inn dir so bann disip fer. (Lir Lik 22:​19, 20.) Ena plizir rezon kifer nou atann avek inpasians zour Komemorasion Lamor Zezi. Anou get sertin parmi zot.

2. Sit sertin rezon kifer nou atann avek inpasians zour Komemorasion.

² Komemorasion Lamor Zezi ed nou pou reflesi lor valer ki laranson ena, ek lor tou bann benediksion ki nou gagne gras-a sa. Sa ed nou pou reflesi osi kouma nou kapav montre nou rekonesans pou sakrifis Zezi. (2 Kor. 5:​14, 15) Anplis, sa donn nou lokazion pou ankouraz nou bann frer ek ser. (Rom. 1:12) Sak lane, boukou inaktif asiste Komemorasion, ek gras-a lamour ki bann frer ek ser montre anver zot sa zour-la, sertin desid pou retourn ar Zeova. Boukou dimounn ki asiste Komemorasion, zot inpresione par seki zot trouve ek tande sa zour-la, ek zot demann enn letid Labib. Akoz tousala, Komemorasion Lamor Zezi li enn zour bien spesial pou nou!

3. Kouma Komemorasion Lamor Zezi montre ki nou enn pep ki ini? (Get zimaz osi.)

³ Reflesi osi kouma Komemorasion Lamor Zezi montre ki nou enn pep ki ini. Sa zour-la, kan soley pe al kouse, tou bann Temwin Zeova lor later pou rasanble. Nou tou nou pou ekout enn diskour ki pou met laksan lor valer ki laranson ena. Nou pou sant de kantik, nou pou pas bann lanblem, ek nou tou nou pou dir “amen” apre sa kat lapriyer ki ena pandan sa renion-la. Dan lespas 24 er-tan, tou bann lasanble dan lemond antie pou fer sa. Sey mazinn lazwa ki Zeova ek Zezi ena kan zot trouv nou pe donn zot loner dan sa fason-la!

4. Ki nou pou examine dan sa lartik-la?

 ⁴ Dan sa lartik-la, nou pou reponn sa bann kestion-la: Kouma nou kapav prepar nou leker pou Komemorasion Lamor Zezi? Kouma nou kapav ed lezot pou gagn bann bienfe? Ek kouma nou kapav ed bann ki inaktif? Repons pou sa bann kestion-la pou prepar nou pou sa levennman bien spesial la.

KOUMA NOU KAPAV PREPAR NOU LEKER POU KOMEMORASION?

5. (a) Kifer nou bizin reflesi lor valer ki laranson ena? (Psom 49:​7, 8) (b) Ki to’nn aprann dan video Kifer Zezi Inn Mor?

⁵ Enn parmi bann pli bon fason ki nou kapav prepar nou leker pou Komemorasion, se kan nou reflesi lor valer ki laranson ena. Par nou-mem, nou pa ti pou kapav libere ar pese ek lamor. (Lir Psom 49:​7, 8; get osi video Kifer Zezi Inn Mor?) a Akoz sa, Zeova inn pran bann dispozision pou ki Zezi donn so lavi pou sov nou. (Rom. 6:23) Zeova ek Zezi toule-de inn fer bann gran sakrifis pou nou. Plis nou reflesi lor bann sakrifis ki Zeova ek Zezi inn fer pou nou, plis nou pou ena rekonesans pou laranson. Dan sa lartik-la, nou pou gete seki sa finn kout Zeova ek Zezi pou donn laranson. Me pou koumanse, anou gete ki ete laranson.

6. Ki ete laranson?

⁶ Enn ranson, se pri ki enn kikenn peye pou regagn ouswa reaste enn kitsoz. Premie zom, Adan, ti enn zom parfe kan Zeova ti kree li. Me kan li’nn fer pese, li’nn perdi posibilite pou viv pou touletan, ek so bann desandan osi inn perdi sa posibilite-la. Pou kapav regagn seki Adan inn perdi, Zezi inn donn so lavi parfe an sakrifis. Kan li ti lor later, Zezi “pa ti komet okenn pese, ek okenn tronpri pa ti sort dan so labous.” (1 Pier 2:22) Alor kan li ti mor, li ti enn zom parfe, parey kouma Adan ti ete avan ki li fer pese. Ek gras-a so sakrifis, Zezi inn kapav reaste seki Adan inn perdi.—1 Kor. 15:45; 1 Tim. 2:6.

7. Sit sertin difikilte ki Zezi inn gagne kan li ti lor later.

⁷ Kan li ti lor later, Zezi inn touletan obeir Zeova, ek li’nn fer sa mem kan sa ti bien difisil. Kan li ti enn zanfan, Zezi ti bizin soumet ar so bann paran ki ti inparfe, mem si li li ti parfe. (Lik 2:51) Kan li ti enn adolesan, sirman Zezi ti bizin fer fas ar presion ki lezot ti met lor li pou ki li dezobeir so bann paran ouswa pou ki li pa res fidel anver Zeova. Kan li ti enn adilt, Zezi ti bizin reziste kont bann tantasion ki Satan ti met devan li. Enn fwa, Satan ti mem dir li aret servi Zeova. (Mat. 4:​1-11) Satan ti bien deside pou fer Zezi fer pese kont Zeova. Lerla, li pa ti pou kapav donn so lavi kouma enn ranson.

