1, 2. Ki nou bizin konpran lor Satan ek so bann demon?

 LAVI dan nouvo lemond ki Zeova inn promet pou extraordiner. Finalman, nou pou viv kouma Bondie ti anvi nou viv. Me azordi, nou pe viv dan enn lemond ki kontrole par Satan ek so bann demon. (2 Korintien 4:4) Mem si nou pa trouv zot, zot existe ek zot bien pwisan.

² Dan sa sapit-la, nou pou examine kouma nou kapav res pros ar Zeova ek protez noumem kont Satan. Zeova promet ki Li pou ed nou. Me nou bizin konpran bann taktik ki Satan ek so bann demon servi pou piez nou ek atak nou.

3. Ki Diab anvi fer nou?

³ Satan pretann ki bann imin ador Zeova pou bann rezon egois ek ki nou pou aret servi Li si bann sitiasion vinn tro difisil. (Lir Zob 2:4, 5.) Kan enn dimounn montre ki li anvi aprann konn Zeova, Satan ek so bann demon remark sa, ek zot esey anpes li. Zot ankoler kan enn dimounn vwe so lavi ar Zeova ek pran batem. Labib dekrir Diab kouma “enn lion feros [ki pe kriye, NW]; li pe  rod kikenn pou devore.” (1 Pier 5:8) Satan anvi kas nou relasion ar Zeova.​—Psom 7:1, 2; 2 Timote 3:12, NW.

4, 5. (a) Ki Satan pa kapav fer? (b) Ki savedir “reziste diab”?

⁴ Me fode pa nou per Satan ek so bann demon. Zeova inn met enn limit lor seki zot kapav fer nou. Zeova promet ki “enn gran lafoul” bann vre Kretien pou sirviv “gran persekision [detres, NW].” (Revelasion 7:9, 14) Diab pa kapav fer nanye pou aret sa, parski Zeova pe protez So pep.

 ⁵ Si nou res pros ar Zeova, Satan pa kapav kas nou relasion avek Li. Parol Bondie rasir nou: “Zeova avek zot tanki zot avek Li.” (2 Kronik 15:2; lir 1 Korintien 10:13.) Boukou zom ek fam fidel dan lepase, kouma Abel, Enok, Noe, Sara, ek Moiz, ti reziste kont Diab kan zot ti res pros ar Zeova. (Ebre 11:4-40, NW) Nou kapav fer parey. Parol Bondie promet: “Reziste diab e li pou sove, al lwin ar zot.”​—Zak 4:7.

6. Kouma Satan atak nou?

⁶ Mem si Satan kone ki Zeova inn met enn limit lor seki li kapav fer nou, kanmem sa, li pou esey fer tou pou fer nou lamitie avek Bondie vinn feb. Azordi, Diab atak nou dan diferan fason, ek li servi bann mem taktik ki li’nn servi pandan plizir milye lane. Ki sertin sa bann taktik-la?

7. Kifer Satan pe atak pep Zeova?

⁷ Lapot Zan ti ekrir: “Lemonn antie li dan pouvwar Lemal.” (1 Zan 5:19) Satan pe kontrol sa move lemond-la ek li ti pou kontan kontrol pep Zeova osi. (Mishe 4:1; Zan 15:19, NW; Revelasion 12:12, 17, NW) Diab kone ki li pa res boukou letan. Akoz sa, li pe met boukou presion lor sakenn parmi nou pou nou pa res fidel ar Bondie. Parfwa Diab servi bann atak direk, me ena fwa, so bann atak pli sournwa.

8. Ki sak Kretien bizin konpran?

⁸ Nou lir dan Efezien 6:12: “Nou . . . pe lit . . . kont pwisans spiritiel lemal lao dan lesiel.” Sak Kretien ena enn lalit personel kont Diab ek so bann demon.  Nou bizin konpran ki tou seki vwe zot lavi ar Zeova, ena sa lager-la pou fer. Dan so let pou bann Efezien, lapot Pol ti ankouraz bann Kretien pou “reziste” ek “tini dibout.”​—Efezien 6:11, 13, 14.

9. Ki Satan ek so bann demon esey fer nou?

⁹ Satan ek so bann demon esey anbet nou dan diferan fason. Zis parski nou’nn reisi reziste kont enn piez Satan, pa vedir ki nou pa pou tom dan enn lot piez. Diab esey rod nou bann febles pou ki li kapav swazir bann piez pou may nou. Me parski Labib ansegn nou lor bann piez ki Diab servi, nou kapav evit zot. (2 Korintien 2:11; get Not 31.) Enn sa bann piez-la se bann pratik demoniak.

