1. Kifer Zezi ti demann Zeova pou protez so bann disip?

 LANWIT avan so lamor, Zezi ti pe reflesi lor bann difikilte ki so bann disip ti pou gagne. Zezi ti bien kontan so bann disip, akoz sa li ti demann so Papa pou “protez zot kont lemal.” (Zan 17:14, 15) Zezi ti kone ki, kan li ti pou retourn dan lesiel, Satan ti pou kontign atak bann ki anvi servi Zeova. Se pou sa rezon-la ki bann serviter Zeova bizin So proteksion.

2. Kifer nou kapav sir ki Zeova pou reponn nou bann lapriyer?

² Zeova ti reponn lapriyer Zezi parski Li kontan So Garson. Si nou fer nou maximum pou fer Zeova plezir, Li pou kontan nou osi ek Li pou ekout nou bann lapriyer kan nou demann Li so led ek so proteksion. Zeova, Li enn Papa ki ena boukou lamour. Alor, Li pou kontign pran swin so bann zanfan. Si Li pa fer sa, sa pou zet dezoner lor so nom ek gat so repitasion.

3. Kifer nou bizin proteksion Zeova azordi?

³ Azordi, nou bizin proteksion Zeova ankor plis. Kifer? Parski Satan inn gagn pouse depi lesiel ek li “bien-bien ankoler.” (Rev. 12:12) Satan inn reisi konvink bann dimounn ki pe persekit nou, ki “zot pe servi Bondie kan zot pe fer sa.” (Zan 16:2) Ena lezot dimounn ki pa krwar dan Bondie ek ki persekit nou, parski nou pa parey kouma bann dimounn ki dan sa lemond-la. Me ninport ki rezon pou kifer bann dimounn persekit nou, nou pena pou per. Kifer? Parski Labib dir: “Me Lesegner ki fidel, li pou fortifie zot e gard zot proteze kont diab.” (2 Tes. 3:3) Asterla, anou get de fason kouma Zeova protez nou.

4. Dapre Efezien 6:13-17, ki kitsoz Zeova inn donn nou?

⁴ Zeova inn donn nou enn larmir spiritiel ki kapav protez nou kont bann latak Satan. (Lir Efezien 6:13-17.) Sa larmir spiritiel la, li bien solid ek efikas. Me pou ki li protez nou, nou bizin servi sak parti dan sa larmir-la ek fode pa nou tir li lor nou. Anou examine seki sak parti sa larmir-la reprezante.

5. Ki ete sintir laverite, ek kifer nou bizin met li?

⁵ Sintir laverite reprezant tou bann verite ki ena dan Parol Bondie, Labib. Kifer nou bizin met sa sintir-la? Parski Satan li “papa bann manter.” (Zan 8:44) Li ena plizir milye lane lexperyans lor koz manti ek li’nn anbet lemond antie! (Rev. 12:9) Me bann verite ki ena dan Labib protez nou kont sa bann foste-la. Kouma nou met sintir laverite lor nou? Nou fer sa kan nou aprann laverite lor Zeova, nou ador Li “dan Lespri ek dan laverite,” ek nou onet dan tou kitsoz.​—Zan 4:24; Efe. 4:25; Ebre 13:18, NW.

6. Ki ete zile proteksion ladrwatir, ek kifer nou bizin met li?

⁶ Zile proteksion ladrwatir reprezant bann prinsip Zeova ki drwat. Kifer nou bizin met nou zile proteksion? Enn zile protez leker enn solda kont bann zarm. Dan mem fason, zile proteksion ladrwatir protez nou leker sinbolik, setadir seki nou ete dan pli profon noumem. Li protez nou kont bann move linflians sa lemond-la. (Prov. 4:23) Zeova anvi ki nou kontan Li ek ki nou servi Li ar tou nou leker. (Mat. 22:36, 37) Akoz sa, Satan esey fer nou aret servi Zeova ar tou nou leker. Li fer sa kan li esey fer nou kontan bann kitsoz ki dan so lemond ek ki Zeova deteste. (Zak 4:4; 1 Zan 2:15, 16) Si sa metod-la pa marse, li pou persekit nou pou ki nou fer bann kitsoz ki Zeova pa kontan.

7. Kouma nou met zile proteksion ladrwatir lor nou?

⁷ Nou met zile proteksion ladrwatir lor nou kan nou aksepte bann prinsip Zeova konsernan seki bon ek seki pa bon ek nou viv an-akor avek sa bann prinsip-la. (Ps. 97:10) Sertin kapav panse ki bann prinsip Zeova priv zot zot liberte. Me si nou aret swiv bann prinsip Biblik, nou pou koumadir enn solda ki tir so zile proteksion lor li an plin lager, parski li trouve ki zile-la tro lour. Li pou bien bet si li fer sa, pa vre! Me si nou kontan Zeova, nou pa pou trouv so bann komannman “lour.” Okontrer, nou pou konpran ki zot kapav fer nou gagn lavi sov.​—1 Zan 5:3, NW.