8. Ki lezot leprev Zezi ti gagne?

⁸ Kan li’nn koumans so servis pou Zeova, Zezi inn gagn bann lezot leprev. So bann lennmi ti persekit li ek zot ti esey touy li. (Lik 4:​28, 29; 13:31) Li ti bizin siport bann defo ek bann erer ki so bann disip ti fer. (Mark 9:​33, 34) Kan li ti pas devan lakour, bann dimounn ti tortir li ek boufonn li. Zezi ti bien soufer ek li ti gagn enn vilin lamor. (Ebre 12:​1-3) Anplis, avan so lamor, Zezi ti bizin  andir tou sa bann leprev-la li tousel, parski Zeova ti tir So proteksion lor li. b—Mat. 27:46.

9. Ki to resanti kan to reflesi lor sakrifis Zezi? (1 Pier 1:8)

⁹ Zezi inn bien soufer pou li kapav donn so lavi kouma enn ranson. Kan nou reflesi ki kantite Zezi inn soufer pou nou, eski sa pa ogmant nou lamour pou li?—Lir 1 Pier 1:8.

10. Ki sa finn kout Zeova pou donn laranson?

¹⁰ Me ki nou kapav dir lor Zeova? Ki sa finn kout Zeova pou donn laranson? Zeova ek Zezi zot bien-bien pros. Zot relasion, se relasion pli for ki kapav existe ant enn papa ek so garson. (Prov. 8:30) Alor, sey mazine seki Zeova inn resanti kan Li’nn trouv so Garson gagn tou sa bann leprev-la lor later. Sirman sa finn kas leker Zeova kan Li’nn trouve kouma bann dimounn ti pe maltret, persekit, ek rezet so Garson.

11. Servi enn lexanp pou explike seki Zeova inn resanti kan Zezi inn mor.

¹¹ Si to enn paran ek ki to ena enn zanfan ki’nn mor, sirman to rapel gro douler ki to’nn resanti akoz so lamor. Ek mem si nou vremem krwar dan lesperans rezireksion, sa pa diminie nou lapenn kan enn kikenn ki nou kontan mor. Sa lexanp-la ed nou pou konpran seki Zeova inn resanti lane 33 Nou Lepok, kan Li’nn trouv so Garson ki Li bien kontan, soufer ek mor. c—Mat. 3:17.

12. Ki nou kapav fer avan ki zour Komemorasion arive?

¹² Avan ki zour Komemorasion arive, eski to kapav prevwar enn moman pou to etidie plis lor laranson dan to letid personel ouswa dan to ladorasion an fami? Pou to fer sa, to kapav servi Liv Resers pou Bann Temwin Zeova ouswa bann lezot piblikasion ki donn plis detay lor laranson. d Pa bliye osi fer to lektir Labib pou Komemorasion. To pou trouv enn program sa lektir Labib la dan nou Kaye Renion Lavi Kretien ek Predikasion. Ek zour Komemorasion, pa bliye get video Ladorasion dan Gramatin pou Komemorasion Lamor Zezi. Kan nou prepar nou leker pou sa levennman spesial  la, nou pou kapav ed lezot pou ki zot osi zot gagn bann bienfe.—Esdr. 7:10.

ED LEZOT POU GAGN BANN BIENFE

13. Pou ki lezot gagn bann bienfe gras-a Komemorasion Lamor Zezi, ki premie kitsoz nou bizin fer?

¹³ Kouma nou kapav ed lezot pou gagn bann bienfe gras-a Komemorasion Lamor Zezi? Pou koumanse, nou kapav invit zot. Anplis bann dimounn ki nou pou invite dan predikasion, nou kapav fer enn lalis lezot dimounn ki nou pou invite. Lor sa lalis-la, nou kapav met nou fami, nou bann koleg travay, nou bann kamarad lekol, ek lezot ankor. Ek mem si nou pena bann linvitasion papie pou donn zot, nou kapav avoy zot sa par mesaz ouswa par mail. Nou pa kone komie parmi zot kapav vinn asiste Komemorasion!—Ekle. 11:6.

14. Ki lefe sa kapav ena kan nou invit enn kikenn personelman?

¹⁴ Kan nou invit enn kikenn personelman, sa kapav plis motiv li pou vini. Enn zour, enn ser ki so mari pa Temwin, ti etone kan so mari ti dir li ki li ti pou vinn Komemorasion. Kifer ser-la ti etone? Li ti etone parski depi plizir lane, li invit so mari pou asiste Komemorasion, me zame li pa’nn vini. Ki ti arive sann fwa-la? Misie-la dir ki enn ansien so lasanble ti vinn donn li enn linvitasion ek ti invit li. Sa lane-la, sa misie-la ti asiste Komemorasion, ek li’nn kontign asiste Komemorasion pandan plizir lane apre sa.

