1. Ki lefe zalouzi ti ena lor fami Zozef?

 ZAKOB ti kontan tou so bann garson, me li ti ena plis lafeksion pou Zozef. Ki bann frer Zozef ti resanti akoz sa? Zot ti koumans zalou li ek ena laenn pou li. Zozef pa ti fer nanye pou ki so bann frer zalou li. Me kanmem sa, kan li ti ena 17 an, zot ti vann li kouma enn esklav. Anplis, zot ti koz manti ar zot papa ek zot ti dir li ki enn zanimo sovaz ti touy so garson prefere. Zozef so bann frer ti zalou li ek akoz sa zot ti detrir lape ki ti ena dan zot fami ek zot ti kas leker zot papa.​—Zen. 37:3, 4, 27-34.

2. Dapre Galat 5:19-21, kifer lanvi ek zalouzi danzere?

² Dan Labib, lanvi ek zalouzi b form parti bann kitsoz ki “laser” prodir ek li kapav anpes enn kikenn pou rant dan Rwayom Bondie. (Lir Galat 5:19-21.) Bien souvan, zalouzi se rasinn bann move kitsoz kouma bann dezakor, laenn, ek koler.

3. Ki nou pou examine dan sa lartik-la?

³ Lexanp bann frer Zozef montre kouma zalouzi kapav gat relasion ki ena ant bann dimounn ek detrir lape ki ena dan enn fami. Mem si zame nou pa pou fer seki bann frer Zozef ti fer, nou tou nou ena enn leker inparfe ki tret. (Zer. 17:9) Se pou sa rezon-la ki parfwa li kapav arive ki nou zalou lezot. Atraver Labib, anou get sertin lexanp ki pou montre nou kifer zalouzi kapav koumans grandi dan  nou leker. Apre sa, nou pou get osi bann kitsoz pratik ki nou kapav fer pou rezet zalouzi ek favoriz lape.

4. Kifer bann Filistin ti zalou Izaak?

⁴ Kan enn kikenn ris. Bann Filistin ti zalou Izaak parski li ti enn zom bien ris. (Zen. 26:12-14) Zot ti mem bous bann pwi ki Izaak ti servi pou donn so bann zanimo bwar. (Gen. 26:15, 16, 27) Parey kouma bann Filistin, sertin dimounn azordi zalou bann dimounn ki ena pli boukou kitsoz materyel ki zot. Zot pa zis rod gagn bann kitsoz ki lezot ena, me zot osi anvi anpes zot ena sa bann kitsoz-la.

5. Kifer bann sef relizie ti zalou Zezi?

⁵ Kan boukou dimounn bien kontan enn kikenn. Bann sef relizie Zwif ti zalou Zezi parski lepep ti bien kontan li. (Mat. 7:28, 29) Mem si Zezi ti reprezantan Bondie ek ti ansegn laverite, sa bann sef relizie la ti fann bann foste lor li pou gat so repitasion. (Mark 15:10; Zan 11:47, 48; 12:12, 13, 19) Ki leson nou aprann ar sa lexanp-la? Kan bann frer ek ser ena bann zoli kalite ek ki lezot dan lasanble kontan zot pou sa, fode pa nou zalou. Okontrer, nou bizin imit zot bann zoli kalite.​—1 Kor. 11:1; 3 Zan 11.

6. Kouma Diotrefes ti montre ki li ti zalou?

⁶ Kan enn kikenn ena bann responsabilite dan lasanble. Dan premie siek, Diotrefes ti zalou bann frer ki ti ena bann responsabilite dan lasanble. Li ti anvi “premie plas” parmi bann frer ek ser so lasanble, alor li ti fann bann foste lor lapot Zan ek bann lezot frer ki ti ena bann responsabilite. Li ti fer sa pou ki lezot dan lasanble nepli respekte zot. (3 Zan 9, 10, NW) Zame nou pa pou fer parey kouma Diotrefes. Selman, li kapav arive ki nou osi nou koumans zalou enn frer ki’nn gagn enn responsabilite ki nou ti anvi gagne, sirtou si nou panse ki nou kapav fer travay-la bien, ouswa mem pli bien ki li.

7. Ki lefe zalouzi kapav ena lor nou?

⁷ Zalouzi li kouma enn lerb anpwazone. Enn fwa ki so lagrin pran rasinn dan nou leker, li kapav bien difisil pou derasinn li. Zalouzi grandi akoz bann vilin defo kouma lorgey, enn latitid egois, ek enn lespri konpetision. Li kapav osi touf bann zoli kalite kouma lamour, konpasion ek bonte, ek anpes zot grandi. Deswit kouma nou remarke ki zalouzi pe koumans pouse dan nou leker, nou bizin derasinn li. Kouma nou kapav lit kont zalouzi?