8. Kifer nou bizin met soulie ki fer nou pare pou al anons bonn nouvel?

⁸ Pol inn ankouraz nou pou met soulie ki fer nou pare pou al anons bonn nouvel ki donn lape. Savedir ki nou bizin touletan pre pou pres bon nouvel Rwayom Bondie. Kan nou prese, nou lafwa vinn pli for. Sa bien ankouraz nou kan nou trouve kouma bann serviter Zeova dan lemond antie rod sak lokazion pou prese! Par exanp, zot prese lakaz-lakaz, dan bann teritwar komersial, dan zot travay, dan lekol, kan zot al fer shopping, ar zot fami ki pa Temwin, ek osi ar bann dimounn ki zot kone. Zot prese mem kan zot konfine kot zot. Si nou koumans per ek aret prese, nou pou resanble enn solda ki tir so soulie an plin lager. So lipie pou blese ek li pa pou kapav protez limem kont latak bann lennmi. Anplis, li pa pou kapav obeir lord so komandan.

9. Kifer nou bizin sarye nou gran boukliye lafwa?

 ⁹ Gran boukliye lafwa reprezant lafwa ki nou ena an Zeova. Nou ena lafwa ki Zeova pou realiz tou so bann promes. Lafwa pou ed nou “pou tegn tou fles anflame ki diab avoye.” Kifer nou bizin sarye sa gran boukliye-la? Parski li protez nou kont fos lansegnman bann aposta ek li ed nou pou pa dekouraze kan bann dimounn boufonn nou bann krwayans. San lafwa, nou pa pou ena lafors pou obeir Zeova kan lezot met presion lor nou pou dezobeir Li. Dan travay ouswa dan lekol, sak fwa ki nou reziste tantasion pou fer enn kitsoz ki Zeova pa kontan, nou pe sarye nou boukliye lafwa. (1 Pier 3:15) Kan nou refiz enn travay ki pey pli bien parski li anpes nou fer nou maximum pou Zeova, nou pe sarye nou boukliye lafwa. (Ebre 13:5, 6) Ek kan nou servi Zeova malgre lopozision, nou pe sarye nou boukliye lafwa.​—1 Tes. 2:2.

10. Ki ete elmet ki sov nou, ek kifer nou bizin met li?

¹⁰ Elmet ki sov nou reprezant lesperans ki Zeova donn nou; lesperans ki Zeova pou rekonpans tou bann ki fer so volonte, ek mem si nou mor, Li pou resisit nou.  (1 Tes. 5:8; 1 Tim. 4:10; Tit 1:1, 2) Lesperans protez nou bann panse, parey kouma enn elmet protez latet enn solda. Nou lesperans ed nou pou res konsantre lor bann promes Bondie ek pou pa trakase plis ki bizin akoz nou bann problem. Kouma eski nou met sa elmet-la? Nou met li kan nou fer zefor pou ena mem fason panse ki Zeova. Par exanp, kan nou met nou lespwar dan Bondie ek pa dan bann kitsoz materyel.​—Ps. 26:2; 104:34; 1 Tim. 6:17.

11. Ki ete lepe lespri, ek kifer nou bizin servi li?

¹¹ Lepe lespri reprezant Parol Bondie, setadir Labib. Sa lepe-la bien pwisan ek li ena kapasite pou devwal bann foste ek liber bann dimounn ar bann fos lansegnman ek bann move labitid. (2 Kor. 10:4, 5; 2 Tim. 3:16, 17; Ebre 4:12) Nou aprann servi bien sa lepe-la gras-a nou letid personel ek bann formasion ki nou gagne ar lorganizasion Zeova. (2 Tim. 2:15) Me Zeova pa zis donn nou enn larmir spiritiel. Li donn nou enn lot kalite proteksion osi ki bien pwisan. Ki sa proteksion-la sa?

12. Ki kitsoz ankor nou bizin, ek kifer?

¹² Enn solda ki ena lexperyans kone ki li pa kapav gagn laviktwar kont enn gran larme li tousel. Li bizin led bann lezot solda. Dan mem fason, nou tousel, nou pa pou kapav gagn laviktwar kont Satan ek bann ki soutenir li. Nou bizin soutien nou bann frer ek ser. Zeova inn donn nou enn fami internasional “bann frer e ser dan lafwa” ki kapav ed nou.​—1 Pier 2:17.

