1-2. (a) Dapre Proverb 16:31, kouma nou bizin konsider nou bann frer ek ser aze? (b) Ki kestion nou pou examine dan sa lartik-la?

 DAN Letazini, ena enn park kot nou kapav trouv bann diaman anba. Selman, sa bann diaman-la ankor dan zot leta natirel, setadir zot pa’nn taye ek poli, parey kouma nou trouve dan bann bizoutri. Akoz sa, kan bann dimounn trouv sa bann diaman-la, zot pa realize ki zot pe get bann pier ki ena boukou valer, ek zot pas akote ar sa bann trezor-la san pran zot kont.

² Parey kouma sa bann diaman-la, nou bann frer ek ser aze zot kouma bann trezor ki ena boukou valer. Labib konpar zot seve gri ar enn kouronn. (Lir Proverb 16:31; b 20:29) Selman, li kapav arive ki nou pa pran kont sa bann trezor-la. Kan bann zenn Kretien rekonet valer bann Kretien aze, zot gagn bann bienfe ki ena plis valer ki bann rises materyel. Dan sa lartik-la, nou pou reponn trwa kestion: Kifer Zeova konsider bann frer ek ser aze kouma bann trezor? Kifer bann frer ek ser aze zot inportan dan lorganizasion Zeova? Ki nou bizin fer pou nou gagn bann bienfe gras-a zot lexanp?

3. Dapre Psom 92:12-15, kifer bann frer ek ser aze ena valer pou Zeova?

³ Bann frer ek ser aze ena boukou valer pou Zeova. Li kone ki kalite dimounn zot ete vremem, ek Li apresie bann zoli kalite ki zot ena. Zeova bien kontan kan bann Kretien aze partaz konesans ek lexperyans ki zot inn gagne pandan plizir lane dan So servis, ar bann zenn.  (Zob 12:12; Prov. 1:1-4) Zeova bien apresie zot landirans osi. (Mal. 3:16) Kitfwa zot finn gagn boukou difikilte dan zot lavi, me zot finn kontign res fidel anver Li. Plis bann lane pase, plis zot lesperans dan lavenir vinn pli for. Ek Zeova kontan zot parski zot pe kontign koz lor So nom “dan zot vieyes.”​—Lir Psom 92:12-15.

4. Ki kitsoz kapav ankouraz nou bann frer ek ser aze?

⁴ Si to pe vinn vie, fode pa to bliye ki Zeova rapel tou seki to’nn fer pou Li dan lepase. (Ebre 6:10, NW) Kan to’nn prese avek zel, to’nn fer to Papa Zeova plezir. To’nn andir bann difikilte, mem bann difikilte ki’nn fer twa bien sagrin. To’nn obeir ek defann bann prinsip Labib, to’nn asim bann responsabilite inportan dan lorganizasion Zeova avek fidelite, ek to’nn form lezot. To’nn fer to maximum pou adapte ar bann sanzman ki finn ena dan lorganizasion. To’nn soutenir ek ankouraz bann Kretien ki’nn servi Zeova aplintan. Anplis, Zeova bien kontan twa osi parski to’nn montre Li to fidelite, ek Li promet ki Li “pa abandonn so serviter fidel”! (Ps. 37:28) Zeova fer twa sa promes-la osi: “Ziska ki [to] gagn seve blan mo pou kontign soutenir [twa].” (Iza. 46:4) Alor, fode pa to panse ki, akoz to laz, to nepli ena enn plas inportan dan lorganizasion Zeova. To ena boukou valer pou Zeova!

5. Ki kitsoz bann Kretien aze bizin rapel?

⁵ Bann Kretien aze bien itil dan lorganizasion Zeova. Mem si kitfwa zot nepli ena boukou lafors, zot ena boukou lexperyans ki zot inn gagne pandan plizir lane. Zeova kapav kontign servi zot dan diferan fason. Anou get bann lexanp dan lepase ek bann lexanp modern ki montre sa.

6-7. Sit bann lexanp ki montre kouma Zeova inn rekonpans so bann serviter aze ki fidel.

⁶ Dan Labib, ena lexanp plizir fidel serviter Zeova ki’nn kontign servi Li mem si zot ti vie. Par exanp, Moiz ti ena apepre 80 an kan li ti koumans servi Zeova  antan ki profet ek gid pou nasion Izrael. Zeova ti ankor pe servi Daniel kouma profet, mem si li ti ena plis ki 90 an. Ek lapot Zan kitfwa ti ena plis ki 90 an kan Zeova ti servi li pou ekrir liv Revelasion.