8. Ki bann kalite kapav ed nou pou lit kont zalouzi?

⁸ Nou kapav lit kont zalouzi kan nou kiltiv limilite ek nou kontant nou ar seki nou ena. Kan nou leker ranpli ar bann zoli kalite, zalouzi pa pou ena plas pou grandi. Enn kikenn ki ena limilite, li pa panse ki li pli bon ki lezot. Li pa panse osi ki li merit plis ki lezot. (Gal. 6:3, 4) Enn kikenn ki kontant li ar seki li ena, li pa konpar limem ar lezot. (1 Tim. 6:7, 8) Enn dimounn ki ena limilite ek ki kontant li ar seki li ena, kan li trouv enn kikenn gagn enn bon kitsoz, li kontan pou sa dimounn-la.

9. Dapre Galat 5:16 ek Filipien 2:3, 4, ki kitsoz lespri sin pou ed nou pou fer?

⁹ Nou bizin lespri sin Bondie pou lit  kont zalouzi, pou kiltiv limilite, ek pou kontant nou ar seki nou ena. (Lir Galat 5:16; Filipien 2:3, 4.) Lespri sin Zeova kapav ed nou pou examinn nou bann mobil ek nou bann panse pli profon. Avek led Bondie, nou kapav ranplas bann panse ek bann santiman negatif par bann panse ek bann santiman pozitif. (Ps. 26:2; 51:10) Anou get lexanp Moiz ek Pol, de zom ki ti reisi lit kont zalouzi.

10. Ki sitiasion ti kapav teste Moiz? (Get zimaz lor kouvertir.)

¹⁰ Moiz ti ena enn gran lotorite lor pep Bondie, me li pa ti res atase ar sa lotorite-la. Par exanp, enn fwa, Zeova ti pran inpe lespri sin ki ti lor Moiz ek ti donn sa enn group ansien ki ti pe debout pre ar latant renion. Inpe plitar, Moiz ti tann dir ki de ansien ki pa ti al kot latant renion ti gagn lespri sin zot osi ek ki zot ti pe azir kouma bann profet. Kouma Moiz ti reazir kan Zozwe ti demann li pou anpes sa de ansien-la azir koumsa? Moiz pa ti zalou ki Zeova ti donn zot sa privilez-la. Okontrer, avek limilite, li ti kontan pou zot. (Nonb 11:24-29) Ki leson nou aprann ar lexanp Moiz?

11. Kouma bann ansien kapav imit lexanp Moiz?

¹¹ Si to enn ansien, eski komite ansien finn deza demann twa pou form enn kikenn pou asim enn responsabilite ki to ena ek ki to bien kontan? Par exanp, kitfwa to kontan responsabilite pou diriz Letid Latour Degard sak semenn. Si to ena limilite parey kouma Moiz, to pa pou santi ki to’nn vinn mwin inportan si demann twa pou form enn lot frer pou ki plitar li asim sa responsabilite-la. Okontrer, to pou kontan pou ed to frer.

12. Azordi, kouma boukou Kretien pe kiltiv limilite ek pe kontant zot ar seki zot ena?

¹² Anou get enn lot sitiasion ki boukou frer aze pe fer fas. Pandan plizir dizenn lane, zot ti pe servi kouma kordinater komite bann ansien. Me kan zot gagn 80 an, zot les enn lot frer pran sa responsabilite-la. Bann responsab sirkonskripsion ki gagn 70 an, avek limilite zot kit sa servis-la ek zot aksepte enn lot form servis. Depi de-trwa lane, boukou Betelit dan lemond antie inn sanz afektasion ek zot inn al servi kouma pionie. Sa bann Kretien fidel la pena okenn santiman negatif anver bann frer ek ser ki’nn gagn bann responsabilite ki zot ti ena avan.

13. Ki kitsoz ti kapav pous Pol pou zalou 12 zapot Zezi?

¹³ Enn lot lexanp enn kikenn ki ti kiltiv limilite ek ti kontant li ar seki li ena se lapot Pol. Pol pa ti les zalouzi grandi dan so leker. Li ti travay bien dir dan so minister, me avek limilite li ti dir: “Mo pli tipti parmi bann zapot, ek mo pa dign ki apel mwa zapot.” (1 Kor. 15:9, 10, NW) Pandan so minister, Zezi ti ena so 12 zapot avek li. Parkont, lapot Pol ti vinn Kretien apre lamor ek rezireksion Zezi. Mem si apre, Pol ti vinn “apot bann non-Zwif,” zame li pa ti form parti 12 zapot Zezi. (Rom. 11:13; Zist. 1:21-26) Olie ki li ti zalou sa 12 zom-la ek relasion bien pros ki zot ti ena avek Zezi, Pol ti kontant li ar seki li ti ena.