10. (a) Bann pratik demoniak. Ki ete sa? (b) Ki Zeova panse lor bann pratik demoniak?

¹⁰ Bann pratik demoniak inplik bann kitsoz sirnatirel ki kapav fer enn dimounn gagn kontak avek bann demon. Sertin lexanp se, get lavenir, sorselri, zet bann sor, ouswa esey koz avek bann dimounn mor. Labib dir nou ki Zeova “deteste” bann pratik demoniak ek ki nou pa kapav partisip dan sa bann pratik-la ek ador Zeova anmemtan. (Deteronom 18:10-12; Revelasion 21:8) Bann Kretien bizin rezet tou kalite pratik demoniak.​—Romin 12:9.

11. Kan nou atire ar bann kitsoz sirnatirel, ki kapav arive?

¹¹ Satan kone ki li pou fasil ris nou dan bann pratik demoniak si nou atire ar bann kitsoz sirnatirel. Ninport ki form pratik demoniak kapav detrir nou relasion avek Zeova.

12. Kouma Satan anvi inflians nou panse?

¹² Satan anvi ki bann dimounn nepli kone ki pou panse. Tigit-tigit li sem bann dout, ziska ki bann dimounn panse ki “seki bon, li move ek seki move, li bon.” (Izai 5:20) Diab ankouraz bann dimounn pou panse ki bann konsey dan Labib pa marse ek ki nou pou pli ere si nou pa pran kont bann prinsip Bondie.

13. Kouma Satan inn esey sem bann dout?

¹³ Enn parmi bann mwayin pli efikas ki Satan servi, se sem bann dout. Li pe servi sa mwayin-la depi bien lontan. Dan zardin Edenn, li ti esey sem bann dout dan lespri Ev kan li ti demann li: “Eski vremem Bondie finn dir ki fode pa zot manz frwi tou bann pie ki ena dan zardin?” (Zenez 3:1) Plitar, dan lepok Zob, Satan ti demann Zeova devan bann anz: “Eski pou nanye ki Zob finn ena lakrint pou Bondie?” (Zob 1:9) Apre batem Zezi, Satan ti provok li kan li ti dir : “Si tomem garson Bondie, donn lord sa bann ros la vinn dipin.”​—Matie 4:3.

14. Kouma Satan kapav fer bann dimounn gagn dout lor danze bann pratik demoniak?

¹⁴ Azordi, Diab kontign sem bann dout. Li esey fer bann dimounn krwar ki bann pratik demoniak pa vremem move. Dan ki sans? Se kan li fer bann dimounn krwar ki sertin sa bann pratik-la pa danzere. Mem sertin Kretien inn bliye ki sa bann pratik demoniak la zot danzere. (2 Korintien 11:3, NW) Alor, ki nou kapav fer pou protez noumem? Kouma nou kapav fer sir ki nou pa pe les Satan anbet nou ar so  bann piez? Anou get de domenn kot nou kapav tom dan piez: divertisman ek tretman medikal.

15. Kouma nou bann divertisman kapav amenn nou pou gagn kontak ar bann demon?

¹⁵ Azordi, boukou fim, video, ek program televizion montre mazik, bann pouvwar sirnatirel ek bann demon. Nou trouv sa osi dan bann game, ek lor bann sit Internet. Pou boukou dimounn, sa bann divertisman-la pa vremem move. Me, zot pa realize ki zot pe les bann demon rant dan zot lavi ek ki li bien danzere. Enn dimounn kapav osi tom dan piez bann pratik demoniak, par bann kitsoz kouma oroskop, lir dan lame, bat kart, fer sakrifis pou bann mor, ouswa bann koutim kan pas lanwit. Diab kasiet danze-la kan li esey fer sa bann kitsoz-la paret atiran, interesan, ek fun. Enn dimounn kapav mem panse ki pena okenn danze pou get enn kitsoz demoniak ouswa sirnatirel tanki li pa pe fer bann pratik demoniak. Kifer li danzere pou pans koumsa?​—1 Korintien 10:12.

16. Kifer nou bizin rezet bann divertisman kot ena bann kitsoz sirnatirel?

¹⁶ Satan ek bann demon pa kapav lir dan nou lespri. Me zot kapav aprann ki bann dezir ek bann panse ki nou ena, kan zot obzerv seki nou swazir pou nou ek nou fami, mem konsernan bann divertisman. Par exanp, ena bann fim, lamizik ouswa bann liv ki koz lor longanis, bann sor, dimounn ki posede, sorsier, vanpir ouswa lezot kitsoz ki ena enn lien  ar bann demon. Si nou swazir sa bann divertisman-la, Satan ek so bann demon pou konpran ki nou anvi konn plis lor zot. Lerla, zot kapav esey anfons nou plis dan bann pratik demoniak.​—Lir Galat 6:7.