⁷ Ena boukou lezot fidel serviter Zeova ki boukou dimounn pa tro kone, ek kitfwa bann dimounn dan zot lepok pa ti mem remark zot. Me Zeova ti remark zot ek Li ti rekonpans zot pou zot fidelite. Par exanp, Labib pa koz boukou lor Simeon, enn zom ki ‘ti viv enn lavi bien drwat ek ti devoue pou Bondie.’ Me Zeova ti konn Simeon, ek Li ti donn li loner pou trouv Zezi kan li ti ankor enn ti-baba ek pou profetiz lor Zezi ek so mama. (Lik 2:22, 25-35) Mazinn lexanp profetes Ann osi. Li ti enn vev ek li ti ena 84 an, me “li pa ti kit tanp.” Zeova ti beni li parski regilierman li ti al tanp, ek Zeova ti donn li privilez pou trouv Zezi kan li ti enn ti-baba. Simeon ek Ann ti ena boukou valer pou Zeova.​—Lik 2:36-38.

8-9. Ki bon lexanp bann vev kapav done?

⁸ Azordi, ena boukou serviter Zeova ki aze ek ki bann bon lexanp pou bann zenn. Anou get lexanp Ser Lois Didur. Li ti ena 21 an kan li ti koumans servi kouma pionie spesial dan Kanada. Apre sa, li ek so misie John ti pas plizir lane dan servis sirkonskripsion. Ek apre, zot ti servi dan Betel Kanada pandan plis ki 20 an. Kan Lois ti ena 58 an, li ek John ti gagn enn lafektasion dan Likrenn. Eski zot ti aksepte sa lafektasion-la? Eski zot ti dir ki zot tro vie pou al servi dan enn lot pei? Zot ti aksepte zot lafektasion, ek John ti servi kouma enn manb Komite Biro Nasional. Apre set an, John ti mor, me Lois ti kontign servi dan Betel Likrenn. Asterla, Lois ena 81 an. Li ankor pe servi Zeova ansam avek fami Betel dan Likrenn, ek zot tou bien kontan li.

⁹ Bann vev ki parey kouma Lois, kitfwa kapav panse ki zot nepli ena zot plas dan lorganizasion Zeova parski zot misie nepli la. Me mem si zot enn vev, zot ankor ena boukou valer devan lizie Zeova. Pou Zeova, bann ser ki’nn soutenir zot misie pandan boukou lane ek ki ankor pe servi Li avek fidelite, zot ena boukou valer. (1 Tim. 5:3) Anplis, zot lexanp kapav vremem ankouraz bann zenn.

10. Ki bon lexanp Tony inn done?

¹⁰ Bann frer ek ser aze ki res dan lopital ouswa dan bann home, zot osi zot ena boukou valer. Anou get lexanp enn frer ki apel Tony ek ki res dan enn home. Tony ti pran batem an Out 1942 laz 20 an, dan Pennsylvanie, Letazini. Inpe apre so batem, li ti bizin al fer servis militer, me li ti refize. Akoz sa, li ti fer prizon pandan de-z-an edmi. Tony ek so madam, Hilda,  ti elve de zanfan dan laverite. Pandan plizir lane, Tony inn servi kouma sirveyan prezidan dan trwa lasanble (zordi kordinater komite bann ansien) ek osi kouma responsab sirkonskripsion. Anplis, li ti fer bann renion dan enn prizon ek li ti etidie Labib avek bann prizonie. Mem si li ena 98 an, Tony pa’nn ralanti dan so servis pou Zeova. Li pe kontign fer so best pou servi Zeova ansam ar bann frer ek ser so lasanble!

11. Kouma nou kapav montre ki bann frer ek ser ki res dan bann home zot ena valer pou nou?

¹¹ Kouma nou kapav montre ki bann frer ek ser ki res dan bann home zot ena valer pou nou? Kan sa posib, bann ansien kapav ed zot pou asiste ouswa ekout bann renion, ek pou prese. Nou kapav montre ki zot ena valer pou nou kan nou al vizit zot, ouswa kan nou koz ar zot par video call. Nou anvi donn zot enn latansion spesial sirtou si zot home lwin ar zot lasanble. Si nou pa fer atansion, nou kapav bliye sa bann frer ek ser la. Sertin frer ek ser aze kitfwa gagn difikilte ouswa pa santi zot alez pou koz lor zotmem. Me si nou pran letan pou poz zot bann kestion ek pou ekout zot rakont bann lexperyans ki zot inn fer dan lorganizasion Zeova, nou pou gagn boukou bienfe.