15. Ki nou bizin rapel kan nou invit bann dimounn pou Komemorasion?

¹⁵ Kan nou invit bann dimounn pou Komemorasion, kitfwa zot pou poz nou bann kestion, sirtou si se premie fwa ki zot pe asiste enn nou bann renion. Alor, reflesi alavans ki kestion zot kapav poz twa, ek prepar twa pou reponn zot. (Kol. 4:6) Par exanp, kitfwa zot kapav demann zotmem: ‘Kouma sa pase?’ ‘Komie letan sa pou dire?’ ‘Ki kalite linz bizin mete?’ ‘Eski bizin pey lantre?’ ‘Eski  pou pas laket?’ Alor, kan to invit enn kikenn pou Komemorasion, to kapav demann li si li ena bann kestion, ek lerla to reponn bann kestion ki li poz twa. To kapav osi servi video Rapel Lamor Zezi ek video Ki Pase dan Lasal Bann Temwin Zeova? pou to montre li kouma nou bann renion deroule. To kapav osi servi leson 28 dan liv Viv Ere pou Touletan!

16. Ki lezot kestion bann dimounn ki asiste Komemorasion kapav poz nou?

¹⁶ Apre Komemorasion, kitfwa zot pou ena bann lezot kestion osi. Kitfwa zot pou anvi kone kifer personn, ouswa zis enn tigit dimounn mem, inn pran bann lanblem. Zot kapav osi demann twa komie fwa par semenn nou fer Komemorasion, ek si tou nou bann renion deroul koumsa. Mem si finn koz lor tousala dan diskour Komemorasion, kitfwa zot pou anvi gagn plis lexplikasion. Lor jw.org, lartik “Kifer Fason ki Bann Temwin Zeova Fer Repa Nou Segner Diferan Avek Fason ki Lezot Relizion Fer?” kapav ed twa pou reponn sa bann kestion-la. Nou anvi ed tou bann ki “ena enn bon kondision leker” pou gagn bann bienfe gras-a Komemorasion. Alor, avan, pandan, ek apre Komemorasion Lamor Zezi, anou fer tou seki nou kapav pou ed zot.—Zist. 13:48.

ED BANN KI INAKTIF

17. Kouma enn ansien kapav ed bann ki inaktif? (Ezekiel 34:​12, 16)

¹⁷ Avan ek apre Komemorasion, kouma enn ansien kapav ed bann ki inaktif? Montre zot ki to gagn zot traka. (Lir Ezekiel 34:​12, 16.) Avan Komemorasion, fer to maximum pou kontakte zot. Dir zot ki to kontan zot ek ki to anvi ed zot. Apre sa, invit zot pou asiste Komemorasion. Si zot vini, akeyir zot bien. Apre Komemorasion, res an kontak ar zot, ek donn zot led ki zot bizin pou zot kapav retourn ar Zeova.—1 Pier 2:25.

18. Kouma sakenn parmi nou kapav ed bann inaktif? (Romin 12:10)

 ¹⁸ Tou dimounn dan lasanble kapav ed bann inaktif ki vinn asiste Komemorasion. Kouma nou kapav fer sa? Nou bizin tret zot avek amour, bonte, ek respe. (Lir Romin 12:10.) Kitfwa sertin parmi zot ti pe ezite pou retourn Lasal, ouswa kitfwa zot ti per tansion zot pa gagn enn bon lakey. e Akoz sa, pa poz zot bann kestion ki pou anbaras zot ek pa dir zot nanye ki pou bles zot. (1 Tes. 5:11) Sa bann inaktif-la, se nou bann frer ek ser, ek nou bien kontan ki zot ansam avek nou pou ador Zeova!—Ps. 119:176; Zist. 20:35.

19. Ki bienfe nou gagne kan nou asiste Komemorasion?

¹⁹ Nou bien rekonesan ki Zezi inn dir nou fer Komemorasion so lamor sak lane, ek nou konpran kifer sa bien inportan! Kan nou asiste Komemorasion, nou gagn bann bienfe, ek lezot osi gagn bann bienfe. (Iza. 48:​17, 18) Nou lamour pou Zeova ek Zezi vinn pli for. Nou montre zot ki kantite nou rekonesan pou seki zot inn fer pou nou. Nou vinn pli pros ar nou bann frer ek ser. Ek nou ed lezot pou aprann kouma zot kapav gagn bann bienfe gras-a laranson. Alor, anou fer nou maximum pou nou prepar nou pou zour pli inportan sa lane-la, setadir Komemorasion Lamor Zezi!