14. Ki nou pou fer si nou ena limilite ek nou kontant nou ar seki nou ena?

¹⁴ Si nou ena limilite ek nou kontant nou ar seki nou ena, nou pou imit lexanp Pol ek nou pou ena respe pou bann dimounn ki Zeova inn donn bann responsabilite. (Zist. 21:20-26) Zeova finn  etabli bann ansien pou pran swin lasanble Kretien. Mem si sa bann frer-la inparfe, Zeova konsider zot kouma bann “don.” (Efe. 4:8, 11) Kan nou respekte sa bann zom-la ek ki avek limilite nou swiv bann instriksion ki zot donn nou, nou res pros ar Zeova ek nou anpe avek nou bann frer ek ser.

15. Ki bann kitsoz nou bizin fer?

¹⁵ Si nou zalou lezot ouswa si lezot zalou nou, pa pou ena lape ant nou. Nou bizin derasinn tou ti tras zalouzi ki ena dan nou leker ek fode pa ki nou plant zalouzi dan leker lezot. Li inportan ki nou fer sa si nou anvi obeir lord ki Zeova inn donn nou pou “kontign fer bann kitsoz ki favoriz lape ek bann kitsoz ki fortifie sakenn nou kamarad.” (Rom. 14:19, NW) Ki bann kitsoz pratik nou kapav fer pou ed lezot lit kont zalouzi, ek kouma nou kapav favoriz lape?

16. Kouma nou kapav ed lezot pou lit kont zalouzi?

¹⁶ Nou latitid ek fason ki nou azir kapav ena enn gran lefe lor lezot. Sa lemond-la anvi ki nou “fer letalaz” ar bann kitsoz ki nou ena. (1 Zan 2:16, NW) Me sa kalite latitid-la fer bann dimounn zalou zot kamarad. Ki nou kapav fer pou ki zalouzi pa grandi dan leker nou bann frer ek ser? Fode pa ki nou koz tro boukou lor bann kitsoz ki nou ena ouswa ki nou anvi aste. Nou kapav osi vey lor nou latitid  konsernan bann responsabilite ki nou ena dan lasanble. Kan nou atir latansion lor nou bann responsabilite, se koumadir nou pe met fimie dan later pou ki zalouzi grandi. Parkont, kan nou montre enn lintere sinser pou lezot ek rekonet bann bon kitsoz ki zot fer, nou ed zot pou kiltiv santiman kontantman. Nou osi favoriz lape ek linite dan lasanble.

17. Ki kitsoz bann frer Zozef ti reisi fer, ek kifer?

¹⁷ Nou kapav gagn laviktwar lor zalouzi! Anou re-get lexanp bann frer Zozef. Plizir lane apre ki zot ti tret Zozef dan enn move fason, zot ti zwenn li dan Lezip. Avan ki Zozef dir zot kisannla li ti ete vremem, li ti teste zot pou gete si zot ti sanze. Li ti organiz enn repa ek li ti fer an-sort ki Binzamin gagn plis latansion ki lezot. (Zen. 43:33, 34) Me so bann frer pa ti zalou Binzamin. Okontrer, zot ti montre ki zot vremem interese ar zot frer ek ar zot papa, Zakob. (Zen. 44:30-34) Bann frer Zozef ti reisi rezet zalouzi. Gras-a sa, zot ti ede pou retabli lape dan zot fami. (Zen. 45:4, 15) Dan mem fason, si nou derasinn tou ti tras zalouzi ki ena dan nou leker, nou pou ede pou ki ena lape dan nou fami ek dan nou lasanble.

18. Dapre Zak 3:17, 18, ki pou arive si nou favoriz lape otour nou?

¹⁸ Zeova anvi ki nou lit kont zalouzi ek ki nou favoriz lape. Nou bizin fer bann gran zefor pou fer sa de kitsoz-la. Kouma nou finn trouve dan sa lartik-la, nou tou nou ena tandans pou zalou lezot. (Zak 4:5, NW) Anplis, nou pe viv dan enn lemond ki ankouraz bann dimounn pou zalou lezot. Me si nou kiltiv limilite, rekonesans, ek ki nou kontant nou ar seki nou ena, zalouzi pa pou reisi grandi dan nou leker. Olie sa, nou pou favoriz lape otour nou ek nou pou devlop bann zoli kalite.​—Lir Zak 3:17, 18.