13. Dapre Ebre 10:24, 25, ki bienfe nou gagne kan nou asiste bann renion?

¹³ Enn lot fason ki Zeova soutenir nou se kan nou asiste bann renion. (Lir Ebre 10:24, 25.) Parfwa, nou tou nou santi nou dekouraze. Kan sa arive, bann renion kapav ankouraz nou. Nou ankouraze par bann zoli komanter ki nou bann frer ek ser fer pandan renion. Bann diskour ek bann demonstrasion motiv nou pou kontign servi Zeova. Ek bann konversasion ki nou gagne avan ek apre bann renion bien ankouraz nou osi. (1 Tes. 5:14) Anplis, nou bann renion donn nou lokazion pou ed lezot, ek sa rann nou zwaye. (Zist. 20:35; Rom. 1:11, 12) Nou bann renion ed nou dan lezot fason osi. Zot ed nou pou vinn bann pli bon proklamater ek ansegnan. Par exanp, nou aprann pou servi pli bien bann piblikasion ki dan nou Kes Zouti pou Ansegne. Alor, prepar twa bien pou bann renion. Pandan renion, ekout bien. Ek apre renion, aplik bann konsey ki to’nn gagne. Kan to fer tousala, to pou vinn enn bon “solda Zezi Kris.”​—2 Tim. 2:3.

14. Dan ki lot fason ankor Zeova soutenir nou?

¹⁴ Enn lot fason ankor ki Zeova soutenir nou se par bann milyon anz. Reflesi lor seki enn sel anz kapav fer! (Iza. 37:36) Asterla, mazinn seki enn larme anz bien pwisan kapav fer. Pena okenn zom, ni okenn demon ki kapav gagn laviktwar kont bann anz Zeova. Zeova Li Tou Pwisan. Alor, kan Li avek nou, nou pou touletan pli for ki nou bann lennmi, ninport ki kantite zot ete. (Ziz 6:16) Kan to santi twa dekouraze akoz enn koleg travay, enn kamarad lekol, ouswa enn fami ki pa Temwin, pa bliye tou bann mwayin ki Zeova servi pou soutenir twa. To pa tousel dan sa lager-la! To pe obeir Zeova, alor to kapav sir ki Li pou soutenir twa.

15. Dapre Izai 54:15, 17, kifer nou kapav sir ki nanye pa kapav anpes bann serviter Zeova pou prese?

¹⁵ Lemond Satan ena boukou rezon pou ena laenn pou nou. Par exanp, nou pa soutenir okenn parti politik, ek nou pa partisip dan okenn lager. Nou fer bann dimounn konn nom Zeova, nou prese ki zis So Rwayom ki pou kapav amenn lape, ek nou obeir bann prinsip Biblik. Nou ansegn bann dimounn ki dirizan sa lemond-la li enn manter ek enn kriminel. (Zan 8:44) Ek nou osi anonse ki lemond Satan pou detrir biento. Satan ek bann ki soutenir li, zame pa pou kapav anpes nou prese. Okontrer, nou pou kontign donn laglwar Zeova dan ninport ki fason nou kapav! Mem si Satan bien pwisan, li pa’nn reisi anpes bonn nouvel prese lor later antie. Kifer? Parski nou ena proteksion Zeova.​—Lir Izai 54:15, 17. b

16. Kouma Zeova pou sov so bann serviter pandan gran detres?

¹⁶ Ki pou arive dan lavenir? Pandan gran detres, Zeova pou fer de kitsoz extraordiner pou sov nou. Premierman, Zeova pou sov so bann serviter fidel kan li pou fer bann lerwa lor later detrir Gran Babilonn, lanpir mondial fos relizion. (Rev. 17:16-18; 18:2, 4) Apre sa, Zeova pou sov so bann serviter kan Li pou detrir leres lemond Satan pandan Armagedon.​—Rev. 7:9, 10; 16:14, 16.

17. Ki bienfe nou gagne kan nou res pros ar Zeova?

¹⁷ Kan nou res pros ar Zeova, Satan pa kapav fer nou ditor pandan lontan. Okontrer, se li ki pou detrir. (Rom. 16:20) Alor, anou met nou larmir spiritiel lor nou, ek les li lor nou! Fode pa nou esey lager tousel. Anou soutenir nou bann frer ek ser, ek kontign obeir Zeova. Si nou fer sa, nou kapav sir ki nou Papa ki kontan nou pou fortifie nou ek protez nou.​—Iza. 41:10.