12. Ki kalite frer ek ser kitfwa ena dan nou lasanble?

¹² Kitfwa nou kapav etone par lexanp fidelite bann frer ek ser aze ki ena dan nou prop lasanble! Pandan plizir dizenn lane, Harriette inn servi Zeova avek fidelite dan so lasanble dan New Jersey, Letazini. Me apre, li ti demenaze pou al res avek so tifi. Bann frer ek ser so nouvo lasanble ti fer zefor pou aprann konn li, ek zot ti dekouver enn trezor. Harriette ti rakont zot bann lexperyans ki li ti fer dan predikasion kan li ti fek konn laverite dan bann lane 1920, ek sa ti bien ankouraz zot. Sa lepok-la, li ti touletan amenn enn bros-a-dan avek li kan li ti al prese, tansion lapolis aret li. Ek samem ti ariv li an 1933. Sa lane-la, de fwa li ti res enn semenn dan prizon. Dan sa bann moman-la, so mari, ki pa ti enn Temwin, ti okip zot trwa zanfan. Bann frer ek ser aze ki fidel kouma Harriette, zot vremem bann trezor, pa vre!

13. Ki nou’nn aprann konsernan plas ki bann frer ek ser aze ena dan lorganizasion Zeova?

¹³ Nou bann frer ek ser aze ena enn plas bien inportan dan lorganizasion Zeova. Zot finn trouve kouma Zeova inn beni zot ek So lorganizasion dan diferan fason. Zot finn aprann bann leson inportan ar bann erer ki zot inn fer. Akoz sa, nou bizin konsider zot kouma enn “lasours lasazes,” ek nou bizin aprann ar zot lexperyans. (Prov. 18:4) Si nou pran letan pou aprann konn zot, nou pou ranforsi nou lafwa ek nou pou aprann boukou kitsoz!

14. Ki Deteronom 32:7 ankouraz bann zenn pou fer?

¹⁴ Pran linisiativ pou koz avek bann frer ek ser aze. (Lir Deteronom 32:7. c) Kitfwa zot pa trouv tro bien, kitfwa zot mars dousma-dousma, ek kitfwa zot koz dousman, me zot leker ankor zenn ek zot ena enn “bon repitasion” devan lizie Zeova. (Ekle. 7:1) Pa bliye kifer zot ena  valer pou Zeova, ek kontign donn zot loner. Vinn parey kouma Elize ki ti insiste pou res avek Eli. Dernie zour ki zot ti ansam, trwa fwa Elize ti dir Eli: “Mo pa pou kit twa.”​—2 Ler. 2:2, 4, 6.

15. Ki kestion nou kapav poz bann frer ek ser aze?

¹⁵ To montre ki to vremem interese ar bann frer ek ser aze kan to poz zot bann kestion avek boukou respe. (Prov. 1:5; 20:5; 1 Tim. 5:1, 2) To kapav poz zot bann kestion kouma: “Kan to ti zenn, ki kitsoz ti konvink twa ki to ti trouv laverite?” “Kouma bann lexperyans ki to finn fer dan to lavi, finn fer twa vinn pli pros ar Zeova?” “Ki kitsoz finn ed twa pou kontign gagn lazwa dan to servis pou Zeova?” (1 Tim. 6:6-8) Lerla, kan zot pe rakont zot bann lexperyans, ekout zot.

16. Kan enn Kretien aze ek enn zenn Kretien partaz zot lexperyans, ki bienfe zot gagne?

¹⁶ Kan enn Kretien aze ek enn zenn Kretien partaz zot bann lexperyans, toulede ankouraz zot kamarad. (Rom. 1:12) Bann zenn pou plis apresie fason ki Zeova pran swin so bann serviter ki fidel, ek bann frer ek ser aze pou santi lamour ki to ena pou zot. Anplis, bann frer ek ser aze pou kontan pou rakont twa kouma Zeova inn beni zot.

17. Kifer nou kapav dir ki bann Kretien aze zot vinn pli zoli amezir ki bann lane pase?

¹⁷ Avek letan, nou nepli osi zoli ki kan nou ti zenn, me amezir ki bann lane pase, bann serviter Zeova ki fidel, zot vinn pli zoli. (1 Tes. 1:2, 3, NW) Kifer nou kapav dir sa? Parski amezir ki bann lane pase, zot finn les lespri sin Zeova form zot ek ed zot kiltiv bann zoli kalite. Plis nou aprann konn nou bann frer ek ser aze, nou donn zot loner, ek nou aprann ar zot lexperyans, plis nou pou konsider zot kouma bann trezor ki ena boukou valer!

18. Ki nou pou examine dan prosin lartik?

¹⁸ Enn lasanble vinn pli for kan bann frer ek ser, zenn ek aze, donn valer zot kamarad. Dan prosin lartik, nou pou examine kouma bann Kretien aze kapav montre ki bann zenn ena boukou valer pou zot.