17. Kouma Satan kapav profit lor nou dezir pou ena enn bon lasante?

¹⁷ Satan kapav osi servi nou dezir pou ena enn bon lasante. Azordi, boukou pena enn bon lasante. Kitfwa ena dimounn ki’nn esey plizir tretman me sa pa’nn marse. (Mark 5:25, 26) Li kapav dezespere ek mem pre pou esey ninport ki kitsoz. Me antan ki Kretien, nou bizin fer bien atansion. Nou pa pou  swazir okenn tretman medikal ki servi enn “pouvwar mazik.”​—Izai 1:13.

18. Ki bann tretman medikal enn Kretien bizin rezete?

¹⁸ Dan Izrael lontan, sertin dimounn ti pe servi bann “pouvwar mazik.” Zeova ti dir zot: “Kan zot lev zot lame ver lesiel, mo kasiet mo lizie pou mo pa get zot. Mem si zot fer boukou lapriyer, mo pa ekoute.” (Izai 1:15) Reflesi lor la: Zeova pa pou mem ekout zot lapriyer! Nou pa anvi fer okenn kitsoz ki pou gat nou relasion ar Zeova ek anpes Li ed nou, sirtou kan nou malad. (Psom 41:3, NW) Alor nou bizin pran ransegnman lor tretman ki nou pe pans pou swiv pou gete si li ena kit lien ar bann kitsoz demoniak ouswa bann pouvwar sirnatirel. (Matie 6:13, NW) Si ena kit posibilite ki li ena enn lien, nou bizin rezet li!​—Get Not 32.

19. Kouma Diab fer bann dimounn per?

¹⁹ Alor ki sertin dimounn panse ki Diab ek bann demon pa existe, lezot kone ki zot vremem existe akoz bann lexperyans personel ki zot inn viv. Boukou dimounn viv dan laper akoz bann move lespri ek zot esklav bann siperstision. Ena lezot ki rakont bann zistwar lor bann move kitsoz ki bann demon inn fer ek sa fer dimounn per. Souvan, bann dimounn interese ar sa bann zistwar-la ek zot extra kontan rakont sa lezot. Sa bann zistwar-la souvan fer bann dimounn per Diab.

20. Kouma nou kapav fann bann mansonz Satan?

²⁰ Reflesi lor la: Satan anvi ki bann dimounn per  li. (2 Tesalonisien 2:9, 10, NW) Li enn manter ki konn inflians lespri bann dimounn ki atire par bann pratik demoniak ek fer zot krwar bann kitsoz ki pa neseserman vre. Kitfwa sa bann dimounn-la pou rakont bann zistwar ki zot panse zot inn trouve ek tande. Plis zot repet sa, plis sa bann zistwar-la vinn exazere. Nou pa anvi donn Satan koudme pou fer dimounn plis per kan nou repet sa bann kalite zistwar la.​—Zan 8:44, NW; 2 Timote 2:16, NW.

21. Olie nou rakont bann zistwar lor bann demon, lor ki kitsoz nou kapav koze?

²¹ Si enn serviter Zeova ti viv enn lexperyans ar bann demon, li pa pou repet sa zistwar-la pou diverti lezot. Fode pa bann serviter Zeova gagn per ar ninport ki kitsoz ki Diab ek so bann demon kapav fer. Okontrer, nou bizin konsantre lor Zezi ek pouvwar ki Zeova inn donn li. (Ebre 12:2, NW) Zezi pa ti diverti so bann disip avek bann zistwar lor bann demon. Li ti konsantre lor mesaz Rwayom Bondie ek “bann kitsoz extraordiner ki Bondie fer.”​—Zistwar Bann Apot 2:11, NW; Lik 8:1; Romin 1:11, 12, NW.

22. Ki to bien deside pou fer?

²² Fode pa nou bliye ki Satan so lobzektif se detrir nou relasion avek Zeova. Li pou esey fer tou pou ki sa arive. Me nou konn Diab so bann metod ek nou bien deside pou reziste kont tou kalite pratik demoniak. Nou “pa donn diab okenn sans” pou fer nou determinasion vinn feb. (Lir Efezien 4:27.) Wi, si nou reziste kont Diab, nou pa pou tom dan so bann piez ek nou pou an sekirite gras-a proteksion Zeova.​—Efezien 6:11.